Friday, December 31, 2010

2010 大事回顧

最大的事莫過於生咗個仔???!
全年的事都係圍繞著瓜瓜發生.
大肚, 生仔, 湊仔.
忙過不停.

搬咗屋囉,
裝修搬屋執嘢,
長做長有.
好在唔係求其搵個地方住,
而係真係一絲不苟的每一個細節都有討論過,
都好攰架.

工作將會展開新一頁,
容後再談.

仲有乜特別呢?
都冇啦,
冇事即係好事啦.
仲想點呢?

下一年淨係希望可以去多兩次旅行,
補償一下舊年冇得去囉.

Wednesday, December 29, 2010

牛扒+銀雪魚+手打墨魚滑菜心仔


張賣相真係衰得冇得再衰!
一開波就開水煮菜心仔加埋個手打墨魚滑,
完成工程之後俾星星發現冇煮飯!!
之後星星蓋住煲菜就發黃啦...
飯熟就煎牛扒同銀雪魚,
件魚仲要分開咗幾件!

幾時至會整啲複雜啲呢??
成日都驚複雜多料兩個人又食唔晒...

Tuesday, December 28, 2010

聖誕節總結

24 號有得早放,
去花墟買咗棵小型聖誕花,
之後去福榮街的大中華晚飯,
味道好, 夠大碟, 周街入錶泊車位,
HK$300 炭燒乳豬, 似葡式燒豬, 要預訂, 唔肥脆口有炭香.
HK$150 鹽燒烏頭, 我老豆大讚話好入味. (有大有細, ~HK$120-180, 我地食中價都有手指頭到手踭咁大條!)
鐵板黑椒豬手, 名物, 黑椒汁好香, 豬手嫩滑, 鐵板超大煙咁上菜型!
東江豆腐煲, 西蘭花冬菇,
仲有芋頭鵝煲, 芋頭吸咗鵝油好得, 鵝就炴完分唔清邊度打邊度就冇心機揀.
六個人都食唔晒,
埋單 ~HK$800.
絕對可以再去.

25 號星期六,
美孚日打咗個邊爐暖 lov lov.

26 號跟十兄弟去咗麥同學之家,
交換禮物 + HaggenDazs 雪糕火鍋,
天氣咁凍但係啲雪糕都熔得幾快囉.
交換禮物得到無印音樂盒, 星星得到遊戲機錢箱.
晚餐於太古坊 Grappa's,
八個人family set,
8 soup + 4 entree + 2 appetizer + 2 pizza + 2 pasta + 8 drink + 8 dessert,
埋單 HK$1417,
真係唔貴喎!
聖誕食個西餐感覺聖誕啲~

27 號就星星的朋友到我家集會.
之前用咗好多個晚上收拾所有的盒!
終於都清理晒所有的地方~ (都係星星清啫 :))
買咗枱櫈,
Ocean Three 訂咗到會,
有得食有得玩.
他們帶來煙火雞同白酒.
突然間又咗咁多人,
覺得間屋原本都唔細喎,
特別個廚房有 5 個人一齊做事都唔迫喎!

Sunday, December 26, 2010

瓜瓜::7Months

一個月過得真快.
瓜瓜成日好似想爬咁,
扒係度的時候對腳撐吓撐吓.
鐘意企係度,
當然係要大人扶住啦.
鐘意講嘢,
成個口水仔咁.
食各樣的固體食物,
粥, 南瓜, 蕃薯, 紅蘿蔔,
不過似乎蕉最吸引.

我呢.
完全復完啦, 個身形,
以前的褲開始要加皮帶!
問你死未!

Friday, December 24, 2010

鹹魚

星星收到保險公司的年結單,
但係又覺得應該未到期.
我: 你結婚前定結婚後買架? 不過都應該生仔後至買架啦, 你邊有對我咁好吖.
註: 星星結婚前一路都冇買保險架, 得一份出街唔覺意打爛就有得賠的廢保!!
星: 梗係唔係啦, 應該結婚前就買咗啦, 我對你咁好.
我: 你對我好? 唔好扮嘢喇.
星: 梗係啦, 再唔買的話死咗你都拿我條鹹魚出黎鞭屍!
我: 咁你就精啲.
---------------------------------------
星星無厘啦謂放個頭係我個膊頭上面.
我: 拿開係個死人頭啦, 好重呀.
星: 點解你唔叫我拿開個鹹魚頭? (高低音好似: 譚魚頭.)
我: 點解要係鹹魚頭?
星: 因為我係鹹魚.

BabyBirthPoster::Chaiv

其實只不過係幾個字的排板,
但係幾得意囉.


All from Chaiv

Thursday, December 23, 2010

煎豬扒+白菜仔+雞蛋布甸

一個禮拜煮兩次飯,
次次都係一個肉一個菜.
因為試煎pan,
每一次都煎唔同的肉.
今次一人一包豬扒.
整到格仔紋啦~
係要讚一下個抽油煙機,
煮完個身都完全冇味,
勁!




五代同糖的雞蛋布甸,
名符其實的雞蛋布甸!
味道不錯,
不過都唔平.

Tuesday, December 21, 2010

Hats::sweetpeatoadtots

啲帽好得意,
但係 bb 仔仲得意!
有戲架囉~






All from sweetpeatoadtots

Monday, December 20, 2010

準備::聖誕節

- 每一年都好想買一棵聖誕榭, 真的買落葉, 假的又浪費, 最怕係節日後要搵個地方收埋那些裝飾物到下年再再出關.
- 雖然 ikea 那棵 3 尺真樹減到 HK$50 好吸引.
- 每一年都要為選購交換用的聖誕禮物而煩惱, 每一年大家都增加多項被嫌棄的禮物清單: 毛巾, 頸巾, 月曆, cushion, 'boots 架'......
- 今年到依家都未買 :p
- 尋日執屋做足一日, 希望聖誕前可以整得完.
- 終於都買到張枱, 細細張足夠兩個人, 然後可變大到六人用, 宜家貨色, 千多元, 都唔錯, 不過未得閒開箱裝配.
- 但係多多要求的我倆仲未睇啱櫈囉! 又要好坐, 又要慳位, 又要靚仔, 當年睇中那張有扶手的無印已經售罄唔出啦.
- 最後應該係日本城買住幾張款客頂住先 :p 自己坐的就慢慢睇.
- 款客的刀叉羹係無印買咗啦.
- 還要到超級市場買一大埋調味料, 唔煮得都睇得 :p

Sunday, December 19, 2010

月曆2011::點點印::收貨


比想像中快到,
都是順風速遞.
訂咗十日左右就到啦.

包裝精美,
一盒兩個.
因為用粉紙而沒有加光面,
總覺得有少少朦朧的感覺 :p
底座是平實的瓦楞紙,
也不錯!
係月曆的本身整體細個仔咗小小,
亦冇舊曆,
如果大番啲咁月曆字就可以大啲啦.

下年可以繼續!

Thursday, December 16, 2010

洋蔥大蝦+菜心墨魚

筲箕灣街市經常有平靚正海鮮,
逢星期日都見到我地.
今次想試吓用新pan 煎大蝦,
墨魚大大隻好新鮮, 星星又愛吃.

完成圖::仍然係擺得極衰, 張相望落去一啲都唔美味!

煎大蝦中, HK$50 兩大隻!!

乾煎已經好香啦!
加咗洋蔥同蔥墊底, 同樣香口.

菜心一定甜,
買的時候大量蜜蜂圍住晒!
墨魚店主已經幫我地去咗內臟,
其餘交俾星星, 我做唔到切開一件生物 :p
我淨係將佢地炒埋一碟.

Wednesday, December 15, 2010

幾句

- 工作很忙, 不過忙得快死得快. 得個忙字, 都冇收益.
- 尋日上磅: 56.6kg, 不遠矣. 不過啲衫褲都著得返啦, 都唔急啦 :p
- 聖誕要招呼朋友, 要去買枱買櫈買刀叉買酒杯, 突然間又有好多嘢要買.
- 原來 sogo club borghese facial 都有滙豐咭回贈, 即時好似買十送一.
- 終於都開咗幾個搬屋留到依家的箱, 希望聖誕前可以處理晒佢地.
- 已經習慣咗星期六去探奶奶, 反而星星覺得有啲繁忙.
- 只要沒有突發事情就好, 生活已經十分充實啦.

Tuesday, December 14, 2010

非誠勿擾

天天天晴都做完啦,
唯一一齣日日都要睇的劇集做完啦,
真係完全唔洗睇電視,
連 MYTV 都冇需要.
唯有自尋出路.

真人騷: Project Runway s8 / Amercian's Next Top Model s15 又剛剛完結了.
台劇: 言, 覺得佢太 chok 囉. 流沬之夏又唔鐘意黃曉明.
日劇: 抱住個仔好難睇字幕
卡通片: 驚第時瓜瓜大咗唔日日睇呀?

最後試睇爆紅的內地真人騷: 非誠勿擾.
又幾好睇喎.
沒有遊戲, 沒有支體接觸.
純眼緣 + 少量對話,
見到啲人一見傾心然後對方又同時會選擇你的時候都好鍋心.
有啲人一出場就俾人配對咗,
有啲呢出場好多次都無人配對,
好現實.
有時啲人講啲無厘頭的理論又幾攪笑.
又可能因為大家都化晒妝,
啲女仔都幾靚.
但係又唔一定靚就快俾人配對走,
心地都好緊要架.

Monday, December 13, 2010

是日Q&A

Q: 生日有乜嘢攪?
A: 冇. 完全冇唸過. 可以有乜嘢攪?

Q: 點解仲返工?
A: 生日就唔駛搵錢定係生日願望發大達仲要願望即時成真? 又冇人陪我放假, 咁一條友可以做啲乜?

Q: 陪瓜瓜咪夠囉.
A: 唔係呀話? 請假湊仔仲忙過返工!

Q: 有冇打扮一下.
A: 冇. 著得仲衰過平時, 今日好凍喎.

Q: 星星送乜嘢俾你?
A: 冇. 仲要最後同你講你自己去揀啦. 點解唔一早講呢? 係咪唔記得買所以叫你自己揀? 一早講一早買今日都有得收啦. 今日至講, 即係今日一定冇得收啦.

Q: 夜晚會唔會出去慶祝?
A: 冇唸過, 帶住隻瓜去得邊? 況且星星都冇唸過, 下晏嗰餐都係我自己唸!

Q: 生日蛋糕都有啩?
A: 好在一早講咗要食 Sevva, 朝早訂下午有得囉, 如果唔係就真係蛋糕都冇個.

Q: 都老夫老妻囉.
A: 唔係嗎! 一年都已經咁啦, 未來的日子都冇運行架啦. 唉.... 真係提少次都唔得!

Q: 又老一歲啦.
A: 係囉, 就黎唔可以同人講幾多歲啦.

Q: 生日願望?
A: 冇乜特別, 咪身體健康嗰啲囉. 冇病冇痛仲想點?

Sunday, December 12, 2010

織織復織織


織織復織織,
總監找來新玩意,
去學織布!
官方介紹好似好得意囉!
打鐵趁熱,
即刻搵個星期六去試一堂入門班,
可以做到一小塊布足夠做個卡片套.
唔知係屋企全職織布搵唔搵到食呢??

上網預約時間,
去到至俾錢.
頗簡單的教室,
就係得兩部織布機,
好似兩部衣車咁大,
無端端係屋企係唔會放一部!

織的過程好簡單,
放塊有洞的卡入機,
左推右推就完成一塊花布啦!
好鬼有滿足感~
最麻煩係開頭同收針囉.
完成後燙一下就得啦.

不過咁簡單的事情遇著我都係多災多難!
中途斷線啦,
無端開洞啦,
旁邊走線啦,
唔知點解啦,
總之...
整咗三次都係有問題囉!!!
不過都因為咁,
我得到三塊布囉~
最大嗰塊有心機的話可以可以造個頸圍俾瓜瓜.

我同花木蘭都係冇乜緣架啦...
但係都唸住再接再厲~
遲啲再去玩過.

小店的部落格

Thursday, December 9, 2010

Ferragamo::Maryland


找了很久的平底鞋終於都有著落!
我最介意人地對鞋,
偏偏自己就成日著對個鞋頭爛晒嘅鞋,
自己都嘔心!

冇辦法,
日日抱仔著平底鞋安全啲,
但係以前都係著高跟鞋多,
得呢一對金色平底最好著兼最易襯.
內外全皮的飛甩雞毛,
啞金色點襯都得,
不過真係著得太多,
個鞋頭冇得救啦.

考慮過好多牌子,
大牌子經典款長出長有,
但係年年加價.
BV 的織皮唔錯,
不過那個渾圓的鞋頭加黑色的皮,
七十年代襯旗袍返學一絕 :P
Roger Vivier 經典平頭四方扣顯得我對大腳超大,
而且啲白鴿眼姐姐真係好難頂,
俾錢仲要睇你面色? no way!
我唔會俾佣你賺嘅!
kate spade 都 ok,
不過個鞋頭大蝴蝶結真係有啲麻煩.
marc jacob 就一街都 copy cat.

本來想去 twist,
睇吓有冇平靚正,
上網搵地址的時候發現 sogo 有 ferragamo 開倉,
呢啲咪係緣份囉!
又係佢~
Maryland 1cm,
個桃紅色好靚呀,
仲要著上腳好似好細對腳咁!
(其實桃紅色的東東都買落唔少 :p)

Tuesday, December 7, 2010

好想購物

大牌子周街都一模一樣,
商場小店都是賣差不多的淘寶 / 韓國衫,
顏色都係嗰幾隻,
令人一啲俾錢的衝動都冇...

好想購物呀!!!

漢堡扒+勝瓜菇菇湯+臘xx


漢堡扒用光波爐,
可能用咗高腳架太近個光源,
乾到痺!

勝瓜菇菇湯,
一條勝瓜 + 磨菇 + 秀珍菇,
用幾粒瑤柱貝調味就剛好.

個飯一舊舊啡色的東東係星星要食的臘鴨 + 臘肉,
放飯面一齊蒸就得啦,
不過佢把寶刀就糟糕啦!
啲臘xx好硬架麻!!

Monday, December 6, 2010

燒烤包+白菜湯


是用新買的牛扒板測試的,
吉之仔燒烤包,
貪佢可以試多幾樣,
雞翼+豬扒+牛xx (唔識分 :p)
用塊板燒真係唔同味架!
用啲咁普通的肉都做到燒烤的味道,
好香架!
仲要燒咗好一陣子都仲咁 juicy!
不過我懶有整格仔紋.
今次成功,
星星可以買塊貴牛扒煎吓啦.

白菜仔加墨魚丸滾一滾,
得咗.

Sunday, December 5, 2010

燈燈燈燈::枱燈


星星總是說書櫃旁要加多支地燈,
因為那個角落唔夠光喎...
我覺得個天花燈已經超勁光啦,
佢又話唔洗吓吓開天花燈囉...
總怕瓜瓜大啲會一手揮底支燈,
所以就搵咗幾款枱燈放入書架上,
好似安全少少 :p

人民幣 388, 購自灯火辉煌,
算是在淘寶比較貴,
不過實在漂亮.
盒裡面仲俾對白手套你裝燈,
唔知仲以為買咗件好貴的貨!
實物比想像中大了一點.
而且內地與香港的插座不同,
星星又要出動個工具箱換咗佢.

在白色與紫紅色之前想了很久.

【花瓶】K-24
产品参数
产品名称: 台灯(另有 同款 壁灯)
产品材质: 冷轧钢板
产品颜色: 白色 / 紫色
额定功率: E14 40W ×1(赠送光源)
额定电压: 220V
产品尺寸: Φ:30cm 高:43cm
产品用途: 适用于客厅、房间、书房等各种现代风格空间

喜歡這個系列,
下次換燈可以考慮一下.
I.T. 的店也用這個式樣的燈啦.

Saturday, December 4, 2010

檳城攝影師::KennFoo

總覺得檳城冇乜嘢玩 :p
廟又冇興趣,
森林區又驚蛇蟲鼠蟻,
唔通日日行商場咩???

想搵吓有冇攝影師幫我地一瓜三口影吓相 :p:p
見當地一般攝影都唔係太貴,
家庭照約 2 小時 ~HKD1000-2000.

題外話:
星星第一反應: 又影相!!!
我: 咁我自己同阿瓜影囉~
星: 咁又唔得喎!
(不過佢把口都係話唔影架 :p 到時睇吓點! 錢都俾咗啦~)
(冇得唔搵人影啦, 星星啲攝影技術真係 xyz%^&$#$.... :p:p:p)

首選: Kenn Foo
佢似乎今年至開始攝影師生涯,
但係可能新, 所以佢啲相冇咁 standard,
比較 fresh 同 energetic 啲.
執相模式就更特別!
好似睇漫畫咁~ (風雲嗰隻~)
好彩佢有期!
希望影 1-2 個鐘,
影啲好馬來西亞的外景.

次選: Daniel Yap
同第一個其實差好遠,
真係要決定都要唸吓 :p
不過佢都冇期.
佢再介紹的 Milen Teh 更加唔係我杯茶.

三選: 真係冇啦...

Kenn Foo 一路用電郵溝通,
都回復得好快,
tailor-made 咗個價目表:
- 影兩個鐘任影
- 全部檔案連全部執相
- DVD 一隻
- 一本 8.5" x 8.5" 的 40 頁相簿
- 650 馬幣 (~HKD1600) + 郵費

價錢都 ok,
見我海外顧客俾咗少少折扣啦 :D
地點佢俾咗一系列的地方,
(順便睇吓有乜地方好玩.)
不過佢先收一半叫我電滙,
手續費咁貴又唔係好想,
未決定.

Friday, December 3, 2010

AsiaMilesVS北海道

想去北海道,
但係 AsiaMiles 登記下年 8 月到 11 月都 '滿座',
係咪真架??

但係如果能夠兩日後就動身即係 4 號出發,
佢又有位囉!
即係要即興遊埠呀???

好想下年去呀.
瓜瓜兩歲前飛.多.幾.次.就好啦...

Dress::MagnolijaDRESS

作為姊妹裙或飲裙也不錯.






All from MagnolijaDRESS

Thursday, December 2, 2010

LeanderBabyMassageClass

買 high chair 的時候睇 Leander 的官網得知有送嬰兒按摩班,
係 mothercare 賣嘢啲小姐係冇講你聽的,
要買咗之後自行上網登記.

話說都買咗差唔多成年啦...
但係一路都安排唔到開班,
相信一來冇乜人買 :p
二來有錢買的都自己俾咗錢學按摩或者俾人按啦,
三來都冇乜人好似我地咁鐘意買嘢前睇官網!!

終於終於都有堂上啦,
星星好雀躍因為佢真係好鐘意同瓜瓜按摩,
而瓜瓜一俾人按 (即係摸!) 就會 '咔咔咔' 咁笑出聲.
不過地點就遠咗啲...
... 貝沙灣 ... 個會所!!
(死未!)

山長水遠的去到,
由於本人十個窮未能入住貝沙灣兼未能高攀住係貝沙灣的朋友,
個會所都幾難搵,
電郵中個地址又寫得唔係好清楚又冇地圖.
好在叫屋企人車我地去,
如果搭巴士或者小巴然後行路去搵都行死你!
呢個實在想鬧爆主辦單位!
雖然可以揀香港 / 九龍 / 新界啫,
香港區要去到最西的西真係要 XYZ%^&%&*^*!!
我要帶個 BB 仲要攞好多嘢去架.

官方叫我地帶一套衫兩條毛巾,
加上平日都要帶的奶粉尿片...
成個咕喱咁... 阿星星...
(我要抱仔啦 :P)

開頭以為要差唔多兩個鐘咪叫屋企人走先,
點知只不過係一小時貨仔,
早知叫佢地去香港仔買餸等埋我地啦.
唉.....

入到課室見到放咗 4 塊墊以為有 4 家,
到上堂的時候得番 2 家!
另 1 家 bb 病咗 :(
仲有一塊墊係俾主辦單位個小姐嘅!
瓜瓜就 6 個月啦,
另一個呢?
已經一歲半啦!!
都唔係好肯俾任你舞啦.
(相信都係買咗好耐...)

內容都 ok,
講解咗按摩油同按肚仔,
不過其實有時間可以講多啲囉.
時間有多人又少點解唔教多兩招呢?

走的時候有一大袋的紀念品,
係咩呢??
毛巾一大條! (沖涼嗰隻厚身版, 質地都唔錯.)
不過真係一抽二'能'囉.
早知佢送我就唔洗帶啦.
好在行去到小巴站的時候發現有直車,
25 分鐘小巴就返到屋企啦~

Wednesday, December 1, 2010

動手裝::LeanderHighChair

買咗個咁貴的工具箱,
當然要付出少少奴力啦 :P
張櫈係就係買咗好耐,
但係瓜瓜之前都唔識坐,
屋企又唔知放邊,
就一路都冇理過啦.

貨到的時候係一大盒的散件,
好似宜家傢俬咁自己動手,
啱晒星星晒吓佢個工具箱.

附送:
冇樣睇勤力星工作照.
Blog Widget by LinkWithin