Wednesday, March 17, 2010

私家檢查 (5)::埃塞俄比 B

記得上個月的時候,
醫生話我肥得太快.
所以之後就唔敢食咁多,
零食都唔敢入貨,
早餐由豬柳蛋漢堡改番普通麵包.

今日磅重 140 磅, (進度好好, 一個禮拜真係只重一磅!)
血壓正常,
驗小便張試紙個格格變咗深綠色,
姑娘話有少少糖尿, 有 2 個 +.
但係佢話上次係醫生飲糖水測試都係一個禮拜前的事,
當時冇問題都冇問題啦.

照超聲波,
瓜瓜今日係 orz 姿勢,
所以面向下, 睇唔到個樣.
不過都可以度頭圍, 腰圍, 手掌同腳掌,

惡夢又黎啦.
醫生話瓜瓜個頭就大咗啲, 腰就細得滯, 胎水又少得滯,
我話似埃塞俄比 B.
想點呢?? 一時又話肥, 一時又嫌瘦!
做人真煩 :p:p

醫生話驚瓜瓜太瘦, 胎水不足會影響發展遲緩喎,
但係同飲多啲水又冇關係,
係要食多啲有營養的食物, 瞓多啲, 休息多啲.

醫生問早餐食乜嘢,
我話麵包,
佢話要食多啲, 要飲奶.
yeah~ 又可以食豬柳蛋漢堡! i like it!

根據預產期係 6 月 3 日, 瓜瓜就應該係 28 週 5 天.
(要知道醫院的預產期係 5 月 23 日, 瓜瓜就應該係 30 週 2 天.)
而現實的數字就係咁:
BPD 頭骨橫徑: 8.21cm --> 31 週 4 天
HC 頭圍: 28.2 cm --> 30 週 4 天 --> 頭圍大都接受到, 因為解釋似陳星星.
AC 腹圍: 23 cm --> 26 週 --> 醫生話呢個相差太遠.
FL 大腿骨: 5.39 cm --> 27 週 2 天
HL: 4.86 cm --> 28 週 2 天
AFI 羊水指數: 9.8
EFW 總體重: 1240 gm 44 percentile

仲唔係大頭怪嬰???
可能因為上個禮拜有啲感冒啩.
醫生寫咗張醫生紙,
叫我攞番去東區醫院睇吓駛唔駛做多啲檢查, 照密啲超聲波.

打電話去東區醫院婦產科,
佢話因為星期五已經約咗去健康院覆診,
到時攞埋張醫生紙俾醫生睇,
有需要的話就會轉番我番醫院覆診,
呢個係最快的方法.
咁等多兩日再算啦.

就係咁,
又可以大吃大喝啦.
(之前話肥得快, 食多啲嘢都好罪惡 :p:p:p).

陳生仲話睇吓好冇早啲放產假留係屋企.
咁早放產假, 想悶死人咩,
況且我個人咁唔瞓得, 留係屋企都唔知做乜好!

No comments:

Blog Widget by LinkWithin