Tuesday, October 19, 2010

澳門::水舞間

冇帶瓜瓜去,
因為 6 歲以上至入得場.
冇影相, (雖然可以影相),
不過專注表演比較好.

長隆睇完好歡樂,
zaia 睇完好夢幻,
水舞間睇完好黑暗.

故事唔知係爭仔定爭權?
我問同行的大家都唔知道.
表演唔連貫.
一忽一忽咁.
一時又古代一時又土人一時又飛車,
好似精神分裂咁.

成件事都好黑暗,
一開場就打雷兼有貞子喪屍混合髒爬上黎,
問你死未?
仲唔嚇死細路仔!
上場仲係半空吊啲死屍落黎,
我百無禁忌都睇到啋啋聲!

無厘頭又會有個中國人出黎耍劍,
九唔搭八,
又唔係耍得好, 又唔係耍得耐, 又冇需要,
好明顯就係迎合內地觀眾啦.

坐位呢,
我一路都覺得 $680 好貴 :p
但係又驚 $380 個位唔好,
結果係好彩買咗 $680,
座位表係馬鞍型,
個缺口位係舞台的一部份,
兼且有戲院大螢幕做背景,
雖然都冇乜特別表演係嗰度發生,
但係平價票就要係咁轉睇晒所有正在發生的事.
都專登船過澳門睇,
俾多少少唔差在啦.

最鐘意的部份係人肉水晶燈,
一班人吊高一齊係個架度移動,
好華麗.
另外值得睇係飛電單車好難聞不過香港都冇乜適合的地方可以做同類的表演.
水花四濺的舞台機關就十個讚,
一陣就滿一水池可以俾人跳水,
一時就全乾可以飛車喎!
真係即時想上 youtube 睇製作特輯囉!
仲有一樣好啱游同學就係大量肌肉男,
好結實啦!

如果你睇咗長隆馬戲團,
又睇咗 zaia,
又好耐冇睇大製作,
又想去吓澳門,
又想洗吓錢,
咁睇吓都無妨囉.

官方網頁: 水舞間

No comments:

Blog Widget by LinkWithin