Friday, November 19, 2010

染髮劑::RevlonColorSilkLuminista

我係唔鐘意去髮型屋架.
唔係因為剪髮貴,
係因為覺得好晒時間!
去一次起碼兩個鐘.
髮型屋係好得閒的時候至會去,
以前係澳洲讀書的時候悶得滯,
髮型屋就最啱啦,
一坐一個下午,
差唔多所有的顏色都玩過晒!
最無聊試過面一層係紅色, 底一層係橙色!

唔係特別鐘意同髮型師傾計,
最記得當年初初夾依家呢個髮型師的時間,
佢問我會鐘意個髮型師好傾定係想要剪得好,
我話當然剪得好啦, 最憎剪頭髮要不停傾計講私人嘢, 依家好熟咩?

最怕電髮 / 染髮 / treatment, 一坐幾個鐘!!
個人咁坐唔定,
個頭戴住個頭盔連條頭都唔郁得真係好辛苦...
唯有最簡約,
一頭唔多洗理佢的長直髮,
半年至修一修!

可惜天生多白髮,
生咗仔之後白髮好似仲多咗, (都可能因為老咗...)
一向都係同媽媽兩個互染,
平靚正!
媽媽的手勢可以比美專業效果!

咁多顏色之中,
覺得紅色同我最夾,
面色又紅潤啲又白淨啲.
但係坊間搵隻真係上到紅色的染髮劑唔多,
依家興日本人偏綠的啡色.

以前最鐘意 loreal 的 3D Color,
支 color booster 好似好勁咁,
不過依家冇咗紅色系列囉.
早排試過那個宣傳強勁的泡泡,
但係染出黎完全唔係嗰回事!
冇紅色不突止,
仲要係偏綠的啡色,
直頭懷疑自己買錯咗!!

(偷相, 我唔係用呢個色.)
我用 #150 - red,
新出的 Revlon ColorSilk Luminista,
勁呀!
洗完頭成個麥當勞叔叔咁!
超紅!!
幾驚瓜瓜唔認得我!
啱啱染, 唔知係咪 long lasting.
不過都彈一彈:
包裝裡面得對膠手套,
梳都冇把囉.

No comments:

Blog Widget by LinkWithin