Thursday, January 28, 2010

又睇樓::太古

屋企人有興趣搬埋同一區,
至少四個大人一個細路,
目標係約 1000 呎的單位,
太細就唔需要搬啦.

逸樺園
樓齡最新,
所以價錢最貴, 實用最低.
三間房得個主人房比較正常,
另外兩間都係單人小房, 6'x6' 嗰隻.
兩對夫婦住唔到喎.
有個小露台, 企到四個人咁上下啦,
但係係用三塊玻璃圍住冇任何石屎,
好可怕.

逸意居
當年新建的時候係豪宅,
而且非常前衛,
白色加粉紫色粉綠色的外牆.
可惜, 歲月催人,
依家有點點娘 :p
入到去單位有好多橫樑嚇一跳,
實用亦冇想像中高.
最抵死係隔離第二期建築中,
將會冇咗半面景觀.

康怡
雖然都係鑽石型,
但係一千呎的鑽都可以接受.
個廳都幾大.
三間房中間的牆都可以移動,
咁就可以做到兩間大一間小房啦.
不過只係得 J 同 M 座有千呎單位,
M 座位置唔好,
J 呢都還可以, 景觀開揚.
可以唸吓.

太古城
啲人成日話太古城好實用,
結果令人有啲失望.
先睇 1100'-1300' 最大的單位,
只限於最近海的一排海景花園.
一入屋就係見到一個三角形的廳, 頗細.
飯廳尤其細,
但係三間或者四間房的房間就大.
而且個單位間格並不是四四正正的,
而係呈 45 度角的多邊形,
走廊似九曲十三彎,
入到屋內感覺不太舒服.
個海景呢對住個東區走廊又唔太吸引.
為求四正, 睇多個 905' 的單位,
係太古地商場二期的樓上,
不過就冇景觀啦.
個主人房超大,
一樣係兩個小房,
兩個廳都係相對較細.

2 comments:

BABYCATH said...

搬埋一齊住????

芷蔚 said...

唔係, 係阿哥佢地住.
我地三人新世界~

Blog Widget by LinkWithin