Tuesday, June 29, 2010

生仔4D3N::Day4

上回.

一早見醫生,
當然唔係個妹妹仔啦,
不過都係好後生架囉.
見我冇乜嘢,
佢問我想唔想出院,
嗰日星期六,
如果唔出就要等到星期一,
咁我寧願返屋企啦.
雖然都住得幾舒服,
冇謂浪費金錢啦.

咁就叫星星黎等辦手續,
出院前瓜瓜要打針,
如果住大房就要自己帶 BB 去打針房排隊,
私家呢就護士幫我做埋,
直接就俾錢出院啦.

出院前問定啲問題,
- 見到瓜瓜的指甲好長, 問要唔要剪?
護士話 BB 指甲好脆, 會自己甩, 唔需要剪, 剪到手指仲衰!
- 瓜瓜食過兩餐奶粉, 食乜嘢牌子? 加幾多?
人地成日話唔好轉奶粉, 不過護士話只不過係食咗兩餐奶粉, 所以返到屋企食邊隻都得啦. 開支奶 80ML 左右
食就食 40-50ML.

當然我都仲未行得,
就去借咗張輪椅返屋企,
可以借 1 個月.

瓜瓜有個小問題,
甲狀腺素偏高,
要 5 日後再驗多次,
可能係母體傳俾佢.
後期驗咗都冇問題.

另外就要自己約健康院幫瓜瓜檢查同打針啦.
----------------------------------------------------
生完仔個肚皮超鬆囉,
個肚臍洞仲好濶添...
子宮未收縮,
個肚腩好大囉.

全文完!
YEAH! 終於成個月至寫完....

6 comments:

阿儀 said...

芷蔚,真係好多謝你嘅分享,確實令我了解咗好多,不過想問吓點解你會最尾果晚先住特別房呢?我有打算全程(三日兩夜)都住特別房,你點睇呀?
八掛一吓,你要搬屋喇?唔再做柴灣友?

芷蔚 said...

唔住特別房因為我想休息! 長期有人黎探我咪冇得瞓 (我少少聲都瞓唔到), 就算隔離床有訪客都嘈住我又嘈住個仔啦.
得呢幾日有得靜靜地架咋, 返到屋企就好忙架啦.
係呀, 搬啦, 之前大肚唔方便裝修吖! 不過都係東區之友.

阿儀 said...

Hi芷蔚,我終於都完成使命喇,我個B七月一號出咗世,你講得好啱,湊仔不及生仔難,我依家都就嚟俾阿B玩死喇,不過好彩有屋企人support,如果唔係我實產後抑鬱...
我最終住咗兩晚特別病房,真係物有所值!!
好佩服你湊緊仔仲可以搞屋企裝修,勁!!
我都有買carter嘅東西,真係幾好.

芷蔚 said...

恭喜晒!!! 痛得耐唔耐??
都唔記得問你個BB係女定仔添??

阿儀 said...

真係要thanks god,雖然我唔係信徒!!
我十一點穿水見紅,十二點半開始陣痛,不過已經痛得好密,每五分鐘一次,唔夠兩個鐘我就已經要去聞笑氣,五點鬆啲就生咗了!!我覺得我嘅產程算係比人地快囉,頭尾加埋都係六個鐘多啲,所以都好開心,不過就唔想再有下一次了...
我阿B係男仔!!

芷蔚 said...

你仲快過我呀! 超好彩!

Blog Widget by LinkWithin