Tuesday, June 1, 2010

餵人奶

餵人奶係一件最最孤獨的事情,
過程只有你同 BB 知,
只係餵幾個月, BB 到大個都唔記得.
護士可以係姿勢上面幫你,
陪月煲兩個湯水俾你,
老公就心靈上的補給,
但係實質上,
半夜三更,
餵仔的咪得你一個.

星星話好偉大,
我覺得一係唔好生仔,
生仔就要負責任,
教同養都要做足.

講番餵人奶,
經過咗幾日,
都略知一二,
有啲真係親子活動,
係同瓜瓜的交流,
同兩個人的合作,
望個表情伸個懶腰就知佢想點,
詳細唔講啦,
如果有一日大家係餵奶上有問題問我的時候,
希望識答啦.

想講係呢幾日的歷情.
一早已經決志咗要餵人奶,
所以之前都去聽咗啲講座,
做足心理準備,
知道需要面對各樣的問題壓力,
知多啲個人都安心啲.
不過都只係紙上談兵,
要生咗瓜瓜出黎至係實戰,
個個小朋友的需要唔同,
而各個媽媽的體質都唔同,
能唔能夠成功,
真係好靠媽媽的堅持!
開頭的呢日真係非人生活.

Day 1
因為生完仔要留係產房張床度 3 個鐘.
咁影個相休息一陣之後,
護士就教我餵仔.
點知同時間隔離床位的媽媽生得, (一間產房有 2 張床.)
生咗好一陣子.
生到我都可以推番去病房啦.

返到病房再等咗好一陣子至有個護士黎教我餵奶.
乜唔係愈早開始愈好咩?
政府都唔係好支持餵人奶啫?
護士懶懶閒.
今日的指導係純粹練習,
都未上奶.
只係做多啲吸啜動作可以刺激媽媽生產奶水.
半夜都叫醒咗 3 次!!
一夠鐘就有護士叫喊幾多號幾多號夠鐘餵奶啦.

不過東區醫院的護士真係好唔專業!
第一日護士 A 話每一餐只可以食一邊乳房.
第二日人奶護士 B 話可以一餐兩邊都食, 唔係可能 BB 食唔飽. 左右左右咁食.
第三日又聽到護士 C 話千祈唔好兩邊食, 因為轉黎轉去 BB 會頭暈.
到第四日返咗屋企又有個人奶護士 D 打黎跟進, 同我講唔好再兩邊食, 因為奶有分前奶後奶, 前奶易食啲不過冇咁濃所以冇咁飽, 依家只可以食一邊, 等佢食到後奶就飽啲.
第五日見健康院醫生 E 就話人奶護士講得啱, 應該兩邊都食係正確, 因為其實仲係初期, 一定要兩邊都食至可以刺激多啲奶水生產, 奶都未夠, 前奶後奶都不分啦.
個個都唔同, 都唔知聽邊個講!!
好鬼 frustration!!!!!
最後當然係聽醫生講比較可信,
亦係第二日聽完人奶護士的說法一路做緊的事情.

Day 2
餵仔係每 3 個鐘頭一次,
每次約 1 小時.
中間得兩個小時 '休息',
呢段時間要食飯啦, 檢查啦, 親人探訪啦, 瞓覺啦.
完全非人生活.

餵仔嗰 1 小時呢,
要打醒十二分精神,
因為 BB 食食吓會瞓,
你要一路整醒佢,
一路調整佢的姿勢令佢食得到.
個仔出世已經 6 磅 12 安士,
捧咗足 1 個鐘,
雙手都斷啦.
仲要 1 日捧幾次,
好快就有老鼠仔架啦.

Day 3
繼續努力,
可惜瓜瓜食極都唔飽.
一餵 2 個鐘,
最多 3 個鐘, 2300-0200,
終於你都要屈服,
佢真係開大個喉嚨黎喊,
嘈住成村人.
唯有加少少奶粉.
唔係餐餐都加,
要視乎瓜瓜有冇變喪屍.
佢一餓就雙手亂抓,
個頭左搖右擺,
呼吸急速, 發出 '霞霞霞' 的聲音,
亦都好似張達明扮暴龍個樣,
瓜瓜會唔會係新一代形體大師呢??
係就係好得意,
不過都幾鬼淒涼.

Day 4
到出院的時候,
為咗方便餵奶,
有好幾樣嘢要買:
餵奶流量控制杯, 開胸睡衣, 魚油.
另外好彩我都有兩手準備,
貪心咗人地一罐免費奶粉先放係度,
不過就冇羹仔可以餵奶.
一出院即係叫星星去買個 Medela Softcup (可避免初生時奶瓶混淆現象和控制流量不會嗆著.)

據聞魚油可以令到啲奶杰啲, 食得飽啲,
又有 OMEGA 3,
就買咗 Udo DHA 奧米茄 3 6 9 混合油.

另外陪月教煲咗個通草加鮮奶,
一個鐘頭左右開始真係上奶,
個胸變得有重量.
個仔都食得飽啲.
但係都係唔夠,
仍然要加奶粉.
瓜瓜小便大便嚴重不足.

Day 5
健康院單對單指導,
因為真係有奶,
而且個護士又有心機,
今次真係完全明白啦.
餵起上黎都得心應手啲!
瓜瓜個樣都滿足啲!
但係瓜瓜仍然未有大便.
醫生話要有入至有出,
所以仍要繼續努力.

Day 6
半夜12:00 斷續 3 次, 維時 3.5 小時.
都係唔夠飽!
整醒星星開奶,
玩到 05:00!
成晚都冇得瞓.
唯一好彩係終於都有大便啦.

好彩星星都幫得手.
換片開奶粉的工作都分擔一下.

BB 最最最現實,
餓的時候就張大個口大大聲的喊,
點抱都唔收聲!
嘈到拆天!
食飽就瞓,
個口合到實一實,
個樣勁囂張,
左邊餵佢, 佢對眼就轉去右邊!

餵人奶的初期實在要超強勁的意志力,
仲有同睡眠講聲遲啲再見,
每日加埋瞓少過 4 個鐘,
好彩我一向同睡眠都唔係朋友.
過多一陣子多啲奶可以做儲備就輕鬆啲架啦.
-------------------------------------------------------------
通草鮮奶
通草 2 錢 --> 中藥房有得賣, 見圖.
加脫脂奶,
煲為 1 杯.
(陪月話過咗 12 朝至飲就冇用架啦.)

Udo DHA 奧米茄 3 6 9 混合油 (購自Citys' Super @HK$285.00)
適用於孕婦和兒童
是DHA(二十二碳六烯酸)極好的植物來源(來自海藻)
妊娠及哺乳時DHA的重要性
婦女在妊娠和哺乳期間攝取充足的DHA對促進孩子的健康是極為重要的。
正在發育的胎兒是無法產生足夠的DHA、必須從母體獲取這極之重要的營養素.整體來说、全世界的妊娠及哺乳的婦女每日攝取這種重要的油脂還沒有達到最理想的水平。
在妊娠及產後期間、增加DHA的補充能改善母親的情緒健康。
DHA與智力及視覺功能有極大關係、由於嬰兒在出生後四年是其腦部生長的主要時期、所以對DHA的需求極大。
DHA在嬰兒期之後的重要牲
DHA對兒童正在生長發育的腦部是非常重要,因此必須攝取足夠的份量。DHA對腦部、眼睛和心臟功能都是極重要的。

奧米加3和6理想的2:1比例
植物性來源的DHA/非魚油產品
有助心臟,眼睛健康
對學習障礙者有幫助
有助過度活躍及缺乏專注力之兒童
有助改善精神病患者
適合與嬰兒的食物或配方奶混合
未遭高温、光線及氧氣的破壞
新鮮壓榨且未經提煉
現在世界各地的政府部門都建議孕婦、哺乳母親及幼兒將進食某些魚類作為獲取奧米加3油脂的來源、但次數限制在每週一次,因為魚內積存了高濃度的污染物(如水銀等)

8 comments:

小啤 said...

Add oil feeding.. very soon the darkest period will pass and you will miss the tiny little baby in your arms =)

芷蔚 said...

thank you~ i'm trying my breast :D

Anonymous said...

Udo DHA 奧米茄 3 6 9 混合油
請問, "Udo DHA 奧米茄 3 6 9 混合油"可唔可以加入三個月大前的BB的食奶中, 混合一齊俾BB食呢? (因為媽媽沒有奶水, 又想BB可以吸收多點DHA, 加入BB的食奶中是的唯一方法)

芷蔚 said...

唔好意思, 我冇試過.
不過個人唔建議咁做, 奶粉都有足夠營養啦.
點解你覺得三個月人仔要多啲 DHA 呢?

Anonymous said...

醫院送的育嬰書籍,介紹母親食魚油,再餵BB人奶,令BB吸收DHA幫助發育。
但因為媽媽奶水不足,BB基本是靠食奶粉。
所以想知如果到了3個月食糊仔時,可否將魚油加入糊仔中。

你的BB幾時開始食"Udo DHA 奧米茄 3 6 9 混合油"?
怎樣給他食?

芷蔚 said...

我相信奶粉裡面都有DHA, 唔需要擔心.
因為呢隻魚油係俾大人食, 我唸加落糊仔俾BB 食唔係咁好. 你可以去 city super 個專櫃問吓姐姐.

我冇俾瓜瓜食魚油, 3 個月的時候佢只係食奶粉.
就算依家就黎一歲都冇食魚油. 有食bb 的零食餅囉算唔算額外營養品?

Anonymous said...

多謝你的答覆.
上星期偶然看到你的BLOG,寫得好有心機.
好有參考價值, 以後要經常來睇.
謝謝你的分享.

芷蔚 said...

唔使客氣, 我都係知幾多答幾多, 希望幫到你 :)

Blog Widget by LinkWithin