Friday, December 4, 2009

陪月員

早兩日到仲介公司跟一個陪月員面試,
其實只係唸住多對手可以幫幫忙,
咁屋企突然多個小孩唔會太 '呢 hea'.
揀呢間公司因為月費平啲, 冇佣金, 而且同東區醫院有聯繫, 全程都可以打去佢公司搵姑娘問問題.

不過第一次見面,
真係唔知道佢應該做啲乜? 同我應該問佢啲乜? 要注意啲乜呢?
大家坐係張枱前講兩句,
我會知佢識唔識湊仔咩?
見到佢都乾淨企理, 乖乖巧巧咁囉.
人如其名: 小靜, 好靜~
仲介公司又頗 pushy,
叫我地俾錢, 簽合約咁.
但我地都想唸吓先,
係咪要呢個小姐幫手呢?

第二日許小姐打黎跟進,
我直接同佢講我都唔知用乜嘢準則去選人,
我又未去產前講座, 資料又貧乏,
都唔知點算?
小靜唔係唔好, 不過想見多個可以比較吓.
咁小姐話下次可以幫我問多啲, 又講解多啲.

今日見咗娟姐,
佢比較多嘢講, 經驗比較多,
而且準備充足, 自備咗好多產後食譜俾我睇,
見到佢對份工好有 passion,
所以相信佢應該會做好呢份工~
而且坐月期間你眼望我眼,
佢多啲嘢講我都冇咁悶.
當然都有陪月員專業証書, 嬰兒按摩証書, 急救証書.
結果就即場決定咗啦.
後尾仲發現佢係陪月課程的最佳學員添.

生仔過程同結婚過程一樣,
好多嘢要決定 :p
好多濕碎嘢.
結婚準備都有姊妹幫手,
生仔準備搵邊個?
兩種心情完全唔同,
結婚的喜悅同孕婦的煩燥加上生仔的緊張,
係生理的影響,
情緒比較飄忽.
同樣地,
身邊的男人都唔多幫手, 唔幫倒忙都算係咁,
佢唔係女人, 更加唔係孕婦, 佢真係唔明架.
佢淨係覺得我好麻煩 :p

2 comments:

Anonymous said...

除咗湯水之外
最重要係BB半夜起身
佢會負責換nappy、或者幫手餵奶俾BB
坐月女人係盡量唔落床

-bro

芷蔚 said...

唔落床好悶架喎,
仲要成個月, 我死梗啦...

Blog Widget by LinkWithin