Saturday, April 30, 2011

瓜瓜::ByeBye

瓜瓜好硬頸,
你叫佢做的事情佢多數唔做.

係公公屋企走的時候,
我叫瓜瓜同公公婆婆拜拜,
佢明明係識,
但係死都唔做.

我同佢講: 唔 ByeBye 唔出街啦.
企係門口完全唔行.
瓜瓜想了又想,
想喊又想走.

如是者勸導咗 3 分鐘,
佢終於攞起隻手拜拜啦.

Friday, April 29, 2011

北京大董烤鴨x東方文華酒店文華廳

周圍都立立亂,
去旅行都要遲吓先啦.
冇得去北京,
食個烤鴨都好啦.

星星的生日飯,
原本咁貴梗係食晚飯好似抵啲啦,
但係晚飯不招待 bb 啦~
星星又想帶埋瓜瓜,
就改星期六的下午啦.

兩個人食套餐最好,
樣樣都可以試吓.
沒選最貴,
也沒要最便宜.
大董特選套餐的內容最對口味.
(HKD$638/位,如選擇大董「酥不膩」烤鴨則為每位 HKD$738)
包括:水晶鵝肝、口水雞、香椿豆腐、紅花汁魚翅或清湯鴨舌羊肚菌、XO 醬爆帶子、燒四寶、老北京炸醬麵、艾窩窩及豌豆黃。

酒店頂樓海景位.


枱面棵樹仔好得意啦,
餐牌都是特製的.


餐前腰果小食.


水晶鵝肝 --> 啫喱多過鵝肝, 所以一啲都唔膩
口水雞 --> 比較辣, 不過雞皮都好滑 (我唔覺意就食埋啦... :()
香椿豆腐 --> 比較淡, 俾咗好多瓜瓜食


師傅即場表現片鴨

「酥不膩」烤鴨
又真係酥而不膩,
好好味呀~

呢個皮好勁,
點拉都唔會黏住或者撕爛!

除咗一般食開的皮仲有呢個叉子燒餅,
但好笑在佢係俾三個囉.
對筷子係有個國語姐姐介紹點隻烤鴨啦.

好多配菜.


二選一, 我們選了紅花汁魚翅.

但係估唔到成碗都係翅囉,
滿滿的啊!!
食完都飽晒啦,
瓜瓜激讚,
食到停唔到口!
放底羹都嘈啦,
咁細個0靚仔真識食!


XO 醬爆帶子
唔知點解覺得個味好港式,
可能係 XO 醬啩,
咬咗一啖都唔大興趣啦.


老北京炸醬麵同香港的炸醬麵好唔同,
但係我已經飽到七個一皮,
咬咗一啖都頂唔住啦,
淨係知白色麵都好彈牙.


艾窩窩及豌豆黃,
好飽,
好想食但係都分咗俾瓜瓜同星星.


瓜瓜全程攪攪陣,
好少人咁細帶 bb 食慢飯啦,
悶死人咩!

文華廳
地址:中環干諾道中5號香港文華東方酒店25樓
電話:2825 4003
菜式:廣東

Thursday, April 28, 2011

針織::fairyshred

初出世的 bb 都係好得意 :)
任你舞,
著啲乜嘢係身都唔知.

特別鐘意呢款 bb 車.






All from fairyshred

Wednesday, April 27, 2011

開平陽江3D2N自駕遊::0421--23

復活節出外走一走,
哥哥說不要愛得太遲,
一行九人兩架車,
到星星的鄉下同我的鄉下.

時間太多,
都是在車的時間比較多,
另外就是看過我的祖屋, 碉樓, 南海一號博物館,
其餘的就是食食食.
沒啥很特別的事.

小事就有幾單:

1.
攞房的時候問要BB 床,
個小姐話 BB 床唔好多穩, 問我要唔要?
成間酒店接近 300 間房,
號稱 5 星級得 2 張BB 床仲要唔穩! 問你死未?
大堂主管仲惡, 態度又差, 係咁問咁你要唔要?
我個仔有乜事係咪你負責?
結果都係送入房睇吓至算.
係有一邊的欄有少少搖搖吓都接受到,
但係又有另一個問題: 個床板係唔可以調整高度,
即係如果瓜瓜企係度就好易跌出黎,
呢個床只係適合唔識企的小 BB,
不過我個仔都係 10 個月,
咁點呢?
咪同我地一齊瞓囉!

2.
瓜瓜從來未試過同我地一齊瞓.
因為我地都認為睡眠質素好重要,
有個 bb 瞓係隔離好大壓力,
而且都冇大張床!
酒店的雙人床幸好都唔細.
不過瓜瓜瞓覺係車輪轉,
一時個頭瞓係我個肚上面,
一時對腳又係我大脾度,
一時又瞓咗係我個枕頭上面!

3.
帶住個攪攪陣的瓜,
我同星星都成日唔記得攞齊嘢,
又係早餐的時候忘記攞走瓜用的小膠匙,
當時已經開咗車出發到陽江去,
咁就即刻打電話返酒店叫人收起佢.
(最勁係我竟然記得酒店那個 11 個號碼的電話!!!!)
個餐廳小姐的第一個反應係: 一般我地都係會將佢地丟落垃圾桶!
啞然....
不過夜晚返到去好彩問小姐都有得俾返我.

4.
有晚叫餸唔多啱瓜瓜食,
想叫多個馬拉糕,
個小姐話:冇.
但係明明隔離枱就有,
個小姐堅持成個月都冇整馬拉糕!
結果唯有叫水蒸糕,
都走的時候見到有馬拉糕出爐,
但嗰個小姐就唔見咗啦.

5.
自駕遊當然需要一個 GPS,
不過內地不斷發展,
GPS 成日帶我地去啲奇怪的地方.
行一啲申請咗但係未完成的路!
今次帶咗我地去個好似碧桂園咁大的地盤睇泥地!

Tuesday, April 26, 2011

瓜瓜::11Months



~9.4kg.


過幾日去健康院順便度下.


頭髮長到可以分界,
我鐘意佢個蛋撻頭.


我覺得瓜瓜都係古惑仔一名.

佢喊我唔抱佢而星星頂唔住去抱佢的時候,
佢會偷偷的對住我奸笑.

你叫佢做的事情絕對唔做,
唔叫佢的時候就做,
有時叫佢 yeah, 佢會話: 唔 yeah.
不過唔知佢係唔覺意發到個音定係真係 '唔' 囉.

十個月的人仔樣樣都識聽,
同佢講: 唔好, 坐低, 行過黎,
又會明白我的表情,
做新的事情都會望吓我問准可唔可以.
但係同佢講 '唔得' 佢一定會 '呀' 多幾聲叫你 '好啦'.

知道做咗啲唔可以做的事情,
會扮喊, 呀兩聲冇人理佢又當冇事發生.
一係即刻補一個可愛咪眼側頭的笑容,
有啲加埋招牌叻仔拍手的動作,
慕求你即時笑番唔再話佢.

食到九成飽的時候都會自動拍手,
食多兩啖就收工.


都仲係唔放嘢入口,
不過俾零食佢都唔會放入口.
有4 隻牙仔.
冇流口水的習慣,
不過一玩一專注就唔記得吞口水.


瓜瓜好硬頸,
唔肯做的事情好難迫得到.


已經由爬轉到扶住行,
想買鞋仔俾瓜但係佢唔鍾意著,
用腳趾撐住對鞋唔俾你穿入去,
不過都開始俾佢著啦,
可以兩個大人拖住佢行街啦.

自學爬落梳化,
慢慢移,
計啱角度放一隻腳, 要左腳先,
再放右腳 sir 落去.


大人食佢就食,
佢自己食就唔食.
要好似皇帝咁先幫佢試味佢就食啦.


紙同搖控器可以玩好耐.
鐘意睇 Mother Goose Club.


有半夜起身,
不過次數少咗,
一晚一次啦.


教咗 give me five,
不過你叫佢做佢絕對唔做,
無端端開心的時候佢又自己做.

教瓜做動作,
一次就學識,
但係唔一定表演你睇.


係緊急 / 要你救佢的時候會發出 '爸' '媽',
但係平時唔會叫你.


我地兩個都似,
都仲有人問瓜係咪女仔...


超級擦鞋仔,
最鐘意公公,
十米前見到公公已經張開手要公公抱.

Monday, April 25, 2011

Sunday, April 24, 2011

RecycleLamp::BootsNGus

再造有時都好精美.
可惜我冇呢個閒情逸緻, 亦欠創作力.





All from Boots N Gus

瓜瓜::跌咗

瓜瓜玩一件玩具有三部曲:
1. 先拿係手把玩一輪
2. 拿住玩具手起刀落的鑒鑒鑒
3. 不經意的放手令佢跌落地又或者一手撥佢落地

當件玩具最後落咗地下,
佢無論原本望緊邊度佢都會擰過黎望住我, 同我: 呀!
我估佢係同我講: 跌咗.
我: 跌咗咪自己執囉.
瓜: 呀! (我估: 你幫我執啦.)
我: 我唔幫你執呀, 你坐低咪執到囉.
瓜: 呀! (我估: 執唔到呀.)
我: 你坐低爬過去咪執到囉.
(同樣的對白不繼重覆.)

最後瓜係有坐低,
但係係爬去攞過第二件玩具玩.

*註: 有時係 '呀', 仲有 '啊', '嗚', '啦', 同埋好多火星的音節.

Saturday, April 23, 2011

瓜瓜::得啦

瓜想去做一啲我唔俾佢做嘅嘢.
例如爬入廚房厠所 / 掂啲危險嘢.

我: 瓜瓜, NO!
瓜: 呀! (我估意指: 得啦!)
我: 唔得呀!
瓜: 呀! (我估意指: 可以啦!)
我: 唔可以呀!
瓜: 呀! (我估意指: OK啦!)
我: 唔 OK 呀!
瓜: 呀! (我估意指: 好啦!)
我: 唔好呀, 快啲番過黎.
(同樣的對白不繼重覆.)

瓜終於好不願意不停回望的走開.

*註: 有時係 '呀', 仲有 '啊', '嗚', '啦', 同埋好多火星的音節.

Friday, April 22, 2011

Thursday, April 21, 2011

揀相::PageStudio

影咗 190+ 張相,
家庭照同 BB 相係分開計,
Package 20 張相入面只可揀 3 張家庭照,
其他的要加錢, $80 / 張, --> 都唔知點解家庭照貴啲? 咪又係咁影??
BB 相就 $40 / 張.

小姐一啲都唔硬銷,
不過唔可以自己按電腦選要唔要,
一張一張的同小姐講: 要 / 唔要,
不斷的: 唔要,
令我覺得有啲唔好意思,
唯有同佢地講: 唔係你拍得好, 係我個仔狀態唔好.
雖然個心覺得拍得一般.

家庭照拍得比 BB 相好,
始終大人比較易控制.
家庭照有做切割,
BB 相就冇執相.

埋單係 $880
+ $120 人頭費(包 4 個大人一齊影, 但係我地有 5 個大人),
+ $960 加相, 主要係加家庭相, 人人有份, 永不落空.
影咗兩次,
包個場玩幾個鐘,
幾個人招呼你,
都係 ~$2000,
佢點賺錢?

揀完就即時燒碟即時攞走,
美中不足係 CD 用佢自己 standard 的封面,
沒有另印製瓜瓜的相面.

Wednesday, April 20, 2011

煎金蠔+臘肉午餐肉炒菜心仔+壽司+蓮子百合紅豆沙

三人晚飯,
媽媽要吃壽司.


煎金蠔
煎比蒸好食,
香口好多,
係要少少心機囉.


臘肉午餐肉炒菜心仔
每一次用臘肉炒菜星星都話太多油,
冇法啦,
臘肉啲油愈炒愈有!


蓮子百合紅豆沙
沒放椰糖果然冇咁香!

Tuesday, April 19, 2011

家庭VS職場

在想是否應該回到職場.

是需要嗎? 不是.
是被要求嗎? 不是.

不過覺得自己好似有點點無所事事囉.
覺得自己愈來愈懶,
除咗一日煮餐飯同少量的家居清潔,
身體仲差咗添.

是想試吓新嘢嗎? 係.
是想搵錢嗎? 唔係.
點解要做? 想學吓其他嘢. 有錢有嘢學去邊度搵?

找到一份幾得意人工唔錯又新鮮的短期工作,
結果被星星一盤冷水潑落黎:
- 少錢 (絕對唔係最低工資.)
- 工時長 (09.30-18.00 都長?)
- 咁短期做得啲乜? (就係短至好玩! 冇壓力啦!)
- 冇事搵事做 (咁真係覺得冇事至搵工啫.)
(總之唸起就嬲!! 次次有工請我都呢樣嗰樣!!)
(心底裡暗暗不爽... ?)
回歸職場的事情又擱置下來.

同時瓜都有關嘅.
佢下個月生日又要打針,
而且啱啱又少少感冒,
仲唸住搵日同佢去深圳動物園.
瓜瓜還是重要一點,
看著他長大也是我想要的事.

算啦,
仲有大公司市我都應該很高興, 是吧?

煎黃花魚+煎墨魚膏+灼菜心+咸蛋節瓜排骨湯

全餐都係星星整,
我睇住病瓜就得啦.



煎黃花魚+煎墨魚膏
墨魚膏都唔知係乜東東,
個賣魚阿姐 Upsell 星星囉!
係一舊好爽口的墨魚味的東東,
好古怪!


咸蛋節瓜排骨湯
簡易推介!


灼菜心

Monday, April 18, 2011

扎肉炒翠玉瓜+魷魚蒸肉餅+粉葛土伏苓赤小豆湯



扎肉炒翠玉瓜
呢個扎肉係青咖哩味~
好得!
辣到抽筋 :P


魷魚蒸肉餅
好多魷魚~
呵呵!


粉葛土伏苓赤小豆湯
Apita 湯包,
好難唔好食啦?
結果係豆太少,
紅蘿蔔太多!

Sunday, April 17, 2011

我們的早餐

瓜的雜菜粥

我的罐頭湯
Blog Widget by LinkWithin