Friday, June 4, 2010

生仔4D3N::Day1::瓜瓜出世啦

上回

3. 產房
入到產房之前護士會幫你將啲家當放入儲物櫃,
俾番條鎖匙你圈係手.
產房的接待處同時有幾位人地的老公著到好似董太咁全副武裝等待中.

下一步就推我入生仔房, (我唔知間房應唔應該叫手術室.)
一間房有兩個產婦位,
中間拉塊簾.

上咗床吊包葡萄糖水,
而且可以聞笑氣,
因為上腦都要幾秒的時候,
所以一開始覺得就黎會痛就要聞,
呢個要好啱時間,
如果聞得太遲,
上得腦黎都痛完啦.
聞咗就 wingwing 地,
分散咗注意力就唔痛囉~
但係覺得唔太痛又唔好聞啦喎,
太 wing 個人唔係咁舒服.
要用鼻索啲笑氣,
用口吸會嘔.

過咗一陣星星都入咗黎捉住我隻手.
同時我都拿住張舊抹手紙, (之前喊的時候用黎抹眼淚.)
有嘢揸手感覺有力啲安心啲.

我聞緊笑氣的時間個護士解釋呢樣嗰樣,
聽到但係唔多入腦.
一路愈黎愈痛.
佢仲問得要唔要住私家病房?
點解唔早啲問?
我痛緊都唔知你收費如何, 探期如何?
wingwing 地個腦都唸唔到嘢啦.
更加唔係唸住我仲有氣開口答呀?
不過我一聽到話探期係 0800-2100,
即時醒一醒搖手反對呢件事.
咁咪人來人往, 貼錢買難受!!

痛的感覺愈黎愈頻密,
一路吸住笑氣的我已經陷入半昏迷的狀態,
雙眼都開唔到,
迷到唔可以攞開個笑氣,
即時好明白啲癮君子!

淨係記得久唔久會有一下收縮令我特別痛,
咁就會醒一醒反白眼兼大嗌一聲長的: '呀~~~~~~'
同時下身會不自覺的想用力谷個仔出黎,
咁呢個時候護士就會講: 你唔好用力住呀, 你咁谷一陣你同 bb 都好辛苦架.
我都唔知一陣間會點,
但係成個過程都係不自覺冇心架囉, 自然反應黎架.
半昏迷 -- 呼叫 -- 護士出聲
呢個循環發生咗好多次,
聽到嗰聲淒厲的 '呀', 你應該即刻唔想生仔.
我都天旋地轉啦,
都唔知過咗幾多時間.
嗌咗好多次之後,
到咗 1130,
護士叫我自己試吓用力痾,
根據子宮收縮的那一下,
要好啱拍子, 唔係就浪費咗度力氣.
一鼓作氣的生出黎.

我唸係平時肺活量細,
谷住一啖氣星星就幫我慢慢數 1 至 10.
同時就下身用力.
一啖氣真係生唔到,
又要即時回氣再谷第二次,
星星又數囉.
谷得三次都攰死咗啦.
但係個死人星啲拍子錯晒!!!
時快時慢!!
10..9...8.7....6..5...4..3....2...1.
有時又跳咗個數目字!
10.9.8.7.5.3.2.1
咁點生呀??
我又冇氣鬧佢,
但係個心好嬲囉, 係咪玩嘢呀??

如是者都唔知重覆咗幾多次的嘗試.
直到 ~1345,
終於...
係終於瓜瓜就生咗落黎啦.
任務成功!
(仲有打止痛針 / 剪會陰 / 抽胎水 / 剪臍帶 / 清胎盤 / 縫針, 呢啲聽落恐怕血腥的詳細情形唔講啦.)

星星話瓜瓜一出世個 patpat 有好多胎糞.
護士清潔瓜瓜之後,
就問我係仔定女.
包住被之後就放低俾我,
俾我地影相.
話影一陣就教我餵奶,
生完仔要留係床上 3 個鐘.

點知...
都未影夠隔離床個媽媽就生得,
星星要離開產房,
所有護士都去咗隔離床幫手,
我呢... 就呆等咗兩個鐘囉...
仲要...
個人瞓係度郁唔到啦,
左手吊住葡萄糖唔攞得高啦,
右手又包住個量血壓布,
瓜瓜係我右臂彎下,
但係望住個天花望唔到我,
我又移佢唔到.
好無奈.....

等咗唔知幾耐,
見隔離攪掂,
我就大叫行黎行去的護士: 請問係咪有人教我餵奶??
佢地至醒覺忽略咗我,
就搵人轉番我落產後房.

待續...

上堂教的呼吸法冇乜用到,
吓吓呼那些攪笑嘢完全冇用過.
淨係痛就深呼吸不過那些停止用力的過程知道咗就真係有啲用.

由見紅到生仔都只不過係 10 個鐘,
真正痛都係最後 2.5 個鐘的事,
都算個天待我不薄啦.

No comments:

Blog Widget by LinkWithin