Monday, September 21, 2009

浦和日本料理

冰上芭蕾開 8.00pm,
可以食個閒少少的晚飯.
浦和開咗一段時間,
算係近公司得黎比較便宜的日本菜,
不過都未試過.
入座後發現有 $188 放題,
結果都變得好趕 :p

冇張放題紙俾你慢慢劃,
吓吓要搵人落單,
有啲煩,
成百樣嘢食,
邊記得咁多?
所以一坐低就先俾個雜錦刺身.
有三文魚, 吞拿魚, 油甘魚, 八爪魚, 北寄貝, 刀馬貝, 希靈魚子.
雖然唔係高級貨色,
但係都好新鮮.
(相片不漂亮... 餐廳燈光又暗又黃...)

點了蔥吞拿魚腩手卷, 紫菜夠脆.
帶子海重卷幾特別.

海老天婦羅同炸蠔,
炸粻比較厚, 略為失色.
汁燒帆立貝個汁唔錯,
但係又唔會特別推介.
鹽燒雞軟骨串同原條沙甸魚我都唔食,
不過見佢燒得唔錯.

飲品都係任飲,
仲有芒果橙汁同柑桔青檸.

蟹子沙律有好多蟹子,
一啲都唔孤寒 (沙律醬同時都好多 :p)
珍味螺肉,
全部都細細隻有鮮味,
唔會發到大晒但係冇味 :p

清酒煮蜆有少量酒味,
而且份量都唔少,
仲有菇菇片.


後加冇影相的:
蟹肉忌廉薯餅: 估唔到係最好食嘅, 想再叫都趕住走啦.
玫瑰卷 (吞拿魚蟹子卷): 吞拿魚買相唔靚, 冇食.
鹽燒雞中翼:雞中翼皮脆肉嫩, 很好喎!
燒冬菇串:兩顆小冬菇作鹽燒, 唔會燒得太乾, 不過冇味 :P
番薯天婦羅 --> 佢上錯咗蝦天婦羅!

仲有好多款式,
但兩個人食唔得多,
因為每碟都有咁上下份量,
同埋後期開始人多,
食物上得比較慢同有漏單的情況.
不過仍然可以再黎.

浦和日本料理
地址 : 灣仔蘭杜街4號A鋪
電話 : 2866 8876
類別 : 日本菜

No comments:

Blog Widget by LinkWithin