Monday, June 7, 2010

生仔4D3N::Day1::62號太太

上回.

轉咗去病房之後,
係唔落得床,
直至另行通知.

有架推車仔有個小姐問你要唔要止痛藥.
當然要啦,
麻醉藥過咗會痛就太遲啦,
食咗至算啦.

等咗一陣,
有個阿姐黎幫我落床,
帶我去洗水間教我沖下半身,
因為要用清水洗傷口.
所以其實第一日我已經濕水啦.
仲話一日要洗 6-8 次.
(呢個時候你需要廚房用的紙巾黎抹乾水, 好過帶條毛巾, 因為毛巾就咁掠係床邊一日都唔會乾.)

沖完身就夠鐘餵奶啦.
因為住大房,
護士一早問定你係唸住餵奶粉定人奶,
餵人奶呢,
一夠鐘就會叫你攞埋個枕頭入育嬰房.
好似監犯咁,
叫你的床位編號.
我係 62 號太太.

浩浩蕩蕩的十幾人走入房.
抱 BB 前先洗手.
然後要檢查尿片睇吓有冇需要更換,
第一次換片就遇著大便, 真濕滯...
(尿片同濕紙巾, 盒裝紙巾都係自己帶黎, 餵人奶的 BB 一日要換 9-10 條片架.)
(驚 BB 會凍, 又或者想容易認得自己的 BB, 包被都要帶一塊.)
要攞起 BB 對腳,
好鬼驚, 軟淋淋咁.
護士係咁意講一講點做,
之後就天才波啦,
由第一刻開始就知道你係要靠自己.

下一步仲驚, 要餵奶啦...
抱起佢都手震震,
驚唔識做又驚瓜冇得食,
瓜一路食又一路瞓,
瞓咗又唔知點叫醒佢??

如果堅持要餵人奶,
一定要一定要之前準備充足,
睇多啲資料,
如果你只係聽醫院的護士的說話加埋佢地的態度,
你好快就會放棄.
因為一來佢地的說法不一,
二來佢地的說話內容係鼓勵你, 但係語氣就好悔氣囉,
要成功餵到人奶要有好好的心理質素,
係盡全力, 得就得, 唔得都冇辦法.
同場有好多媽媽,
大部份都係新手.
一開始係辛苦啲,
一定要坐足 45-60 分鐘,
BB 瞓咗都要整醒佢繼續,
有啲媽媽 15 分鐘見到 BB 瞓咗放低 BB 番床就走,
有啲自己半夜眼瞓又走,
咁樣好難成功.

頭一個星期的餵奶非人生活請看舊文.

夜晚發現每次番上床有啲問題,
對腳用唔到力,
坐係床邊我唔能夠將對腳放番上張床,
要用雙手攞起條褲管逐隻腳抬起,
好似人地植物人咁.
不過移動小腳又冇問題,
關唔關傷口 / 縫針事呢??

Continues..... Day 2

3 comments:

Jellyfish said...

餵人奶的 BB 一日要換 9-10 條片架....
咁請問餵奶粉的要多啲定少啲?

Anonymous said...

姐,

我精神上支持你

芷蔚 said...

林芍芍, 奶粉用少啲.

Bro, 感激你喎~

Blog Widget by LinkWithin