Wednesday, December 28, 2011

Taxi+Aeroplane

都係佢擦膠漿我貼.

這對飛機翼有一大進步!
因為瓜終於肯全隻手板放落個調色板度!
再將手掌放到機翼拍拍拍.

Monday, December 26, 2011

瓜瓜::19Mths


~??kg.


~??cm


上下各出咗兩隻大牙,
犬齒都見到啦.
即係有 14 隻啦~


依然係兩餐飯三支奶兩次小食.
想學大人用杯多過任何一款學習杯.
會自己叉餸食,
又會指指點點自己想食的餸,
飯好次要.
唔想食會0騾出黎.


最鐘意的活動係睇書!!
朝早起身第一件事係睇書,
臨瞓前最後一件事又係睇書,
無無聊聊笑笑口拖你隻手入房又係睇書!!!
另外就切生果/ 轉扭斗骰/ 砌積木.
餐枱底係佢間屋, 鐘意攞埋啲玩具坐入去.


通常都 2145 瞓到 0715.
半夜常常起來, 可能因為天氣轉變,
更多時因為肚餓.


一起身心情好的時候就好多嘢講.
一救命就 '媽媽媽媽媽...',
對住爸爸都可以 '爸'.
問佢 '要唔要', 好唔好', 佢都識 '呀' 表示贊成.
見到佢識的東東好興奮發出怪聲,
特別係錶, 聖誕樹, 鐘, 鷹, 車轆!


- 又唔鐘意沖涼, 可能天氣太凍.
- 古靈精怪, 好多怪表情, 好多怪主意.
- 開始肯攞人地俾的東東.
- 喊少咗好多.
- 坐櫈好定, 如果張櫈矮佢可以一 pat 坐落去佢就好開心.
- 返學的最大好處係佢學識坐定定, 坐定食飯食茶點聽故事
- 成日倒後行, 但係都係唔識落樓梯.
- 要自己揀衫著! 都係啲彩色多圖案的.
- 影相叫佢笑會向右彎腰90 度再 E 起棚牙.
- 最憎試鞋, 次次都喊到拆天!
------------------------------------------
呢排同好多不同的家長傾計,
個個都要訓練周身刀.
瓜有興趣咪繼續升班,
冇興趣咪學第二樣,
唔強求.
一星期最多咪返三樣.

6 歲前可行的興趣班:
2.5 歲 - 音樂預備班
3 歲 - 游水, 畫畫, 鋼琴或鼓或單簧管或樂器一種
4 歲 - 溜冰, 跆拳道
5 歲 - 踢躂舞, 跳彈床
6 歲 - 英文戲劇, 魔術, 騎馬

係咪好似好多呢?
瓜有興趣至算啦!!

Sunday, December 25, 2011

Lego 錶


瓜的聖誕禮物,
因為佢勁勁勁鐘意手錶!!
一日到黑就指住手錶.
仲識得分錶面, 錶表, 錶的!
所以我就決定送佢一隻手錶~

咁細個人!
咁細隻手!
一般的小童錶佢都唔啱戴.
Lego 錶似乎係唯一選擇.
格格表帶都可以除下來.
不過 Lego 錶都有好多款式.

瓜瓜自己揀的 Star Wars!
依家佢的東東我都俾佢自己揀,
佢會指佢鐘意嗰樣.


依家每次出街前佢都指住話要戴錶,
真係俾佢吹脹~~~

Saturday, December 24, 2011

幼兒園::一個月後

轉個眼瓜瓜都返咗個幾月學啦.
我覺得呢個係正確的決定.
雖然一返學就病咗 :(
不過好快就冇事啦.

返學的最大好處係佢習慣聽指令,
學識坐定定,
佢會坐定食飯食茶點聽故事,
仲會自己攞張櫈俾你添~
同人的情感處理都好啲,
可以同陌生人握手,
收佢地俾的東東,
熟啲可以主動的抱抱同鍚鍚.
大喊大叫的事情都少咗好多.

相對起其他小朋友,
原來瓜都好乖架啦.
會 tidy up,
會自己玩,
唔會爭玩具.
人地啲玩具周圍放都會主動放好,
人地開門佢去關門都算好有手尾~

一步一步由堂堂淨係掛住自己飲水,
到可以自己跳舞,
到坐定定聽故事,
到任意的玩水彩,
下一步想佢自己主動入班房忘記啲玩具.
更希望係再面試其他幼兒園時表現會好啲!

Thursday, December 22, 2011

Car+Bus

瓜又進步一啲,
可以自己用手指畫水彩,
仲自己揀顏色!

佢自己拿筆畫,
我冇幫手,
所以都係好輕力的色彩.

Tuesday, December 20, 2011

Reindeer

瓜終於都肯自願的玩水彩!
呢個係用手指仔點嘅頭飾.


Microsoft「家.從此更精彩」

自從瓜瓜出世之後,
盡量日日都同瓜瓜影相,
啲相多到要買個 external harddisk!

小朋友真係大得好快.
轉個頭瓜已經變咗個小朋友,
再唔係一舊飯啦....

瓜瓜的相片會放上加密部落格.
但係要招呼新朋友睇佢的成長路就有啲 too much!
假設一日十張,
18 個月你話有幾多???
人地邊有咁好閒情逸緻慢慢睇你個仔!

我用 Movie Maker,
一日一張相咁整個瓜瓜成長路,
加埋配樂,
整段幾分鐘的短片,
由 BB 到依家,
幾分鐘就睇晒啦!

無獨有偶,
竟然同 Microsoft 最新的「家.從此更精彩」 Facebook 推廣活動的其中一段短片內容相似!
嗰段係講爹哋係書房整片,
將相片放係 Microsoft SkyDrive,
然後大家都可以透過 SkyDrive 睇片!

不過短片最特別之處係段片入面係加入你自己的相片同朋友交流,
你好似第一身用緊啲產品,
好鬼親切!
(如果你覺得加咗你的相片 / 朋友的短片有趣, 仲可以即時 share 添!)

Microsoft「家.從此更精彩」係我最新參與的遊戲!


睇短片答簡單問題就有機會攞到 HP Pavilion Entertainment PC dm1/ LenovoThinkCentre Edge E71 (SFF/Tower) / Nokia Lumia Windows® Phone智能手機/ Xbox 360® 4GB 遊戲機連 Kinect™!!

我唔貪心......
想睇吓有冇機會贏到部 Xbox 360 Kinect :P:P
大時大節一班人玩好開心!!


玩法好簡單:
先 *Like* Windows Hong Kong Facebook page,
登上遊戲主頁, 睇短片答問題, 有 4 小段, 爺孫片最有趣, 其實老人家玩體感遊戲真係好得意 :D (我阿媽打機都好得意! 佢地特別肉緊:P) 不過唔好淨係掛住睇片, 要記低每段片曾經出現的Microsoft產品名稱, 但係要留意每段片又唔係只得一款產品! 好彩每段片尾都有文字提示!


客廳:xbox, Windows Phone,
飯廳:Lenovo IdeaPad U300s UltraBook, Internet Explorer® 9,
書房:Microsoft SkyDrive, Windows® 7, HP Pavilion Entertainment PC dm1,
睡房:Sony VAIO Z226, Office PowerPoint
(我就搵到咁多, 驚俾咗山埃貼士, 你自己登入去睇啦.)

最後寫 50 字內的創意想法, 寫低你點用短片中出現的其中一款 Microsoft 產品豐富你的家庭生活. (以上咁多產品, 你點都用過 / 擁有過啦? 五十字好簡單啫!)

記住1月31日活動就完結啦!

Monday, December 19, 2011

MsB'sCakery::MadameButterfly

今年生日私為自己選了 Ms B's,
因為瓜生日那個仍然回味中!
Madame Butterfly 有三層,
為了中間綠色的開心果味!
個樣真係好靚!


星星去攞的時候買多兩個小的.
一個係紅豆味的 Memoirs of a Geisha,
佢朋友之前食過話好食,
我覺得幾淡口,
都 OK,
不過我唔係紅豆味的 Fans.

另一個 Nutcase,
原本我同星星講到佢生日的時候買呢個.
但係經過試味之後,
係好難兩個人食到一個正常的 Nutcase,
因為撻面真係全部都係果仁!
食到牙都軟又飽肚....

講番個主角.
顏色好靚,
蝴蝶好靚.
擺係度好靚.
但係結果係有啲失望架.
因為開心果那一層完全係藥水味 :(:(:(
連瓜都食!
同個夾層桃醬又唔夾.
紅菜頭味 OK,
瓜就食晒紅色.
底層的朱古力好濃,
係全個蛋糕最好食!
下次可以買個多朱古力嘅~

Sunday, December 18, 2011

Bear+Crocodile

貼貼貼,
瓜瓜可以做乜嘢?
先用手指擦膠漿,
當然係我拿住佢隻手控制佢啦,
之後我貼完佢幫我拍實佢!

顏色都係佢拿顏色筆,
我拿住佢隻手畫畫畫,
我懷疑佢係左撇子.


Saturday, December 17, 2011

幼兒教育

近來跟其他小朋友在讀幼稚園的家長傾談,
現代教育真的痴線,
個個都有課外活動,
一個禮拜三樣都驚少,
樣樣學習要有評核/ 獎狀,
四歲人仔的獎杯可以堆滿一個書櫃!
想學嘢太多人報要抽籤!!!
我都要為瓜打算吓!

唔係想比較,
當個世界個個都古靈精怪,
你就驚個仔冇競爭能力.
做人都係未雨綢繆好啲.

原本都想生多個,
但係聽完呢啲 '活動教學' 之後真係想打退堂鼓....
使命好重呀!
生多個真係要出返黎做嘢!

瓜,
你想媽媽陪你定細佬/妹陪你?
你想多啲物質定多啲愛心?
定係你驚我地老咗之後得一個照顧我地兩老?

Tuesday, December 13, 2011

2011::又老一歲+全職主婦::8個月+大事回顧

一次過寫晒三樣嘢!
橫掂都係差唔多的事情.

自從踏入咗 3 字頭之後,
日子過得好快.
轉過眼又一日.

2 字頭同 3 字頭的最大分別係,
以前一日到黑想出街,
依家天黑你唔好搵我出街.
心歸到不得了!
而且日日煮飯而有人準時返屋企食都算係一種福氣.

陀仔的時候好驚修唔到身,
點知依家仲瘦過以前,
仲要增極都唔肥!
等我仲掉咗啲瘦人褲,
著開的褲啲褲頭都鬆晒.
依家焗住買橡筋褲頭,
肥又著得, 瘦又著得!
其實我都想肥番少少,
身體好啲他日有機會迎接豆豆都好啲.

今年最大的分別係將大部份的時候奉獻俾瓜,
當然係開心啦.
對住瓜個喊樣都好過對住老闆過笑面啦!
不過佢返學之後仲忙過返工,
睇電視的時間都少之有少.
私人時間都少啦.

唔返工變得比較小心洗錢,
依家一對鞋著足兩年,
仲要日日著!
以前三兩個月就買對鞋啦!
不過量可能比以前少咗,
但係質素就好咗,
幸好都仲有閒錢買衫 :D
因為唔洗日日轉 LOOK,
反而要著得舒適,
湊仔要方便.

旅行去咗馬來西亞, 泰國, 開平陽江同澳門,
都不過不失啦.
帶住個小朋友,
要去太遠太耐都唔容易,
但係都係好期待再去日本!

上親子班算唔算係學習呢?
識咗好多首兒歌喎,
家吓可以不停唱大半個鐘兒歌唔重覆!

來年希望家人朋友身體健康, 瓜瓜入到間好學校就夠啦!

Sunday, December 11, 2011

明玩機械雜技劇團 - "飛"比尋常大鳥巢

又有我鐘意的雜技表演!
通常雜技表演的簡介都係唔知寫乜??
評論不錯又買票啦.

結果係我覺得幾特別,
係特別,
因為佢地冇閃閃的舞台衣飾,
冇大堆頭的人山人海.
將雜技溶入亂糟糟的工廠背景,
非一般的有趣.

不過話分兩頭,
星星就覺得有啲悶,
因為雜技的本身難道不高兼熟口熟面,
最後結尾謝幕時計極都只得十五人!
以最便宜的票 $395 計算,
點都係只值 $200 喎.

--------------------------------
明玩機械雜技劇團 - "飛"比尋常大鳥巢

「獨特、觸動人心、引人入勝,極盡耳目之娛。」
紐約時報

工場 – 一個不尋常的馬戲團設計,入面有耍雜技的工人及機器模樣的馬戲團道具。觀眾除可欣賞到軟體舞表演及單輪車手的精湛演出,亦會被高空鞦韆和巨型機械輪深深吸引,違反物理邏輯的彈床表演亦令人瞠目。與此同時,觀眾必定會被喜劇演員的滑稽動作逗得哈哈大笑,為雜技舞蹈深感著迷,及為當中的幽默、愛情、飛翔及鳥巢的故事心感陶醉。

「從沒見過像”飛”比尋常大鳥巢一般的馬戲表演。」
舊金山紀事報

“飛”比尋常大鳥巢,啟發自墨西哥藝術家Diego Rivera(戈裏韋拉)的大師級壁畫、卡通畫家Rube Goldberg(路戈德堡)令人震驚的創作,及查理卓別林的電影摩登時代打鬧劇式的幽默風格。

「自太陽劇團後對美國馬戲表演作出了最重大的貢獻。」
壯麗馬戲團時報

「結合太陽劇團的壯麗及STOMP的草根別緻,是最潮的馬戲。」
Time Out 杜拜

For more information, please visit www.aba-productions.com

合家歡 / 馬戲表演
演出時間: 約1小時50分鐘 (設中場休息)

Saturday, December 10, 2011

大都烤鴨

平時出街抱住隻瓜加個奶粉袋,
星星都唔俾我帶相機 :(
換咗 iphone,
拍食物就方便啦.
加埋用 apps 整一整,
個畫面即刻靚晒~

新開的店,
報紙寫得天花龍鳳,
'以明火掛爐及果木燻烤方式烤製的烤鴨',
我又鐘意食烤鴨,
立即試一試.
不過唔好彩有幾樣想食的東東都售罄 :(




















蠔油磨菇,
個人非常欣賞那個刀功!
味道也佳.

蜜汁豬肉蝴蝶餅
好似蜜汁烤煙肉,
少啲牙力都唔得.























烤鴨絕對係我係香港食過最好食嘅!
新鮮, 香濃, 脆口!
非常推介!
不過冇得坐係枱度睇表演!
鴨皮切得薄,
薄餅煙勒,
配菜都有好多種類,
哈蜜瓜絲真係好夾!

乾煸四季豆夠乾身.
爆三鮮係三款鴨內臟我冇食, 不過反對似乎唔錯.
鴨絲XX羹係加錢的烤鴨兩食, 都好好味.

不過樣樣都好小碟,
最後加個黃鱔麵同黃金蝦仁炒飯至夠飽!
四大一小, 埋單七百多,
都唔係貴啦.

大都烤鴨
地址 : 尖沙咀河內道18號K11購物藝術館2樓221號舖
電話 : 2628 0662

孜然焗排骨+魚香茄子+炒菜心

Friday, December 9, 2011

澳門::大倉酒店

上次悅榕莊買一送一,
一定要今年內完成,
所以我地又去澳門啦!
其實都冇乜嘢做,
帶住瓜瓜又唔入得賭場!
所以叫埋公公婆婆,
至少人多啲叫餸都可以叫多啲 :P

將悅榕莊俾兩老,
今次佢地住低層,
有個露台!

我地另外訂咗同地點的大倉.
點解係大倉而唔係更便宜的銀河?
因為我成日以前大倉係三間之中最平,
而星星又話蔡瀾讚不絕口.
是但啦,
我地係淘寶搵到間旅行社好平,
俾一個平過銀河的價錢就住到大倉啦!
不過訂的時候都好擔心,
都唔知會唔會呃人!
問咗勁多問題,
然後店方話係訂房後先付支付寶,
住完再確認付款,
我地至試一試.
訂完之後亦有打電話 / 寄電郵到酒店跟進!
結果我地係成功入住架!

坦白講我係又少少失望,
房間都幾細,
設備又一般.
(比較咗悅榕莊真係差太遠...)
相迎的價錢應該同十六蒲比,
不過個人喜歡十六蒲多啲,
至少沐浴用品係 L'occitane!

張床好幾舒適.

有兩隻紙鶴放係枕頭上面迎賓.

休息的櫈,
唔係咁好坐,
主要係瓜瓜坐係度食餅.

辦公桌,
我成日都好驚瓜瓜撞埋去!
玻璃面又不锈綱腳!

唔知係咪個牆身設計問題,
個電視好似好細咁,
不過電視台的選擇娛樂性豐富.

浴缸都 OK,
個電視就細啲.
另有淋浴間.


有兩個洗手盤,
個手龍頭係瀑布水.

浴室用品非常齊全,
但係竟然衣櫃部竟然係冇鞋抽!!

要彈的係問佢攞 BB 床,
竟然得到一張網床!
咁深! 我點放個仔入去瞓?
而且網床的板都唔適合瞓覺啦??
太唔貼心啦!!

Wednesday, December 7, 2011

河馬+熊貓

瓜瓜真係好乾淨,
呢隻河馬的灰色係要自己用手指將黑白水彩溝出黎,
佢溝得好痛苦,
不斷拿起隻手指叫我幫佢抹乾淨!!



到第二次整熊貓,
佢又怕棉花,
又唔想掂水彩,
完全唔肯幫手!

Friday, December 2, 2011

津白菇菇+蒸排骨

天寒天凍最好就係整個砂鍋津白~
熱辣辣!!

Thursday, December 1, 2011

師奶的一天::瓜@親子班

7.30 瓜瓜醒我醒, 飲奶, 換片, 玩遊戲
8.30 星星返工, 瓜跟我買餸
9.00 食早餐, 瓜又食
9.30 陪瓜遊戲 / ipad / youtube / 睇書
10.30 準備瓜午飯, 瓜沖涼
11.30 瓜食飯, 起碼半個鐘
12.00 迫瓜瞓覺, 因為一陣要返學
12.30 午飯
13.30 準備返學唔好帶漏嘢
14.00 一齊上堂
16.30 放學返到屋企準備晚飯
17.00 陪瓜遊戲 / ipad / youtube / 睇書
18.00 瓜晚飯, 其實食半個鐘耐唔耐呢??
18.40 星星抵家陪瓜, 我煮餸
19.10 晚飯
19.45 陪瓜遊戲 / ipad / youtube / 睇書
20.30 沖涼
21.00 瓜睡前小故事
21.30 輔助瓜入眠
22.00 瞓覺

其實瓜返咗學之後真係忙到冇停手!
有冇發現除咗煮飯之外冇其他家務事??
因為基本上係冇時間,
洗衫熨衫吸塵拖地,
通通都要留待瓜唔返學的日子!

鹹檸檬蒸烏頭+扎肉炒萵苣+麵醬蒸排骨

Tuesday, November 29, 2011

Zebra+Tiger

瓜瓜同媽媽用棉花棒合作的斑馬!




















同婆婆整的老虎.

Monday, November 28, 2011

幼兒羽絨::Mont-bell

今年天氣報告話冬天會比以前凍啲同長啲,
所以季初已經為瓜瓜物色一件羽絨.

我偏好樣靚, 時裝牌子,
好多牌子的絨毛比率低,
或者好多奇怪嘢, 例如多幾條拉鍊幾個口袋,
又或者冇咁細個的碼數.
其實 Uniqlo 那件真的不錯,
至少平靚正.
但唔鐘意那些顏色,
那個紅跟那個綠, 唉....
係因為星星之後買咗件想配做父子裝,
而且想買的時候黑色已經斷碼 :P
如果唔係真係太貴,
Nicolas & Bears 同 Izzue 都好有型,
但係小朋友著得一季仲要唔知著得幾多日就浪費咗啲囉.

星星家姐就偏好功能性.
所以佢幫瓜睇咗好多專業牌子.
當然功能性強個樣就差啲.
當中 Aigle 唔錯, 但又係貴.
最後敲定 Mont-bell.

有小童碼, 最細有 80, 瓜著 90,
雙面兩隻顏色都可以,
男孩是藍與橙,
當然女生的更漂亮.
最緊要唔係大大舊想抱都難!
$580, 都不算便宜, 係相對便宜囉.

Mont-bell 官網.

Sunday, November 27, 2011

談幼兒園

踏入十一月,
好多幼兒園都開始面試, 收生, 留位.
我算比較懶散? 輕鬆? 冇所謂?
報咗 4 間.
其實我都覺得報得多...
而且我心儀的那間過咗年至面試.

點知依家返幼兒園跟其他媽媽祖母閒聊,
7-8 間真係閒閒地,
話要漁翁撤網,
又研究邊間收咗邊間唔讀,
原本唔緊張都緊張埋一份.

暫時瓜瓜見了兩間,
第一間下半場非常不合作,
衰到我同星星講如果間學生收佢都唔好讀, 咁嘅學生都收一定係呃錢架!
點知轉頭第二輪收生又收到信俾瓜讀下午班!! (莫非有教無類??!)
可能同時間好幾間學校同時收生,
其他人都揀有學卷的學校啦.

另一間係我次選,
瓜瓜當日心情勁好,
除咗專注力低同唔識講嘢之外都做得好好啦!

其實我都唔明做乜十月就面試,
間間鬥早博你俾留位費!
得十幾個月人仔你想佢識啲乜????

啲家長又好緊張,
仔囡面試係星期六,
個爸爸著西裝咪多咗囉?!
親子時間你著西裝??!!
--------------------------------------------
我選幼兒園的要求呢:
--
交通方便唔太遠,
返學之餘仲要買餸!
又驚落雨又怕車多.
我唸住日日送佢返學架!
--
信任傳統名校,
唔知呢,
總係覺得新派那些比較商業化.
而且一向住本區,
有歷史的好學校由細聽到大.
--
語言好重要,
細個學外語容易啲啦.
特別普通話我唔識教.
--
偏向傳統教學,
因為接住讀小學會易適應啲.
--
校服都唔好太醜樣,
要日日著喎! :P:P:P
--
師資反而其次,
讀得書多唔代表有愛心.
面試的時候我好留意啲老師,
睇吓佢地對住小朋友的表情係咪真心的笑容.

Saturday, November 26, 2011

瓜瓜::18Mths







~10.9kg. (又係病完, 輕得好快.)


~81cm


出咗兩隻大牙,
另外有兩隻仲係白點.
因為牙痕,
好多時夜晚比較難瞓著,
又會咬手指流口水.


兩餐飯三支奶兩次小食.
除咗奶樽外,
唔識用其他類型的杯.
但係想自己用攞匙羹食飯,
或者用叉叉住食.


仲係最高興推車仔,
樣樣都可以推.
最鐘意坐係度拍一聲向後躺 /或向前!
好似 free fall!!


通常都一覺 2145 瞓到 0715.
因為要就返學時間,
依家下午都未能定時,
通常瞓得一陣.


冇乜進展,
都係火星文.
不過 '呀' 得黎有唔同的語氣,
有時興奮, 有時疑問.
最鐘意的火星文之一: 得架得架得架得架得架得架得架得架得架.
最叻講'冇'.
不過佢用手指, '呀' 加擰頭已經可以表達佢大部份意思.


- 會幫手澆水
- 想自己著衫
- 成日咬人, 拍打人, 我依家手腳好多瘀痕, 好似被虐打一樣!
- 更多時係臨瞓前先咬得個膊頭5 分鐘!
- 又鐘意番沖涼, 但係要企係度唔肯坐.
- 要坐大人櫈唔要護欄, 所以拆咗高櫈那條欄.
- 開始返學
- 一聽到音樂就會跳舞
- 換片前會自己攞條新片.
- 瞓覺前會幫忙熄燈.
- 用拖住你隻手指引你佢想去我地方.
- 唔會爭玩具, 佢有佢玩, 人地攞佢玩緊的話都冇所謂, 佢會自己搵第二樣玩.
- 會扮喊, 會扮嗲, 會扮可愛, 會扮嬲.
- 攞新嘢之前一定會望吓我睇吓批唔批.
- 人地俾嘢佢一定唔要, 無論玩具定食物, 就算係鐘意的食物都唔會要.
- 一唔高興就跪地甚至扒係度.
- 會自己洗手, 抹手, 抹枱, 其實佢都好乾淨.
- 成日係地板幫我檢垃圾, 例如頭髮紙屑.
- 會點頭, 不過未等同'要'.
- 成日指住天上的鷹!
- 剛開始肯玩放唔同形狀入洞的那個盒, 不過玩多幾次都唔啱就唔玩!

Tuesday, November 22, 2011

買物

以前買咗新衫返屋企總係急不及待的拿出來左拼右拼,
依家買完放係個櫃入面到下年,
係下一年的同時間, 唔係下一季!
都仲係放係膠袋入面!

新電話新科技,
要即刻叉電,
一叉完要研究研究.
家吓星星送咗部 iphone4s 俾我,
雖然我都期待跟大家 whatsapp.
但係我連電都懶得叉!

係咪年紀大咗呢?
想點??
定係我純粹想購物???

洋蔥蒜心炒豬扒+麵醬蒸排骨

Monday, November 21, 2011

蜜糖芝麻包



















很喜歡吃芝麻.
冇落糖改用蜜糖,
自覺落咗唔少,
但係都唔多覺有甜味囉?!

Saturday, November 19, 2011

Cheesess::芝士蛋糕
















New York Cheesecake + Strawberry Brady Sauce

小碼的很小巧不過好味道!
香滑又唔太實淨兼唔太甜.
兩個人食就剛剛好.
三個人食就有少少唔夠.

個人覺得唔加果醬淨食蛋糕香濃啲~
味道 OK,
不過果醬本身比較水狀,
唔太識欣賞 :P

蛋糕就一定會再買其他味道食吓!

Cheesess
地址:中環雲咸街31A地鋪
銅鑼灣希慎道2-4號地下15號舖
尖沙咀彌敦道100號The ONE Kiosk 1 四樓
電話:2530 0050

Tuesday, November 15, 2011

瓜瓜正式返學
















係上 playgroup!
之前有係其他地方試堂,
但係呢次係正式的一個星期三日,
每次一個半鐘,
係幼稚園辨學,
所以有校服, 書包, 私家杯同私家毛巾盒.

點解係度上?
因為始終係幼稚園,
地方比較大,
課室大, 遊戲的地方大.
有地方俾大家走動.
真正幼稚園老師教學,
成件事情比較認真.
90 分鐘的課堂,
有多一點暖身的時間去適應課室環境.
最後係收費都唔貴!

點解瓜瓜咁細去上堂?
因為瓜瓜係我地兩家之中唯一一個小朋友,
冇乜同其他小朋友一齊玩,
欠缺耐性又大脾氣專注力又低,
係, 書本的東西我可以自己教,
但係人際關係做人態度就要佢自己領會.
上堂唔係想佢學習什麼課本知識,
只希望佢可以習慣吓群體生活,
學習等待, 學習呢個世界唔係事事如願.

好啦,
咁上堂做啲乜?
每件事情做 15 分鐘.
有一個外籍老師,
正正係上次面試日講故事那位!!
一個輔助的中國籍老師.
12 個學生,
一半係外傭帶,
其他的係同婆婆嫲嫲,
只有另一個同我係媽媽,
即時覺得瓜瓜好幸福!

先係操場玩各式自行車,
不過瓜瓜唔肯坐只係推!
仲有小小遊樂場, 有滑梯, 有爬爬蟲山洞, 有轉轉椅.

下一節入課室聽歌玩大件的玩具,
可以自由的跑跑跳跳.
瓜瓜成日私下走去搵其他唔關事係四周收好的玩具!

之後就排隊洗手去第二間房食小食,
瓜瓜自己開水, 洗手, 關水龍頭.
難得之後佢肯等一陣攞食物,
可能唔係太肚餓.
然後自己放餅乾入口,
口乾又自己飲水,
不過佢食得慢,
俾隔離個鼻涕蟲女同學食咗佢最後塊餅!
食完仲俾番個碟老師.

下一節算係正式學習,
老師教長頸鹿,
但係只係見圖,
連 'Giraffe' 的英文字咭都冇.
然後就做個小手工整長頸鹿,
我盡量想瓜幫手,
不過佢肯坐定一齊做已經好好啦.
整好咗瓜又幫我攞俾老師.
















之後又係洗手時間.
洗完手就圍圈聽老師讀書,
呢個係瓜的弱項,
係點石成金的故事,
皇帝隻手掂乜都全部變金.
但係故事時間瓜就唔肯自己坐啦.

最後又係唱歌跳舞
一班人玩,
所播的歌全部瓜都熟到不得了,
所以佢都跳得好開心,
又因為佢太開心,
每一首歌之間停頓兩秒佢就尖叫!!!
最後講再見的時候仲抱抱老師!

有其他小朋友係唔同啲,
瓜瓜全程都好乖!

第一次見到瓜瓜穿著校服,
內心非常的激動仲有啲眼濕濕添.
上堂的時間過得好快,
而且瓜瓜都好開心亦比想像中快融入課堂中.
結果係我好攰囉!
一來一回, 加上課堂四圍走,
仲辛苦過自己返學!
Blog Widget by LinkWithin