Wednesday, December 16, 2009

睇樓::鰂魚涌

因為多咗個小朋友,
依家目標單位都大咗少少,
六百尺至八百尺啦.
我唔鐘意康怡的三角廳,
佢唔鐘意三房的南豐走廊長.
今次主要睇咗四個屋苑:
康蕙花園, 柏蕙苑, 寶峰園, 康景花園.

康蕙花園
正門要上少少斜路,
都接受到,
價錢就四個屋苑之中最平,
不過啲房真係細得緊要.
完全唔會考慮.

柏蕙苑
四橦樓,
相對樓齡較新,
太古管理的樓宇 keep 得好,
睇咗個高層單位, 非常開揚,
而且客廳有落地玻璃, 好光猛.
樓底夠高, 廚房超大, 反而洗水間就偏細.
我睇的兩房單位, 一大一小,
兩口子住就剛剛好,
加個小朋友就細咗少少啦.

寶峰園
ABC, 三座.
三十幾年的舊樓,
非常四正實用, 高樓底.
近地鐵站.
成件事情都 ok,
不過我睇嗰間係凶宅,
又冇第二個啱的放盤,
盤源少, 要等.

康景花園
最靜, 景觀最好, 不過地點最怪.
搭車就有小巴 $2.8 上咗南豐再轉落去.
行路就由鰂魚涌圖書館氣街市路再經掠晒衫的舊樓再轉電梯上 UG.
因為相對比較隔涉,
如果返工放工的時候無論小巴定電梯都會好多人.
冇車的話方便度就最差.

下一站: 天后.

No comments:

Blog Widget by LinkWithin