Friday, October 31, 2008

半天假

忙咗成個月,
需要休息一吓,
身心皆疲.

係屋企做咗個瑜伽,
食咗穀物早餐,
睇張敬軒演唱會,
清咗部落格段段寫咗一半的文字,
慢吞吞的....
深層休息!

聽日又要由頭開始啦!

魚翅城酒家

因為有五百蚊贈卷,
益咗我有翅食.

148 翅 (HK$148/位)
可選紅燒或雞湯,
仲係堂煮.
我要咗雞湯,
一大排翅,
不過冇乜特別,
就係一碗翅囉.

帶子瑤柱炒蛋白
蛋白好嫩滑,
不過淡咗少少.

芥末脆蝦
薄薄脆粻的炸蝦,
加日式芥末汁,
好好味呀~

蟹粉小籠包 (HK$78/兩隻)
太大隻!
一啖食唔晒,
所以流晒啲汁好狼狽.

杏汁撞蛋白 (HK$38/位)
略甜,
堂煮嘅特色係咩呢?

扣咗贈卷,
俾咗 HK$217.
好似好抵,
但係又唔會令到我俾十足黎食多次,
差唔多價錢的選擇又多的是.

魚翅城酒家
地址 : 尖沙咀彌敦道132號美麗華商場4樓D號舖
電話 : 3586 1328
類別 : 酒樓

回水!

我有退稅!
我有退稅!
我有退稅!
我有退稅!
我有退稅!
寒冬過得舒服一點.
(但係又好想買兩對鞋囉...)

洛杉磯愛樂樂團音樂會

真係唔識欣賞,
可能細個上音樂堂唔多留心.
全場坐立不安,
屏息靜氣,
真係好怕要靜英英坐定定.

大部份時間我都係好想瞓... :p
應該買隻 CD 番屋企做安眠曲!
唔眼瞓係因為我想睇吓同場的董建華會唔會打呵欠??
演奏第一首同唔係節目表裡面送的那二首比較輕快就好少少囉~
音樂會真係唔係好啱我.

節目詳情:
洛杉磯愛樂樂團音樂會
音樂總監: 埃薩 ‧貝卡‧沙羅倫

節目
30.10
法雅 舞曲三首,選自《魔法師之戀》
德布西 海
拉威爾 鵝媽媽組曲
拉威爾 波雷羅舞曲

Wednesday, October 29, 2008

長征

尋日返大陸同阿哥睇婚紗,
上去皇岡好似好快,
由灣仔出發半個鐘就到,
夜晚係深圳灣返嘉享灣,
用咗個半鐘,
攰死我 :p

好彩完成任務,
如果要我自己搭巴士上多去一次,
不如整死我吧啦~
有飯食都係咁話!

Tuesday, October 28, 2008

Sunday, October 26, 2008

大閘蟹

終於食了今年的第一次大閘蟹,
爹娘都高膽固醇,
已經不能多吃,
所以我都冇得吃.

出街食又貴又無儀態,
蒸大閘蟹又冇難度,
一般都係買番屋企整.
每年我們只會到華記永昌號,
唔鐘意買最平, 冇肉食.
亦唔鐘意食最貴, 太老.

今日食 $85/隻 (約五兩),
所有嘢都剛剛好,
鮮甜味美.

最重要係蟹後薑茶,
最緊要夠辣!
咁就完美啦~

華記永昌號
地址 : 銅鑼灣駱克道476 號地下
電話 : 2836 6411

牛仔褲

牛仔褲是除咗時間以外最最現實的東東.
個褲頭絕對冇彈性去客忍你肥多一寸,
肥腩的脂肪會從兩邊喞出黎,
當你要縮起個肚腩至扣到粒褲頭鈕,
咁就世界未日啦.

Friday, October 24, 2008

思緒混亂,
想起以前現在種種的人與事.
全部是片段式,
支離破碎的,
迷迷糊糊的.

想起小時候的家庭樂,
想起以往讀書的悠閒日子,
那些年陪伴我的他,
零零碎碎...

係咪因為就黎死呢? 哈!

Thursday, October 23, 2008

喜來登酒店咖啡廳

自從上一次宵夜自助餐失敗咗,
想食自助餐嘅筋一路抽住抽住.
試吓喜來登~
$380/位,
用恒生信用咭有8折!

我覺得呢度啱女仔食多啲,
冷盤, 熱盤同甜品的選擇相若.
甜品最好食~
一般自助餐我都唔食得多,
淨係揀啲貴的回本, 哈哈!

冷盤有生蠔, 魚生壽司, 青口, prawn cocktail, parma ham....
生蠔好細隻不過新鮮同甜, 要落單等待 (即開喎), 乾淨啲囉.
parma ham 加蜜瓜超正.
凱撒沙律也很好。

熱盤有燒西冷牛肉, 火雞, 原條蒸魚, 咕嚕肉, 燒味拼盤.........
十幾款啦, 不過我一樣都冇食 :p
買相唔多吸引咁囉.

湯就一中一西一泰, 冬蔭公好辣 :p

甜品有朱古力, Macaroon, 芒果布甸....
panna cotta 釋作忌廉布甸, 我覺得似雲呢拿 mousse :p
蜂蜜蘆薈, 好新鮮囉.
生果啦, 西瓜, 波蘿, 哈蜜瓜, 蜜瓜.
白酒啫喱, 都唔錯, 係結實咗少少.

喜來登酒店咖啡廳
地址 : 尖沙咀彌敦道20號香港喜來登酒店2樓
電話 : 2369 1111
類別 : 自助餐

Tuesday, October 21, 2008

抗抑鬱

病況:
週期性抑鬱加諸事不順引致腦閉塞同淚線腫脹.

減輕症狀的方法包括:
遠離是非
好處: 眼不見為乾淨.
壞處: 雖然你見唔到, 但係唔代表事情唔會繼續發生.

遠離煩囂
好處: 重投大自然的懷抱.
壞處: 日日係個城市度工作, 邊會咁得閒吓吓去親親大自然?

行街購物!
好處: 能醫百病
壞處: 荷包會得到乾硬化症狀.

食甜點
好處: 心情暫時得以舒緩.
壞處: 肥咗的時候會更唔開心.

曬太陽
好處: 吸收什麼維他命.
壞處: 曬黑咗的時候都係會更唔開心.

打電話俾游貝貝
好處: 呢個世界得佢咁厚顏無恥的係條街度大呼小叫然後再大聲的唱歌俾你聽!!!!!! 絕對係最方便快捷極速開心法~
壞處: 冇乜, 貝貝比較大方 :) 只要唔係三更半夜.

Monday, October 20, 2008

偷得浮生半日閒

生活迫人,
好頭赤.
原本想給自己半天假返家休息,
點知突然間有個客下午要睇樓.
得番兩個鐘.
人在中環,
想找個靜英英的地方休息吓.

先係蘭桂芳的 haagan-dazs 食個 high tea,
一球好甜的 tiramisu 雪糕,
加一件甜死人的 chocolate paradise cake,
再來一壺熱紅茶.
從一樓的窗前望下,
望住人來人往的街道,
得到片刻的寧靜,
跟兄弟無聊的 sms 和唔用腦的 nds 遊戲,
時間慢慢的流走.

平常我會沿着皇后大道行返金鐘.
今日選擇走條更遠的路.
聽着張敬軒唱着林憶蓮的歌,
經過炮台里,
走到聖約翰教堂,
穿過長江公園, 萬國寶通廣場,
再到香港公園.
慢步綠色的道路,
呼吸新鮮的空氣,
豁然開朗.

當然還得多謝你在公司幫忙處理那些瑣碎事讓我可以幹着這樣無聊任性的事.

家好月圓連續劇

播得太耐啦,
身為半個局外人都煩到想死啦.
局外人可以望到全貌,
但係又唔可以有情緒立場,
要體貼別人的感受,
再加上要謹慎的言行,
好抑鬱.

我分唔到好人同壞人.
只見到蠢人, 貪婪的人, 安於本份同埋意氣用事的人.

成件事的主旨係:
一個人最好都係自食其力,
唔駛你幫,
又唔要你養.

又轉季

一轉季就好想買衫,
想買新一輪的流行,
離棄舊衣.

但係我又想慳錢,
都唔知點算?
唸吓唸吓,
今個月已經唔覺意洗咗幾千銀啦.
慳乜鬼吖慳!

Sunday, October 19, 2008

絳州大鼓音樂會

這是一個很值得看的表演.
大鼓與小鼓的合奏氣勢磅薄,
配合服飾, 動作, 身韻,
加上完美的合作性,
很強的趣味性,
通過說故事的人,
可以感受當中的意境.

無論是一個人演奏成個人咁長直徑的大鼓,
定係縛在腰間的小號鳳陽花鼓式團體賽,
都係無懈可擊!
好有驚喜~
--------------------------------------------------
世界人類口頭和非物質遺產代表
國寶樂團:絳州大鼓音樂會

北京奧運開幕式的擊缶演出氣勢磅礡,扣人心弦;要知道缶源自晉南,即山西南部,跟山西絳州鼓樂藝術團是同鄉。乘中國在奧運舞台上展現世界一流的水平之際,山西絳州鼓樂藝術團重臨香江,以被受各國推崇的中國鼓藝文化饗樂迷。他們激越的鼓聲,流露遠古晉南的豪情,演出精益求精,絕不欺場。

今年乃山西絳州鼓樂藝術團成立20周年。該團1995年由香港藝術節踏上國際舞台,多年以來,鼓樂團曾出訪歐美亞20多個國家和地區,受到觀眾高度好評。丹麥奧爾胡斯時任市長西蒙先生稱讚絳州鼓樂團是「超一流的世界級藝術團體」。而於2002年,絳州鼓樂團更獲聯合國教科文組織列為「世界人類口頭和非物質遺產代表」。

是次絳州鼓樂團共演出十五首曲目﹙每晚不同組合﹚,其中包括剛於去年獲全國群星獎大獎及創作獎,由絳州鼓樂團自家創作的《楊門女將》。此曲由京劇妝容粉墨登場的小妮子,以颯颯英姿擊出明快的節奏,極盡視聽之娛。另外,用直徑2.2米大鼓演奏的《黃土的訴說》以雄渾的鼓聲帶動大地,訴說歲月的滄桑,情思無限。而《秦皇點兵》則涵蓋了絳州鼓樂多種傳統鼓技,再現秦王﹙唐太宗李世民﹚揮師北伐凱旋而回歸的宏大場面。

【節目】
《楊門女將》、《老鼠娶親》、《黃河船夫》、《滾核桃》、《拉呱》、《牛鬥虎》、《晉南花鼓》、《秦王點兵》、《黃土的訴說》、《黃河鼓韻》、《大得勝》、《打鼓山傳奇》、《狗攆鴨子》、《黃土》、《三晉鼓律》

音樂會資料
音樂會名稱︰絳州大鼓
地點︰香港文化中心大劇院
日期︰2008年10月18及19日﹙星期六及日﹚
時間︰晚上7時30分
票價︰HK $480 $320 $240 $160 $80 ﹙學生、60歲或以上長者及殘疾人士半價﹚

Karaoke

很久沒有唱 karaoke,
跟同事唱着歌,
她們總嫌棄我愛的慢版情歌很悶,
特別是她們並不欣賞台灣國語歌.

還是跟十兄弟唱歌好,
我們有着同樣的審美觀,
仝人高唱慢吞吞的歌,
很盡興!

Friday, October 17, 2008

燈燈燈燈送到了

新的廳燈終於都送到了,
返屋企一開燈的時候,
簡直好似裝咗個太陽係屋企咁呀!
超正!
我最鐘意光猛大廳~

好似太陽咁溫暖~

八八八拉麵

終於搵到間比較好食的拉麵館,
尋找拉麵之旅暫時告一段落,
因為其實我本身沒有很喜歡吃拉麵 :p

星期六的一點三黎到,
時間尚早,
不過都要等位.
呢到冇籌派,
要係門口條樓梯排隊.

小懷舊拉麵 (HK$30)
我相信其實係鹽味?
係半份的麵食,
都好大碗吓囉.
可能個湯味淡,
嗅就有鹼水味,
食就唔多覺.
麵質夠韌,
幾好.

另叫了豬骨湯叉燒拉麵,
都好,
湯底夠濃.

炸雞塊我覺得炸得脆得滯,
好彩有幾片生菜食吓,
冇咁熱氣.

炸芝士 (HK$28) 就真係超正~
軟綿綿軟心,
四粒仔,
唔會太膩.

八八八拉麵
地址 : 銅鑼灣軒尼斯道499號永光商業大廈B2地庫
電話 : 2893 2388
類別 : 拉麵

阿媽

從今日蘋果日報見到呢個:
醫 學 Online
多 上 網 記 性 較 好
經 常 上 網 是 預 防 冇 記 性 的 好 方 法 。 美 國 一 項 研 究 邀 請 24 名 55 至 76 歲 的 人 士 參 加 , 其 中 一 半 人 甚 少 上 網 , 研 究 人 員 將 參 加 者 分 成 上 網 及 閱 讀 兩 組 , 當 兩 組 人 完 成 上 網 或 閱 讀 任 務 後 , 即 接 受 腦 部 掃 描 檢 查 , 量 度 腦 部 的 活 躍 程 度 。 結 果 發 現 閱 讀 組 只 有 主 宰 語 言 的 部 份 較 活 躍 , 但 上 網 組 則 大 腦 多 個 部 份 , 包 括 記 憶 及 邏 輯 分 析 等 也 很 活 躍 , 顯 示 長 者 多 上 網 有 助 預 防 腦 部 衰 退 。
------------------------------------------
我 msn 叫我阿媽睇吓.
阿媽 says:
你話我老人家
Wee says:
卡卡卡
阿媽 says:
我已升級冇所謂
Wee says:
升乜級 ?
阿媽 says:
奶奶 :)
Wee says:
救命.................
------------------------------------------
佢娶新抱應該好高興.

Tuesday, October 14, 2008

垃圾

我有一大疑問:
明明我個個月都大清理家居,
除咗收拾衣物仲發現有好多其他東東.
點解每次都搵到大量唔需要的物資呢?

Monday, October 13, 2008

寵壞了

jo 跟我說起工作的不愉快,
jo 爸同佢講做得唔開心可以隨時辭職.
被寵壞了的我們,
總是任性的選擇面對喜愛的人與事.

這是每次想起都眼濕濕的往事.
十年前的事還是歷歷在目.
連天氣, 場景, 對話都記得一清二楚.
那一年我想離開澳洲到不得了.

那個在澳洲短暫的家有個很大的露台,
我們的家在小丘上,
遠眺山下的住宅區.
(那可是個高尚住宅區啊! 我卻無福消受.)

爹坐在椅上看著黃昏時份的夕陽,
微微的涼風,
灰暗的天加上沉降中大大個的幻彩太陽,
寂靜的, 烏繩飛過都聽到.

爹獨個兒坐了一會,
我走出露台跪在他身邊,
他語重心長的跟我說:
芷蔚, 呢度真係好悶, 你都係唔好讀啦, 一齊返香港啦.

當下感動得淚流下來,
那年當是理所當然的到澳洲留學,
只為著選擇那門喜歡但毫無用處的科目.
事實上我家沒有大富大貴,
要供養兩個好逸惡勞的外國留學生並不容易.
到頭來只是懷念着家中被寵的大小姐生活,
嚴重想家的我一點也不寫意.
想離開很久了,
不過不敢喧之於口.

很想立刻說句好,
但又不喜讓人看扁看輕兼半途而廢,
亦不想令家人失望,
矛盾極了,
眼淚不能停止緩緩的流下來.

最後,
勉強的支撐了一年多,
還是回來了.

那段孤獨的日子,
每次想起都打從心底的寒起來.

雪櫃

雪糕長期不缺,
一年四季.
愛選購不同口味的過程,
愛放入口香甜軟滑的質感,
食一口,
心都甜了.
----------------------------------
一定有啤酒.
心血來潮時想喝一口,
嗜甜的我其實不喜啤酒,
有時需要酒精,
因為寂寞.
幸好雪櫃內的啤酒放置了很久了.
----------------------------------
一向都沒能睡得很香,
很難入睡,
半夜驚醒.
一個人在部屋內很缺安全感,
好像有鬼,
好像有賊.
不知從那一天開始,
隔幾日就食安眠藥進睡.
終於能夠完全的放鬆.
(其實更似昏死去.)

Sunday, October 12, 2008

喜萬年酒樓

又是阿哥惹的禍,
每次返香港都話要食乳豬.
乳豬原本好難搵,
要好味的乳豬更難.
試過千里迢迢去元朗食,
成日去酒樓都嘗試叫,
但係大部份的酒樓都冇做,
太子鳳城做得唔錯.

喜萬年係午市好憎去的地方,
勁迫.
為咗阿蘇介紹的乳豬,
唯一晚市再去睇睇啦.

炭燒乳豬 (半隻: HK$180, 全隻 HK$350)
肥膏少啦,
鬆化豬皮啦,
豬肉juicy嫰滑啦,
份量十足啦,
半隻乳豬都仲有紅燈閃吓閃吓啦.

其他食物都可以,
服務就差啲囉,
不過乳豬實在係突出.

喜萬年酒樓
地址 : 灣仔軒尼詩道1號熙信樓1樓
電話 : 2861 2882
類別 : 酒樓

三妹嘜泰國菜館

油麻地之旅食咗個好好食的泰菜,
當時只係開咗兩日的新店.

冬蔭公 (hk$68)
泰式炒椰菜苗 (HK$48)
鹽燒魚 (HK$$98)

家庭式的味道,
冬蔭公的味道很合胃口,
鹽燒魚非常好食.
全店泰國人.
女店長很好人.
希望小店食品能維持水準.

三妹嘜泰國菜館
地址: 九龍佐敦吳松街 109 號
Tel: 2739 3738
菜式: 泰國菜

有時會唔覺意的 '頂' 我阿娘.
娘會回我: 你老母吖!
我會話: 咁你又唔好咁話你自己.
佢有時又會話: 你老味吖!
我會指住爹話: 佢話你呀!

老=懶

今日的節目係染髮,
一向都係同阿媽互染,
作為親子活動之一,
亦慳錢慳時間.

跟林芍芍 msn,
我說白頭髮愈來愈多.....
Wee says:
i think it's bcoz getting old too hahahaa
Wee says:
i made getting old as excuse for everything
林芍芍 says:
hai wo... old can be excuse for so many things
林芍芍 says:
poor memory
poor health
walk slower / less
work slower / less
don't want to move...
haha... actually just laziness
Wee says:
hahahaaaaaaaaaaaaaaaaaaa u noe the truth wor!!

實情係: 我又老, 又懶.

節錄: 環保專家倡豆漿替牛奶

遺 棄 的 熊 仔 餅 , 走 入 有 機 食 品 店 幾 乎 迫 到 窒 息 , 做 現 代 人 , 忽 然 好 無 奈 。
周 兆 祥 搞 環 保 搞 了 20 幾 年 , 冷 眼 旁 觀 毒 奶 風 暴 , 覺 得 人 類 應 有 此 報 , 「 牛 奶 根 本 就 唔 係 畀 人 飲 , 無 一 種 動 物 成 年 之 後 仲 飲 奶 , 你 有 無 見 過 長 頸 鹿 飲 羊 奶 ? 」 他 說 , 牛 奶 含 飽 和 脂 肪 和 生 長 激 素 , 對 身 體 絕 無 好 處 , 而 且 人 體 內 兩 種 分 解 牛 奶 的 酵 素 , 過 了 幼 兒 期 就 會 消 失 , 「 尤 其 中 國 人 , 好 多 都 不 耐 乳 糖 , 飲 牛 奶 就 會 肚 屙 。 」
今 時 今 日 跟 牛 奶 劃 清 界 線 的 周 兆 祥 , 承 認 自 己 從 前 也 是 奶 癡 , 為 了 完 全 甩 掉 奶 癮 , 他 創 製 了 「 牛 奶 美 沙 酮 」 , 用 豆 漿 、 果 仁 、 果 做 杏 仁 奶 、 水 果 奶 昔 及 雪 糕 等 , 美 味 之 餘 , 又 營 養 豐 富 。

杏 仁 奶 入 口 香 滑 清 甜
其 中 杏 仁 奶 入 口 香 滑 清 甜 , 又 有 鮮 奶 口 味 , 不 隔 渣 的 話 有 粒 粒 碎 杏 仁 飽 肚 , 最 得 記 者 歡 心 , 早 餐 或 下 午 茶 時 間 飲 一 杯 , 非 常 醒 神 , 若 放 在 冰 箱 中 儲 存 , 又 可 作 冷 飲 。
尚 營 坊 高 級 營 養 師 黃 凱 詩 指 , 成 年 人 每 日 需 要 1,000 毫 克 鈣 , 一 杯 奶 含 300 毫 克 , 一 安 士 杏 仁 有 75 毫 克 , 她 了 解 過 有 關 食 譜 , 認 為 可 稍 作 改 良 , 「 杏 仁 真 係 高 鈣 食 品 , 但 係 都 係 脂 肪 物 質 , 經 常 飲 杏 仁 奶 代 替 牛 奶 , 可 能 會 過 胖 。 」 她 建 議 把 杏 仁 磨 碎 , 加 入 豆 漿 中 , 再 用 來 煮 麥 皮 , 營 養 更 為 豐 富 , 亦 可 以 減 少 攝 取 脂 肪 。
她 又 指 , 中 國 人 愛 吃 的 芥 蘭 、 白 菜 及 西 蘭 花 , 本 身 也 富 含 鈣 質 , 「 好 似 白 菜 咁 , 一 碗 煮 熟 就 有 180 毫 克 鈣 質 。 」

三 款 天 然 奶 品 製 法
杏 仁 奶
材 料 : 杏 仁 、 無 花 果 、 無 糖 豆 漿
做 法 : 杏 仁 先 用 冷 水 浸 兩 、 三 小 時 , 與 無 花 果 一 起 放 入 攪 拌 機 打 碎 , 如 喜 歡 幼 滑 口 感 , 可 用 過 濾 網 隔 去 硬 粒 , 最 後 加 入 豆 漿 即 成
提 示 : 杏 仁 可 以 合 桃 、 腰 果 或 松 子 等 替 代 , 全 部 須 事 先 浸 冷 水 ; 無 花 果 可 以 黑 糖 漿 、 蜜 糖 、 麥 芽 糖 、 杞 子 、 去 核 紅 棗 、 龍 眼 、 杏 脯 等 作 天 然 甜 味 ; 另 加 芒 果 、 椰 子 、 有 機 木 瓜 等 ; 夏 天 可 冷 藏 後 飲 用
優 點 : 滋 潤 、 含 鈣 質 及 優 質 的 油
營 養 師 提 示 : 杏 仁 富 含 鈣 質 , 但 屬 高 脂 食 品 , 可 用 加 鈣 豆 漿 取 代 , 或 把 杏 仁 磨 成 粒 , 加 入 豆 漿 中 , 用 來 煮 麥 皮

麥 皮 水 果 奶 昔
材 料 : 薏 米 、 麥 片 、 香 蕉
做 法 : 薏 米 及 麥 片 先 泡 水 1 小 時 , 蕉 去 皮 切 片 , 放 入 攪 拌 機 內 打 碎 , 如 喜 歡 幼 滑 口 感 , 可 用 過 濾 網 濾 去 硬 粒
提 示 : 如 想 更 幼 滑 , 可 先 用 磨 機 把 薏 米 麥 片 磨 碎 才 浸 水 ; 香 蕉 可 以 橙 、 蘋 果 、 梨 、 榴 槤 、 椰 子 、 大 樹 菠 蘿 , 甚 至 紅 菜 頭 代 替 , 顏 色 更 鮮 艷 吸 引 ; 可 另 加 麥 芽 糖 、 杞 子 、 去 核 紅 棗 、 龍 眼 等 調 味
優 點 : 低 脂 肪 、 提 供 營 養 及 纖 維
營 養 師 提 示 : 香 蕉 熱 量 達 90 卡 路 里 , 若 加 入 太 多 香 蕉 , 反 而 容 易 致 肥

香 蕉 雪 糕
材 料 : 香 蕉 3 隻 ( 可 做 3 杯 )
做 法 : 把 香 蕉 剝 皮 切 片 , 約 1 隻 香 蕉 切 開 10 截 , 放 進 小 膠 袋 或 膠 盒 內 , 放 入 冰 格 雪 3 至 8 小 時 , 取 出 倒 入 攪 拌 機 內 攪 約 一 至 兩 分 鐘 即 成
提 示 : 可 以 木 瓜 、 芒 果 、 蜜 瓜 、 青 瓜 替 代 , 加 上 檸 檬 汁 、 橙 汁 、 蜜 糖 、 杏 仁 粉
優 點 : 沒 有 人 工 添 加 劑 及 白 糖 、 低 脂 肪 、 豐 富 維 他 命
營 養 師 提 示 : 是 理 想 的 雪 糕 替 代 品

資 料 來 源 : 綠 色 生 活 育 基 金 主 席 周 兆 祥 、
尚 營 坊 高 級 營 養 師 黃 凱 詩
記 者 : 張 嘉 雯
蘋果日報 2008-10-12

手作仔日

我們當中有創作界的代表 iris,
最愛購買各式各樣的手工材料作實驗,
成功後便輪到我們的手工班.

昨天試作了布包紐,
布包紐可變身成橡皮圈, 髮夾等,
原本係十級容易的小童班玩意!
有空讓我將大褸們換掉紐扣~
林芍芍同 ling 弄了精美的手機吊飾,
其實還可以整頸錬, 手錬.....
不過轉眼已經夜深啦.

手工班待續....

Saturday, October 11, 2008

嬲死: 山頭火

都係阿哥無聊,
係日本食咗拉麵又話要買麵豉醬自己煮湯!
老豆話不如出街食,
今期 '飲食男女' 介紹拉麵,
最近屋企有山頭火.

排晒隊!
等咗接近一個鐘,
心唸唔好食就死啦!

食品選擇唔多,
三款湯底,
我地三個人一人一款 (主角阿哥反而唔係度~).
鹽味, 麵豉味同豉油味. (HK$58/碗)
可加辣, 不過就變成一碗辣油麵!
豬頸肉款式要 HK$98.

食拉麵要先呷一口湯,
我三款都有飲.
well....
失望到震,
淡而無味. (仲要油膩添.)
我一向都食淡都覺得好淡! (死唔死??)

勁普通的拉麵,
仲要黏牙!!
(鬧到停唔到口.)
义燒同豬頸肉都唔見得特別好味,
又唔香又無肉味.

餃子一般 (HK$35, 六隻),
個人唔多鐘意多肉少菜.

半熟蛋
比較上還可以.

杏仁凍牛奶
杏仁味香,
不過太甜.

最讚係鮮果杏仁豆腐,
豆腐香滑,
鮮果係新鮮紅莓, 藍莓, 士多啤梨,
滿滿的舖在豆腐上,
亦沒有一般日式甜品太甜的問題.

三個人食咗三百幾蚊!
又要等.
又貴.
重點拉麵又唔好食.
嬲死!

山頭火
地址 : 鰂魚涌康山道1號康怡廣場吉之島1樓
電話 : 2967 4044
類別 : 拉麵

台式地道美食

沙嗲串燒四寶丸 (HK$8)
牛根丸, 貢丸, 蟹籽丸, 墨魚丸,
必食推介~
沙嗲醬超好食!!!

食品都俾其他的店平,
款式又多,
叫咗個布丁珍珠 (HK$7),
QQ 有咬口.

HK$15 蚊,
滿足到暈~

台式地道美食
地址 : 旺角山東街40號地下
電話 : 2264-8090
類別 : 小食店

太子 --> 旺角 -> 油麻地

又唔想返屋企,
銅鑼灣行爛咗,
尖沙咀又啱啱 shop 完,
今次目標花園街同講咗好耐想行的廟街.

隨住個人愈來愈老加愈來愈肥,
花園街的衫我已經買唔落手.
我一般都會買配飾,
無聊頸鍊, 橡筋, 髮夾真係平到震.
最後收穫係大大個毛絨布花花心口針 (同髮夾兩用),
早兩日係銅鑼灣見到賣三百多,
花園街賣十蚊一個!!!
即時買咗三個,
雖然我都未唸到可以襯邊件褸??

然後橫過旺角西洋菜南街行人區,
依家好多人賣藝架喎,
自彈自唱啦,
仲要係好多唔好樂器喎,
用腳寫毛筆字啦,
雜耍啦.....
但係唔見咗 '誠徵女朋友' 喎??

旺角又點少得必然的掃街小食呢?
呢個留番下回分解.

原本係再行去油麻地食橫綱拉麵,
(因為想補償早兩日係太古吉之島食咗個嬲死貴價北海道拉麵!)
點知要等成五十個號碼,
冇電的我即時走人去廟街尋食.
最後係吳松街食咗間新開的泰菜,
都係下回分解.

食完飯,
經過廟街返油麻地搭地鐵.
見到樓梯底坐係度小背心短褲的阿姐(年紀實在唔細.)
仲有街邊卡啦 ok,
大大聲唱歌的阿叔,
好閃的陪舞阿姐,
叫喊: '嗰邊好有財氣的阿哥!' 的相士,
做'妹' 玩鐳射光的阿姐: '嘩~~ 好勁呀~~~'

廟街好似係唯一冇俾時間洗禮的地方,
細個同屋企人行的時候係咁樣,
大個同十兄弟去又係咁樣,
家吓都係咁樣!
好另類,
好似去咗個旅行咁,
舒服晒~~

Friday, October 10, 2008

杭州酒家

返工好似好苦悶,
今日晏晝想食啲新奇又刺激嘅嘢,
想要啲新鮮感~

兩條友去咗灣仔,
見到人多又唔去,
又要食新嘢,
唔覺意去咗杭州酒家.
知道出名但係從來冇試過.

素鵝 HK$48
齋唔凍唔好食!
有啲又雪到結冰!
呢個就很好.
腐皮層層叠,
好好味!!!

片兒川面 HK$45
其實睇個名完全唔知乜嘢黎?
仲以為係辣嘅 :P
事實係肉片雪菜湯麵.
好鮮味.
但係唔知點解麵食係第二道上的菜??
(可能杭州麵食係前菜.)

錢江小炒 HK$60
今日果然係想要新奇有趣,
樣樣嘢都唔知係乜?
(冇睇菜牌, 只有一張好似點心紙的午市點餐紙.)
事實係炒絲加炒絲.
呢個有筍絲, 有冬菇絲,
有豆腐乾絲, 有青/紅椒絲,
有魷魚條, 有肉絲.
送飯會好啲.

小籠包 (特價 4 隻 HK$12)
賣相奇差,
好似蒸過龍咁,
我都唔想放入口...
不過咬一啖之後發現個味道都唔錯,
裡面仲好多湯添,

家常餅 HK$38
又一唔知係乜?
事實係大大個的蔥油餅.
(係大餅麵包款, 唔係酥皮嗰隻.)
新鮮熱烘烘,
十級正!
不過食唔晒,
打包咗三份二.

HK$223.
臨尾仲送綠豆沙添.
食物質素無用置疑,
係衰在一樣一樣黎,
前後次序錯晒,
等得略耐囉.

杭州酒家
地址 : 灣仔莊士敦道178號-188號華懋莊士敦廣場一樓
電話 : 2591 1898
類別 : 杭州菜

Thursday, October 9, 2008

想抖

返工好攰,
返屋企都好攰.

唔想唸嘢住,
俾個腦休息吓吖唔該.

Wednesday, October 8, 2008

悶蛋一號

同事話: 去邊度搵啲咁悶的人?
返工的時候就寄電郵俾同一班人.
收工去食飯又係同一班人.
放假行街都係同一班人.
去做運動亦係同一班人.
無聊 msn 仲係同一班人.
講心事仍然係同一班人.

日日都傾計,
個個禮拜都見面.

兄弟,
點解個個覺得我地好似好悶,
我地仍然樂此不彼?

慳唔到錢

話慳錢慳錢,
結果都係慳唔到錢.

俾咗保險年費,
阿娘保護費,
做咗身體檢查,
買咗燈,
又買咗袋,
買咗飲裙,
仲要買阿哥份禮.

救命...
借大耳窿都唔掂....

Tuesday, October 7, 2008

慳錢

市道應該會更差一點,
人工沒有加,
但市面大部份的費用都加了,
食飯加價,
衫褲鞋襪又加,
護膚品又加,
連成班大駛精都話要慳錢.

自從有每月各項預算同 microsoft money 之後,
我的財政已經比較容易追查,
不過我成日俾藉口自己超出預期,
拉上補下呀,
平均數呀,
好耐冇買呀,
好需要呀,
唔少得呀......

節流好似難一點,
再想一想開源,
其實仲難.
懶啦,
冇時間啦,
唔知可以做乜啦,
唔想多勞,
又豈何多得呢?

點先可以有多啲錢呢?

燈燈燈燈: 番外篇

昨天放工途經燈飾店選擇但沒有購,
今早跟爹娘一起去買.
尋日穿黑色 one piece 加黑色短靴,
今日 tee 加 爛鬼短褲加 birkenstock.

店員今日再見我的時候,
第一句話: 嘩, 你今日咁嘅? 尋日成個 OL look.
我話: OL 都要休息架.

返工的時候.
要見客,
至少都要體面一點.
但係靚通常都係有代價,
好少又靚又舒服.

休息的時候,
我想着得舒服啲,
又唔洗見人,
親朋好友都慣咗我係一個爛仔,

爛仔 look 真係舒服過 OL look 十萬倍.
不過亦都見證人靠衣裝.

燈燈燈燈+門鐘

我相信由我買這個水晶廳燈那一天開始,
我便不喜歡它,
只是我需要它.
安裝了那個燈,
我更不喜歡,
有燈影啦,
唔夠光啦,
唔夠靚啦....

再重新選擇,
我唔想再要水晶燈,
想要實際的勁光慳電膽又唔娘的燈,
(最好仲要平!)
很難.

行咗好多轉都買唔落手....
終於因為阿哥結婚而的起心肝買過支廳燈,
繼續係駱克道搵到(比較)合心水的,
佢話係奶白色的西班牙玻璃,
個人覺得似厚膠, 哈哈..
不過最光可有 720 火!!!!
i like it!!!
我鐘意光到似日抖~
--------------------------------------------

門鐘很久沒有聲音了,
其實搬來一陣子已靜寂了.
都唔知壞咗定無電.

不過我又習慣兼鐘意佢冇聲,
咁我就可以享受一個人係屋企的安寧.

但係接新娘冇門鐘會唔會太怪呢?

黑夜不再來

放假一起來翡翠台播着 陳奕迅 Get a Life 演唱會,
他亦是我唯一一個每次開演唱會都會俾錢睇的男歌手.
很喜歡陳奕迅歌聲中的感染力,
很喜歡他唱現場的功力,
當然林夕的歌詞亦應記一功,
有很多的歌都成為近代經典.

'黑夜不再來' 陪伴了我好一段日子,
當時淨係片面的想唔開心的心情快點遠離.

冇黑暗又何來光明,
所有事情都係相對.
---------------------------------------------------------------


黑夜不再來 陳奕迅
作詞:林夕 作曲:陳輝陽

如果將街燈的光線代表真愛
或者熄燈了會更發現你存在
如果日落西山燈光普照麻木了
蒙住這雙眼令黑夜再來

@誰叫我這樣活該
縛起雙手給你愛
愛到兩腳浸沒在大海不懂再走開@

熟悉的想講再會
陌生的都很匹配
難怪我永遠懷念飛灰

如果將香煙點給我代表深愛
莫非煙熄了會更震憾與期待
難道討好我等於鼓勵我去歧視你
一手將心摔下來

嫌棄你想再會
被丟低想反悔
誰叫我要靠別人待薄才配

如果一呼氣一吸氣代表相愛
或者淹死我會更發現你存在
如果日夜一起想不起我曾被愛
難道分手會令感動再來

如何不後悔

Monday, October 6, 2008

重覆犯錯

每個人都會犯錯,
但係大部份的人都唔會認錯.
但係錯誤已經造成, 可以點呢?
唯有推卸責任.

將錯誤歸咎於別人好容易,
從而可以掩飾自己的不安,
心理中得而平衡, 不能自拔,
所有的反對行為變得名正言順.

當局者迷.

Sunday, October 5, 2008

深海尋人

尋日買的 vcd.
以為係恐怖片.
頭一半同尾一半係兩樣嘢黎.

整整兩個鐘頭!!
成件事死唔斷氣.
太多解釋, 做極唔完, 阻住我食飯.

係個海底特別少少.
HK$38蚊... uummm.... ok... 啦...

官方簡介:
『與那國島』是位於沖繩列島中最西端的小島,也就是日本國境最西端之處,連許多日本人都不知道它的存在。在島的海底長眠著神祕又令人震懾的海底古城遺跡。身為考古學家的陳國棟帶著高靜潛入海底古城準備向她求婚。就在此時,一件離奇的意外發生了,國棟竟在汪洋大海中消失得無影無蹤。 隨後打撈到一具無頭男屍,但經過DNA比對仍不能證實那是否就是國棟的遺體…

高靜難以接受這個打擊,對國棟的生死未卜及思念讓她陷入一種迷離狀態。為了查探水底發生意外的經過,她透過其病人Simon的引導,看得到不應該看到的光景、感應到平常人不能感應到的事情,異常的事件相繼在她身邊發生。這到底是真實或只是高靜的幻覺,驚懼之餘,她像是被一股未知魔力所牽引,回到國棟作研究的小島上。如當地自古流傳探求理想之鄉的傳說般,高靜向著黝黑的大海的另一方漂流而去…

密碼

facebook 的 status 或者 msn 的 personal message 是一處讓你寫上一小段現況或者心情.
某程度中係一個密碼.
雖然你的 friend list 中有好多人,
但係唔係個個人都明白你寫乜嘢.
只有你自己知道你係寫俾邊個人睇,
只得有心人先至明白你想表達的事情.

發生

當外在環境變差的時候,
你最親密的人會與你更緊密或離你更遠.

雖然事務着實令人難過,
但我慶幸原本已經可愛的家又再緊密一點.
這個月中我跟哥所通的電話已經是以往年的總和,
咁多年都未試過有咁多共同的秘密,
亦只有我倆並肩才能解決當下難題.

我終於都開始有啲崇拜佢啦, 哈哈~~~

觀點與角度

又一單觀點與角度的往事.

今日同家人行 megabox,
入咗去 B&Q 的傢俱部,
見到張摺枱好適合我的部屋.
想像一張橢圓形枱好像蝴蝶,
中間腹部可以收藏摺櫈,
兩邊翅膀可以張開成橢圓形枱或收起得番一個長方形的櫃.

哥說: 小時候也有一張相似的摺枱, 每次被追打藤條炆豬肉的時候都會喱係櫃底.
娘: 你細個頑皮吖麻.
哥: 唔係呀, 我明明覺得細個的時候阿妹頑皮啲.
我: 咩呀, 我明明記得細個每次原本打你都無拿拿打埋我. 我不知幾乖~
娘: 公平吖麻, 兩個都打. 唔係你個妹會囂架~
哥: 唔係呀, 佢依家都好囂架.
我: 呵呵~~~

究竟係邊個頑皮呢?
一般打邊個先呢?
我又喱去邊呢?

Saturday, October 4, 2008

泉昌美食

我想我真的老了,
總懷念買少見少的食品.
特別愛掃街類小食,
一串一串的,
好像很多選擇,
旺角的店愈來愈差,
灣仔這家小店不錯,
不過堂食的話是在衛生沒有很好的後巷內.

咖哩魷魚是有名的,
咖哩入味,
魷魚軟滑,
不個唔係熱食的.

另一樣推介的是臭豆腐,
即叫即炸,
香脆可口,
而且沒有很臭,
食咗都唔會一陣味 :p

泉昌美食
地址 : 灣仔灣仔道150b
電話 : 2575 8278
類別 : 港式小食店

Wednesday, October 1, 2008

想買

格仔格仔格仔,
我愛的蘇格蘭格仔裙回來了.
(訂咗格仔裇衫裙同格仔絲襪啦~)

紫色紫色紫色,
衫褲鞋襪都想買紫色.
(得條紫色 tight pants 同紫色平底鞋.)

長靴長靴長靴,
想要一對深啡色.
(雖然已經買咗兩對, 不過意猶未盡.)

新袋新袋新袋,
想買個輕的 tote bag.
(成年都冇買新袋啦.)

飲裙飲裙飲裙,
阿哥結婚嗰日條裙都未唸~
(屋企的衫好似唔啱身份.)

保持通話

我沒有看原片,
不過這套拍得不錯.
大部份的電影原素都有,
緊張的氣氛持續.
飛車追逐場面尤其出色.
王祖藍的一段亦攬笑輕鬆.
大S 兩母女,
古天樂的父子情也不俗.
唯一係最後十五分鐘有點畫蛇添足同太似和記廣告.

另外一讚係太古廣場的 AMC 實在係全城最好的戲院,
座位寬敞,
山頂的朋友都唔會見到人頭湧湧,
音響質素高,
更重要係一般去金鐘睇戲的人都有教養一點,
亦不會太多小朋友,
沒有人聲沸騰,
星期二的五十蚊飛簡直超值~

官方簡介:
改編自荷里活電影《駁命來電》(Cellular),講述單親媽媽Grace(徐熙媛飾演)這天如常送女兒如婷上學,途中卻被悍匪以霍(劉燁飾演)駕車欄腰猛撞,在她半昏半醒、全身無力的狀態下,目睹以霍在她屋內大肆搜索,更以凶殘手法殺害其女傭!然後把Grace擄走並鎖到一個貨櫃內。以霍逼使Grace交出他的犯罪證據,否則把她全家幹掉。驚惶失措的Grace襯無人看守時竭力地把一台損毀的手機重組,奇蹟地打出一個求救電話,意外撥通給任職財務公司貸款部職員的阿邦(古天樂飾演)。
Blog Widget by LinkWithin