Wednesday, December 10, 2014

瓜瓜::4歲 6個月


~19.3g.


108cm

食 - 差唔多
起身食咗支淡奶,
飲杯香蕉奶,食個乳酪 / cereal.
出門口食粒 Papa Jelly.
學校有茶點,
放學食八粒小小魚仔餅, 一小杯加水的蘋果汁或3.6奶,
午飯, 食通粉.
晚飯食飯.
臨瞓前要講書唔食奶,
鐘意粉麵多過飯.
至愛蘋果, 火龍果, 青提子同各式菇類.
仲有親子士多啤梨班戟.
通粉同粟米湯一齊食.
魷魚, 豆卜魚蛋.
飲茶要食飯, 食蓮蓉包(個蛋黃!).
菜淨鐘意食西蘭花,
唔鈡意食豆, 食黑色食物,
飲水同果汁.

玩 - 差唔多
都仲係鐘意玩車,
鐘意反斗車王,Planes.
鐘意紅色,
鐘意海洋公園, 科學館.
勁鐘意名古屋的鈴鹿賽車場, 梁川交通公園.

行 - 
太重, 抱住重死啦,
八成行兩成騎膊馬.

瞓 - 不變
瞓之前要講一本書,
通常都 2130 瞓到 0700。
星期六, 日通常有午睡。

阿瓜語錄
公公有四個問題
成日同我爭電視,
又爭嘢食.
成日爭第一,
睇IPAD又嘈.

瓜自己話要學嘢,
呢個學期佢日日都有加班,
珠心算,普通話, 軍鼓, 唱歌, 英文.
珠心算好難,
不過上咗兩堂之後又好高興.
瓜好鐘意學新嘢.
成日話要讀多D書,
夜晚會主動攞書出黎溫習.

瓜同我講佢唔鐘意自己, 因為佢覺得自己唔叻, 乜都唔識.
我同佢講冇人一出世就乜都識, 俾心機學就得啦. 而且你唔鐘意自己, 人地好難會鐘意你, 所以你先要愛自己.

關於佔中.
瓜國慶假期問我去邊好?
我: 不如去銅鑼灣
瓜: 唔好, 有人擲嗰D彈(催淚彈) , 好煙架, 會咳架.
又過一陣, 瓜又問去邊?
我: 不如去銅鑼灣
瓜: 唔得, 佢地霸住條馬路, 如果我地要過馬路會好麻煩架!

叫佢去婆婆度同舅父玩齒輪 (一個好似LEGO的積木遊戲.)
瓜: 唔得, 我都冇BOOK (自己屋企玩自己的玩具都要BOOK 咩?!)
我: 咁你想玩乜?
瓜: 我想玩車仔, 不過舅父話佢唔鐘意玩車仔, 佢唔會同我玩車仔.
我: 咁你地玩齒輪, 我BOOK咗
瓜: 我取消咗 (!!!)
爸: 我BOOK咗幾次
瓜: 我取消咗好多好多次.

瓜講嘢真係好誇張, 表情又誇, 舅父叫佢影帝.

我扮驚,
瓜會同我講: 我保護你.

我扮痛,
瓜會幫我騷癢, 佢話咁樣就唔痛啦.


6 歲前可行的興趣班:
3 歲暑假... 英文拼音, EQ 訓練! 音樂班.
3 歲 - 音樂+小手工班 / 軍鼓班 / 英文
4 歲 - 英文戲劇,音樂+小手工班 / 軍鼓班 / 英文, 游水, 珠心算,普通話
5 歲 - 溜冰,踢躂舞, 跳彈床, 跆拳道,畫畫, 單簧管或樂器一種
6 歲 - 魔術, 騎馬, 劍擊早餐







No comments:

Blog Widget by LinkWithin