Friday, September 30, 2011

生多個?

對於豆豆的來臨,
星星同我都係抱住順其自然的態度,
冇特別的造人亦冇避孕.

結果就令我每個月到咗臨近經期的日子就會好緊張.
最慘係來經的警號徵狀同初期懷孕好似,
會嘔會想食酸想食甜同好攰 :(
究竟係有定冇真係要見血至知道.

問心呢,
我都好想生多個豆豆,
因為有個機會可能生個女,
囡囡大個都仲會成日同阿媽一齊吖麻 :P
雖然生多個仔我都好歡迎 :)
但係生第三個就冇可能啦.

不過依家得星星一個搵錢,
一個養咁多個好大壓力,
屋企得兩間房咁豆豆瞓邊呢?
會唔會夜晚一個喊醒另一個又醒咪成晚冇得瞓?
一唸到又要半夜餵奶個心即刻寒一寒 :P
大肚點抱瓜瓜?
咪又有一年冇得去旅行?
然後再去旅行時四個人去咪好貴?

現實係好殘酷.
所以每個月都好掙扎.
想見血定唔見血?

今個月: 見血...
心底大呼: 好彩...
我唸我都係未準備好同豆豆結緣.

Wednesday, September 28, 2011

SiamKempinski::泳池

唔太細的泳池,
不過中間位好多樹,
個池度久不久就見落葉,
感覺怪怪的.

水好淺,
全場 1.2 米,
圍邊位高咗一大級,
水都唔到膝蓋,
瓜瓜都可以行足全場.

有按摩噴水位的石椅,
舒唔舒服就好個人啦.



有啲房一出露台就泳池,
不過係地下就變咗冇景,
仲要俾人望晒入面.


呢有暖水 bb 池,
不過磁磚地好滑,
我行得危險過個仔.


揀好位就有靚仔攞水同生果俾你.


另一個係天台的小泳池, 比較曬.


隔離就係健身室,
望住一大片草地跑步好舒服~

Tuesday, September 27, 2011

曼谷::CrystalDesignerCentre

星星唔想日日行公司,
想搵個郊區咁的地方.

一個小鎮咁大買傢俱的地方,
全部都係傢俱,
如果想搵精緻家品就唔係呢度啦.
我地都鐘意睇屋企嘢,
呢度都幾好行.
地方好大款式又多,
至少行半日.
仲有腳骨力的話隔離都仲有其他的店.

我地有冇買到嘢?
冇!
因為唔算太便宜,
仲未計運番香港呢!

我地由酒店搭的士,
去的時候 B$221,
返的時候 B$140.







Crystal Designer Centre 官網

Monday, September 26, 2011

瓜瓜::16Mths



~10.7kg. (係曼谷機場個行李磅磅的, 連衫連鞋.)


~??cm


不變的 8 隻牙仔.
大牙出極都出唔到.


一唔滿意就尖叫.
出街唔想返屋企仲會0累地!


上咗樓梯降, 一見樓梯就要行!
最鐘意吊高對腳用前腳掌行路.
樓梯上上落落都行得唔錯,
出街行商場好多時都自己行.
(抱住佢好重架...)
不過佢驚走失一定會拖住,
而且拖住佢可以好安落的四圍望唔使望路,
行得開心仲可以不停搖頭!


一日兩餐飯三支奶,
最鐘意食蛋同食魚.
想唔食會退出黎,
有渣咬唔到都退出黎.
終於都肯自己攞奶樽!
係個口拔個奶咀出黎仲會笑~
然後又放番入口.
食得高興就會扮豬咀,
豬多兩次仲會拍手掌.


將啲物件一件件攞出黎然後一件件放入盒就最高興.
但顏色/形狀就分唔到.


通常都一覺 2145 瞓到 0715.
下午 ~230 瞓兩個鐘.
有晚臨瞓前飲飽水竟然自己指路話要返自己張床瞓覺唔使'暗'完再放低!
所以依家訓練佢係張床自己瞓著.


學識尖叫算唔算?
仍然靠手指指囉!


瘦就似媽媽,
肥的時候似爸爸.
我個人覺得佢除咗個樣唔太似我之外其他樣樣都似我,
連懶惰都似到十足 :P


- 以前淨係佢指我講, 依家可以我問佢指. 平時所學的動物生果車輛日常用品基本上都記得晒, 最驚喜係佢會掀書掀幾頁搵番出黎.
- 識得指自己.
- 閂門開門冇問題.
- 好鐘意對新鞋, 不停讚佢對新鞋就好開心, 好似女仔... 咁貪靚!
- 問佢鐘鐘唔鐘意件粉紅色衫, 佢擰頭! 唔通男仔天生唔鐘意粉紅色?
- 受軟唔受硬, 只要你係咁讚佢叻, 佢就好肯學新的事物.
- 話說某日同友人們出街成枱人讚佢自己攞水樽飲水好叻, 第二日佢爭個奶樽要自己攞住飲!真虛榮!
- 識得原地踏步, 跳舞.
- 知道軟同硬, 係我地張床上面, 企係度面向下'啪'一聲扒落床. 行地毯的話行兩步就雙膝落地覺得好好玩!
- 行超級市場一定要幫手推車仔.
- 俾張八達通佢會幫我嘟.
- 見到個海就好興奮, 無論係電視上定係十里遠見到...
- 坐係度一定'筒'高腳.
- 可以幫你戴眼鏡.
- 有想攀爬的意欲.
- 自己會點蟲蟲, 會張大手板話'冇啦'!

Sunday, September 25, 2011

SiamKempinski::KidsClub

帶住個小朋友唔方便離酒店太遠,
因為要帶多好多嘢 :P
其實大部份時間都會留守酒店.
個 Kids Club 都係一個好地方,
地方好幾大,
有波波池, 有大量益智玩具, 有卡通片睇,
過咗兩歲仲可以放低俾佢照顧咁大人就可以做 spa 啦~
瓜瓜都玩得好開心架,
我就不停影相,
星星就悶啲囉.




Saturday, September 24, 2011

曼谷::MannA

唔知食乜.
係 Siam Paragon 最方便近酒店.
旅遊書介紹呢度有失傳泰菜兼有我至愛的生蝦刺身,
唔使唸即刻訂位~


餐廳外有旋轉木馬裝飾.
(雖然似乎與泰菜九唔搭八...)


Spicy Manna Salad B$250
酸汁海鮮沙律,
除咗上面啲蛋好似唔多夾外,
個酸汁令到成碟嘢好得.


生蝦 B$280
超肥美的說!
個汁就同香港食的有啲唔同.


泰菜必食冬蔭公 B$320
好辣 :P
生完仔之後完全食唔得辣 :(


Seabass Fish Sau... B$280
唔知乜嘢酸魚星星點嘅~
又係一個湯但係好少魚好多雜菜.


Hot & Sour Fried Fish B$220
個魚好炸!
所以好嚡...
俾唔到瓜食囉.
另碗裡面係青蘋果絲浸辣椒魚露,
估唔到又幾好食喎!


後加碟蒸魚俾瓜 B$580!!!
泰國人又點識豉油蒸魚?
上枱的時候係唔熟架囉,
我地叫佢番蒸至俾瓜食!


加埋白飯, 飲品要成 B$2443,
乜依家曼谷食飯咁貴架??

Friday, September 23, 2011

曼谷::MangoTango


泰國版許留山,
主打芒果,
不過都係一般啦.
啱啱行到去 K Village 有杯凍飲就唔錯囉.

Thursday, September 22, 2011

曼谷::K-Village


一個好細的地方,
非常極度唔推薦!!
細過條村囉仲叫自己 village!
我覺得有八成係食肆而賣嘢嘅店係都嘢睇囉.
幸好隔離有間 Big C Extra,
有小商場兼超級市場,
買咗啲生果返酒店食.

BTS 係 Phrom Phang 落車,
以為唔多遠,
點知抱住瓜都行咗成 20 分鐘.
走的時候搭的士返酒店,
都只不過係 B$85 連貼士啦!

Wednesday, September 21, 2011

SiamKempinski::早餐

相太多,
要慢慢整理.
係酒店時間最多,
可以分開寫幾日.

Siam Kempinski 個早餐超得,
嘢食唔算太多,
不過樣樣都係精品.

有三個地方可以食早餐,
lobby lounge, bistro 同泳池邊.
廚房係 lobby lounge,
地方大啲人多啲,
所以要靜就就要去遠啲的 bistro.
(我地開頭以為 bistro 的食物會唔同, 但係其實一樣!)
泳池邊就曬太陽囉 (有太陽傘.),
要番入 lobby lounge 攞嘢食,
煩啲囉,
不過就感覺泰國啲,
我地冇去,
驚瓜瓜跌落水 :P


熱盤唔算多,
要食熱的最好食蛋.
有餐牌任叫.
雞蛋寫明 organic 的.
瓜瓜日日食烚蛋,
佢學識自己用門牙咬嘢.


穀類早餐同各類乾果,
乾果全部都大大粒靚靚仔.


麵包桌都有五隻蜜糖, 五隻果醬.


仲有個蜂膠~
我括咗黎沖蜜糖水.
飲品仲有各式果汁同香檳!


各款火腿,
食唔完的 Parma Ham~
添食極快.


呢幾碟專為阿拉伯人而設,
應該好多阿拉伯人入住,
因為房個電視都有好多阿拉伯台但係就冇香港台,
雖然我見到八成客人都係香港人,
周圍都聽見廣東話...


High Chair 係名牌 Strokke,
同屋企嗰張好似,
瓜瓜好似番咗屋企咁.


另外呢個梳化都好啱同 BB 一齊坐~

Tuesday, September 20, 2011

曼谷::購物


Boots 儲奶袋 - 手信.
比香港平過半,
Siam Centre 的 Boots 攞咗遊客咭仲有九折,
依家兩盒至 ~HK$62.


Thann 按摩油, 浴鹽, 沖涼液, 有一小舊送的肥皂.
遊客咭送張 B$1500 減 B$200,
浴鹽半價, B$600,
有小支按摩油 B$390,
沖涼液 B$490.
唔知香港賣幾錢,
呢度就俾咗 B$1280!
不過得三隻香味,
Aromtic Wood (橙味),
Sea Foam (我覺得好似萬甘油...),
Oriental (Lemongrass).
要多味揀就要買同系的 Harnn.


瓜瓜腳厚, 買鞋有難度.
呢對購自 Isetan 的日牌 e.a.B,
可以全幅分開,
幾厚腳都冇問題啦~
係貴咗少少囉... B$1390.
考慮咗好耐至俾錢架!
我買咗紅黑色.
原本想買粉藍色,
不過就黎冬天難襯衫.


另外只買了三樣嘢.
Chaps 衣服,
兩件上衣才 B$2280,
但係要 B$4000 至有得退稅.

Jocky 短褲
星星試咗好多品牌,
呢個質量價錢俱佳.

泰國必買胸圍,
maidenform 入門版只需 B$850,
遊客咭 -10%,
稅 -7%,
折合 ~HK$200,
好抵~
不過總覺得泰國的尺碼比香港的細,
一定要試身.

可能我地行商場多,
而且兌換率都貴咗好多,
樣樣都好似好貴.
第一次去泰國買咁少嘢.....

Monday, September 19, 2011

曼谷::國泰航空嬰兒票

帶住個 BB,
Check-in 唔仗使排隊.

上一次瓜瓜搭飛機好乖,
今次都唔差,
上升降落都冇問題,
係坐得耐有啲悶.

我地帶咗零食, 書仔,
最重要的 ipad,
基本上都可以,
仲有食飛機餐同瞓咗個覺.


國泰又準備啲乜嘢俾瓜?
一小包旅行裝的 Mustela patpat 膏同保濕膏,
另有兩條唔啱用 M 碼的 petpet 尿片.
大人食完飛機餐之後瓜瓜就收到 4 瓶亨氏食,
兩瓶鹹品, 一瓶果泥, 一瓶果汁.
但係我就冇即時俾佢食啦.
一來一回得到 8 瓶,
可以食一段日子.
回程的時候仲得到多出的小童包 (3-6YRS),
有木顏色同迪迪尼公仔紙可以畫畫畫,

講開又講,
瓜瓜從來都冇食過呢啲一樽樽的即時 baby food,
就算開粉的都唔食得多,
亨氏的食品都好濃味,
食慣咗都唔好.
都係新鮮的食物有營養,
同瓜瓜煮個飯仔都唔係太難啫.

Saturday, September 17, 2011

曼谷5D4N::行程

回來了.
有沒有揼骨或是 Spa?
答案是沒有!!
仲冇去翟度翟同 night bazaar!

有了家庭, 帶同兒子,
去曼谷好像到了一個新的地方...

Day 1
- CX713
- 的士去 Siam Kempinski B$470 (Limo 要B$2200!!)
- Siam Paragon Gourment Market
- 午餐::Siam Paragon Food Court B$340
- 游水::Siam Kempinski
- 晚餐::Siam Paragon MannA ~B$2800

Day 2
- 早餐::Siam Kempinski
- Siam Kempinski Kids Club
- Siam Centre
- Siam Discovery Centre
- Siam Square
- High Tea::Siam Kempinski
- Central World
- 晚餐::Central World - Flavor ~B$600

Day 3
- 早餐::Siam Kempinski
- K Village
- Big C Extra
- 午餐::Big C 某餐廳 ~B$400
- 游水::Siam Kempinski
- 晚餐::Siam Square - Ban Khun Mae ~B$900

Day 4
- 早餐::Siam Kempinski
- Crystal Designer Centre
- 午餐::Crystal Designer Centre - Viva Cafe ~B$1000
- 游水::Siam Kempinski
- 晚餐::Siam Paragon Asian Cuisine ~B$1230

Day 5
- 早餐::Siam Kempinski
- 游水::Siam Kempinski
- 的士往機場 B$400
- 午餐::機場

Friday, September 16, 2011

廣州3D2N::食食食之旅

又係冇做過啲乜就過咗三日.

係食咗幾次廣州酒家,
朝早的點心好過食晚飯,
燒賣係手剁,
奶黃包有流沙,
蛋撻好酥皮,
最受親戚歡迎係粉仔,
我買咗馬仔返香港食.

冇米粥打咗個粥水邊爐,
平靚正.

富順食燉奶,
雙皮奶太甜,
薑汁撞奶就好好味啦.
麵食河粉都OK,
我地食三點三,
全店都係客,
個師傅竟然落咗班!

仲有外賣腸粉+粥,
一般般啦.

買嘢呢,
雖然廣州好多批發,
雖然帶住個仔好難四圍行,
但係都俾我買到件 jumpsuit!

Tuesday, September 13, 2011

曼谷5D4N, 休息5天~

帶埋瓜瓜去,
估吓我地有冇揼骨同做 spa?

Monday, September 12, 2011

澳門::悅榕莊酒店

check-in 前的吊燈好靚~


一入門口有香薰油或點香,
好泰國.


睡房區
大大張睡床好舒服,
唔會太淋的床.
電視機有兩個,
床前面一大個,
客廳又一大個.


個廳超大,
瓜瓜周圍走超開心.


係波浪池走的時候有小丑扭波,
整咗隻老鼠俾瓜.


商務區


每間房都有個咖啡機,
不過我地唔好彩壞機...
不幸中的大幸係房務部換個新的俾我地.


衣帽間都好大~


賣點室內泳池,
不過池水太太太凍,
係可能開熱水,
不過咁大個池都唔知何年何月至熱啦.
環保啲唔好浪費水源,
用黎浸吓腳都仲可以.
而且水池隔離的磚濕咗水勁滑腳,
要小心小心.


浴室區
最鐘意個木筒桶,
一路浸一路睇電視~
洗手盆都有兩個.


沖涼房有兩個蓮蓮頭.


廁所全自動,
仲有得洗 patpat 同電暖板.


最受歡迎的包包,
不過唔可以攞走! (真小氣!)
但係內容就好有誠意,
男包同女包的梳係唔同,
女的係 brush, 男的係 comb.
牙膏都係大的旅行裝成 25ml.


- 有免費旅遊巴去唔同的旅遊點包括官也街, 的士都慳番.
- 由碼頭開出的旅遊巴停 Galaxy, 可以等接駁車, 不過行去悅榕莊只係 10 分鐘.
- 入會 Galaxy 的賭場, 酒店樓下的食肆有九折.
- 間房好大, 屈蛇起碼可以住六個舒舒服服, 但係就冇得浸水桶囉.
Blog Widget by LinkWithin