Monday, July 22, 2013

瓜瓜::37個月


~15.5kg.


~97.5cm


早餐食包/食通粉/北菰雞飯,
下午食飯, 食通粉,
返學有茶點,
放學有雞蛋.
晚飯食飯, 食通粉,
臨瞓前食奶,
半夜臨天光可能食多次奶.
鐘意通粉多過飯.
食飯一定要有菜,
至愛士多啤梨.
唔鈡意食豆, 食黑色食物,
飲水同果汁,湯水唔啱.

玩 - 不變
都仲係鐘意玩車,
鐘意反斗車王,
鐘意紅色.
鐘意公園.

行 - 不變
肯自己行的時間多咗。
一半一半啦。
行樓梯鐘意先用左腳踏出.

瞓 - 不變
通常都 2100 瞓到 0700。
星期六日有午睡。

阿瓜語錄
佢企係條扶手梯想用手掂條扶手,
但係差少少,
瓜話:原來我都唔係好高啫!

瓜:爸爸鐘意食香口嘢,
我:即係咩呀?
瓜:係香口膠!

一日到黑都’雨天’’晴天’’陰天’,
最鈡意睇天氣報告。
瓜:有太陽又有雲仲要落雨,咁多嘢即係點呀媽媽。

你問佢叫乜名,
佢話係賽車手!

成日要講道理。
要軟功不能硬碰。

開始鐘意同小朋友玩。

可以講到今日去過邊,
茶點,午飯,晚餐食乜嘢,
飲左乜嘢,
公公婆婆去左邊,
天氣點樣,

瓜係黃昏的時間話:仲咁光嘅,個太陽仲未落哂去。
夜晚時:媽媽,個太陽去咗美國呀。
 
成日都講登登。
例如佢整咗啲新嘢,
做個新動作,
好似好勁咁。

佢行開會同我話:我好快番。

如果我想行開,
瓜話:一定要拖住,唔係一陣唔見左你

長期話自己兩歳,
兼做個V字2歲的手勢。

洗手要數到20.
我地食緊無盬無油好寡的番薯葉,
爸爸話:我唸我坐監都生存到。
瓜話:陰公囉!
 
爸爸拆開咗玩具車,
爸爸叫瓜:唔好掂, 你會整爛架,
瓜話: 唔會架, 我會保護佢架.

瓜話睇下剪完頭髮靚唔靚?
佢照住鏡話:好靚呀,直頭冇得彈呀!
用一個數白欖的方式說話:
好靚,
好靚,
好好靚!~ 
----------------------
6 歲前可行的興趣班:
3 歲 - 音樂預備班 / 英文戲劇 / 游水
呢個暑假... 英文拼音, EQ 訓練! 音樂班.
仲有游水未報喎!
4 歲 - 溜冰, 跆拳道, 畫畫, 鋼琴或鼓或單簧管或樂器一種
5 歲 - 踢躂舞, 跳彈床
6 歲 - 魔術, 騎馬, 劍擊






Saturday, July 20, 2013

瓜::故事演講比賽獎

時間過得好快,
轉眼就到瓜幼兒園畢業,
依家幼兒園都有畢業典禮!

沒有穿起畢業袍,
就是一班人上台影個相再一班人走下台已而。
然後再每人一個豬肉獎,
一班16人有6個獎每獎2人!

我唔知老師的評分準則,
獎項有清潔,操行,??, 歌唱,演講,美術。
瓜得到故事演講比賽獎,
當然佢係唔知發生乜嘢事情的情況下得獎!
但係我就好高興啦,
比起得到其他的獎項更高興。

話說早幾個月前老師派左張故事比賽紙,
叫家長教小朋友。
但係又冇寫幾時比賽?同邊個比?
我就日日係瓜耳邊講講講又教佢做動作!
都唔知佢幾時比賽咗,佢就得咗獎啦?!
至少呢個獎實在係我有教而有練習的小成果!

瓜之前都冇同我講已經係老師前講過故事,
攞左獎後問佢,
佢話老師叫佢個名就出去講囉!

佢講成點?做左D乜?真係唔知啦!
Anyway,都算係有意義的豬肉獎啦!
Blog Widget by LinkWithin