Monday, June 7, 2010

有仔新生活::2weeks

1.
BB 的喊聲真係有得分別.
係想食, 好想食, 太悶, 啱啱瞓醒.
依家瓜瓜伸個懶腰都知佢想點.

2.
有時覺得瓜瓜好細粒,
但係一想到佢原本就係咁大件生活係我個肚入面,
又覺得大得過份.

3.
生之前個肚有 41", patpat 都係 41"
生完返到屋企係第四日, 子宮仲未收縮, 肚 36", pat 41"
地獄式生活兩星期後腰 31" (可以叫腰啦.), pat 都仲係 40"

4.
每一日就係餵仔, 餵自己同埋瞓覺.
一心二用的時候可以上吓網.
精神啲就要做吓簡單家務.
不過醒的時候大部分都係食的時間,
一碟兩杯三碗咁.

早餐好啲, 因為自己決定,
我會買 (1) 一袋麵包,
食唔晒半夜肚餓都有得食.
另外中醫叫要燉 (2) 豬肉汁/ 雞汁, 一定要加薑.
飲品盡量唔好飲水, 飲 (3) 炒米茶, 可以加黑豆 / 果皮.
見瓜瓜唔多夠飽會煮一杯 (4) 通草鮮奶.
午餐就 (5) 白飯+菜+肉, 一般係西蘭花/菜心, 梅菜肉餅/黑木耳蒸雞.
下午茶就係 (6) 老火湯, 內容有乜我唔知啦.
陪月會再煲碗 (7) 紅棗水之類的東東.
晚飯 (8) 就近似午餐, 都係白飯+菜+肉.
依家過咗十二朝, 仲要隨時隨地食 (9) 豬腳薑, (10) 雞酒.

即係咁,
大部份時間都唔係肚餓但係要放入口,
呢樣又補, 嗰樣對你有益咁,
見到都唔想食啦.
長期都好飽.

零食? NO WAY.
依家仲食得清過以前.

5.
冇咗陪月最忙係我阿媽,
出出入入上上落落買東買西整呢樣嗰樣,
唔該晒~

6.
星星以前成日問我坐月會唔會出街,
依家的答案係忙到出唔到街,
而且體力都用晒落捧住隻瓜,
想我出街都難!

7.
仲有什麼滿月 / 拜祖先的事宜,
唔該都問吓瓜瓜啦,
佢食得飽咪可以出街囉,
唔係我霸住個瓜唔放,
不過我未接受到自己周街餵仔,
寧願出少次街啦.

12 comments:

Queenie said...

Hi芷蔚,你好呀...其實我有keep住睇你個blog嘅,因為我下個月都生喇,亦係喺東區,有啲野想你俾少少意見我,唔知你介唔介意呢? 阿儀字

芷蔚 said...

阿儀, 當然唔介意啦, 有乜嘢幫到你?

阿儀 said...

多謝你先!
1. 上回你提及到喺醫院要每日洗會陰6-8次,我想問只係用清水洗或是要清水加少少滴露呢?
2. 仲有如果我老公陪我生,佢要做啲乜架?(呢個係我代佢問你,哈哈!)
3. 另外你有無準備羊毛底衫俾瓜瓜架?我聽東區啲護士話要,但有人喺果度生過又話唔洗...我仲未買呀,因為十五十六緊!
4. 你住大房嘈唔嘈呀?係咪6人房嚟架?
5. 最後,你有無買充氣坐墊呀?其實又需唔需要呢?佢地嘅聯針手勢ok嗎?

唔該晒^.^

芷蔚 said...

1. 只用清水
2. 睇住你痛/ 聽你慘叫/ 捉住你隻手俾啲支持/ 同你講加油/ 幫手數時間/ 護士都會同佢講點做, 都好忙架 :P/ 仲有生完個B影相/ 讚你生咗個B好叻/ 同你講辛苦晒/ 唔該你呢十個月的辛勞
3. 羊毛底衫買咗一件, 不過從來冇人問我攞, 亦唔見其他 BB 有著.
4. 住大房好過私家房, 因為只得中午同黃昏兩個時段的探期, 其他時間所有人都會休息, 反而比較靜. 我住咗一晚半私家房, 三張床, 但係大家都可以0800-2100到訪, 剛好隔離床好多親朋好友, 嘈到震!
5. 充氣坐墊冇買, 又係唔見人地用. 我覺得唔需要囉, 到時真係有需要至叫老公去買都唔難, 個傷口唔痛架喎. 聯針的時候有需要都可以聞笑氣減輕痛楚, 不過我都冇聞, 到咗聯針的時候都已經冇感覺啦.

你預產期幾時呀?

阿儀 said...

謝謝你詳盡嘅解答,想問吓如果帶唔夠藍墊紙會有咩後果呢? 我之前喺吉之島買咗8塊比較厚的床墊,厚啲會唔會好啲架呢?定係佢地都會濫用?(我指生緊仔果陣)
請問中午同黃昏嘅探病時間係幾點至幾點架?我預產期係7月頭(依家開始有啲緊張,成日驚帶漏嘢!)

芷蔚 said...

想問吓如果帶唔夠藍墊紙會有咩後果呢? --> 叫你老公落去買囉. 醫院樓下有得賣.
我之前喺吉之島買咗8塊比較厚的床墊,厚啲會唔會好啲架呢? --> 似乎冇關係, 但係 8 塊護士一定話唔夠.
定係佢地都會濫用?(我指生緊仔果陣)--> 相信唔會, 因為護士係絕對唔會冇事搵事做.
請問中午同黃昏嘅探病時間係幾點至幾點架?--> 如果冇記錯係中午12時至1時30分, 下午6時至8時.
我預產期係7月頭(依家開始有啲緊張,成日驚帶漏嘢!) --> 7月頭好快到啦! 平常心啦, 帶漏嘢咪叫老公攞黎或者係醫院買囉. 好小事啫, 係病房可以打手提電話啦, 唔係探病時間可以托護士交俾你.

阿儀 said...

唔該晒你呀!
我諗你一定係好辛苦,見你次次覆我都係半夜,係咪餵完仔呢? hehe...

芷蔚 said...

唔洗客氣~
半夜餵完仔又不能即刻瞓, 驚佢嘔奶, 咪又上網囉.
如果你餵人奶的話都係咁架啦....

阿儀 said...

呢一日距離我都唔遠囉,見到你依家咁可憐,我都predict到自己會係點,做媽媽嘅真係超偉大呀!!我今日聽講座,個護士都有講話如果餵人奶最好係埋身餵,直至要返工為止,我都驚未到我要正式返工之前已經放棄咗...
想請問你生之前究竟有無放大便呢一會事架呢?

芷蔚 said...

依家係可憐, 你真係要做足心理準備呀. 有問題記得搵我呀.
餵人奶最好係埋身餵, 因為奶泵冇嗰個吸啜的動作去刺激你製奶.
唔好話餵到返工啦, 好似我依家奶量未穩定, 瓜瓜時飽時唔飽, 三個禮拜咋, 我都想放棄啦! 我日日都同星星講我想返工...
放大便呢...冇喎, 護士淨係入產房前問我有冇去小便咋.

阿儀 said...

聽到你咁講我真係好驚呀,身邊又未有朋友生過,有果啲都起碼十幾年前,啲嘢都今時唔同往日,你生之前嘅一個月有無出現(大脾連住盤骨嘅較位果度)超痛嘅情況呀?尤其係訓醒起身果陣,我依家每朝早都受住呢種痛苦起身返工...

芷蔚 said...

我生之前冇呢個情況, 不過生完之後痛咗成個禮拜! 見咗物理治療識得好邊度力就好好多啦. 總之就一行就用小腹的力, 忍住啖氣舒服啲啦.

Blog Widget by LinkWithin