Sunday, December 30, 2012

福崗::乜都冇買

以下的事情都寫咗好耐,
但一路都埋尾囉...

---------------------------
明明以前去日本要儲定好多彈薬,
要帶子母喼,
去的時候將東西放在小喼內再放入大喼,
回程的時候就兩喼都是滿滿的。

今次去日本真係零買嘢,
唔關我帶住個仔事,
我地都行左兩日商場 outlet。

係依家lT都好齊,
定係日本款式來來去去差不多,
又或者我個衣櫃已經好爆?
不過我都轉左比較愛上網買歐洲衫,
可能係我慳家(孤寒)左呢?
樣樣都好貴咁,
冇乜嘢令我覺得一定要買。
個喼都放瓜的奶粉尿片都冇乜位。

真係估我唔到!
我去日本乜都冇買!!!!

25-28Dec::廣州

幾日廣州,
冇做過啲乜,
都係飲飲食食啦.
廣州酒家 / 南順薑汁撞奶當然就必食啦.

去咗廣州動物園,
點解唔去長隆?
瓜太細怕黑又早瞓,
唔睇大馬戲好浪費,
等佢大啲先啦.
廣州動物園平靚正交通又方便,
人仔$20入場又大又乾淨仲有好多動物!

仲去咗荔灣湖, 陳家祠,
都係好好行,
好啱一家大細閒逛,
最緊要瓜跑得開心.
-------------------------------------

去完廣州,
我地又唸下一站,
我話一定能夠自駕遊至會再同瓜去旅行,
個衰仔除咗係景點肯行一陣,
中途搭車等車轉車的時間全部要抱!
我地一個抱住成兩大包米的瓜, 一個揹尿片奶粉玩具,
仲有冬天的厚衣,
每一日都攰到七個一皮!

星星想去濟州或者布吉,
我就梗係福崗或者台灣啦!

然後星星仲話批我下年可以自己去一次旅行啦!
但依家網上購物咁方便,
反而我都唔知想去邊囉?!

Friday, December 7, 2012

生日2012

原來到左某個年紀,
特別係你身邊的同事年齡差距太大,
真係開始唔想話俾人聽你幾歲!

某日星星突然問我今年生日有乜願望。
真係冇。
我唔會好偉大的講世界和平,
又唔想講雖然都想但好行兼好新年的身體健康!
又唔想話啲超現實的發大達,
仲有控制唔到的瓜要孝順或瓜入到心儀的小學。仲要係幾年後的事。

況且本身都仲算知足,
父母高堂仍在,
暫時都仲叫父慈子孝,
朋友唔洗多但知心朋友有好幾個,
健康除左頗為容易頭痛頭暈之外都算食得瞓得,
錢又搵唔曬,
依家叫做有少少能力唔洗多加考慮就可以買到想要的東東,
一年都可以旅行幾次,
如果咁都唔夠的話個天都劈我啦!

唔貪心,
能夠將以上知足的事持續落去就夠了。

Thursday, November 29, 2012

瓜瓜::30個月


~14kg.


~92cm


早餐食包/食通粉,
下午食飯, 食通粉,
返學有茶點,
晚飯食飯,
臨瞓前最好食奶,
半夜臨天光可能食多次奶.


都仲係鐘意玩車,
鐘意科學館多過海洋公園.


好多時都唔肯自己行,
樓梯,斜路比較吸引。


通常都 1915 瞓到 0700。
冇午睡。

阿瓜語錄
- 會飽同肚餓
- 每一樣嘢都問咩黎架?邊個架?
- 教佢唱小小姑娘,由冇乜聽過到可以獨唱只需兩日
- 開始識睇卡通片,除左反斗車王,功夫熊貓,冰河世紀都好喜愛。
- 分到你我他
--------------
鐘意講: 好得意,忘記左,攪錯左, 好興奮。
我想食咩嘢呢?我想去邊呢?
--------------
最愛的答案: 唔記得!
--------------
瓜自己醒咗,我地兩個仲想瞓。
瓜同我講:唔好瞓啦,會好飽架
然後又同爸爸講:唔好瞓啦,你肚餓啦,去整嘢食啦
--------------
瓜:唔要你,唔要爸爸。
我:唔可以唔要爸爸架,冇禮貌。
瓜同爸爸講:你去食飯啦。你肚餓啦。(暗示爸爸可以離開佢視線範圍。)
--------------
我:媽媽最錫邊個?
瓜:BB
我:咁爸爸最錫邊個?
瓜:媽媽
我:爸爸最錫BB嘛?
瓜:媽媽最錫BB嘛,咁爸爸就最錫媽媽囉!
So sweeetttt...
--------------
瓜食緊kit kat ,
爸爸問佢俾爸爸食得唔得,
瓜話俾媽媽食,
佢同我講,你咬一啖好啦,留番啲俾我呀!
--------------
瓜: 好大風呀,點出街呀?
--------------
瓜: 無端端落雨嘅。
--------------
我:媽媽最錫邊個?
瓜:臭Be
我:係囉,媽媽最錫臭Be囉。
瓜:媽媽,我咁臭你都錫我架?
--------------
公公:邊個似加菲貓?
瓜:姑媽。
公公:姑媽似邊個?
瓜:加菲貓
瓜好高興的講咗幾日。
直到有一日。
公公:唔可以話姑媽似加菲貓架,佢會打你 pat pat 架。
公公:邊個似加菲貓?
瓜:冇人。
公公:姑媽似邊個?
瓜:冇嘢。
--------------------------------------
6 歲前可行的興趣班:
2.5 歲 - 音樂預備班 / 英文戲劇  (夠歲啦, 不過尚未有上其他興趣班的可能.)
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Thursday, November 22, 2012

皮婚Leather Wedding

我很幸福.
結婚三年,
感覺還是有的,
選擇仍是對的,
很好.
-------------------------------

咁就三年啦,
有了小孩的日子過得特別快。
想下筆很久,
但上班以外,不用湊仔的時間我只想休息,
那怕只係坐係梳仔發呆望住無聊的電視節目。

慶幸三年過去仍然感覺幸福,
雖然有時也為雞毛皮的事情少吵,
不過日子都算樂也融融吧。

今年完全沒有慶祝,
連蛋糕也沒一個,
但也適合冷淡淡的你與我。

來年也請你多多包涵,
感謝你。

Thursday, November 15, 2012

報讀幼稚園

又到面試的時候,
終於明白點解咁多家長鐘意一條龍校,
因為考學校真係好煩!

先要選定心意的學校s,
對,有s,
個個家長都報十間八間,
冇法子,
有啲唔係個個報名的都見,
有時撞期,
有時小朋友心情唔好,
更不幸的病左,
好多不明朗因素!
然後要留意報名日期,
有啲9月,有啲下年1月,
之後排隊攞表交表,
有啲學校只限兩日收表,排勁長龍!
日日就返屋企開信箱,
好不容易有個面試的機會,
老闆又玩嘢,
專登唔聽話攪攪震!
大佬,
個個坐定定,
你就死都唔肯埋位,
你阿媽真係極樣衰,
好明顯教子無方,唉!
之後又再等奇蹟出現係個信箱度。。。

好彩有得原校直升,
如果唔係都幾擔心!
如果年年都考一次,
我真係俾埋條命你啦。

Saturday, November 3, 2012

瓜瓜::29月


~13.7kg.


~91cm


早餐食包/食通粉,
下午食飯, 食通粉,
返學有茶點,
晚飯食飯,
臨瞓前最好食奶,
半夜臨天光可能食多次奶.


都仲係鐘意玩車,
最愛巴士, 火車。


好多時都自己行,
樓梯,斜路比較吸引。
會扮蟹行,蝦行,雞行,兔仔跳,馬行。


通常都 1930 瞓到 0630。
冇午睡。
 
 阿瓜語錄-返到屋企要婆婆,係婆婆度要媽媽,公公出街就搵公公
-口頭禪係 '好驚' , 乜都好驚!
-識得分’你’,’我’,’佢’
-會同我講呢樣冇見過,好難講,唔知道
-叫佢返學佢話搵媽媽!
-識得用’因為’,’所以’,’或者’
-公公話搭扶手梯係笨,搭電梯聰明,最鐘意睇下媽媽係咪笨
-成日要講故事
-教佢 See you tomorrow,佢話 see you tomorning,或者 see to tomo 公, see you tomo 媽,see you tomo 老師!
-講嘢好多尾音,呀,喎,呢
-自從某次病完之後成日要一齊瞓
-爸爸問: BB 係肥仔定瘦仔呀?  瓜: 係鵪鶉蛋仔呀!
-問佢嘢佢答:一定係, 可能係.
-改詞專家, 叫佢唱歌,佢成日唱媽媽同公公同爸爸.
-好識冧人,成日叫人:唔好咁小氣啦,我掛住你,我鈡意你
-一日到黑要吉之島/玩具反斗城/公園
-所有衫要揀紅色系!

--------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Sunday, October 21, 2012

日本福崗::26-30Oct2012

有一日我同星星講公司要清假,
唔知點樣講吓講吓就話去旅行,
然後講吓講吓同佢家姐姐夫一齊去,
講吓講吓想去北海道,
講吓講吓冇咁長假,
講吓講吓不如去福崗,
講吓講吓睇吓有冇好玩,
講吓講吓睇吓酒店靚唔靚,

就係咁講吓講吓,
禮拜五就飛啦.

雖然帶住隻瓜去旅行仲攰過返工,
又冇乜得行街買嘢,
食嘢又滾水淥腳.
不過我地都係帶埋佢去.

其實福崗好啱小朋友去,
可以自駕遊得黎地方距離唔太遠,
大量果園, 農場, 海豚, 小朋友火車,
大人又有宮崎牛, 博多拉麵, 火山, 溫泉仲有兩個 Outlet!
價錢同台灣沒有差太遠啦!

由於我一個人決定所以行程,
但係又要令其他團友都知道有乜嘢玩,
我睇咗勁多網頁做咗30+版的旅遊資訊!

日本, 好高興今年見到你兩次呀!!!!!


Wednesday, October 10, 2012

一點心情

很久沒有更新部落格,
這應該是件好事吧,
因為我每天過得充實得沒有時間胡思亂想兼筆耕。

很高興瓜很愛黏著我,
雖然黏得連沖涼也瓜瓜嘈,
但仍很享受跟他一同玩耍的時間。

工作環境很快活,
又有一定的工作量,
做兩做又夠鐘收工啦。

假日帶瓜周圍去學習新地方,新事物。
仲要做功課,做家務,網購。

總之時間就火箭咁快!
有空閒都瞓下先!

好享受依家的生活,
睡前回想每一天的感覺都好幸福,
多謝你給我一個溫暖的家。

Saturday, October 6, 2012

瓜瓜::28月


~13.4kg.


~90cm


早餐食飽,
下午食飯, 食通粉,
返學有茶點,
晚飯食飯,
臨瞓前最好食奶,
半夜可能再食兩次奶.


都仲係鐘意玩車,
最愛巴士, 火車.


好多時都自己行,
樓梯, 斜路比較吸引.


通常都 1930 瞓到 0600.
但係就會醒好幾次飲奶.


8號 突然唱哂所有兒歌的歌詞
之後仲會自己作詞,
會自己譜曲,
跟講嘢發音都好準確.

阿瓜語錄
- 無端端會講啲佢明啲又明啲的詞: 好慘! 懶懶蛇!
- 乜都識講,乜都識聽,溝通完全冇問題
- 自己作句: happy happy 瞓覺覺!
- 一句說話有齊時間地點人物動作: 下個星期同爸爸媽媽一齊去嫲嫲屋企玩火車!
- 大部分的生字都講英文,見你唔明佢就講中文, 中英轉換非常清楚.
- 自己組合字: Moon 餅 (月餅), Two-teen (12)
- 會講故事, 開始的時候會講: 從前...
- 會一劃一劃的填色,不再是鬼畫符
- 好清晰的要求, 即係好多要求.
- 超貪靚, 要自己揀衫, 仲要揀埋人地的衫褲鞋襪!
- 超誇張, 所有事情都有個 '好' 字! 仲要加重音! 好靚呀, 好好味呀, 好得意, 好舒服!
- 會比較其他人,自己個婆婆靚啲!
- 唔想要爸爸的時候就話: 好大個爸爸阻住晒
- 公公話打乞嚏的叫: 乞嚏怪平, 媽媽話係: 乞嚏大魔王, 瓜將佢地加埋叫: 乞嚏怪魔
- 將全家改名: 爸爸係: 陳爸, 媽媽係: 陳媽, 瓜自己係: 陳B
- 多多藉口: 叫佢食飯/ 換片/ 執嘢, 佢會話: 玩緊車! 食緊嘢! 飲緊水! 睇緊MOON!!!
- 成日黏住媽媽, 媽媽零空間... 總之一定要黏住個大人.
媽媽係度,冇有驚!

--------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Monday, September 17, 2012

瓜::上學兩星期

頭三曰一個人返學,
除左到放學見到婆婆的時候會眼紅紅扁扁咀,
第二日問佢都仲係想返學,
似乎返學都不是問題,
媽說可能放學前已經安撫左佢地,
叫佢地坐定有家長接。

不過成個星期半夜都會無端端喊話要婆婆,
唔知關唔關返學事?

一個星期後,
班主任打俾我,
問佢係屋企食嘢點?
佢話係學校食三文活,
我話佢一定食左火腿唔食包,
老師話係,仲借D意整左個包落地,
然後老師話唔得,俾塊新的要食哂佢!
咁佢就食得好慢。
另外就唔肯去廁所,
好抗拒要慢慢教,
仲話瓜坐唔定,唔坐得耐。
大小肌肉遊戲都肯玩,
其他都冇乜嘢。

咁都好好啦,仲想點?

我每一曰都問瓜。
鐘唔鐘意返學?
返學有乜嘢玩?
食咗乜嘢茶點?
學咗乜嘢?

終於佢兩個星期後會同我講,
食左三文治sandwich
我知學校冇教英文,
佢可以自己聯想番個腦入面的生字!

隔多一日,
佢突然記得學校學咗乜嘢!
有句子加動作!
攞個拳頭dup dup dup,
攞對手手拍拍拍,
攞個咀仔 muah muah muah!
問佢邊個教?
佢話吳老師教!

返學學多好多嘢!
講嘢都實在好多!
係暫時未調教到睡眠時間,
攪到我好眼瞓。。。
Zzzzzz

Wednesday, September 5, 2012

瓜::試學4日

瓜上的這所幼兒園,
給小童4天的適應期,
每日一小時,
頭兩天需家長陪同,
後兩天就開始自力更新。

頭兩天都係由我做侍讀,
瓜的反應好好,
好乖的坐定定,
不過都未有太留心老師的說話。
但係比較下,
瓜就變成好學生啦。
至少不用抱,不用奶咀,
可乖乖做手工,自行進食,可自行用杯飲水,冇奇怪要求。

第三日就開始婆婆接送,
佢入左課室之後,
婆婆借意出左黎佢都冇喊。
全程都冇事直至佢放學再見番婆婆就喊啦。

第四日一到達老師已經唔俾入門口的抱走瓜啦。
所以都唔知佢有冇喊,
到放學佢已經坐定定的等待著,
可能已經講定叫佢地乖,有屋企人接啦,
一樣的見到婆婆就扁扁咀。

我每天都會問佢要唔要返學?
鐘唔鐘意返學?
返學做左乜?食左乜?
頭三日瓜的意見都好正面。好鐘意返學!
之但係過左第四日佢就話唔鐘意,返學冇玩具玩!

第五日開始正式每日三個鐘啦,
又睇吓點啦.

Sunday, September 2, 2012

瓜瓜::27月


~13.2kg.


~89.5cm


不變的兩-三餐飯,
臨瞓前最好食少少嘢,
唔夠飽半夜唔又會食奶,
一日兩至三支奶,
食得飽就睡前就飲水.


都仲係鐘意玩車,
一切關於車都OK.
之後係熊貓.


依家好乖,
有七成的時間都係自己行足全程,
除非我趕時間.


通常都 2230 瞓到 0800.
但係另一個問題就係經常濕床!


16 號 能唱有字的歌, 唱到7 成的abc song
要重複佢講過的說話, 因為咁佢至肯定你明白佢講乜!
識得分左, 右.

阿瓜語錄
超愛食乳酪 -- 士啤啤yoghurt / yoghurt blue
乜都要BB自己做 -- BB 呀!
唔想答或者唔識答-- 就講 '怕醜'

阿瓜怪行
鐘意一個講外星文的遊戲,
二人用外星文交談仲要有表情!
好似交談中....

同公公玩的遊戲: 飛被,瞓被,冚被,好舒服,醒,錫公公
--------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊



Wednesday, August 29, 2012

瓜::上學去

瓜明天開學了,
當個全職學生了.

我好緊張,
緊張過自己開學,
好多通告/ 資料要填,
好驚掛一漏萬.

又驚佢聽日唔肯著校服,
(佢平日的衫褲鞋襪都要自己揀.)
其實都唔洗驚,
佢一定唔著.
雖然我已經專登手縫咗巴士圖案落件校服度.
(呢個都想分開寫, 但又懶.)

又驚佢乜都唔識,
連用飲管都唔識,
點食茶點?

驚之後佢自己一個人返學,
對住啲陌生的老師點算?

轉個頭又要去準備報考幼稚園啦,
問你死未?




Tuesday, August 21, 2012

返學鞋::Thomas&Friends

瓜對於試鞋非常抗拒,
加上返學鞋得黑同白,
好難討喜愛紅色同花呢碌碌的佢歡喜。

之前已經同瓜做咗好多心理輔導,
到出發買之前佢都死口唔要!
完全唔接受新事物。

幸好,一去到吉之島就見到湯馬仕皮鞋,
佢一見到已經乖乖穿上!
仲試晒兩隻款俾我地揀!
會員價HK$250。

成件事就係有個湯馬仕印條,
鞋踭有個壓花,
同唔關事的紙盒!
不過隻皮都靚少少架。

雖然係比正常的貴少少,
但佢肯著俾多少少都冇法子啦。。。
都好嘅,
依家未返學都成日叫住要著囉。

仲有運動日的白鞋,
如果佢到時唔肯著總監送的Adidas,
就唯有買多對湯馬仕啦。。。


Sunday, August 19, 2012

TayoBus::帳篷+櫃筒

瓜鐘意車類的卡通片,
韓國的 Tayo Bus 係佢早期 YouTube 的至愛,
不過因為韓文的關係慢慢就少睇左,
不過依家係婆婆度有NOW都有得睇啦!
我覺得佢比湯馬仕火車頭靚好多同少見啲.

咁既然少見,係邊樹買呢?
第一時間想到我網上至愛的淘寶,
睇中咗個櫃筒.
但好幾家店都係指明韓國代購,
咁我不如自己直接係韓國買?!
內地有淘寶,
韓國都有 gmarket!
Tayo Bus 韓文係 타요.
櫃筒就想買左好耐俾瓜放玩具但冇見到一個心儀,
心唸再冇就宜家傢俬是但買個就算,
但係咁就好冇性格囉!
家吓櫃筒有個巴士樣即刻唔同晒,
型咗好多囉,
然後隻黃色又醒神!
505mm x 400mm x 710mm
(本身都有藍色選擇, 但黃色開心啲.)

之後我發現咗巴士帳篷好有趣,
小朋友有個小天地~



原來只係俾星星睇吓,
點知佢話買喎!
我仲覺得貴時佢話個工具部都咁上下錢啦。
又好似好啱咁喎。。。
但這兩件東東的賣家都不設全球付運,
唯有找代購公司,
找了好幾家,
兩個業餘的店家給我的回覆係gmarket的店舖不作全球貨運,
點先? gmarket有英文版,佢肯寄外國我就直接購買唔使搵你俾$你賺!
幸好都仲有兩家專業的覆我,
要俾多10-15% 啦,
最後係呢間 KoreanBidBuy 度買,
價錢平啲, 效率又高.

 新玩意用盡個飯廳!


見到個巴士樣都開心!

打開真係原架巴士樣!
好細緻.
要收埋都好方便,
好似汽車用嗰啲防曬貼,
擰番圓形放番落袋唔佔地方架.
不過同時因為係幼鐵線兼方便收藏,
所以十分唔穩固,
星星用咗好多心機加針線鈎住隔離個 PlayPen 架.


成套玩意有帳篷,
有個叮叮,  叮叮有齊Tayo 的歌曲,
藍色收納袋,
同三張車票.


裡面都好有誠意!
車頭有司機位, 車尾有地圖!
車尾的設計係可作波波池.


仲順手訂咗本畫畫書,
Doodle Book 用水就可以變畫啦,
橫豎都訂開囉 :D

















自從有咗呢架大巴士,
瓜出咗街之後都好想返屋企啦!

瓜,有冇覺得你真幸福呢?
希望你有個細佬妹或者大個時又都仲記得我地係好愛你架!


Sunday, August 12, 2012

丹霞山::3-5Aug

旅行三日,
三日都落雨。
落大雨加四面八方的大風,
十級狼狽!
雖然去的地方幾多。
但沒有見到我估計可能見到的特色,
不過一家人齊齊整整的旅行去已經很高興!
Day1 香港 l 福田 l 東莞 l 韶關
Day2 丹霞山 l 珠璣古巷 l 風度中心
Day3 南華寺 l 十九涌 l 長江水庫

丹霞山沒有比桂林靚,
落雨能見度低,
驚天雨路滑,
只遊了個船河,食個午飯,
淨係記得張門票二百多好貴!
珠璣古巷係一個百家姓的主題公園,
非常適合外國華僑尋根之旅!
但我明明知道鄉下故居係邊 :P
有各姓的故居同祠堂,
到此一遊都還可以。

南華寺係千年古寺,
又唔覺得比其他寺廟特別得多?

十九涌係百萬葵園隔離,
一條漁港/海鮮/海味什貨的街道,
好有特色,
可惜行咗唔夠五分鐘突然下勁大雨!

去長江水庫係為咗餐魚鍋,
雖然不大是我的口味,
但實在為旅程劃上完美的句號.

Saturday, August 11, 2012

我和秋天有個約會

生咗仔之後同呢個世界有點脫節,
以前我可是什麼CD也下載一番係地鐵聽架!
出街活動的次數也比以前少了很多,
星星很想每天都陪住阿瓜呢!
我就... 都想久唔久俾啲私人空間休息下啦 :P
所以不能好似以前咁濫,
只可以揀啲真係極想睇的至買飛囉.


電影可以下載,
唔係想睇3D都等二輪啦.
但係演唱會舞台劇都係睇現場架麻.

張敬軒的軒動心弦演唱會2010
我可是大住個肚去聽的演唱會呢!
雖然慢歌較多所以有啲悶,
可以他的LIVE唱曲的感染力好大, 好感動呢!

呢個係我和春天有個約會的下集,
'春天' 我冇現場睇,
不過電視播過N次.
今次真係完全為咗張敬軒.

演出不過不失啦,
個故事好正路,
然後好多老歌囉,
呢啲非常通俗的劇目都唔會有乜期望,
有啲時候都有小悶,
但係我仍然覺得軒仔的現場唱得實在好!


Thursday, July 26, 2012

瓜瓜::26mths


~13kg.


~87.5cm

不變的兩-三餐飯,
半夜唔食奶,
一日兩至三支奶,
食得飽就睡前就飲水.


都仲係鐘意玩車, 依家加上整車!!
之後係熊貓,
又忽然愛砌圖.


最鐘意係地鐵車箱入面行,
斜路, 樓梯都唔會放過.


通常都 2230 瞓到 0800.

3號 識叫姑媽同爸爸個名
4號 識叫自己同嫲嫲個名
5號 識叫媽媽個名
21號 識講自己名,突然自己改自己做陳B (低音嗰隻)

阿瓜語錄
食飯唔肯坐定的時候 --> 揸車食雞!
食營養品 --> 揸車食cow! (個樽有牛公仔.)
入房要爸爸 --> 坐爸爸身睇ipad!
同媽媽玩的遊戲 --> 行媽媽身! (真係瞓係床佢係你個身上面行!) / 捐媽媽櫈
睇自己食飯沖涼揸車唱歌打鼓 --> BB 睇 BB
搭𨋢 --> 搭乜
要同唔要都不停重覆直至你輸 --> 玩呀,街呀,唔返企呀,抱呀,唔好呀,唔要呀,自己呀,唔返企食飯
每日必有的要求 --> 爸爸BB媽媽搭小巴去ocean park揸電車/ 睇魔魔
每日必做 --> 去買餸買舊fish
自己發明成日講但又唔知係乜 --> 波波dum
所有東西都有屬於某人 --> 呢個爸爸袋, 嗰對BB鞋.
想出街 --> 去街市買餸
想返企 --> 返屋企玩巴士
黃昏的時候 --> sun 落山, moon 出黎呀
識得數一至二十-- > 但係中文會跳咗個6,英文冇左five
要爸爸整車 --> 爸爸坐白色咕𠱸,紅色BB坐
動物園有乜嘢呀?  --> horse , cow, pig , 雞!
自己想食蛋糕 --> 媽媽整蛋糕BB食
我講電話:  平時又唔見佢無端端叫我,一講電話佢就係旁邊好溫柔的 '媽媽' '媽媽'!
唔識用個我呀,用 'BB' 或者 '自己'
唔識用你字,會講 '佢'
想你同佢玩砌圖--> 係box攞呢個砌圖俾媽媽

阿瓜怪行
食營養品又要攞車 -->  明明係廚房門口都要搵番架車揸過黎, 間屋好大咩?
扮鼻塞! 扮怕醜! 扮瞓覺! 直頭係做戲的朋友
----------
我: 有冇 BB 要搵爸爸?
瓜: (指住我.) 佢呀!
----------
我: 媽媽去沖涼。
瓜: 唔愛沖。
我: 除左衫喎。
瓜: 要著衫。
----------
星: 爸爸去沖涼。
瓜: 唔愛沖
星: 爸爸肚疴。
瓜: 嗯,得。
-----------
瓜: 唔出街呀!
我: 點解唔出街呀?
瓜: 曬呀!
我: 點個教BB曬唔出街架?
瓜: BB!
----------
我: 邊個地鐡站紅色架?
瓜: 太古。
我: 仲有太子係咪?
瓜: 太媽媽,太爸爸,太BB!
-----------
我: 有冇雲呀?
瓜: 有雲,大舊雲!
----------
瓜: 山
我: 係咪山呀?
瓜: 生
我: 生?
瓜: 聲
我: 有乜嘢聲呀?
瓜: 太陽呀!
我: 哦,sun!
--------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊 27號 噴水池

Wednesday, July 25, 2012

明和電機::熊貓笛

瓜鐘情熊貓,
所以見到啲熊貓樣的益智奇怪嘢都忍唔住手買少少。。。
係Citys' super 見到呢個明和電機出品的熊貓笛 (HKD158),
又唔覺意的敗一個。。。
好似可以練下吹氣,練下手指,學下不同聲音,呢樣嗰樣。。。
係咪好好呢?
其實買個玩具駛唔駛咁多藉口?


瓜見到支笛的時候好興奮,
係咁話: 開呀!開呀!
我就開出黎做個示範。

但係當瓜發現支笛能夠咧咀而笑佢已經驚到退後,
然後我再吹一下低沈的聲音,
佢立刻叫: 收埋!收埋呀!

熊貓笛依家沈睡係櫃筒中。。。

人地明和電機個官方介紹明明好得意架麻。。。

Monday, July 23, 2012

8號風球

有個仔的好處乛
返緊工打風即走都唔會俾人白眼!
並且會叫你即刻走!!

Thursday, July 19, 2012

天灸@三伏天2012

終於有機會又約到做天灸啦,
好興奮!  (係咪傻架?...)
想試好幾年但有咗坐月湊仔, (有咁忙咩?),
終於成功做咗第一服~

去咗東華三院的中醫部,
感覺專業啲吖麻!
而且價錢都便宜一點,
$150 一次,
逐次收費。
2012年度冬病夏治-天灸療法定於2012年7月18日(星期三)、7月27日(星期五)、8月7日(星期二)。

流水式作業,
先登記,
䕶士量血壓,
問到疹原因,
再見中醫師,
把脈問症,
寫低你應貼的穴位,
最後有實習?中醫將藥貼好。

我天炙的原因係想治手腳冰冷,
所以除左貼頸背下那些呼吸道的穴位外,
醫師說應貼內膝下的穴,
但穿了牛仔褲太貼唔方便,
改貼了兩個在肚臍下方。
貼兩至四個鐘後自行除去即可。

貼左的感覺係冇感覺,
那貼藥的本身好小,
係無名指指甲的大小,
然後用白色強力膠布貼穩,
至多都係覺得有塊膠布囉,
不熱不癢不痛。

四個鐘頭後叫星星幫我除下就痛啦,
佢好有快感的一嘢撕下膠布,
我就好似做wax被脫毛的感覺!

結果!
表皮有非常輕微的灼傷咁,
有少少紅同沖熱水有啲痛,
第二日就冇事啦.
同埋夜晚好好瞓!

Wednesday, July 18, 2012

蕃茄蛋通心粉

星星抄人星座冰室的茄蛋通加蘆荀。

Tuesday, July 17, 2012

漣漪

自從返工之後很小作文,
以前一日寫三篇,
家下半個月至寫三篇!!

一來寫文的時間大幅減少,
二來有時間我都想瞓吓, 打吓機,
(呢期極端上癮 Pocket Plane!)
三來心情沒有太大起伏要傾訴,
四來購了物也不敢太張揚免得星星發現太大洗! :P

關於工作:
很久也沒有像現在這樣的喜歡工作,
工作的事情樣樣都上心,
同事也一團和氣,
暫時除了人工比以前少一截之外就沒有太大的缺點了.
準時收工準時放工冇壓力,
有老公有仔湊的師奶就係要咁啫?!

關於家庭:
跟星星找到一個大家可以接受的生活軌跡,
個個禮拜都做著差可不多的事情.
是沒有什麼新奇又刺激可言,
但簡單溫馨,
這何嘗不是一種幸福?

關於自身:
有了家室作了一年的師奶的我很難淨想自己,
做任何一件事情之前都要三思,
煮呢個餸個仔食唔食?
買呢件衫抱仔會唔會走光?
要出街的話邊個煮飯湊仔?
搭巴士個仔會唔會唔瞓覺?
放假同個仔可以去邊?
總之依家就好耐性好心機高EQ兼凡事唸定十萬個補救方法!
愛好自由的我好似脫胎換骨!

一口氣的打打打.
比起之前真係想寫的說話少咗好多.
寫完之後想唱番首陳百強! :-



生活靜靜似是湖水 全為你泛起生氣
全為你泛起了漣漪 歡笑全為你起

生活淡淡似是流水
全因為你變出千般美
全因為你變出百樣喜
留下歡欣的印記

植物亦似歌 那感覺像詩
甜蜜是眼中的癡癡意
做夢也記起 這一串日子
幻想得到的優美
....

Monday, July 16, 2012

旅行

飯局間說起旅行,
好友A說: 八月去台灣.
好友B說: 九月去韓國.
好友C說: 八月去日本.
好友D也說: 八月去日本.
好友E 從韓國回來沒多久...

我也怪不好意思的說: 八月也去... 丹.霞..山.... (滴汗...)

點呢?
幾時至到我飛呢??....

Wednesday, July 11, 2012

生活點滴

每晚食飯時跟他說起工作時的種種,
很像兒時放學回家跟父母滙報各同學的活動一樣。

很喜歡有人聽我說話。
可能講完佢唔記得,
可能同時佢食緊飯夾緊餸睇緊新聞,
但佢讓我知道佢亦同時聆聽我的日常工作,
這樣已經很好。

Monday, July 2, 2012

ShoppingAtBarney's::JasMB+BottegaVeneta

早排歡天喜地的係黎小姐的網站訂了一個Jas MB 斜揹袋,
點知五月訂的貨要八月中至有實物!!
你挑起咗我條根又等極都未有~
個心真係七上八下!
仲要又唔係賣得平。。。
不過算啦,那個款係其他網站搵唔到。(自我安慰中。。。)

的而且確我係需要一個輕的斜揹袋,
就繼續上網找尋另一款的 Jas MB!
(家下個菇時有啲重,雖然個間格幾好,但係再抱住隻瓜就有啲吃力。。。)
係我鍥而不捨的努力下係 Barney's New York 見到白色馬尾毛的 Mini Wings Traveller Bag,
馬毛好精緻囉,
原價US$385,
減至US$149,
不過千元的包包,
啱啱遇著剛剛的 free shipping!
平時郵費大約要US$35!
好似又平多幾百。。。
忍唔住又買了。
之後見過一個橙色皮版US$169,
但個人都係喜歡白色的東東。
而且我覺得馬毛都唔係好冬天啫。


第二日。。。
突然又出現咗一對之前試過但猶豫不決的 BottegaVeneta pointed toe flat!!
仲係鞋櫃必備的黑色,
原價US$495,
減至$239,
兼要得番我著的那個碼!
Barney's New York 一定係正貨先啦,
亦係免郵 promotion 中。
真係唸唔到一個唔買的理由!?
平時買貴嘢都會俾星初步評審,
但係今次都決定買左先!
如果咁都唔買真係會後悔一年兼以後唔再買BV!


收左錢慢吞吞的三日後至寄出,
幸好用DHL,
多兩日就到啦。

雖然即變窮人,
但買到平貨歡喜咗幾日!!
收到貨後極啱心水,
然後高興又持續幾日,
剛收到信用卡單浄係見個袋條數,
對鞋歸落下個月至俾$,
結果仲可以開心多成個月!!!
浄係買開心都抵咗啦!
抵! 抵!! 抵!!!

Tuesday, June 26, 2012

瓜瓜::25mths


~12.8kg.


~??cm


不變的兩-三餐飯,
半夜好少食奶,
一日兩至三支奶,
食得飽就午睡前唔洗飲.


都仲係鐘意玩車, 依家加上整車!!
之後係熊貓,
突然愛上搖木馬.


健步如飛! 但要有興趣的圬地方至肯行.


通常都 2200 瞓到 0730.


28號 Brown 班/ owl owl / purple purple / iPad ipad
31號 叉燒包 / 謝謝
2號 white tee / 嫲嫲 / hot air balloon --> ho ai boom / strawberry ??? / cable car --> pa-ple car / eagle
3號 眼鏡 --> 眼驚/ 小巴 / Ambulance
4號 舅父 --> 呼
5號 tractor ta-tor / racing car --> sing sing car / 唔該 --> 華街 --> 埋雞/ 走呀
7號 爸坐 / 爸走 / 爸食 /爸砌
8號 車 車
9號 正經的叫媽媽/ 跑車 國語 / jet / Porsche / tow truck
11號 泊車 / 姑丈 / 娟山洞 / one / two
12號 揸車
13號 壞車 / 沙灘
14號 飛 / 北角 / 太古 / 開 / 美孚
15號 bicycle / 山 /mountain / 屋企--> 企 / 去街
16號 識叫自己做BB / 電鑽
18號 airplane --> ai平 / 去碼頭搭船 /fish
好大架船
19號 斜啤 / school / 舅父 / 舅母
20號 tram --> train / 電車 /鉗 --> 閣閣 / sun / / shark
24號 ocean park / octopus
25號 買餸 / earth / 顏色筆 / 畫畫-->娃娃 / 火車.....
--> 邊度有船? 海--> 邊度搭船? 碼頭--> 邊度有碼頭? 灣仔
識得分大細。
識得太多, 不能盡錄!-------------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Wednesday, June 20, 2012

Tuesday, June 12, 2012

蒸的做麵包

作為主婦最高興係煮的食物老公會全部食哂,
作為媽媽最歡喜係專登為個仔煮一樣佢喜愛的食物。


蒸的做麵包,
說穿了就是蒸蛋糕.
用麵包機整出黎比較大個,
好多時都食唔哂,
蒸的話份量自己決定,
一次蒸六小個,
一人兩個一次食哂仲好。

是 '幸福麵包機' 同一個作者的著作,
很簡單的食譜。
為咗呢個蛋糕包,
買下靚食材仲有靚器具,
呢個 Le Creuset 紅色矽膠兜係瓜選的!

第一次整已經大成功!!
三個原味,
三個加了少少果占作測試,那些望落去水水的東東就係果占。
下次可以試下芝士,乾果,雪櫃內的剩餘物資。

Saturday, June 9, 2012

Tuesday, June 5, 2012

Monday, June 4, 2012

Train+Airplane


以前我的夢係俾老闆捽數,
依家夢係瓜入唔到那間名校,仲要我走去求個校長收佢!
自己讀書的時候都未試過!
都係睇少啲留言區啦。。。

Saturday, June 2, 2012

Monday, May 28, 2012

Easiyo

世界變啦,
又是廚具部同童裝部的東東,
我的女裝部呢?

又一件廚房用品,
我知唔係新產品,
但我師奶年資尚淺,
呢啲簡單DlY小器材都還是很有新意。

喜歡它有無糖的選擇,
喜歡它只是粉加水放一晚就有得食,
瓜也愛乳酪。
乳酪的益處也無需多講。

這個做出來的乳酪較杰身,
瓜可以一羹一羹的食,
乾淨啲唔會變烏嘴豬!

價錢沒有很便宜,
這塑膠器皿就已經$248,
每包整到一公升的粉又$50一$70。
不過紐西闌貨,
有益健康冇防腐劑就算啦。

Saturday, May 26, 2012

瓜瓜::2歲


~12.5kg.


~??cm


兩-三餐飯,
半夜好少食奶,
一日兩至三支奶,
食得飽就午睡前唔洗飲.


都仲係鐘意玩車!!
之後係熊貓,
仲有熊仔.


健步如飛!


通常都 2200 瞓到 0730.


27號 bye bye / panda 係pan-tan (不過好多就只叫 pan) / 會講字母m / b / c 基本中認得所有字母,慢慢識講/ 又認得1一10 / tree / go train
28號 字母 n / 姑媽叫 gu
29號 key / stop train
30號 狗 / bridge 係 bird-ch / cat 係 ti-t
3號 snake 就咁sss / boat 好準 boa-t
4號 red 又好重的 d 音 / blue 冇 l 音 - bue
6號 pig 又有好重的 g 音
10號 '呢架' '嗰架' 的組合, 會講 '抱'
11號 排排坐
12號 早晨係 'so一son' /雞變左基 / airplane 好懶的叫 a
13號 pink / apple 都好準
14號 eight 冇t音- eig
17 號six 冇x音- sic / where is 組合 (where is - 顏色 - 物件) / 蟹係hi / green 係堅
18號 bear bea-r
19號 1-2 之後係3- 4- 5
最長講到的句子: All through the town / Where is black car? /排排坐 XX果
20號 排排CAR/ 排排TRAIN ,排排係一個組合... ROW ROW ROW YOUR BOAT / STOP
Chu Chu Chu tr-ain / wheel - wow
21號 7- 8-9
23號 鐘意講嘢唔出聲淨係用氣好似去咗圖書館!
24號 10
26號 school bus gu bus / bird bird/ 問佢得唔得?會答: 得 / circle


- 唔鐘意答就發個 t 音
- 唔想見的人或事就囂張的拜拜
- 問佢幾多歲? 佢會答: TWO!
-------------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Friday, May 25, 2012

麵包布丁

次次整麵包都一大個,
因為冇防腐劑又放唔得多過兩日,
要想下除咗淨食有冇其他出路。

試整麵包布丁,
好簡單的加奶加糖加蛋同蘋果。
至少有啲新意,
今次加落又唔成功的朱古力包,
賣相唔太好但係幾好食!

Monday, May 21, 2012

真的要再去檳城嗎?

那些榴槤很吸引啊...
-------------------------------------------------------
快來臨的六月,是一個重要月份,比起飛往異地整容更迫切,必須要飛一趟馬來西亞檳城。來到這裏,身為老饕的你必定會心微笑。無錯!又是榴槤飄香的時節,想起榴槤味道多變,有先甘後甜、甜而不膩,更有軟滑如雪糕。來吧!跟我一起到檳城朝聖!

記者、攝影:姜穎妍
模特兒: Ruby
鳴謝: EGL Tours、馬來西亞旅遊促進局、東寰假期
 

人生榴槤驚為天人

當日龍哥介紹了六個特色靚榴槤,拚命狂吃了10多件後,真的驚為天人!以我的認知,泰國榴槤向來只有甜味,吃過馬拉榴槤,才知道榴槤跟人生一樣,一味的甜並不精采,要有甘有甜,才使人永遠難忘。
貴咗都係抵
在香港售賣的榴槤多來自泰國,少有來自馬來西亞,而馬拉榴槤都是樹上熟,掉下來才發售,有更多時間吸收養份,果肉味香濃,特別肥厚,每年六月就是當造時候,我們上星期飛了一轉,來個率先探路。
甫來到檳城,急不及待追問檳城人導遊 CC哪裏有靚榴槤,「去年五月中,馬路旁全是榴槤,可惜今年太多雨太熱,產量不多,無晒影,價錢一定貴。」雖說價錢上漲,但依然很抵,在香港買馬拉榴槤,約售$600至$1,000,但在檳城只需三分一價錢便買到, CC繼續說:「自從賭王用私人飛機運榴槤,貓山王俾人炒熱晒,其實馬拉榴槤品種超過130種,且會定期舉行榴槤選舉,得獎的話就註冊名字,不少獲獎榴槤都用參選改的名字,例如 D字頭加數字嘅名都係咁嚟!」所以馬拉有大堆名牌榴槤,包括紅蝦、葫蘆、 XO、 D24等,還有沈殿霞、林鳳嬌……單聽沈殿霞之名,已能想像出榴槤必定肥美可人,檳城人真幽默!                                   
食榴槤 搵龍哥
對於檳城人,食榴槤總有個共識,就是不見龍哥當天不買榴槤。 CC說:「龍哥係榴槤車仔檔檔主,當日榴槤唔靚就唔開檔。」我一見龍哥就問為何此處榴槤特別靚?他答:「我家三代賣榴槤,每個州都有相熟買手,榴槤越靚給他們的佣金就越多。」
阿龍榴槤檔 
電話:(60)0194121616
地址:安順路

擔凳仔踎街食

晚上龍哥不開檔,也可幫襯 Jalan Macalister街邊的榴槤檔過口癮。我親身試過,雖然榴槤選擇不太多,但在行人路上攤開摺凳大啖食榴槤,勝在有風味。
車仔榴槤檔 
電話:(60)0164600157 
地址: Jalan Macalister

唔揀牌子揀靚樹

吃過風味榴槤,是時候見識當地人如何高層次品嚐榴槤, CC說:「睇樹就知榴槤靚唔靚,七八層樓高,樹齡最少有二三十年,必定係好嘢!當地人先致電果園,詢問園主前一晚有沒有榴槤從該樹掉下來,有的話便驅車前往,且一公斤平$20㖭!」
今趟我們上山搵到三代也種榴槤樹的園主陳奕強,他有400棵榴槤樹,每棵樹可種出百多個榴槤,「無乜特別種植方法,普通施肥澆水,呢度榴槤靚因泥土夠好。」榴槤會據當日價格釐定,像我們當天市價為$47/kg,在山下便會售賣$63/kg。園主還解構榴槤有眼不會掉中人的傳說,「榴槤於氣溫約25℃才會跌落地,只有半夜才有這個溫度,所以夜晚就唔會掉中人啦!」
陳奕強果園
電話:(60)0124887773
地址:311 MK7 Genting,11100 Genting, Balik Pulau

彈指掃出靚榴槤

原來要找出靚榴槤,非常簡單,園主就教我以下方法。

1.看一看:榴槤柄,乾身兼斷口帶白色的最新鮮。

2.聞一聞:香味越濃代表越熟,不熟的會有青草味。

3.搖一搖:聽到咯咯聲,代表果肉及殼分離,夠乾身食得。

4.彈一彈:港人揀榴槤會㩒榴槤釘,但揀馬拉榴槤只需用手指邊彈邊掃釘,聽到清脆聲就知榴槤離樹不久。

榴槤千奇百趣

1.榴槤內殼有散熱氣作用,用來盛水飲就可去熱除口臭。

2.用榴槤殼盛水洗手,可去除手上的味道,但像 Ruby用殼盛水倒在手上就大錯特錯,要把殼當成器皿盛水,把手放進去捽才成。

3.榴槤跟酒是敵人,吃榴槤後喝酒,隨時爆血管。                                   
copy from 蘋果日報 21/5/2012

選擇::playgroup

瓜從一歲起我便開始找尋一家合適的遊戲班,
唸住18個月的時候就上堂。
你知依家個出生率幾高架啦,
最驚冇位!
所以晨早我已經同佢報名然後等囉!

我的目標好明確,
因為沒有太多有差唔多年紀的小朋友,
兩個家庭都係得佢一粒霸王孫,
所以瓜返學對於我黎講唔係為學習知識,
係為有一群小朋友一齊上堂,
學習相處,相親相愛。
3歲以下的課本知識,
就算我教唔到,ipad都教到啦!

不過對於星星呢,
佢其實唔多贊成咁細個就返學,
佢以為返學好慘?
大佬! 咁細個學校可以做啲乜呢?
根本就堂堂都係玩!
從遊戲中學習吖嘛?
大家都唔需要太認真,對嗎?
選playgroup的意義在於佢可以教一啲自己教唔到的東西,
特別當時我係全職媽媽,
好多嘢我都自己教,
除左我唔能夠變一堆同齡的小朋友出黎一齊玩。

我就先選語言,
自問英文還可以,
普通話就絕對唔係可以教導的程度。
不過坊間普通話為主的不多,
英文就周街都係,
如果係英文堂就一定要外國人教,
中國人教英文又係不如自己教,
最低限度瓜知道個世界有其他人種。
第二的選擇係地方要大,
呢個就真係幼稚園附屬至得,
小朋友有地方跑跑跳跳,
有一大個遊戲空間。
最怕得一間主人房咁大的課室,
一大班學生家長入內之後就搵條路行下都冇!

仲要有一定數量的學生,
我想瓜學識與同年紀的小朋友相處,
並不是只有老師!
老師的作用係控制場面,
瓜算係一個聽話的學生,
希望有個好老師會令佢愛上學。
當然有啲人鐘意一對一添,
感覺好似抵啲?!
我要有好多同學仔囉.

又怕有啲學校因為人數唔夠,
小朋友年紀可以相差好遠,
試過某試堂係瓜一歲多時同個三歲一班囉?!
一個行都未行得穩,一個已經流利的談話中!
會唔會相差太遠?

又試過老師因為瓜未識講嘢而全班都問就係唔問瓜,又唔教佢講。
佢唔識講唔代表佢唔認得或冇學習能力。
即時 blacklist 佢!

如果長遠計想之後入讀該學校的N/K班,
當然應該揀該校的 playgroup,
面試的時候係熟悉的環境表現都好啲。
試堂其實係幾好嘅,
可以睇下係咪適合你要求的教學主張,
不過好似瓜都頗怕生保的地方,
頭兩堂都係適應期,
真正又唔係學得幾多。
所以揀啱咗就唔好四圍再試啦。

依家瓜好鐘意返學,
但係間學校七月開始放假又冇暑期班,
之後就讀第二間幼稚園的N班,
我又要幫佢再搵個好玩的地方啦!

Saturday, May 19, 2012

Cars Crocs

一向都唔鐘意 Crocs,
十分認同佢係最醜樣的笨鞋之一。
至㐅係。。。
星星每一次去海灘都會好高興咁同我講佢嗰對係XX海盜特別版。。。

然後依家到瓜啦,
佢第一次好興奮自願想試的鞋兼唔肯除要即刻俾錢!
完全冇發癲,冇叫囂!
見佢咁鐘意又啱著就買啦。
小朋友細隻版都可以叫做可愛嘅...
落雨又唔怕, 去沙灘又得~
原價$308,減到$169。

Tuesday, May 8, 2012

Face off

最近很懶沒有Post,
因為我用了所有的空餘時間看 Face Off!
不是那套吳宇森啦。

又是真人騷,
做特技化妝啦!
好有創意兼好有趣的改造,
雖然主持同剪接都好差勁,
不過個化妝本身有亮點就可以,
由真人到化妝完成品的改變都OK可以一看啦乀
我這種零創意的朋友見到人地咁厲害全身改造,
觀賞價值都好高啦!

Thursday, May 3, 2012

Saturday, April 28, 2012

Thursday, April 26, 2012

瓜瓜::23mths




~??kg.


~85cm


兩-三餐飯,
半夜都仲有一兩晚會食奶,
一日三支奶,


都仲係鐘意玩車!!
其次係鐘,
之後係熊貓.


可以唔需要扶住落樓梯


通常都 2200 瞓到 0800.
不過 0600 左右會想飲早奶.


29號 認得兼識講 'Ass'  即係英文字: S
30號 會叫 '公', 扮大象叫woooo,'魔魔' 係魔鬼魚.
31號 好重鼻音的'檬一n',即係moon。
1號 heart 係 'har-t',  'chew' 係坐
2號 clock 係冇 L 音的 'cock', horse 就讀成 '蝦-s'
7號 燈係好重鼻音的 'dannn'
11號八達通係 '嘟',門鐘聲係 '丁丁'
12 號 知道兩個同樣的東西係 2, 可以做任何的 2 字組合,好似 Two car/ two bus / two star / two train
14號地鐵關車門係 '嘟嘟嘟嘟嘟',
15 號 escalator 講到 'es'
18 認得兼讀到大小階 o
19 認得兼讀到大小階 e
21 認得兼讀到大小階 a


- 28號 會指patpat俾我知道佢開咗大
- 31號 識飛吻,不過係好大力好似生意失敗咁拍過額頭再飛出黎!
- 同佢去街佢見到鐘意的東西會攞上手把玩,
我: 係咪鐘意?
瓜: 係。
我: 係咪要?
瓜: 係。
我: 係咪買?
瓜: 係。
我: 俾$好唔好
瓜唔答我直接放低唔買走咗去。
- 同公公有一個私家叫 'bom' 的遊戲, 類似 cushion 大戰.
- 可以有條理的答問題.:
我: 瓜鐘意食乜? 
瓜: 蝦 / fish
我: 瓜鐘意玩乜嘢?
瓜: bus / car
我: 鐘意睇乜嘢?
瓜: bus/ car
我: 海洋公園有乜嘢睇?
瓜:  fish / cable car (不過唔識講 cable)
我: 有乜嘢車呀?
瓜: bus
我: 仲有呢?
瓜: train
我: 仲有呢?
瓜: car / 扮救護車叫/ ka 即 truck / digger
- 知道會點頭示意
- 會哼歌 fly fly fly butterfly, twinkle twinkle little star, wheels on the bus, London bridge is falling down, 會自己填詞, 會 '打~打~打~BUS~'
- 要人陪佢排排坐
- 問佢依家幾點, 佢會指住自己隻錶.
-------------------------------------------
6 歲前可行的興趣班:
2.5 歲 - 音樂預備班 / 英文戲劇
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 魔術, 騎馬, 劍擊

Tuesday, April 24, 2012

呢排出的 post 都有啲頹, 都是積存已久的食物照... 冇辦法, 依家可以寫字的時間愈來愈少, 工作時間不行, 回到家又要陪瓜玩直到佢瞓咗而我又仲精神嗰少少時間打字, 又或者係搭地鐵用 iphone 寫, 但係用電話寫 blog 真係慢到震... 唔想荒廢呢個陪伴咗我幾年的小小發洩平台, 但冇時間兼唔想好似日日交稿, 往後的日子都係隨心, 期望一個禮拜都仲可以寫到兩篇有文字的 blog 啦...

墨魚丸莧菜湯+燒排骨

Thursday, April 12, 2012

Nissen 學習褲

冬天終於過去,
瓜下個月都兩歲啦,
要教佢自己上廁所啦。
見到人地話用學習褲輔助效果不錯,
我又買半打試下囉。
因為係貼身衣物,
唔敢淘寶,
見日本貨(中國製)不貴 (10% off, $71/2 條),
網上評價不錯,
就立即訂貨啦!

第一次從 Nissen 買物,
過程非常簡單,
而且非常快捷,
三天便到貨了!
件件都好靚仔啦!!
















係要收$90 運費,
所以我同時再訂多4條短褲,
橫竪戒片過程都好容易瀨濕褲啦!
希望瓜好快就成功啦!
Blog Widget by LinkWithin