Sunday, April 25, 2010

大肚攝影::Asgard

終於都影啦,
其實算遲咗影,
依家肥過豬頭!
早一個月影塊面就靚啲,
但係個肚就細啲, 個形就圓啲,
依家有啲水滴形.
咁我係想留住最肥一刻,
所以都 ok.

可以影四套衫.
有啲之前預備咗都已經唔啱著啦 :p:p:p
唸住用攝影公司配備的長紗,
三點式橙紅色泳衣加橙色沙灘裙 (第一次影三點式 :p)
一件米色大肚衫 (即係淘寶嗰件.)
一件白色 / 一件紅色貼身背心 (即係阿玲係 topshop 買嗰兩件.)
陳星星配合我都要著白色背心底衫, 赤裸上身 + 短褲.
我地都係第一次著咁少衫影相!!
露咁多肉都好難公諸於世 :P

原本約咗三點鐘,
應該早十五分鐘上去化妝,
不過食飯早咗, 兩點半就到啦.
咁冇人就可以早啲開始.
先化咗個淡妝,
有打鼻影, 冇假眼睫毛, 冇打腮影,
所以仍然圓碌碌.

成件事情有四個人招呼我地,
兩個小姐幫我化妝換衫, 化妝師 Sum Wong,
另外兩位男士, 一個攝影師 Jacky, 一個打燈!
好有誠意!
我俾幾百蚊咋喎!!
玩足兩個鐘~

好明顯係由最多布的開始.
米色大肚衫 + leggings,
星星係白 tee + 牛仔褲.
studio 出面有平台,
有個小花園的佈置.
當暖身啦.
有衫始終唔係咁見到肚形.

下一步就係貼身背心.
我同星星都係白色背心.
情侶裝 :p
攝影師話可以玩黑白喎.

之後就戲肉啦.
用塊長紗包住就做個 tube top + leggings,
留條長尾做到好似頭紗咁飄紗.
單人相比較多.
之後仲勁爆,
用另一塊長紗包做迷你裙.
再影咗張好似冇著衫的相!!

最後就著三點式橙紅色泳衣加橙色沙灘裙,
星星赤裸上身 + 短褲.
不過就係咁意影咗幾張就收檔啦,
因為都有啲攰同冇乜嘢好影啦.

唔算影得好多 pose,
而係佢公司網頁所見到嘅我地都有影~
但係一個 pose 閒閒地影十幾張,
特別係飄紗呀, 難度的藝術大肚 pose,
影到靚至收貨,
我真係覺得好似 america's next top model 囉!

影相過程非常滿意!!
星星仲話第時瓜瓜的 BB 相都返黎影添.

不過唯一就係服務怪怪,
係荔枝角影完相,
問攝影師幾時有相睇,
佢嘅答案係叫我打電話去尖沙咀辦公室再約時間.
呢個唔係佢地幫我安排架咩??

No comments:

Blog Widget by LinkWithin