Saturday, June 19, 2010

生仔4D3N::Day3::疑似半身不遂

Day2

半夜起身餵奶,
行得好辛苦,
用唔到力,
舉步維艱,
特別係第一步起步,
停成分鐘都攞唔起隻腳,
然後全程都要扶住黎行.
護士見我咁慘,
俾咗兩粒止痛藥.
返到床邊要瞓落床都要少 3 分鐘.

2 個鐘頭後再餵奶,
護士見我仲係行唔到,
即時覺得冇理由喎.
佢叫我行兩步俾佢睇,
話好可能要見物理治療師.
叫我聽朝同醫生講.
我都唔知乜事,
瞓醒至算啦.
不過要行番床/ 瞓落床都係一件難事.

事情係兩邊胯位用唔到力,
一路行一路痛.
開頭以為關個傷口事,
又有食止痛藥.

第二朝又見到妹妹仔醫生,
護士同佢講我行唔到.
叫我同醫生講邊度有問題.
醫生都唔知點算?
個護士提佢: 應該係 '實-石-say-tion pain'. (我唔識的專業名詞啦)
醫生: 乜嘢黎架??
(唔係吓話?? 你係咪真係醫生黎架??)
護士好緊張的叫我同醫生講我覺得邊度有問題.
咁我咪話個胯發唔到力囉.
個醫生仲係呆吓呆吓.
護士 '建議' 佢建議我見物理治療師.

病況係坐咗落床就發唔到力將對腳放上床,
要用手抽住褲腳攞對腳,
對腳上咗床又痛到唔能夠將背脊放落床.
起身亦然.
如果坐低呢,
就用手扶嘢借力至起到身,
然後又再起步艱難啦.
總之就要轉姿勢就死啦.

然後呢半日因為用唔到力返上床,
我就一路都坐係櫈度,
要去洗手間的話要按鈴搵個阿姐攞張輪椅推我去.
自己行兩步係唔得嘅,
腳板不能離地 Z 形推吓推吓咁行.
要餵仔就有護士推瓜瓜出黎俾我.

而同時瓜瓜又食極唔飽,
推出黎俾我好多次!
次次都好似喪屍出場,
雙手亂抓, 個頭又四圍搵.
大食喪屍瓜正式登場.

一般生仔都係住三日兩夜,
但係我要見物理治療師冇得走, 要住多日.
而且由於行動不便,
自己都照顧唔到自己,
試圖轉半私家的特別房,
淨係香港人至住得, (HK$2400/晚, 三人同房)
要睇吓有冇位,
有位就叫星星返黎交按金,
結果等到 ~1630 至轉到.

物理治療師話因為荷爾蒙影響,
生仔的時候比較用力,
勒帶鬆咗所以痛,
教咗我移動的方法配合呼吸,
自己練習吓就得啦.
不過唔知幾時至康復,
因人而異.
(結果我都用咗成個禮拜...)

Continues... 私家病房

No comments:

Blog Widget by LinkWithin