Friday, August 14, 2009

羅浮宮::揀相

再去九龍塘,
好快,
三十分鐘唔洗就走得!
任務成功,
一蚊都冇加!
好叻~

我地一行三人,
佢姐夫先去泊車.
招呼我地的係 Joanna.
如傳說一樣,
小姐係會分開幾次俾你揀,
相信主要原因係張枱都唔夠大一次平放晒所有的相!

第一回係二人的婚紗造型.
佢家姐話攞起一定要的, 因為少啲 :)
但係同當日揀晚裝一樣,
只係揀到唯一的一張 :p
係好簡單的公園景, 有小小花, 兩個都笑得好.
我地係咪要求太高??
當然同我地已經影咗一輯都好大關係.
所以我地又轉個模式,
攞走我地唔鐘意的.
各自唔需要別人的認同,
一輪衝鋒!
啪啪啪的掃掃掃,
掃淨幾張 :p
所以其實有好多我直程冇掂過!
不過仲好,
唔駛多心.

點解可以啪啪啪?
因為其實影得唔係咁好,
非常爆光,
人物同背景的比例又怪,
動作冇特色,
有特色就娘 :p
張張都係兩個頭貼住然後四萬咁嘅口,
(當然我唔否認有啲係因為星星笑到攰咗.)
有啲背景又由頭到尾都唔鐘意但被迫要影!

第二輪係單人相.
數量唔多,
而配額有限.
一早唸住一人只可有一張單人,
所以好快就決定啦.

第三輪係雙人晚裝造型.
晚裝主要係室內景,
又係娘 :p
爆光問題亦更嚴重,
我塊面爆到好似冇化妝!
又可以啪啪啪~

仲有最後 effect 相,
果然係怪怪的 effect,
相中相,
加吹泡泡的框,
落雪,
黑白相.
啲相係之前冇見過,
但係我又唔見得特別靚喎??
有張係我影相的時候已經決定一定要的大頭剪影,
但係好衰唔衰!
佢兩張剪影都造咗 effect!
一張的相的左面係剪影, 右面係我的單人相.
一張的相的右面係剪影, 左面係我的單人相.
我地各自都唔鐘意自己的單人相!!!
如果要淨係剪影嗰張相就側埋一面...
唉... 唯有放棄...
另外佢鐘意張好似係教堂行出黎的黑白相,
(其實冇乜特別 :p)
不過都要 $178 (連 file),
所以都冇買.

最後揀到 17 張,
咁當然就好快手咁調整到 12 張.

下一步就係揀大小.
16' x 20' 油畫布 1 張
--> 就係一開始揀咗的唯一的一張. 小姐有係咁意講吓要唔要相框, 當然冇要啦.
8' x 10' 2張
--> 二人相, 一張婚紗一張晚裝
5' x 7' 2張
--> 單人相, 佢係坐係度的宮廷影, 我的係婚紗教堂背景
4' x 5' 10張
--> 唔要個兩張單人相款, 咁就剛剛十張~

之後小姐差啲忘記咗我有張簽名布!
我提佢的時候佢再問我酒店 coupon,
咪一早俾咗你公司囉!
佢再問我有幾多圍至加番俾我.

最後就問我地自己黎攞定速遞俾我,
速遞俾我唔駛加錢,
但係都要 11 月14 日後!!
我話我 7 號結婚, 你 14 號俾我太遲,
佢叫我加錢做特快!
當然唔會俾啦 :D
所以既然都係遲,
咁送返屋企唔駛專登過黎啦.

原本一開始係唸如果影得唔錯,
個小姐又 sell 吓,
咁或者會一次買走所有的 sample,
但係以上的事情都冇發生.
所以我地全身而退!
勁!!

題外話:
當時周圍都掛住周麗淇的婚紗相,
我都覺得同我化妝後個樣好似 :p

No comments:

Blog Widget by LinkWithin