Tuesday, November 29, 2011

Zebra+Tiger

瓜瓜同媽媽用棉花棒合作的斑馬!




















同婆婆整的老虎.

Monday, November 28, 2011

幼兒羽絨::Mont-bell

今年天氣報告話冬天會比以前凍啲同長啲,
所以季初已經為瓜瓜物色一件羽絨.

我偏好樣靚, 時裝牌子,
好多牌子的絨毛比率低,
或者好多奇怪嘢, 例如多幾條拉鍊幾個口袋,
又或者冇咁細個的碼數.
其實 Uniqlo 那件真的不錯,
至少平靚正.
但唔鐘意那些顏色,
那個紅跟那個綠, 唉....
係因為星星之後買咗件想配做父子裝,
而且想買的時候黑色已經斷碼 :P
如果唔係真係太貴,
Nicolas & Bears 同 Izzue 都好有型,
但係小朋友著得一季仲要唔知著得幾多日就浪費咗啲囉.

星星家姐就偏好功能性.
所以佢幫瓜睇咗好多專業牌子.
當然功能性強個樣就差啲.
當中 Aigle 唔錯, 但又係貴.
最後敲定 Mont-bell.

有小童碼, 最細有 80, 瓜著 90,
雙面兩隻顏色都可以,
男孩是藍與橙,
當然女生的更漂亮.
最緊要唔係大大舊想抱都難!
$580, 都不算便宜, 係相對便宜囉.

Mont-bell 官網.

Sunday, November 27, 2011

談幼兒園

踏入十一月,
好多幼兒園都開始面試, 收生, 留位.
我算比較懶散? 輕鬆? 冇所謂?
報咗 4 間.
其實我都覺得報得多...
而且我心儀的那間過咗年至面試.

點知依家返幼兒園跟其他媽媽祖母閒聊,
7-8 間真係閒閒地,
話要漁翁撤網,
又研究邊間收咗邊間唔讀,
原本唔緊張都緊張埋一份.

暫時瓜瓜見了兩間,
第一間下半場非常不合作,
衰到我同星星講如果間學生收佢都唔好讀, 咁嘅學生都收一定係呃錢架!
點知轉頭第二輪收生又收到信俾瓜讀下午班!! (莫非有教無類??!)
可能同時間好幾間學校同時收生,
其他人都揀有學卷的學校啦.

另一間係我次選,
瓜瓜當日心情勁好,
除咗專注力低同唔識講嘢之外都做得好好啦!

其實我都唔明做乜十月就面試,
間間鬥早博你俾留位費!
得十幾個月人仔你想佢識啲乜????

啲家長又好緊張,
仔囡面試係星期六,
個爸爸著西裝咪多咗囉?!
親子時間你著西裝??!!
--------------------------------------------
我選幼兒園的要求呢:
--
交通方便唔太遠,
返學之餘仲要買餸!
又驚落雨又怕車多.
我唸住日日送佢返學架!
--
信任傳統名校,
唔知呢,
總係覺得新派那些比較商業化.
而且一向住本區,
有歷史的好學校由細聽到大.
--
語言好重要,
細個學外語容易啲啦.
特別普通話我唔識教.
--
偏向傳統教學,
因為接住讀小學會易適應啲.
--
校服都唔好太醜樣,
要日日著喎! :P:P:P
--
師資反而其次,
讀得書多唔代表有愛心.
面試的時候我好留意啲老師,
睇吓佢地對住小朋友的表情係咪真心的笑容.

Saturday, November 26, 2011

瓜瓜::18Mths







~10.9kg. (又係病完, 輕得好快.)


~81cm


出咗兩隻大牙,
另外有兩隻仲係白點.
因為牙痕,
好多時夜晚比較難瞓著,
又會咬手指流口水.


兩餐飯三支奶兩次小食.
除咗奶樽外,
唔識用其他類型的杯.
但係想自己用攞匙羹食飯,
或者用叉叉住食.


仲係最高興推車仔,
樣樣都可以推.
最鐘意坐係度拍一聲向後躺 /或向前!
好似 free fall!!


通常都一覺 2145 瞓到 0715.
因為要就返學時間,
依家下午都未能定時,
通常瞓得一陣.


冇乜進展,
都係火星文.
不過 '呀' 得黎有唔同的語氣,
有時興奮, 有時疑問.
最鐘意的火星文之一: 得架得架得架得架得架得架得架得架得架.
最叻講'冇'.
不過佢用手指, '呀' 加擰頭已經可以表達佢大部份意思.


- 會幫手澆水
- 想自己著衫
- 成日咬人, 拍打人, 我依家手腳好多瘀痕, 好似被虐打一樣!
- 更多時係臨瞓前先咬得個膊頭5 分鐘!
- 又鐘意番沖涼, 但係要企係度唔肯坐.
- 要坐大人櫈唔要護欄, 所以拆咗高櫈那條欄.
- 開始返學
- 一聽到音樂就會跳舞
- 換片前會自己攞條新片.
- 瞓覺前會幫忙熄燈.
- 用拖住你隻手指引你佢想去我地方.
- 唔會爭玩具, 佢有佢玩, 人地攞佢玩緊的話都冇所謂, 佢會自己搵第二樣玩.
- 會扮喊, 會扮嗲, 會扮可愛, 會扮嬲.
- 攞新嘢之前一定會望吓我睇吓批唔批.
- 人地俾嘢佢一定唔要, 無論玩具定食物, 就算係鐘意的食物都唔會要.
- 一唔高興就跪地甚至扒係度.
- 會自己洗手, 抹手, 抹枱, 其實佢都好乾淨.
- 成日係地板幫我檢垃圾, 例如頭髮紙屑.
- 會點頭, 不過未等同'要'.
- 成日指住天上的鷹!
- 剛開始肯玩放唔同形狀入洞的那個盒, 不過玩多幾次都唔啱就唔玩!

Tuesday, November 22, 2011

買物

以前買咗新衫返屋企總係急不及待的拿出來左拼右拼,
依家買完放係個櫃入面到下年,
係下一年的同時間, 唔係下一季!
都仲係放係膠袋入面!

新電話新科技,
要即刻叉電,
一叉完要研究研究.
家吓星星送咗部 iphone4s 俾我,
雖然我都期待跟大家 whatsapp.
但係我連電都懶得叉!

係咪年紀大咗呢?
想點??
定係我純粹想購物???

洋蔥蒜心炒豬扒+麵醬蒸排骨

Monday, November 21, 2011

蜜糖芝麻包



















很喜歡吃芝麻.
冇落糖改用蜜糖,
自覺落咗唔少,
但係都唔多覺有甜味囉?!

Saturday, November 19, 2011

Cheesess::芝士蛋糕
















New York Cheesecake + Strawberry Brady Sauce

小碼的很小巧不過好味道!
香滑又唔太實淨兼唔太甜.
兩個人食就剛剛好.
三個人食就有少少唔夠.

個人覺得唔加果醬淨食蛋糕香濃啲~
味道 OK,
不過果醬本身比較水狀,
唔太識欣賞 :P

蛋糕就一定會再買其他味道食吓!

Cheesess
地址:中環雲咸街31A地鋪
銅鑼灣希慎道2-4號地下15號舖
尖沙咀彌敦道100號The ONE Kiosk 1 四樓
電話:2530 0050

Tuesday, November 15, 2011

瓜瓜正式返學
















係上 playgroup!
之前有係其他地方試堂,
但係呢次係正式的一個星期三日,
每次一個半鐘,
係幼稚園辨學,
所以有校服, 書包, 私家杯同私家毛巾盒.

點解係度上?
因為始終係幼稚園,
地方比較大,
課室大, 遊戲的地方大.
有地方俾大家走動.
真正幼稚園老師教學,
成件事情比較認真.
90 分鐘的課堂,
有多一點暖身的時間去適應課室環境.
最後係收費都唔貴!

點解瓜瓜咁細去上堂?
因為瓜瓜係我地兩家之中唯一一個小朋友,
冇乜同其他小朋友一齊玩,
欠缺耐性又大脾氣專注力又低,
係, 書本的東西我可以自己教,
但係人際關係做人態度就要佢自己領會.
上堂唔係想佢學習什麼課本知識,
只希望佢可以習慣吓群體生活,
學習等待, 學習呢個世界唔係事事如願.

好啦,
咁上堂做啲乜?
每件事情做 15 分鐘.
有一個外籍老師,
正正係上次面試日講故事那位!!
一個輔助的中國籍老師.
12 個學生,
一半係外傭帶,
其他的係同婆婆嫲嫲,
只有另一個同我係媽媽,
即時覺得瓜瓜好幸福!

先係操場玩各式自行車,
不過瓜瓜唔肯坐只係推!
仲有小小遊樂場, 有滑梯, 有爬爬蟲山洞, 有轉轉椅.

下一節入課室聽歌玩大件的玩具,
可以自由的跑跑跳跳.
瓜瓜成日私下走去搵其他唔關事係四周收好的玩具!

之後就排隊洗手去第二間房食小食,
瓜瓜自己開水, 洗手, 關水龍頭.
難得之後佢肯等一陣攞食物,
可能唔係太肚餓.
然後自己放餅乾入口,
口乾又自己飲水,
不過佢食得慢,
俾隔離個鼻涕蟲女同學食咗佢最後塊餅!
食完仲俾番個碟老師.

下一節算係正式學習,
老師教長頸鹿,
但係只係見圖,
連 'Giraffe' 的英文字咭都冇.
然後就做個小手工整長頸鹿,
我盡量想瓜幫手,
不過佢肯坐定一齊做已經好好啦.
整好咗瓜又幫我攞俾老師.
















之後又係洗手時間.
洗完手就圍圈聽老師讀書,
呢個係瓜的弱項,
係點石成金的故事,
皇帝隻手掂乜都全部變金.
但係故事時間瓜就唔肯自己坐啦.

最後又係唱歌跳舞
一班人玩,
所播的歌全部瓜都熟到不得了,
所以佢都跳得好開心,
又因為佢太開心,
每一首歌之間停頓兩秒佢就尖叫!!!
最後講再見的時候仲抱抱老師!

有其他小朋友係唔同啲,
瓜瓜全程都好乖!

第一次見到瓜瓜穿著校服,
內心非常的激動仲有啲眼濕濕添.
上堂的時間過得好快,
而且瓜瓜都好開心亦比想像中快融入課堂中.
結果係我好攰囉!
一來一回, 加上課堂四圍走,
仲辛苦過自己返學!

Monday, November 14, 2011

老婆如衣服

星: (好驕傲的說) 條睡褲著咗廿年啦!
我: 掉咗佢啦, 有客人見到幾樣衰呢!
星: 你廿年我都唔掉你啦, 叫我掉咗條褲!
我: 好難講, 老婆如衣服!
星: 係喎! 我廿年都唔會掉你喎!

大家黎見證廿年後老婆係咪如衣服啦!

Friday, November 11, 2011

星空

阿哥俾咗兩張贈卷我,
星星唔睇,
我就同阿玲平日睇咗佢.

下午三點的場次.
好似全場都係中學生咁!
佢地不停傾計,
令到我忍唔住要 '噓' 佢地!!!

故事都係 '那些年' 嗰隻的十三歲版本.
真係老啦,
已經想不起十三歲的歲月,
但係就代入咗劉若英媽媽的角色,
腦裡面想著的是如果瓜瓜到了十三歲會怎麼樣?

如果兩個人的愛消失了.
同星星離婚, 瓜瓜會點?
我們能夠給瓜瓜快樂的童年嗎?

戲中說: 在放手前, 能抓多緊, 就抓多緊.
依家能夠的就係抓緊每一天看著瓜瓜長大的變化同埋抓緊瓜瓜黏著我的時間,
再過幾年,
佢都嫌我煩啦.

當了媽媽之後,
每一次看到關於親情的東東就會莫名的感動.
一個家就好似一幅拼圖, 少一塊就是少一塊.
一個成員也不可少.



齣戲拍得好 '幾米'.
得閒都要拿番本幾米出黎睇吓!
那個小男生演得好好啊!
五月天的主題曲都好好聽啦~



演唱:五月天
作詞:五月天(阿信) / 作曲:五月天(石頭)
編曲:五月天 / 監製:五月天
歌詞:

摸不到的顏色 是否叫彩虹?
看不到的擁抱 是否叫做微風?
一個人 想著一個人 是否就叫寂寞?

命運偷走如果 只留下結果
時間偷走初衷 只留下了苦衷
你來過 然後你走後 只留下星空

那一年 我們望著星空 有那麼多的 燦爛的夢
以為快樂會永久 像不變星空 陪著我

獵戶 天狼 織女 光年外沉默
回憶 青春 夢想 何時偷偷隕落?
我愛過 然後我沈默 人海裡漂流

那一年 我們望著星空 未來的未來 從沒想過
當故事失去美夢 美夢失去線索 而我們失去聯絡

這一片 無言無語星空 為什麼靜靜看我淚流?
如果你在的時候 會不會伸手 擁抱我?

細數繁星閃爍 細數此生奔波
原來 所有 所得 所獲 不如一夜的星空
空氣中的溫柔 回憶你的笑容
彷彿只要伸手 就 能 觸 摸

摸不到的顏色 是否叫彩虹?
看不到的擁抱 是否叫做微風?
一個人 習慣一個人

這一刻 獨自望著星空 從前的從前 從沒變過
寂寞可以是忍受 也可以是享受 享受僅有的擁有

那一年 我們望著星空 有那麼多的 燦爛的夢
至少回憶會永久 像不變星空 陪著我

最後只剩下星空 像不變回憶 陪著我

Tuesday, November 8, 2011

朱古力飽
















將牛奶改為十字牌特濃朱古力奶,
不過都係冇乜朱古力味.

Monday, November 7, 2011

布婚CalicoWedding

我很幸福.
結婚兩年,
感覺還是有的,
選擇仍是對的,
很好.
--------------------------------
- 有了孩子, 時間過得更快.
- 星星說我幸運, 是的.
- 從小到大也是符符碌碌的一步一步的走著走著, 到今天成為人妻, 成為媽媽, 成為主婦.
- 人工係少咗, 但係心靈好富足, 夜晚瞓得好.
- 沒有特別的宗教, 但還是感恩, 謝謝身邊的人都愛錫我.
- 星星事事以我為先, 樣樣有商有量, 很多事情也讓著我.
- 好少嗌交, 一方講完不滿, 事情就完結啦. 瞓醒一覺都唔記得啦.
- 瓜瓜給我最大的考驗係耐性同體力.
- 最大的好處係可以買唔同牌子的洗面乳 / 洗頭水, 唔鐘意的話都有人幫你用到尾.
- 最唔習慣係張床太細, 以前一人一張雙人床, 依家兩個人迫埋一張雙人床.

Friday, November 4, 2011

3idiots

自從瓜瓜出世之後都冇乜睇過戲,
一口氣睇咗好幾齣戲:
志明與春嬌
抱抱俏佳人
財神客棧
槍王之王
出軌的女人
猛男滾死隊
得閒炒飯
唔知係咪全部唔洗錢上網睇的關係,
港產片好似冇咁爛啦喎?!
啲編劇都有啲誠意喎!

不過都係印度片 3idiots 最好睇!
好感動 :D
睇完淨係想講:
瓜, 都係努力讀書啦!
雖然考試制度係有問題,
但係要成功都係必先讀書啦!
有知識至可以讓你選擇你喜歡的道路.

Thursday, November 3, 2011

Face::影相

係喎~
又影相喎~
出面街影得好啲囉,
又唔係貴 :P
圍購 $198 有 20 張相啦.

開頭以為一個小時好似少咗啲,
唔可以換太多場景,
但瓜瓜的好狀態唔維持得好耐!

全程瓜都好眼瞓,
係中途迴光返照咗一陣,
就係嗰陣都影咗唔少大笑好心情的相.

全店的店員都好鐘意小朋友,
瓜瓜係唔攝影的時候玩得好開心.

第二日就有得睇相啦~
-----------------------------------
包20張數碼影像jpg file (只限選取套餐內之數碼影像)
為保留自然純美一刻,影像調色、執相、化妝及服飾將不包括在服務內
保證寵物不會進入拍攝場地影響拍攝效果
額外拍攝人數每位加HK$300,建議最多加4人
兌換時間:星期一至五10:00am-10:00pm (公眾假期除外) (每日最後預訂時間︰5:30pm)
預約星期六、日及公眾假期須另加$500
將於揀相日期起計3個月內取回相片檔案

60分鐘完美攝影服務
拍攝多款數碼影像,可從中選取20張 (高解像jpg file)
SOGO 數千呎時尚影樓,4間獨立主題Studio
專業燈光及攝影師
全港獨家K-Kids & 森林家族場景
採用Canada 先進Amaircare TrueHEPA空氣過濾系統
星級Studio,明人明星齊齊於FACE拍下一家幸福時刻
銅鑼灣地段,四通八達

FACE
銅鑼灣軒尼詩道555號東角中心新翼SOGO CLUB 12樓
聯絡電話: 28318927

Tuesday, November 1, 2011

二三事

1.
瓜瓜星期六去第一個幼兒園面試,
但係仲未識講嘢,
點解歲半咁早就見呢?
見家長咪算囉!
希望佢到時聽聽話話啦.

2.
收到上次去中大的報告,
原來參加人數暫時都少過 100,
咁少人,
分析都唔使點睇啦.

3.
好想買衫,
但係點解今季啲衫咁斯文?
件件唔係裇衫就西裝褸!
買唔到俾自己唯有買俾個仔.

4.
自從唔開冷氣轉咗開窗間屋多咗好多塵,
家居清潔都做多咗!
而且樓下個巴士站都幾嘈 :p

5.
麥同學放產假中,
好緊張呀!
好似自己生多個咁呀~
不過都要講句當年生的時候只不過係痛咗幾個鐘,
瓜瓜都算待我不薄啦.
Blog Widget by LinkWithin