Monday, May 31, 2010

薑皮煲水

係第五日,
阿媽終於都 '醒起' 有包薑皮, (都唔知係咪專登 '唔記得'!)
薑皮可以煲水俾我沖涼!

薑皮係之前煲薑醋的時候批出黎的皮,
晒一晒乾保存至今.
然後就用一大煲水煲咗黎沖涼.
沖的時候唔可以加冷水,
只可以等水放涼.
洗頭都得, 但係一定要吹頭.
(以上資訊全由我阿媽提供.)

可以沖涼,
感覺超爽!!!
雖然只係得一煲水的份量,
仲要全部都係薑皮, (我連埋皮沖, 唔知其實可唔可以用個煲魚袋隔一隔呢??)
不過有得沖我都冇所謂啦,
但係如果洗頭就攪笑啲囉,
一頭都係皮,
我冇洗, 買咗支乾洗劑.

沖完舒服晒,
但係唔可以開冷氣住,
會入風.

啲薑好勁,
所有毛孔都擴張晒,
全身發滾!!
呢幾日的疲勞係全身的毛細孔走出黎!!!
勁個焗桑拿十倍!!
沖完淨係想瞓係度,
全身冇力超放鬆,
所以一定要臨瞓前至好沖,
之後好瞓都極點!

仲有冇多啲薑皮呀???
晚晚都有得沖就好啦....

No comments:

Blog Widget by LinkWithin