Thursday, June 24, 2010

瓜瓜滿月停人奶

瓜瓜今日滿月,
我決定停止餵人奶.
這是個艱難但輕鬆的決定,
明知人奶有益,
唔係我唔想繼續,
不過知易行難.

1.
瓜瓜愈黎愈大食,
就算泵出黎餵都好快肚餓.
2.
瓜瓜鐘頭分段進食,
一餐分三次,
一餐食兩個鐘!
3.
泵奶都好花時間,
至少一個鐘頭,
仲未計之後要清洗泵奶的器材.
最慘係泵出黎唔夠飽好似好可憐.
4.
一個人又要餵又要泵的話完全冇得休息,
陪月員唔會長期陪住我.
5.
餵人奶的 BB 係比較黏身,
瓜瓜都開始有呢個徵狀,
一起身唔食都要人抱.
6.
我都要深層休息準備返工/ 搬屋啦.

瓜瓜食埋雪櫃裡面的冰奶就要食奶粉啦.

12 comments:

阿儀 said...

hi芷蔚,又係我呀,想問吓你係點樣停人奶架?要食啲咩先停到? 我依家谷奶谷得好辛苦,半日就要換一塊pad喇,有時仲痛醒添! 我開始過緊非人生活...

芷蔚 said...

你咁快唔餵啦??
1. 豬潤水啦, 最快, 不過我都食咗成個禮拜要見效. 如果唔食豬潤就淡豆豉.
2. 我個泵 MEDELA SWING 冇用啦, 依家出讓中, HK$900 連4 個樽1 盒BOOTS 奶袋. 有冇興趣?

阿儀 said...

1.我都有飲豬潤湯,不過好似仲更加多奶咁~
其實我都未決定要幾時停,個心就諗住餵到滿月,不過我個傷口仲痛緊,加上腳胯位仲未好番,前日忍唔住去咗洗頭又好似入咗風,百病纏身,又訓得唔好兼唔夠,成個人都好攰咁...
2.我有泵喇,多謝你嘅offer!

阿儀 said...

想問吓淡豆豉,係咪即係平時食果啲豆豉呀?咁食豆豉蒸XX得唔得架?

芷蔚 said...

淡豆豉唔同豆豉架, 去藥房買架, 同麥芽一齊煲 30 分鐘.
豬潤水真係得架, 不過我都飲咗成個禮拜要冇咁谷咋.
你要堅持呀! 有冇人幫你呀??
我都係有個陪月幫手有得抖吓要捱到咋...
入咗風用啲薑水沖涼啦, 好得架!

芷蔚 said...

覺得痛就泵啦, 泵咗一身鬆呀! 放係冰箱遲啲飲都得啦.

阿儀 said...

咁請問麥芽係咪都係喺藥房買呢?用幾多水煲埋一齊呀?可能係我意志薄弱啦,我已經無晒心機,每日花喺阿仔嘅時間真係可以話寸步不離,我都難以想像第日返返工會係點,雖然請咗個工人幫手,不過都梗係唔會放心囉...我諗你一定會明白我的!!
我今日再用薑水洗多一次頭,希望會好得番啦~!!

芷蔚 said...

淡豆豉同麥芽都係去藥房買, 份量要聽朝陪月返工要答到你, 不過真係豬潤水快啲.
唔好無心機啦, 開頭係好辛苦架, 一日餵12次, 我阿媽嗰時都話我成日都攬住個仔! 不過冇辦法啦, 都想BB抵抗力好啲.
你可以試吓自己餵之後工人掃風你休息,
又或者朝早人奶, 夜晚奶粉.
再唔係你淨係泵, 其他嘢都俾工人做囉.
好彩係最後請呢個陪月員好好令我好放心俾個仔佢然後我瞓大覺, 都係咁至有多啲休息時間.
你好快要返工啦? 唔好唸咁多, 順其自然啦. 返工咪唔好餵囉.
加油呀!

阿儀 said...

每次見到你嘅支持,我都好開心,不過就覺得自己好水皮,你又係做人阿媽,我又係做人阿媽,點解可以差咁遠?! 話時話,你上次話你產後胯位痛,最終痛咗幾耐呀? 我依家每朝都好辛苦先爬到落床呀...
我都知餵人奶好,不過呢個程序真係好磨人~ 泵,餵,洗,消毒-->泵,餵,洗,消毒-->泵,餵,洗,消毒... 想死!!

芷蔚 said...

淡豆豉同麥芽係藥房一齊買 $10, 四, 五碗水煲埋一大碗, 至少煲半個鐘.
胯位痛咗一個禮拜, 我有跟物理治療師的練習, 同埋愈痛就愈行多啲, 練習番啲筋骨.
程序係好磨人架, 我次次都玩2 粒鐘~ 食完一邊泵一邊, 係咁意洗吓係咁意煲吓囉. 係好苦架 :P 所以夜晚都冇乜得瞓, 咪朝早瞓等陪月做囉.

阿儀 said...

唔該晒你,真係無諗過谷奶係咁辛苦架,都有啲後悔餵人奶...依家真係好似蔡依琳上身咁,G奶~~

芷蔚 said...

千祈唔好咁唸, 人奶對BB健康好啲, 辛苦少少都值得, 唔係第時佢易病, 你要照顧佢咪仲辛苦! 依家係先苦後甜啫!

Blog Widget by LinkWithin