Tuesday, March 31, 2009

未嫁得出

請不要再問我關於結婚的細節,
大家一開始就以結婚為前題的交住著,
真係結婚有幾出奇?
依家一次過滿足大家的好奇心.

係咪就黎結婚?
未確定, 可能聽日, 可能下年.
時機到的時候自然嫁得出,
簽張紙之麻~
又唔係要大鑼大鼓做大龍鳳.

大日子幾時?
其實真係未決定,
佢未求婚,
我屋企人又未知,
冇可能好肯定咁講一個日子.
最快可能係十一月.
呢個講天時地利人和.

係咪有咗, 點解咁急?
絕對冇, 我非常介意本人成為未婚媽媽.
如果我真係有咗,
仲等到十一月?
到時個肚大過鑼啦!
當你有時間有錢,
籌備根本唔係問題,
阿哥都係用咗四個月就嫁出啦.
咪又係我統籌~

婚紗相就証據啦?
唔係,
影呢輯婚紗相一開始就係平平地玩玩吓,
想試吓辛唔辛苦靚唔靚,
影相好簡單啫,
貴少少的生活照囉,
唸住年年都去影黎留念架喎.
都冇唸過作為結婚照,
到真係結婚的時候我一定會再影多幾輯!

地點, 伴娘人選, 婚紗呢?
係, 我對每樣嘢都有研究,
有啲之前幫阿哥睇過,
有啲做咗咁多年人有唸過,
有啲大家傾吓傾過,
不過全部都未落實.

我地都係爽快的人,
要落實所有的細節真係零難度.
嫁得出的時間,
一定會張貼告示, 大肆宣揚!

No comments:

Blog Widget by LinkWithin