Tuesday, December 1, 2009

全家福::聖羅蘭

結婚的時候我買咗好多衣飾,
同時我的家人都落本地洗咗唔少錢!
媽媽買了一條西裙再多一襲旗抱後,
爸爸亦在 Kent & Curwen 買了一套過萬元的西裝!
哥哥也到 ST Dupont 買咗件貴價西裝褸~
要知道我地平時係唔需要穿呢啲衫,
平時一家四口大部份時候都係 tee + 牛仔褲,
所以靚衫都好明顯係 one-off,
然後從此就回歸櫃底,
不見天日....
所以就想件衫可以用多次,
就係一齊去影多次全家福啦!

去番我影結婚相的聖羅蘭,
因為價格同招呼都不錯,
化妝衣飾相片製成品質素都有信心.

9.00 出發,
10.30 到隔離春滿園飲個茶,
等位的時候我地先去聖羅蘭傾價錢.

一樣都係人仔3999 的套餐, 一樣唔要大相改做相簿.
- 我地三對每人兩個造型, 其中自備服裝一套, 佢地的衫一套
- 65 張相入 cd 入相簿 --> 上次得 48 張
- 12' x 8' 水晶 x1
- 10' x 8' 水晶 x1
- 8' x 8' 水晶 x1 --> 多咗一個水晶相架
- 12' x 8' 相簿 x3 --> 我地可以一家一本
- 8' x 8' 相簿 x1
- DVD x1
- CD x1
- 2R 銀包相 x10 --> 上次係 6 張
- VIP 金卡 x1
- 加相每張連 CD $48, 唔連就 $38

12.30 我地就返去揀衫啦.
因為之前見人地全家福的樣本有個奶奶穿咗件紅袍好靚,
就老點咗阿媽去試啦. (原本係唸住叫佢再著婚紗!! :D)
係好似四奶奶或者大宅門當家式樣的衣裙, 大紅色, 很艷麗.
然後造型師為她戴上假髮盤上一個大髻, 插上珠釵, 很特別.
她很高興的走黎走去, 雖然個假髮好重~
不過爸爸就好唔高興,
因為配對媽媽的服裝只有一款選擇,
是一套大紅的呆佬拜壽裝, (佢自己的形容啦.)
其實係一件暗紅色的長衫, 外加暗紅色的唐裝, 我覺得好有型喎.
爸爸很好,
他總為我們做出他平時打死都唔做的事情!
全家福要扮嘢, 要等, 要笑足全程,
過程佢一啲都唔 enjoy, 很攰的呢!
因為父母最先完成造型同埋爸可以早一點換番自己衫,
所以佢地先影, 係中式場景.
我見媽媽其中一個佈景係扮彈古箏,
她可是很喜歡古箏的呢,
因為中學時代佢曾經老點我去學啦, (咁優雅的樂器邊適合我??)
不過爸爸說她應該要扮林青霞的東方不敗 :p:p:p

哥哥呢, 就好想扮埋一份,
叫嫂嫂試日本和服啦, 古裝啦,
不過嫂嫂都覺得很醜, (我相信係大家的接受能力唔同.)
最後尾都只係選咗普通層層疊珠片粉紅色晚裝.
本身佢地都係一早攪掂個造型,
但係我係大肚婆麻,
佢讓咗俾我先,
咁佢就等等等,
睇完神奇四俠, 仲睇埋建國大業!
佢地呢就冇咁抵啦, 影背景紙, 雖然都換咗幾款.
不過佢地想要活潑可愛吖麻~

我呢, 決意要華麗宮廷,
因為之前冇影過.
不過咁就 '賴嘢' 喇!
宮廷裝係拖尾, 好多層布, 樽領長袖,
咁個頭呢, 又要加個長假鬈髮, (好似丐幫 :p)
所以成件事情都好重好熱好焗,
加埋影相的時候兩支大光燈射住, 差啲暈,
要休息兩次飲啲水至可以完成拍攝.
佈景當然係華麗西式宮廷梳化 + 水晶燈 + 大塊鏡的梳妝台啦.

之後就大家換番套飲衫影大合照啦,
佈景就只係普通的布芾好似屋企窗口俾張白木櫈咁, 比較悠閒風.
我著番條紅色衫,
set 鬈個頭就算啦,
冇戴頭飾,
用咗店的閃閃鑽頸鍊耳環, 好 glam~

化妝部份,
不過可能星期日真的人多,
化妝師們都出外景去.
我地三個的化妝師都唔同.
我嗰個呢不過不失囉, 上次嗰個好啲, 不過冇做啦.
上次化完自覺似 stephy, 今次似楊怡,
唔係話楊怡唔靚, 不過年紀唔同囉.
一貼完雙眼皮膠紙的時候,
對眼真係鴛鴦囉, 一邊個眼尾戚高咗好似鳳眼, 但係另一邊冇, 而且好似細咗一半咁!
好彩畫完眼線之後正常番, 但係都唔係我鐘意嘅圓形眼.
髮型就都是鬈髮啦,
不過估唔到依家呢個長度係最適合影相!
反而變化還多一點,
因為弄鬈後可以很型,
戴個假髮就變長髮啦,
最緊要係洗頭的時候簡單好多!!
(但係結婚當日就一定要用自己長頭髮, 因為近鏡俾人睇到啦.)

攝影師很讚!!
好有心機,
每個人的每個小動作手手腳腳都注意到, 都會提醒你.
每張相影完都會即時睇返有冇問題至繼續下一張.
所以同時都影得好慢 :p
一個造型影成 45 分鐘.
因為同時都有其他女子影造型照,
我地加埋影 4 part,
都攪到 7.00pm 至走得!!

好期待啲相啦,
不過我地只可以星期日上去,
最快係 12 月 13 號, 但係我冇理由生日上去睇相架,
之後 20 號阿哥就去咗韓國,
所以一拖就去到 27 號啦~

No comments:

Blog Widget by LinkWithin