Monday, January 25, 2010

賀年蘿蔔糕

唔鐘意日日煮飯,
不過晒時間整啲麻麻煩煩的食物就 ok.
超鐘意食蘿蔔糕,
年年都整幾次,
細個淨係幫手刨蘿蔔,
依家就可以全程都插一腳.

材料: (其實都係個人喜好.)
重點係七斤蘿蔔加一包粘米粉. (阿嫲嗰代就六斤蘿蔔一包粉, 咁個糕就實啲.)
一般就臘腸, 臘肉, 冬菇, 蔥, 份量隨意.
今次老豆話食海鮮, 所以佢嗰盤就有蝦米, 瑤柱.

蘿蔔刨粗絲, 粗啲有咬口.

加水開大半包粘米粉, 要慢慢加水,
開到好似漿糊咁, 剛剛飽和,
非常的杰, 備用.

炒香所有臘味材料, 備用.

然後蘿蔔連蘿蔔水一齊煮至諗身.
蘿蔔係會一路煮一路出水.

加入粘米漿.
覺得水太多要繼續煮,
加埋最後的粘米粉直至乾水.
再加入炒咗的臘味.
放入鍚紙盤, 蒸 45 分鐘,

食得~ 剛剛蒸起的好軟熟, 特別好味!
我自己食晒一盤 :p

No comments:

Blog Widget by LinkWithin