Wednesday, June 9, 2010

陪月員 3 號

其實經過咗 2 個禮拜,
基本上所有嘢我都可以自己做,
除咗買餸煮飯同幫瓜瓜沖涼,
但係我都唔想阿媽太辛苦,
再請過另外一個陪月員.

見工都知佢新手,
剛剛加入呢間公司,
不過佢話平時有做開朋友介紹,
其實都唔係太鐘意,
不過唸住只係需要有個幫手幫輕吓,
咁就算啦.

第一日返工,
手腳好慢.
換片唔識開咗條新片先.
有便便問我洗定抹, 我話先抹後洗, 佢唸住用一般面紙唔識用濕紙巾.
個人行開咗攞水又鬆開條片, 瓜瓜一郁就周圍都係啦,
洗 patpat 洗濕件衫,
出入廁所 洗 patpat 過程又係冇遮冇掩打出個咕咕, 又係一小便就大檸樂.
沖涼沖係個廳中間, 周圍都濕晒, 攞走個盤之後第一件事唔係拖地, 同佢講完之後即拖但係個地都拖唔乾.
瓜瓜洗濕咗個頭但係佢又冇舖定毛巾亦都冇熄冷氣.
沖涼水倒落個廁所度, 成個廁所濕晒.
我坐係廳度, 佢係廚房, 瓜瓜係床喊咗好一段日子變得大聲佢至出黎睇.
沖完涼瞓埋至記起未洗臍帶, 又除開人地件衫.
放咗瓜瓜落床又唔幫人蓋被, 我開咗冷氣啦.

每個程序都睇唔過眼,
點算?
又炒呀?
--------------------------------------
煮飯佢就有心啲,
會問吓我老公食唔食,
我食幾多碗飯, 要硬定軟,
但係尋晚明明同佢講我勁偏食,
佢話整豬肉,
結果佢以為我會食整咗我唔食的豬潤...
--------------------------------------
我搵到佢嘅好處啦.
就係佢好靜, 唔會迫我講嘢.
都好.

No comments:

Blog Widget by LinkWithin