Friday, April 23, 2010

孕婦按摩::纖與美

上次買孕婦內衣的時候滿一千元送的按摩.
出面街一般按摩店唔敢去,
呢間主打孕婦按摩就試一試啦.
同時個姐姐的銷售能力好強!
服務都唔錯.

開始時, 小姐 Annie 介紹吓佢地的服務,
如果係送的療程, 就只係送孕期舒緩護理其中一項服務, 每項原價 HK$200-300.
1. 肩頸疲勞
2. 舒緩靜脈曲張
3. 腰酸背痛
4. 手臂鬆弛肥胖
5. 腿部腫脹及抽筋
6. 面部皮膚粗糙,妊娠斑
當然小姐唔會放過機會, 叫係做多呢樣嗰樣,
呢個就咁樣, 嗰個又對嗰度好,
亦都有一啲誇張性的事實,
好彩我對於資訊一啲都唔輸蝕,
同埋已經到懷孕後期,
如果唔係真係俾佢嚇親!
好硬銷!
自問唔識拒絕人的朋友千祈唔好去!

然後又另一個據了解係賣孕婦裝的店所派出的小姐,
做個個人諮詢,
睇吓你的身體有乜問題,
咁孕婦有問題都可以問.
佢話我手腳都有啲水腫啦,
(都 35 週, 少少水腫都好正常啦??)
乳線有啲塞囉.
(佢按的時候有少少痛嘅, 可能係塞啩.)
佢又話唔好著短襪, 血液循環唔好喎,
應該著船襪.
唔好食濕的食物, 個 b 易啲有濕疹喎.
例如蒜, 洋蔥, 芒果, 菠蘿等等.
(我個個禮拜都食, 第時話你知有冇濕瓜!)
對腳要墊高, 不過唔需要用枕頭咁高,
因為血液唔需要太快的回到心臟, (我唔係好明...)
anyway, 用毛巾薄薄地就 ok 喎,
但係我又慣咗墊高啲.
又話餵人奶最好係 100 日, (??? 冇睇過咁寫喎...)
唔好餵 6 個月, 5 個月或者 7 個月都得,
因為 6 個月係啲免疫力轉變喎. (冇聽過囉...)

講完一輪,
白老鼠性格的我就選擇豪一次!
一次過試晒佢!
全身按摩 HK$600 (原價 HK$700, 有單減 HK$100)
約兩小時二十分鐘
通乳線 HK$480 (呢個 package 價, 單次 HK$580)
約三十分鐘

全身按摩已經包晒之前講的肩頸疲勞, 舒緩靜脈曲張, 腰酸背痛, 手臂鬆弛肥胖, 腿部腫脹及抽筋.
孕婦按摩係打側瞓係度按嘅,
俾個三角枕你墊住個肚. (但係我覺得屋企用緊嗰隻條狀的攬枕舒服啲.)
按的時候主要用拳頭的指頭或者全個手掌,
唔可以按淋巴或者穴位,
用維他命 E 油.
而且孕婦瞓係度太耐會唔舒服,
所以同時有兩個人同我按, 好忙!
一個肩頸腰背, 一個按腳.
(之後仲有另一個按胸!!)
按摩好舒服,
手勢力度都好好.
按完手腳都會敷熱模,
小姐話可以從皮膚排出毒素, 減少水腫.
頸同腰都敷啫喱袋, 增加血液循環.

按完的結果係成身都鬆晒!
手腳的腫都去了,
由手臂到手指, 大腿到小腿都即時瘦了!

到通乳線的部份,
點解會做呢?
九成出於好奇 :p
而且我見有啲媽媽係討論區講會塞, 嚴重有乳線炎, 嚴重嘅仲要做手術添!
咁如果試一次知道方法,
第時都可以自己按吓.

做的時候感覺有啲似通淋巴, (即係都係痛都抽筋!!)
個小姐話係遂條乳線去通, (但係自己睇唔到條乳線喎...)
就外而內的推.
推某幾條會痛就推多幾吓,
相信痛嘅就塞塞地囉,
因為有啲係完全唔痛嘅,
但係都有啲痛都嗌救命!
小姐(當然)話推一次唔得架,
至少都要請五至十次,
有媽媽臨生的時候一個禮拜去兩三次添.
推完之後仲有個胸膜添.

結果係:
個胸冇咁硬, 係鬆咗,
形狀就 firm 咗,
腋下的黑色素淡咗.
呢啲都係小姐之前講過的功效.
真係得架!
不過比較貴,
仲考慮緊俾唔俾呢個錢,
或者生咗再唸.

做完之後...
又去返 sales 房,
係咁 sell sell sell...
我有一份堅持啦!
一定要唸幾日先啦.
我: 我返屋企同老公商量吓先.
佢: 咁你舒服吖麻.
我: 咁佢俾錢嘅.
佢: 係咪驚近排的報導美容公司走佬呀?
我: 都唔關事嘅.
佢: 我地公司歷史好悠久架... blablablablabla....
我: 咁好少錢啫... 至少返屋企照吓鏡睇吓效果先啦.
佢: 照鏡可以去洗手間吖..
我: (我已經反白眼...)
佢: 其實我想幫你留住個優惠, 或者你落住訂先啦. 落一千蚊, 咁如果唔想 join, 咪當 facial 做咗佢囉.
我: (當我傻架... 落咗訂邊有得走?? 仲俾你煩多次!) 唔啦, 我返去唸吓先啦.
佢: 其實舒唔舒服吖, 對自己好啲囉.
我: 咁大條數都係要唸一唸.
其實仲講咗好耐,
不過唔記得咁多啦,
總之佢好勤力囉.

總括而言係所有的事情都有效,
療程服務都好好,
價錢其實合理.
不過我都就黎生囉,
而且平時冇洗開呢個錢,
所以唸吓先啦.
--------------------------------------------------
俾多少少資料,
孕期按摩的好處~
經過我親自測試, 都好啱嘅.
all from 官網.

孕期舒緩按摩
頸肩疲勞、腿部腫脹及抽筋、手臂鬆弛肥胖、胸部護理、腰酸背痛、舒緩靜脈曲張、面部皮膚粗糙,妊娠斑。配合柔白熱敷體模,我們是首間利用熱敷原理,舒緩孕媽咪的疲累。疲倦的原因有二:第一是肚皮負荷過重,拉緊肌肉,肩腰背尤其繃緊,第二是由於排毒負荷重了,循環系統相對差了,濕毒困在身體內,所以利用熱敷舒緩肌肉緊張,排出下半身的水腫,體內毒素少了,人自然輕鬆舒暢,而且按摩完成後,熱敷可以令人鬆弛入睡,不似一般淨按摩,完成後要立即起床,相對來說,熱敷的效用與按摩有著同等重要的效用。

古法起風
在中醫角度來看,懷孕需大量血液供胎兒成長,形成其他部份器官血液供應不足,例如胃部呆滯,關節疼痛,都是因為血虛所引致,血虛生風,容易頭暈,頭痛,四肢尤其是腿部到了晚上容易抽筋。所以孕媽咪如接受舒緩按摩仍未能解決不適,便需要進行古法起風療程了。

通乳腺
為哺母乳作準備及保護胸形,舒緩漲痛感覺。

預防妊娠紋
腹,胸和臀部擴張使皮下彈性纖維斷裂形成妊娠紋,要預早強化結締組織,避免做成難以復原的斷紋。

色素沈澱
循環減慢令頸項,腋下,乳頭,胯下,臀部色素加深,日常勤加護理,做個亮麗白滑靚媽咪。

皮膚痕癢
孕媽咪體質易有濕氣鬱結,濕疹非內困就是誘發,內困易遺傳給胎兒,外發令孕媽咪難受。 參考療理古法,安全有效地舒緩濕疹帶來的不適。

纖與美
預約服務專線:2730 8902 (成日都冇人聽架 :p)
九龍區
九龍尖沙咀彌敦道184號地庫全層
Fax: 2730 8932 (尖沙咀警署對面)
香港區
香港銅鑼灣渣甸街50號渣甸中心15樓全層
Fax: 2577 0932 (銅鑼灣港鐵路站渣甸坊F出口)

No comments:

Blog Widget by LinkWithin