Sunday, May 30, 2010

生仔4D3N::Day1::等生

好想寫低個過程,
不過真係有啲忙.

1. 急症室
上回提到見紅入院,
慢條斯理的坐的士去急症室,
坐的士其實係唯一方法,
唔通半夜叫醒我老豆車我咩.
上到去登記都 5:00am 啦.

因為要 7:00am 後至可以去婦產科,
半夜要去急症啦,
個登記人員問點解入院,
有冇見紅? -->有
有冇穿羊水? --> 應該冇
幾耐痛一次? 每次痛幾耐? --> 冇留意喎, 冇人同我講要數住喎! 唯有話約 5 分鐘 1 次啦.
當時得 1 個小孩同媽媽 & 兩個大叔,
所以好快就有人招呼我上病房啦.

2. 婦產科病房
去到婦產科病房,
星星要係出面等.
第一件事係磅重,
人生的高峰: 74.9kg.
希望呢世都唔會再創新高啦.
然後護士又問番同樣的問題,
答案都一樣啦.
之後俾咗個床位我都唔知做乜,
等咗一陣就推個 bb 心跳機, 個紀錄 bb 心跳同子宮收縮,
有個制要我按個 bb 幾時有腳撐撐,
要聽 30 分鐘,
但係又唔俾我出去同星星講仲要熄電話,
護士又比較惡,
星星一個人坐係出面又唔知我發生乜嘢事.
有一段時間 bb 心跳慢,
好大機會係我瞓得太側接受唔好.
30 分鐘護士話子宮收縮唔夠密, 未生得.
唯有等囉, 但又唔知等到幾時,
所以都叫咗星星返屋企先.

咁得番我一個人入咗大房都唔知做乜?
食咗個菠蘿包,
呢個包一路支持到我生完仔啦,
瓜瓜係咪應該改名做菠蘿瓜?
又冇人理,
瞓又唔係, 坐又唔係.
因為都久唔久痛吓.
7:00am 有個早餐: 碎肉粥加個包.
個個鐘頭醒吓直至 9:30am.
知道有護士周圍行.
我同佢講想要多個枕頭,
因為痛到個背脊想要啲乘托.
佢就搵另一個護士同我檢查.
又問我幾耐痛一次? 痛幾耐囉?
不過我冇錶又冇人叫我要睇住,
痛緊邊有留意喎...
anyway,
驗吓瓜瓜個頭位係邊度喎.
佢一驗就話我已經開到 2-3 度, (10 度就生得!)
可以入產房啦.
咁鬼易??
我就俾佢驗到眼淚都流埋出黎.
堅喊!
唔知係因為痛得太緊要定好快生得呢?
但係護士就好惡咁話喊咩呀喊, 快啲打俾你老公, 留番啲力生仔啦, 就黎生得啦仲喊!
well...
我都唔知點解喊,
啲眼淚自己流出黎架.

打俾星星叫佢返上黎,
點知冇人聽囉!!!
唯有打俾阿媽轉告,
但係阿媽又話接收唔好,
喊緊痛緊仲要講幾次! 嬲死!!

佢地就推咗我入產房...
待續...

2 comments:

Jellyfish said...

我想知道如果係私家醫院啲姑娘係唔係都會咁惡,喊都唔比?

芷蔚 said...

我之後轉咗半私家病房啲護士都後生啲又有禮貌啲!
不過過兩日發現佢地可能做得太耐化咗, 其實冇嘢, 仲幾關心你, 係把口寸寸地嗰隻囉.

Blog Widget by LinkWithin