Thursday, March 31, 2011

飾櫃::bluebirdheaven

飾物多到唔知點算?
整個木架放係牆,
可以擺嘢又美觀!



All from bluebirdheaven

煎黃立倉+金銀蛋菠菜


煎黃立倉
終於可以用一下新 pan,
不過係星星用 :P
條魚煎得好好啦~
應該係個 pan 好囉 :p:p:p
依家瓜瓜都可以寫多啲魚.

金銀蛋菠菜
嗜好周圍買靚咸蛋!
今次購自銅鑼灣燈籠街有利,
有糖心, 不過都有少少澀味.
菠菜啱嬰兒,
得閒都可以整多幾次!

Wednesday, March 30, 2011

泡菜炒茄子+蒸鯇魚尾+壽包+蛋糕


壽包係東海的出品,
成個拳頭咁大俾瓜瓜食.

啲泡菜放咗好耐,
同茄子豆卜做個朋友,
都唔錯.

星星要食魚,
剛開條新魚要咗截魚尾,
加埋豆卜蔥菜一齊蒸,
GOOD MATCH~

美心新出的 mini cake,
紅色的地方太甜啦,
裡面都ok.

Tuesday, March 29, 2011

三文魚三色意粉+炒椰菜花


為咗清咗啲存倉而整的晚餐,
有包意粉醬,
有罐三文魚,
有啲腸仔,
有啲冰鮮蝦,
開包三色意粉.

買棵椰菜花.

Monday, March 28, 2011

生薑燒豬肉+冬菇雲耳蒸雞+炒菜心


媽媽跟我地食飯~
煮多少少嘢.


生薑燒豬肉
呢個食譜唔得!
一啲都唔薑,
好鬼死甜!
甜死人咁甜!!
仲要周街都係賣 4 罐裝的薑啤,
行咗 6 間店至係 7-11 買到!
參考食譜


冬菇雲耳蒸雞
又唔記得落鹽....
今次蒸雞胸唔夠油.


炒菜心
好少炒成斤菜...

Sunday, March 27, 2011

香草雞柳+蘋果批+薯蓉

香草雞柳
S&W 的香草調味包,
很不錯吃,
調一調, 煎一煎就可以啦.

沒有煮飯,
再食薯蓉加幾支伴碟菜.

購自崇光日本節的蘋果批,
冷食一般般,
第二日將它焗熱後鬆很多!

Saturday, March 26, 2011

瓜瓜::10months


有個小朋友時間過得特別快~


~20磅,
正常過唔正常.


~72cm,
都係正常過唔正常.


咁多個月都未剪過頭髮.


已經明白喊係十大武器之首,
有事冇事大叫大嚷,
係都要咇啲眼淚出黎,
已經係大個仔令我打佢.


瓜瓜暫時最乖的事情係從來唔放嘢入口,
食手指都少之有少,
所以放佢係地下點玩都得.


星星話:
普天之下, 莫非瓜土!
全屋周圍都係瓜的東西!


瓜瓜的脾氣大咗,
佢唔鐘意的事情完成迫佢唔到,
唔食奶就唔食, 簡直係'緊閉的雙唇'!
唔係就伸直條腰, 撐吓對腳.


周屋爬,
會入廁所廚房!
又爬得快,
星星叫佢科莫多瓜!
係咪應該參加爬行比賽?
(其實係每個阿媽都以為自己個仔最快, 因為間屋細, 話咁快就由頭爬到尾 :P)


成日懷疑瓜係咪過度活躍症,
一起身就冇停手!
上咗鍊唔識停!
(不過 '專業人士' 話通常同自閉一齊黎, 瓜又絕對冇自閉, 佢係人都對住佢笑.)


除咗奶之外乜都食,
追住食,
快啲俾我食!


可以好平,
佢最鐘意玩紙!
酒樓的點心紙,
街邊的宣傳單張,
過期的雜誌.
唔太硬的紙都得.
又或者係 '塵',
佢見到淨色的表面多咗一粒唔同色的地方就會係咁指係咁捽.


唔知點解今個月成日都半夜起身?
有時一日起幾次,
喊得耐又企起身,
係咪關出牙事,
定係食唔飽?


想教佢做吓啲動作,
例如拜拜, 飛吻,
佢都唔多肯學,
突然有一日突飛猛進?
識拍手, HELLO/ 拜拜!


聲音反而好肯學,
已經有好多發音,
有時佢用自己的語言追句!
會發出 '爸' '媽',
但係唔係因為你係爸, 媽.


出街其實主要都係抱,
好多時冇攞車仔,
抱比較方便, 又驚近地面大塵,
成日都怕再重啲抱唔起,
又怕大啲都唔俾你抱.


明明聽到你叫佢個名,
唔想認你的時候就扮晒嘢,
個頭對眼都要轉另一邊唔理你,
呆呆地,
啲戲好差!


買咗好多衫俾瓜瓜,
佢買十件先等於我買一件!


似邊個呢?
樣子日日都變,
以前都會似我多啲,
依家大部份時間都似星,
個口好大似星,
所以一喊就好似星.
不過星星唔係度啲人都會話似我嘅...
但係最奇怪就係依家仍然有人問瓜係咪女仔...
以前 90% 的人問係女仔,
依家都仲有 10%,
明明人地著藍色啦!
仲大把人問係咪 3-6 個月?
有冇咁細粒呀??

Friday, March 25, 2011

往事如煙::各式各樣篇

真係好垃圾婆...
乜都留 :)
姑婆屋的用處就係保留一大堆無用又好似有啲回憶但係從來唔會攞出黎的東西.
-------------------------------
那年很流行的 JPG 鐵牌銀包!

仲一定要貼貼紙.

讀書的時候就有時間拼拼圖.
超喜歡旋轉木馬,
細個一見到就要玩,
不過依家都係 :)
但係只玩那些大大座的.
Strap Sheep 也是紅過一輪的小公仔.
個盒就係度,
但係裡頭的拼圖就唔知放咗係邊囉?!

Thursday, March 24, 2011

飾物::gemagenta

好雅緻的感覺~



All from gemagenta

法國麵包蟹+澳洲和牛+凱撒沙律+黑松露薯蓉


好豐富的西餐!!
超勁!
不過加埋都係 ~HK$300.

法國麵包蟹 ~HK$70
原隻熟蟹冰鮮.
買咗好幾日,
估唔到咁好食,
個殼大過我隻手板,
全部都係膏!
啲肉就嚡咗少少,
不過呢個價錢好抵買.
絕對會再買!


澳洲和牛 HK$63
我一啖都冇食,
星星自己煎格仔扒.

凱撒沙律 ~HK$28
吉之仔貨色,
菜都新鮮,
不過那些麵包粒已經過氣啦.

黑松露薯蓉 ~HK$127+HK$8.9
黑松露醬沒有買貴貨,
這個只有 3% 黑松露. (50% 的要$400+)
薯仔就好便宜啦,
但係星星仲要買牛油&忌廉.

Wednesday, March 23, 2011

她約我去迪迪尼

好友從澳洲回港,
我們相約到迪迪尼一日遊.

這個半冷不熱又似落雨的天氣加上平日,
人數不多,
每個遊戲都是最多排了 5-10 分鐘就有得玩,
好舒服,
係天氣乍暖還寒,
衣服穿得少了一點.
荷里活酒店的自助晚餐還不錯!
不用 ~HK$250 便飽到不行!
質量也中上.

香港迪迪尼的手信部比較少,
間間都是買同樣的東西.
我最喜歡這個 chocolate crunch,
每次到東京迪迪尼都會大手買入,
這個都寫明是 product of japan!
大罐那個有新的 honey lemon 味道 (HK$100),
小的罐是五週年特別版 (HK$135),
非常適合放各式調味料!


很久沒有跟好友玩足一整天,
很盡興!
回來家都十一點多啦~

每次獨個兒跟友人外出,
星星總是會等我的門,
這都是一種默默的關心吧?
不過星夜返我都冇等佢門啦,
會似查勤多過關心吧?
又是另一種的男女大不同.

湯煲::岩煉養生鍋


原本用阿媽個二手不锈鋼,
但係覺得水份蒸發得比較多,
次次都唔知應該煲幾多水,
我地又唔鐘意煲煲吓溝水溝淡晒.

我地都係瓦煲的朋友,
星星要肚腩型唔要直身煲,
樣子其次,
最緊要啱用.

Apita 陶瓷煲做緊 promotion,
減價至 HK$698 仲要買大送細,
賣點係煲蓋冇洞所以存氣原汁原味.

呢個相係開煲相,
湯就未煲過,
希望星期日開封啦.

Tuesday, March 22, 2011

三年抱兩?!

對於第二個 bb,
我地都抱順其自然的態度,
有就有, 冇就唔一定要追.
如果他/ 她真的來臨就會叫'豆豆',
種瓜得瓜, 種豆得豆,
就係咁簡單.

但係如果過一陣子都冇,
就唔想會再考慮啦,
唔想開始舒服少少又由頭黎過.

星星比較樂觀,
佢覺得養多個都係咁啦,
貴又咁養, 平又咁養.
我就怕,
特別因為我冇返工,
驚要洗好多錢, (但係明明瓜瓜都唔係洗好多錢.)
又怕地方唔夠, (但係明明我細個的時候都係住細屋.)
唔返工的人就鐘意胡思亂想!
其實我地都算比上不足,
生多個應該唔係太困難?? (又自言自語...)

回復經期之後都尚算準時,
上個月唔記得記錄之餘二月又得 28 日,
但係似乎都遲咗成個禮拜... ???

跟星星說可能豆豆來臨啦,
然後買了一支極可笑的驗孕棒組合!
(牌子忘了, 去萬寧睇多次之後一定同大家分享!)
結果當然係冇啦,
所以至可以寫出黎啫~
其實我擔心咗好幾個晚上....
搶心得半夜都醒咗瞓唔著!

第二日.
星: 你黎咗未?
我: 未.
星: 咁你可能真係有咗呀.
我: (呆) 吓? 尋日至驗, 今日就有啦?
星: 咁可能唔準呢? 支捧有就一定有, 冇都可能有架麻?
我: 咁其實你想有定冇呢?
星: 我唸吓先啦.

然後每一日的早午晚,
一去洗手間星星就又會再問: 你黎咗未?
我: 未. 我有我話你聽啦. 咁其實你想有定冇呢?
星: 我唸吓先啦.

最後都仲等多個禮拜.
我堅持再問星要唔要?
星: 唔係特別要追, 但係唔覺意有咗都開心嘅, 不過都要用錢同要時間照顧.
我: 呢排瓜瓜成日半夜起身係咪即刻唔想要豆豆呢?
星: 可能瓜瓜唔鐘意豆豆爭寵所以成日起身啦.

星星呢幾日最鐘意講的說話: 係亞豆 , 唔係阿斗!
好煩...

五香豬軟骨+灼唐生菜+紅豆沙



五香豬軟骨
上一次唔係好得,
再接再厲!
今次自行決定加豆乾同雞蛋!
顏色唔靚,
聽日一定要買支老抽!
但味道就好得啦!
星星話似白鹵水~



灼唐生菜加炸豆腐
好似多樣嘢食咁囉,
不過都係齋.


紅豆沙
加咗媽媽自製的6年陳皮,
又有白米的綿,
見人寫加新鮮橙皮,
再用上次檳城買超香的椰糖,
起晒沙~~~
一絕!
超香~
參考食譜

Monday, March 21, 2011

莞茜皮蛋魚片湯+麻婆豆腐+鮮奶燉蛋

星星說想要清淡啲,
整個豆腐啦,
另一個菜...
去到街市至算啦.

麻婆豆腐
用咗一磚豆腐變咗好似豆腐多過肉,
下次豆腐要買多一點.
個醬就用上次你檳城買的 Sambal,
好似桂林辣椒醬但係冇咁鹹,
好得!

莞茜皮蛋魚片湯
見到莞茜好新鮮,
醒起雪櫃有隻咸蛋,
最衰個魚販唔幫我切片!
我等星星返黎整.
媽媽話加茶瓜都得,
但係醃咗的茶瓜都幾甜.

再戰鮮奶燉蛋
今次用中細火,
半成功!
好滑啦,
不過程序都有少少出錯,
有少少熟蛋粒.
下一次一定 100 分!

Sunday, March 20, 2011

再買LeCreuset

原本買 Le Creuset 真係會上癮,
真係幾好用!

咁啱去尖沙咀食飯冇咁早,
醒起 Le Creuset 開倉,
想買個大個仔的平底鍋.


樣樣都好似相對便宜,
呢個 26cm 原本 HK$1588,
依家 HK$700
Nude color 係唯一選擇,
都唔錯啦.

樣樣都好似有用,
又好似冇用,
唸咗好耐...

仲買咗個耐熱刮,
HK$70, 半價咁上下啦.

自己煮飯就會再要啲好啲嘅廚具,
有工人的話又未必會咁買囉.

Saturday, March 19, 2011

鹵水牛展+紅莧菜湯+薯仔炒真假雞柳

唔上網查食譜,
去到街市果然係亂買嘢,
通常的結果就係冇乜買肉:P:P:P

紅莧菜湯
煲出黎個湯紫色好靚~

鹵水牛展
呢個都係奶奶的涼菜.

薯仔炒真假雞柳
買得太少雞柳,
整多兩條素雞加埋食剩的豆干,
是但揾啲嘢炒埋一碟,
但係星星話好食 :)

Friday, March 18, 2011

大阪之旅取消了

還是決定取消,
那個幅射的問題好像還未能解決.

但除咗日本,
真係想唔到一個近近地的地方特別想一去再去.
不幸中的大幸早幾年曾經到過仙境似的仙台.

台灣都好,
不過暫時都係唔好向北面行.

韓國就冇啾好食,
我唔鐘意食韓國菜,
好似樣樣一個味道.

新加坡開咗賭場之後樣樣貴晒,
環球片場又未成形,
本身個地方又冇乜特別.

泰國係好去處,
但係帶住個仔冇得dup骨咁去黎做乜?

馬來西亞又好鬼悶,
越南又唸唔到一個令你好想再去的原因?
那事件之後菲律賓唔洗旨意我會踏足.
未去過的老撾, 柬埔寨我有興趣,
但係點可能帶個 bb 去?

內地團呢?
唔到最後都唔好唸啦!
雖然都好多地方可以去.

唉...
依家過幾個月就一單大件事,
都係睇定啲先啦.

牛蔔腩+炒西蘭花+隔夜肉餅+鮮奶燉蛋


牛蔔腩是奶奶做給星星的菜,
我不吃牛的呢,
亦唔多唸住整.

炒西蘭花
終於都記得落鹽啦.

瓜瓜的西蘭花飯仔

鮮奶燉蛋
不過老咗:p
食譜寫中大火,
我個爐應該用中小火!
糖亦落得太少 :p:p
參考食譜
Blog Widget by LinkWithin