Thursday, April 23, 2009

桂林肇慶自駕遊::回憶

五日的行程,
有兩日半都係車入面渡過,
經過國道 - 好似香港的高速公路, 石屎路面, 燈光通明.
經過省道 - 質素已經好參差, 好多都仲係沙路, 山路不過闊少少, 完全冇街燈, 得少少反光牌.

有日由桂林唸住經廣州返東莞,
其中一段路的國道未完成,
一定要走省道.
2.00pm 開車,
開到接近 7.00pm,
天都開始黑,
係條山路度左兜右兜,
一路都唔見城市,
只係偶而經過小村莊.
去到一個三岔口,
廣州仲有 100km,
肇慶就 77km.
去肇慶就近啲,
可以玩多個地方.
當下決定一個右轉,
向肇慶出發!

咁就瀨嘢啦!!!
天又黑,
肚又餓,
人又攰,
仲要眼瞓唔敢瞓.
全程係九曲十三彎的山路,
右邊就係懸崖,
冇街燈,
兩旁都係高聳入雲的大樹,
月光都唔係好睇到.
好彩有個 GPS 系統,
大約都知條路係點,
不過司機就其實睇唔到,
因為掛住望路.
當時我不知幾想唱: 她的眼光, 她的眼光, 好似好似星星發光, 睇見睇見睇見心更慌...
(即係殭屍先生的主題曲, 葉德嫻的鬼新娘)
唔知點解山卡啦咁有幾個屋,
無拿拿又企幾個人,
有時突然殺隻野狗出黎,
想嚇死人咩...
因為唔開得快,
如是者行咗兩個幾鐘!

開始見到街燈同公路的時間,
簡直如悉重負!
但係到咗夜晚合埋雙眼的時候都仍然左轉右轉暈車浪中 :(
第二朝起身都未暈完...
-------------------------------------------
省道一路都係山區入面,
全是農田, 小村莊,
不過相信已經係比較先進的地區.

有日咁啱放學時間,
一隊隊的穿住拖鞋的學生治著路肩行路返屋企.
我地架開開咗好耐都仍然都見到學生的縱影.
保守估計,
佢地每日返學放學都至少要行一個鐘,
距離就好似銅鑼灣返中環咁囉.

我們真的好幸福.

No comments:

Blog Widget by LinkWithin