Thursday, May 29, 2008

澳洲篇 - 27May Kings Canyon

六點九集合.
一早行山, 好健康.
見到個太陽由懸崖邊慢慢的升起.
天空由黑,
慢慢的沁出半圓形的光邊.
紅, 橙, 黃, 白, 藍,
一層層的漸變直至全天變為藍色.

預計行三至四個鐘.
行上峽谷頂,
全沙石路.
上上落落,
了無人煙.
好大風,
係乾爽的風,
好舒服.
當然一路行一路上地理堂啦,
風化, 大水, 熔岩, 石質, 斷層…..

以前去美國的大峽谷係搭直昇機,
呢處用腳行,
感受截然不同.
(導遊話美國嗰個唔應該叫 Canyon, 因為 Canyon 係風化嘅, 美國嘅係水造成.)

由於建議每人要帶 1.5L 的水,
我要揹埋阿媽嗰份, 即係3L.
邊個話我唔行得?

中途行咗去 Garden of the Eden,
真係好特別,
峽谷底有個小河同小水池,
一個小小的平地,
微弱的陽光,
左右兩旁翠綠的樹,
好清幽.

雖然頗靜,
香港好難得有如斯的生態旅遊,
谷上我見到一顆九百年的樹,
好驚訝,
呢片土地咁多年都冇變過.
會唔會我的子孫第時會見到同一顆樹呢?

這幾天像露營的生活.
作為都市人很不習慣,
但我覺得一生人都應該要黎一次.
這是一種體驗.
一種幸福.
只要你抱着學習的心,
世界真的很大,
每一次去完旅行都覺得好幸福.

到了旅程的最後一天,
我忽然間有啲唔捨得.
望住個天好藍,
紅色的土地,
啡色的山,
綠色的樹,
黃色的草.
我係車入面對住個窗望咗好耐.
係香港唔會見得到咁大片的土地, 咁長的地平線.

No comments:

Blog Widget by LinkWithin