Monday, March 31, 2008

圖書館

書店與圖書館.
我愛逛,
但不能作為工作的場所.

每次逗留十分鐘左右便會肚痛,
一離開便好了.

原因不明.
環境太靜?
書有書味?
太悠閒?
沒有深究.

一向不愛好酒精類飲品,
好苦.
近年來開始對酒精敏感,
飲多兩杯面上會起粒粒,
一兩日後才散去.

紅酒是另一番學問.
葡萄, 年期, 產地....
將會學習新的飲食文化.
我還想學朱古力品評.

Sunday, March 30, 2008

掃墓

拜山前,
跟娘到紙紮舖買衣紙.
見到一籠籠紙紮的點心食品.
我真的不明白,
這些能食嗎?

Saturday, March 29, 2008

朋友/男朋友

有些過氣的男朋友,
當他仍然是男朋友的時候,
總是格格不入.
有些人可以只可以做朋友,
作為男朋友,
我要求可高呢.
回歸朋友身份,
感覺舒服自在多了.

是有緣無份吧.

長征

今日做了一件所有人都會認為是好無聊的事.
但這樣的事,
一生人做一次的話是頗有趣的.
突發奇想,
由金鐘行路到柴灣!

一點鐘放工,
係皇后大道東食個晏,
兩點鐘開始行,
行行睇睇,
五點九就到達啦.
大約二十分鐘行到下一個地鐵站,
中途停得最耐是在北角琴行街排隊買雞蛋仔!

路線:
皇后大道東-> 春園街-> 莊士敦道-> 灣仔道-> 橫過天樂里-> 灣仔道-> 橫過寶靈頓道-> 灣仔道-> 橫過堅拿道西-> 羅素街 (時代廣場)-> 橫過波斯富街-> 橫過利園山道-> 啟超道 -> 渣甸坊 -> 橫過渣甸街-> 橫過怡和街-> 記利佐治街-> 橫過告士打道-> 穿過維多利亞公園-> 橫過興發街-> 電氣道-> 橫過琉璃街-> 橫過清風街-> 橫過永興街-> 橫過水星街-> 橫過麥連街-> 橫過油街-> 橫過艇街-> 橫過大強街-> 橫過雪廠街-> 渣華道-> 橫過月園街-> 橫過北角道-> 橫過糖水道-> 橫過書局街-> 琴行街 (雞蛋仔+夾餅)-> 英皇道-> 橫過電照街-> 橫過健康西街-> 橫過健康中街-> 橫過健康東街-> 橫過模範里-> 橫過民新街-> 橫過英皇道-> 糖廠街 (入太古坊睇 one island east)-> 華蘭路-> 太古城道-> 橫過太豐道-> 筲箕灣道-> 橫過太祥街-> 橫過太康街-> 橫過太安街-> 橫過聖十字徑-> 橫過海寧街-> 橫過海晏街-> 橫過海富街-> 橫過愛秩序灣道-> 橫過新城街-> 橫過林安坊-> 橫過南康街-> 橫過南安里-> 橫過愛秩序街-> 教堂街-> 橫過筲箕灣道-> 柴灣道-> 橫過阿公岩道-> 橫過樂民道-> 橫過康民街-> 吉勝街 -> 到站!

咁多年黎從來冇由筲箕灣行柴灣道到柴灣,
上山落山,
呢個行程都幾得意.
係全程有啲大塵囉.
今日又有啲熱,
返到屋企即時由頭洗到腳趾尾!

後記:
當我講呢件事俾我老豆聽嘅時候,
佢嘅反應係:
發神經架!
我想我無聊時間太多啦~

Friday, March 28, 2008

犯太歲

好肯定我今年係犯太歲,
有乜可能啲客個個都白痴, 'long 黎', '盧嘈' 兼煩到震呢??

蘇民峰

一向爹都有買 '忽然一週',
因為佢鐘意睇 '飲食男女'.

'忽然一週' 內有蘇民峰的專欄,
有四分之一的位置係留俾讀者寄上生日日期蘇民峰會幫你算命.
我從來唔會寄呢啲信,
但係我會八卦吓啲人問乜嘢.

今期被抽上的幸運讀者 '長期讀者李小姐',
竟然同我同年同月同日生!!!
(雖然我有啲懷疑係有人偷咗我嘅生日日期寄出~)

節錄問題如下:
1. 我一生人的整體運程如何? 有冇結婚運?
2. 工作運如何呢? 適合打工還是做生意?

蘇民峰答:
你屬 <金>,
生於冬天以 <火來照暖, 木來生火>,
以 <木> <火> 有利.
成世人由 32 歲開始入大運,
行到 62 歲,
係入大運之前,
有係打死都唔好輕舉莽動,
而你條命係有幫夫運同幫老闆運嘅,
所以亦可以話你係旺佢地!
想做生意嘅話,
千祈唔好獨資, 宜同人夾份,
而你仲要係佔細股份嘅,
至於做邊行都冇乜所謂嘞!
去年同今年都係你姻緣較好嘅年份,
有意中人就試吓發展,
結唔結成婚都係睇自己點唸.

落雨

個天一定係唔鐘意我啦.
要出街睇樓兼想着新鞋嘅時候佢就落雨!
激死...

Thursday, March 27, 2008

我成日都同人講 '我好窮'.
但係唔知點解冇人信我??
個個都話: 你除咗供樓都唔駛洗錢啦!

係~ 我唔算俾好多錢屋企.
但係一個人住嘅燈油火爉都要錢架.
我又饞嘴,
又鐘意購物,
幾廿歲人又要買補品護膚品,
冇乜錢淨架咋.
好窮!

十八年

好可怕.
幫 ling 寫 referee 的時候要填寫 '相識年期'.

屈指一算...
足足十八年!
長過楊過等小龍女呀.

再想一想,
同 iris 識咗 24 年!!
係現有仍然緊密聯絡的朋友首位!
好可怕呀....

Wednesday, March 26, 2008

母女對話

媽 (每日一問): 你今晚返唔返屋企食飯?
我 (每日一答): no 呀.
媽 (輕鬆的): 咁我去行街街啦~
我 (不經意的): 買咩呀?
媽 (興奮的): 睇吓有乜嘢大減價益你呀媽益你阿爸囉~
我 (無聊的): 吓? 益你呀媽好乸驚喎! (我阿婆走咗好多年.)
媽 (即答!): 咩呀! 買嘢俾我阿媽好乸貴架!
我 (大嚇一驚): 你突然間反應咁快嘅!

silly 朋友的 silly 公司

silly 朋友轉工,
要申報 referee.
名額四個.
不知是喜是悲的選上了我.

silly 朋友理所當然的配搭 silly 公司.
貴公司給我 email with attachment.
正常的應可 reply email.
但 silly 公司需要我郵寄或傳真回覆至 -->
英國總公司!!

實在 silly...

長恨歌

細個阿媽去買餸的時候,
總會將阿哥同我放係圖書館.
或者睇書的興趣係自小培養.
格林童話, 愛徒生童話集是常讀的書籍.

有一段時間,
沈迷成語故事, 唐詩三百首.
小學五年級,
點會識解唐詩三百首?
但係當年係識背長恨歌囉!
仲要同個同學鬥背得快背得多!

這是什麼樣的童年??
-----------------------------------------------------
長恨歌 白居易

漢王重色思傾國,御宇多年求不得.
楊家有女出長成,養在深閨人未識.
天生麗質難自棄,一朝選在君王側.
回眸一笑百媚生,六宮粉黛無顏色.
春寒賜浴華清池,溫泉水滑洗凝脂.
侍兒扶起嬌無力,於是新承恩澤時.
雲鬢花顏金布搖,芙蓉帳暖度春宵.
春宵苦短日高起,從此君王不早朝.
承歡侍宴無閑暇,春從春遊夜專夜.
後宮佳麗三千人,三千寵愛在一身.
金屋妝成嬌侍夜,玉樓宴罷醉和春.
姊妹弟兄皆列土,可憐光彩生門戶.
遂令天下父母心,不重生男重生女.
驪宮高處入青雲,仙樂風飄處處聞.
暖歌慢舞凝絲竹,盡日君王看不足.
漁陽瞽鼓動地來,驚破霓裳羽衣曲.
九重城闕煙塵生,千乘萬騎西南行.
翠華搖搖行復止,西出都門百餘里.
六軍不發無奈何,宛轉蛾眉馬前死.
花鈿委地無人收,翠翹金雀玉搔頭.
君王掩面救不得,回頭血淚相和流.
黃埃散漫風蕭索,雪棧縈紆登劍閣.
峨嵋山下少人行,旌旗無光日色薄.
蜀江水碧蜀山青,聖主朝朝暮暮情.
行宮見月傷心色,夜雨聞鈴腸斷聲.
天旋地轉迴龍馭,到此躊躇不能去.
馬嵬坡下泥土中,不見玉顏空死處.
君臣相顧盡沾衣,東望都門信馬歸.
歸來池苑皆依舊,太液芙蓉未央柳.
芙蓉如面柳如眉,對此如何不淚垂?
春風桃李花開日,秋雨梧桐葉落時.
西宮南內多秋草,落葉滿街紅不掃.
梨園弟子白髮新,椒房阿監青娥老.
夕殿螢飛思悄然,孤燈挑盡未成眠.
遲遲鐘鼓初長夜,耿耿星河欲曙天.
鴛鴦瓦冷霜華重,翡翠衾寒誰與共.
悠悠生死別經年,魂魄不曾來入夢.
臨邛道士鴻都客,能以精誠致魂魄.
為感君王輾轉思,遂教方士殷情覓.
排雲馭氣奔如電,升天入地求之偏.
上窮碧落下黃泉,兩處茫茫皆不見.
忽聞海上有神仙,山在虛無縹緲間.
樓閣玲瓏五雲起,其中綽約多仙子.
中有一人字太真,雲膚花貌參差是.
金闕西廂叩玉扃,轉教小玉報雙成.
聞道漢家天子使,九華帳裏夢魂驚.
攬衣推枕起徘徊,珠箔銀瓶迤邐開.
雲髻半偏新睡覺,花冠不整下堂來.
風吹仙袂飄飄舉,猶似霓裳羽衣舞.
玉容寂寞淚闌干,梨花一支春帶雨.
含情凝睇謝君王,一別音容兩渺茫.
朝陽殿裏恩愛絕,蓬萊宮中日月長.
回頭下望人寰處,不見長安見塵霧.
惟將舊物表深情,鈿合金釵將寄去.
釵留一股留一扇,釵擘黃金合分鈿.
但教心似金鈿堅,天上人間會相見.
臨別殷情重寄調,詞中有誓兩心知.
七月七日長生殿,夜半無人私語時.
在天願作比翼鳥,在地願為連理枝,
天長地久有時盡,此恨綿綿無絕期.

reference:
http://hk.knowledge.yahoo.com/question/?qid=7006052002392

Tuesday, March 25, 2008

依賴

我想我依賴了 '部落格'.
愛上自說自話.

無論發生什麼事,
我首先想到的是 '部落格',
每件事都想跟 '部落格' 分享傾訴.

'部落格' 是我知心密友.
這說明了我最親愛的還是我自己.

社工

我有好幾個朋友都當我係社工.
女人其實都只係想將件事情講出黎,
唔係要求解決.

不過實在能醫不自醫~
本人都有好多煩惱,
不過鐘意放埋一邊,
冇乜必要我都唔會攞出黎,
點解要令到自己唔開心?

蘋果批

我的家庭真可愛~
健康快樂笑常在~~

實在忍唔住要唱歌~!
早兩日睇 '飲食男女' 見到個係大埔的蘋果批(仲有雞批)好似好美味.
口痕痕叫老豆得閒去買俾我食.

頭先佢打俾我話佢已經搵到蘋果批嘅所在地,
聽日就會買返黎俾我食~

好感動.
熱切期待新鮮蘋果批!!

銀杏館

銀杏館聘請的侍應和收銀都係長者,
全部退而不休,
服務一流.

頭盤: 翡翠螺 HK$68
法式凍食海鮮,
好鮮甜.

頭盤: 煎鵝肝 HK$118
厚切,
十級肥美.

主菜: 煎銀雪魚 HK$188
兩大塊魚,
好滑, 煎得啱啱好.
配菜都好講究,
全碟都好好味.

主菜: 烤羊架 HK$208
(加 HK$40 加湯, 蒜容飽, 餐飲)
羊架唔騷,
香口但唔乾.

甜品: 朱古力餅 HK$58
普通啦.

甜品: 銀杏叔叔甜品 HK$58
係一個梳孚厘加蛋糕的甜品.
梳孚厘個蛋白發得超企身,
好有誠意,
但係好可惜甜品唔甜,
失色.

埋單 HK$811,
略貴.
但係服務超好,
個心都舒服啲.

銀杏館
地址 : 中環歌賦街44號地下
電話 : 2545 1200
菜式 : 法國菜

樓上樓下

我成日都好有衝動想走上樓上個單位睇吓佢做緊乜嘢.
佢地可以廿四小時都不停咁跌嘢.

根據本人對聲音的認知,
跌得最多嘅係類似骰子的物體.
係不停咁跌 N 咁多次嘅.
開頭我會估佢打牌,
但係我從來都聽見麻將聲.

另外可能係拜神類的 '勝杯',
不停嘅求神.
木同木的撞擊聲至少兩次或以上.
但係一日要問幾多之神??

或者係小朋友發脾氣亂掉嘢.
但係我未聽過喊聲.

有啲好似波子跌落地嘅聲.
有門較冇落潤滑油嘅聲.
有拉櫃由左邊拖到右邊嘅聲.

好困擾.

Monday, March 24, 2008

邪教

呢幾日係屋企做得最多嘅係伸展活動.
我會坐係梳化睇電視,
伸直條腰,
雙手高舉過頭然後伸直合十.

有時娘同我排排坐同時高舉雙手,
相信隔離屋見到我地應該會覺得我地舉行邪教酬神典禮.

大象亞鈍救細界

好有意義的一齣戲.
你睇唔見聽唔到冇感覺唔代表唔存在.
'i said what i meant and i meant what i said!', Horton.

不幸地我睇嘅係英文版.
一般卡通片我比較愛中文配音版,
親切好多,
笑話亦好笑好多.

裡面有隻黃色毛神神的配角動物, 好得意呀~!!!

熱烈期待同公司的 IceAge3 ---- Summer 2009!!!

故事簡介:
故事講述大象亞鈍在森林中聽到一把微弱的呼救聲,它發現聲音來自一粒在空氣中飄浮著的細小塵粒,原來塵粒裡住著一群小生物。大象亞鈍不理其他動物的恥笑,它決定拼死也要拯救新「細」界。

七日瘦身湯

在我最胖的時候,
我飲過呢個湯,
好有用,
瘦咗嘅唔會肥番.
是但淨飲三日都瘦 2kg 啦.

過程好肚餓,
因為飲湯一陣就肚餓啦.
要唔返工成日都係屋企先得.
我唔太跟指引.
我煮一大煲放係雪櫃,
想飲幾多就翻煲幾多囉.
基本上我係冇跟個份量黎煲,
所有事情都隨意.

但係個湯係一個好悶的菜味,
我呢啲齋人就覺得好好味啦.
唔多適合食肉獸囉.
有人加茄膏,
我加大量黑椒~
----------------------------------------------------------
七日瘦身湯

材料:
洋蔥 六個
青椒 兩個     
芹菜 一棵
番茄 六個    
椰菜 一個     
鹽 少許     
注:比例不變,一般一天煲一次。 

做法:
1、洋蔥去皮,用水沖洗乾淨,切成角形。
2、青辣椒用水洗淨,切成小型塊狀,去除籽。(注:辣莖不去)
3、芹菜用水洗淨,切成斜段。
4、番茄用水洗淨,切成小塊狀。
5、椰菜洗淨,切成三角形小塊狀。

  將以上5種菜放入大煲內,注滿清水,翻滾後,慢火煲3小時左右,餘下湯水即可,湯水可濃可淡,你可以用鹽調製你喜歡的味道,但不能放入動物油類。

飲用方法
  七日瘦身湯含大量纖維素、維生素,能有效降低膽固醉,分解脂肪,暢通胃腸,解除人體內毒素。
  此湯需一日飲用十次以上,每次1碗以上,連續七日即可達到減肥4-5公斤,再飲用時需用隔水熱溫,不能用火燉開,也可以不加熱飲用,一般一天燉一次,再喝時如上述加熱方式。餓的時候一定要喝湯,餓的時候喝效果較好。

reference:
http://www.winning11.com/discuz/viewthread.php?tid=51163&extra=page%3D1

自閉仔

這幾天的生活像自閉仔.
獨留家中,
無聊時拿出 NDS 玩數獨.

本來就覺得 NDS 係自閉仔的玩意,
仲要玩數獨!
有時真係覺得自己唔死都冇用!

Sunday, March 23, 2008

早熟

曾幾何時,
我娘都好怕我未婚懷孕.

看電影 '早熟',
我看到的是貧賤夫妻百事哀.

昨天友儕們又談到女仔讀咁多書就比較難嫁得出.
但係唔讀多啲書又搵唔到咁多錢,
你估個個男人都金龜?
個個嫁咗都唔駛做咩?

修身齊家治國平天下,
已經唔係淨係男人嘅專利.
女人都要增值.
女人都要先養活自己先至有個家.

一如所料

果然!
假期過咗一半,
仍然一事無成.

不過做啲無聊事過日晨,
好舒服~

Friday, March 21, 2008

三叔

三叔患有抑鬱症,
古怪行為多不勝數.

早幾天,
他又離家出走.
(其實係返咗公司瞓.)

嫲又提出古怪論調:
係公司瞓咁高, 好危險架!
(只不過係 23 樓.)

都唔知瞓覺同樓層有乜關係?
阿哥以前住 53 樓喎.

東京和食

打電話訂座的時候說人太多,
只接受 6.30pm 那一輪.
6.30pm 的座位,
8.00pm 要交還.
正常的用餐時間吧.
但到達直至中段時候,
仍然頗為水靜河飛喎.

Oden 關東煮
至愛的 7-11 小食,
入味的蘿蔔,
各式的魚蛋, 枝豆, 魔芋, 雞蛋, 腸仔....

三文魚腩刺身 HK$68
勁肥美,
有五片.

芒果牛油果卷 (三件) HK$32
芒果牛油果都係我愛的水果,
酸酸地好味道,
不過好細件.

蒲燒鰻魚蜆肉釜飯 HK$75
日式多餸飯.
有三大碗.
用釜上好似特別新鮮滾熱辣.

串燒七支 HK$68
有雞軟骨, 雞肉, 冬菇, 青椒, 茄子, 蕃茄, 雞翼, 豬肉條, 腸仔.
好香兼好玩.

甜蝦壽司 HK$38
油甘魚壽司 HK$42
松葉蟹壽司 HK$39
燒牛肉壽司 HK$42
各一客兩件,
都幾好.

Mango Paradise (飲品) HK$30
橙汁加芒果汁
麻麻地,
芒果好假.

綠茶紅豆啫喱 (飲品) HK$28
好日本味,
綠茶加奶好滑,
紅豆啫喱唔太甜.

二人晚飯,
次次都叫到一枱都係,
然後飽到食唔晒,
呢度又係叫到一枱都係,
再叫多一輪,
都係七成飽,
全部都細碟而精緻.
埋單 HK$561.
可以再黎.
---------------------------------------
額外一題.
尾段的時候,
隔離枱黎咗一男一女.

男的穿著普通西裝,
樣貌普通,
突出在一頭織髮,
(我以前嘅工作地點係哈佛織髮樓下, 我睇得出何謂織髮! 特別整齊架.)
女的精彩囉,
濃妝曲髮,
白色熱褲內加黑色大格魚網絲襪外襯粉紅中身乾濕褸.
單看追型已經吸引我的注意力.
一個火星撞地球的怪組合.

我繼續食我美味的食物,
鄰座兩位落單.
由於已到尾聲,
我無聊的留意著鄰座的舉動,
(另一原因係佢地不停的找侍應招呼佢地啦.)

男的不停向那個廣東話講唔正的女士介紹日本食物.
口水多過茶, 懶有型.
男的就好似電影 <金雞> 裡面梁家輝的飾演的教授, 女的當然似吳君如的角色啦.
例如:
我係日本就會係咁樣咁樣食.
(我會建議佢搭 3.00pm 的飛機去日本食個晚飯, 然後瞓個覺聽朝返.)
無拿拿問侍應有冇魚生用的濃豉油.
(其實佢應該自備或者去間高級日本餐廳囉.)
同個經理講呢個係 Otoro 唔係 Chutoro, 有筋應該要做 tatare.
(因乜事要講日文? 識日文代表你識食定高貴啲? 點解唔講中文??)
(註 Otoro 係吞拿魚的大腹 / 大拖羅及 Chu toro 係中腹 / 中拖羅.)
(註 tatare Or tartar, pâté made from seasoned raw minced steak, 簡稱碎肉或蓉.)

好鬼頂佢唔順,
即時埋單走人.

東京和食
地址 : 銅鑼灣時代廣場食通天13樓
電話 : 2506 1838
菜式 : 日本菜

reference:
http://www.encyclopedia.com/doc/1O39-tatare.html
http://hk.knowledge.yahoo.com/question/?qid=7008010903167

Thursday, March 20, 2008

復活節假期

今年的復活節,
我沒有為自己找尋節目.
沒有外遊.
沒有預訂約會.

我想在假期期間找尋自己.
很久沒有留一點時間給自己去整理生活的鎖事.
有些需要清理.
有些要重生.

可能攪完一輪又冇答案.
可能攪攪震又過一日.
可能無情情發咗呆瞓咗覺.
放長雙眼睇吓四日後會點.

Wednesday, March 19, 2008

返學

時間太多
一直想再返學,
返學我覺得係個人燃燒時間的最佳方法.

出街要洗錢.
朋友都會有其他嘢做.
留係屋企又悶.
長時間無聊又浪費光陰.
讀書至少自己有所得着.

原本想學婚禮統籌,
但係上到間 '學校',
細過一千呎的商業單位,
四面白牆, 一間小房,
非常有 '謀人寺' 的感覺.
冇報名我就掉頭走啦.

PhD 暫時未有時間,
再一個 Master 輕鬆啲但好貴.
再簡單啲,
讀美勞斑, 廚藝班, 語言班, 運動斑.
美勞斑 -- 審美眼光都有啲, 美術同創作天份零蛋.
廚藝班 -- 玩一次半次就得, 持續性個個禮拜就唔 ok 啦.
語言班 -- 我學過普通話, 日文, 法文, 德文, 全部都冇半桶水, 其實真係有興趣可以自修. 我寧靜再進修英文.
運動斑 -- 可以跳吓舞當做運動, 鋼管舞同踢躂舞都好想學. 或者室內攀石都有啲興趣, 但係呢啲有伴會趣味啲.

暫時報咗手語斑,
但係人多又要抽籤,
睇吓到時又冇份先再算啦.

V 太太

這陣子我 '追看' V 太太的法庭新聞,
比陳冠希事件更複雜.
好睇過電視連續劇.

當中有太多的不可思議??
係愛?
係無知?
係威脅?
係變態?
係白痴?
係淫蕩?
係犯賤?
係強權?

呢個世界真係乜人都有.

Tuesday, March 18, 2008

腸粉

上文講開腸粉,
腸粉唔係度度都好食.
我鐘意最無瑕的白腸粉,
加芝麻, 甜醬, 麻醬, 辣醬, 超正.

合益泰小食
必食推介合益泰!!
呢度嘅腸粉唔只滑仲有米味,
每次食完一碟都再加碼!

強記美食
之前介紹過嘅強記,
佢個 xo 醬炒腸粉真係好惹味!

合益泰小食
地址 : 深水步桂林街121號
電話 : 2720 0239

強記美食
地址 : 灣仔駱克道382號莊士企業大廈地下
電話 : 2572-5207

甜品

嗜甜的我,
好像沒怎麼寫過糖水舖.

王記糖水
淨係開夜晚,
長期排長龍.
非常足料,
水準穩定.
由十蚊都依家加價到十四蚊都仲好好食.
主打中式糖水,
紅豆沙, 綠豆沙,
西米露, 雪耳露,
芝麻糊.....

許留山
唔介紹,
因為係香港人都應該識,
我太鐘意食芒果啦.

源記甜品專家
老字號糖水鋪,
桑寄生蓮子茶, 必食.
加上全雞蛋蛋糕.
一東一西都要去食!

玉葉甜品
糖不甩軟滑, 椰絲同砂糖好香,
紅豆沙係我至愛, 好沙~
娘就鐘意綠豆沙的臭草香.

Sogo 超級市場
超級市場內有一個日本雪糕專買店,
我唔知道店的名稱.
係賣健康產品附近.
雪糕好多奇怪的味道,
薑, 石榴, 藍梅 (@HK$25)...
阿娘係我屋企淨係攞走呢隻牌子.
我就鐘意個牛奶布甸 (HK$20),
好滑好濃,
個樽又靚.

佳記甜品
即係 B 仔涼粉.
阿爹有時會買 B 仔涼粉一家人食,
(B 仔涼粉真係超大碗, 幾個人食幾日.)
好溫馨.
但係我覺得腸粉最好食.

呂仔記
食品唔多,
但係樣樣都好.
喳咋多料.
腐竹糖水香滑.
燒賣粉果加佢個辣椒油真係冇得頂!!
爹就最愛椰子汁.

王記糖水
地址 : 北角書局街5號地下

許留山
地址 : 總有一間係左近.

源記甜品專家
地址 : 西環正街 32 號地下
電話 : 2548 8687

玉葉甜品
地址 : 中環伊利近街2號
電話 : 2544 3795

Sogo 超級市場
銅鑼灣軒尼斯道555號崇光百貨地庫

佳記甜品
地址 : 元朗教育路大坑渠側
電話 : 2473 3148
地址 : 元朗又新街置富中心7號舖
電話 : 2479-4743

呂仔記
地址 : 筲箕灣東大街121號A地舖
電話 : 2885-8590

買! Guinot Anti-Fatigue Eye Gel

睇其他人的部落格,
女士們唔多唔少都會寫吓美容護髮,
其實我都好鐘意試新產品,
有時都發掘到啲好嘢,
口頭介紹朋友冇問題,
但係好似人地咁寫文我又做唔到,
雖然成日睇時裝雜誌,
對於美容護髮的詞彙仍然好缺乏.

嗰日睇完 黎堅惠 的文章,
又亂買嘢.
買咗 Guinot 的 Anti-Wrinkle Mask (50ml) 同 Anti-Fatigue Eye Gel,
然後個小姐仲送咗 Guinot Energizing Lifting Mask, Guinot Moisture-Supplying Radiance Mask 同 Anti-Wrinkle Mask 嘅 tester 俾我.
係卓悅有八折,
用咗 HK$840,
無端端又無拿拿咁唔見咗啲錢.

呢幾日用過個 Eye Gel,
個小姐話可以減少幼紋, 去黑眼圈, 收緊眼袋.
用咗幾日, 好似真係緊致少少.
我個眼袋好易起油脂粒,
咁呢個 Eye Gel 好吸收, 好潤但乾爽,
似乎唔會起油脂粒.

Moisture-Supplying Radiance Mask 用咗一次,
評價同 Eye Gel 一樣.
唔膩, 好吸收, 好水潤但乾爽.
(你睇吓... 詞彙極度缺乏... 我要再進修一吓.)

其他產品試咗而我又有新詞彙的話,
我再試吓寫美容用品啦.

Monday, March 17, 2008

川島隆太教授的腦力訓練

昨天的報紙:學童玩廿分鐘NDS提升學習能力
《川島隆太教授的腦力訓練》都係我每朝返工都玩嘅遊戲!!

我鐘意搭地鐵返工,
坐係度瑟縮一角,
聽住 mp3,
打NDS,
成個自閉仔咁.

雖然周圍全部都係人,
我好似自成一國.
好有私人空間.
--------------------------------------------------------------------------------
學童玩廿分鐘NDS提升學習能力
16/03/2008
東方日報

【 本 報 綜 合 報 道 】 自 從 任 天 堂 推 出 NDS 遊 戲 機 後 , 打 機 會 荒 廢 學 業 這 句 話 可 能 已 不 合 時 宜 了 , 蘇 格 蘭 一 間 小 學 試 驗 證 明 , 學 生 上 堂 前 先 玩 二 十 分 鐘 NDS , 有 助 提 升 學 習 能 力 。 下 月 起 加 入 「 NDS 學 習 試 驗 大 聯 盟 」 的 學 校 將 增 至 十 六 間 , 令 九 百 個 學 生 日 日 返 學 有 機 打 。

名 為 Learning and Teaching Scotland ( LTS ) 的 一 個 蘇 格 蘭 學 習 及 育 組 織 , 早 前 挑 選 了 鄧 迪 市 的 聖 科 倫 巴 小 學 作 為 試 點 , 免 費 發 給 任 天 堂 NDS 遊 戲 機 , 學 生 每 朝 上 堂 前 會 先 玩 二 十 分 鐘 《 川 島 隆 太 教 授 的 腦 力 訓 練 》 遊 戲 , 內 容 包 括 閱 讀 理 解 、 解 決 難 題 練 習 和 記 憶 力 拼 圖 。

成 績 有 顯 著 進 步
學 校 在 試 驗 開 始 前 , 先 為 學 生 進 行 一 次 數 學 考 試 , 待 他 們 玩 足 十 個 星 期 後 , 再 做 一 次 , 結 果 學 生 的 成 績 平 均 進 步 了 百 分 之 十 , 完 卷 時 間 由 十 七 分 鐘 減 至 十 三 分 鐘 , 而 且 在 心 算 、 集 中 力 、 自 律 及 學 習 能 力 方 面 亦 有 所 改 善 。 校 長 科 伊 爾 表 示 : 「 學 生 玩 腦 力 遊 戲 時 需 要 安 靜 及 專 注 , 這 令 他 們 的 課 堂 表 現 更 佳 。 」

LTS 下 月 將 擴 大 NDS 學 習 試 驗 計 劃 至 東 艾 爾 郡 、 阿 伯 丁 郡 等 地 , 屆 時 將 有 十 六 間 學 校 及 九 百 名 學 生 參 與 。

長途車

娘很喜歡按摩,
又特別鐘意返東莞按,
因為佢覺得啲技師手勢好啲.

我都鐘意按,
雖然都係一程車又唔駛我揸,
但係吓吓咁坐長途車山長水遠咁,
簡直要了我的命.
點按都補唔番啦.....

海神號遇險記

這是我的 all time favourite~!!
明珠台已經重播咗 N 次,
每一次我都坐定定,
由頭睇到尾,
remake 都冇呢套原著咁好睇.
爭分奪秒.
危險! 緊張! 刺激!

故事簡介:
故事講述某年除夕夜,一艘超級郵輪「海神號」如常出發,船上乘客都準備在船上慶祝新一年的來臨。怎料航行途中,郵輪遇上巨浪,令整艘船覆轉了!難敵來勢凶凶的天災,乘客逐一罹難;船上一名非常牧師(真赫曼飾)在這危急關頭帶領著船上的生還者,穿梭於船艙內尋找出口逃生。面對船艙內灼熱的蒸汽,雄雄烈火和不斷湧入的海水,叫人心力交瘁。

Saturday, March 15, 2008

鑽石餐廳

阿蘇成日話去介紹嘅餐廳係食指定的食物,
我好同意,
因為只有少數的食肆可以做到樣樣都好味道.

呢間西餐廳係女人街入面 (近家樂商場),
超多水晶燈好易認.
一個晚餐 HK$88-108.
有湯, 主菜同飲品.

主菜 okay.
最好食係酥皮海鮮湯 (餐加 HK$12)~
酥皮超正,
好香牛油味.
食完個湯其實我可以唔食個主菜架啦.

鑽石餐廳
地址 : 旺角通菜街2A - 2P 鴻光大廈地下F,G&H 舖
電話 : 2385-2899
菜式 : 西式 (咖啡茶室)

Friday, March 14, 2008

這幾天心情奄奄悶悶的.
太過平靜,
太過機械式.

日復日,
做着同樣的工作,
見住同樣的人,
面對同樣的問題.
連新聞也淡淡的.

需要一點衝擊,
一點突破,
一點新鮮感.

再返學,
生活應該充實一點.

Thursday, March 13, 2008

持續蟲咬

持續蟲咬,
去至愛的 zara 都空手而回.
連平時一定唔會行屋企樓下的商場都要照殺,
買咗兩條 one-piece.

由於蟲咬的關係,
身邊好友紛紛向我獻計點樣能夠止痕.
有人叫我買嘢保值,
有人提供各類所需.

買金?
依家啲金好貴喎.

買錶?
我都唔戴錶嘅.

買銀包?
個銀包用咗十幾年仲好滿意.
你有冇見到新銀包一邊可以擺相,
一邊擺散銀,
然後冇拉鍊包埋一舊?

買護膚品?
有存倉.

買屋企嘢?
你幫我抹呀?

買mp3?
ipod 係新架喎.

買相機?
部舊相機放咗係公司個櫃筒成年都冇攞過出黎.

買電話?
唔係換咗好耐咋喎.

買車?
冇需要.

買多層樓?
冇錢.

激死.

Wednesday, March 12, 2008

佐熊之家

我有一班志同道合十個無聊的朋友.
想舒舒服服傾吓計消磨時間有啲嘢做(簡稱:hea)消費又低的地方實在唔多.
幸好身邊人都係文化界,
對大量雜誌漫畫樂此不疲~

left bear 係一個大部份人都會贊成個個月都去坐一坐的地方.

佐熊之家
地址 : 銅鑼灣謝斐道496號金利文廣場12樓
電話 : 2838 1322
菜式 : 港式 (互聯網餐廳)

Tuesday, March 11, 2008

The best is yet to come

失戀, 失意, 失望, 失敗, 失眠的時候,
聽到呢首歌都覺得好安慰.
-------------------------------------
曲/詞:林一峰
編曲/所有樂器:李端嫻@人山人海

永遠有一個吻未嘗 有些燭光未燃亮
若愛太苦要落糖 結他斷線亦無恙
To hug someone to kiss someone
The best is yet to come

若要錯失永不能守 得到也不代表長久
假使快樂有盡頭 痛苦也未會不朽
寂寞半點假如不能承受
這生命註定過得不易
笑與淚 亦有時候

To hug someone to kiss someone
The best is yet to come

若你說不再聽情歌 不想再經歷這漩渦
假使抱住你拳頭 到底也沒法牽手

就是為了追求一時平靜
將感情隔離半點感動都扼殺 沒法承受

永遠有不妥協傷口 有些憾事不放手
若你太刻意淡忘 越會補不到缺口
Why don't you just hug someone
just kiss someone
The best is yet to come 最好的尚未來臨

蚊叮蟲咬

被蟲咬,
好想買嘢....

Monday, March 10, 2008

有時我想

不經不覺都供咗兩年半樓啦~
我想十年內供晒,
會唔會太天方夜譚??

有時我想如果我唔洗供樓,
我可以每日買一件衫,
每個月買一對飛甩雞毛,
一年可以買兩隻 IT bag,
好想瘋狂大購物~

揼骨戰衣

返大陞揼骨,
山長水遠,
仲要我唔鐘意換佢地啲怪衫~
我會着得非常輕便.

一條寬鬆的斜布褲,
一件寬鬆的娃娃衫,
加件龜背夾棉背心.

每次阿哥一見到就會問我係咪增肥成功,
呢套衫好舒服,
但係我好似肥咗十磅~!

講開又講,
呢排好似真係肥咗少少,
肥咗少少又幸運少少,
幸運少少生意又好少少,
都唔知點好!

病癒

經過多日來不斷的休養生息,
好多了~

不停瞓.
不停瞓.
不停瞓.
不停瞓.
好正~

Friday, March 7, 2008

Wednesday, March 5, 2008

捐血

上次捐血係舊年 911.
成日唸住過咗農曆年再去,
講咗成個禮拜,
今日去開中環走上去新捐血站.

填完 form,
拮手指,
驗血紅素,
然後.....
佢話血紅素要 11.5 至可以捐血,
我得 11...
唔俾我捐!!!
我都未試過唔捐得.

有個好溫柔的護士同我講:
你唔洗驚~
你差少少,
唔係貧血,
不過今日就唔可以捐血啦.
返去食多啲牛肉補充鐵質,
過兩三個禮拜再返黎啦~
(但係我唔食牛肉架喎.)
咁食蘋果菠菜啦.

激死我!!!
即刻叫阿媽買番幾個蘋果先!
--------------------------------------------------------
鐵質是製造血紅素必需的材料。缺乏鐵質會引起貧血是生物書籍常用的範例。 但鐵質對健康的影響並不如此簡單。營養學家發現嬰兒缺乏鐵質可影響終生智力, 以及「手眼協調」等的發展。成人如缺乏鐵質則會導致精神不集中、語言學習困難、 記憶力衰退和情緒不安等。女性由於月經關係,缺乏鐵質的情況也較普遍。最近, 澳洲一項調查發現年青女性缺乏鐵質的情況高達一成之多。要攝取鐵質可吃含鐵質較多的食物, 如:肉類、豆類和一些蔬菜。但要注意的是鐵質的吸收是需要維生素C等物質幫助, 故進食含鐵質食物時也應多吃含維生素C的蔬果類食物。

缺 鐵 性 貧 血 (Iron Deficiency Anemia)

鐵 是 血 紅 蛋 白 的 重 要 成 分 , 任 何 引 致 缺 乏 鐵 質 的 情 況 , 都 會 引 致 缺 鐵 性 貧 血 , 而 這 也 是 最 常 見 的 疾 病 之 一 。 缺 鐵 性 貧 血 是 體 內 貯 存 鐵 缺 乏 , 影 響 血 紅 素 合 成 所 引 起 的 貧 血 , 其 特 點 是 骨 髓 、 肝 、 脾 等 器 官 組 織 中 缺 乏 鐵 質 、 血 清 內 的 鐵 濃 度 、 運 鐵 蛋 白 飽 和 度 和 血 清 鐵 蛋 白 都 降 低 , 典 型 的 是 小 細 胞 、 低 色 素 型 貧 血 。 本 症 是 最 常 見 的 營 養 素 缺 乏 症 , 至 今 仍 是 世 界 各 國 很 普 遍 的 問 題 , 尤 其 是 發 展 中 的 國 家 , 在 婦 女 、 嬰 幼 兒 和 兒 童 尤 為 普 遍 。

這 病 的 病 因 主 要 是 因 飲 食 中 缺 乏 足 夠 量 的 鐵 或 食 物 結 構 不 合 理 導 致 鐵 的 吸 收 和 利 用 減 低 。 中 國 人 食 物 一 般 以 穀 物 和 蔬 菜 為 主 , 肉 類 較 少 , 因 此 血 紅 素 鐵 在 食 物 中 的 含 量 較 西 方 人 的 為 低 , 飲 食 中 供 鐵 量 以 非 血 紅 素 鐵 為 主 , 因 大 部 分 來 自 植 物 , 故 吸 收 可 能 比 較 困 難 , 故 當 生 理 性 鐵 需 要 量 增 加 時 , 如 嬰 幼 兒 、 青 少 年 、 月 經 期 婦 女 、 孕 婦 和 哺 乳 期 婦 女 , 就 容 易 發 生 營 養 性 缺 鐵 性 貧 血 了 。 婦 女 一 次 月 經 平 均 失 血 量 40 至 60ml, 相 當 於 30mg 鐵 , 因 此 每 天 的 需 鐵 量 比 男 性 多 1mg, 應 為 每 天 2 mg; 妊 娠 期 為 供 應 胎 兒 所 需 及 分 娩 時 失 血 所 丟 失 的 鐵 , 估 計 一 次 正 常 妊 娠 要 額 外 增 加 1 克 的 鐵 , 妊 娠 中 、 後 期 需 鐵 量 達 每 天 5 mg, 單 從 飲 食 是 難 以 獲 得 的 。

另 外 一 個 病 因 就 是 慢 性 失 血 了 。 每 1 ml 的 血 含 0.4 mg 的 鐵 , 慢 性 長 期 失 血 便 等 於 失 鐵 , 即 使 每 天 5 ml , 也 足 以 引 起 缺 鐵 。 引 起 慢 性 失 血 的 疾 病 包 括 : 消 化 道 慢 性 失 血 、 月 經 失 調 、 反 覆 流 鼻 血 、 長 期 服 食 阿 司 匹 林 引 起 的 胃 腸 道 黏 膜 出 血 , 都 是 常 見 的 原 因 。

任 何 引 致 鐵 的 吸 收 障 礙 的 情 況 , 都 會 引 致 缺 鐵 性 貧 血 , 例 如 胃 切 除 術 後 因 胃 酸 過 少 , 都 會 引 致 鐵 的 吸 收 , 小 腸 的 疾 病 亦 會 引 起 長 期 腹 瀉 , 亦 會 影 響 鐵 的 吸 收 。

臨 床 表 現

在 臨 床 表 現 方 面 , 除 了 因 貧 血 而 引 起 組 織 器 官 缺 氧 , 導 致 貧 血 的 一 般 性 表 現 外 , 還 有 因 組 織 缺 鐵 導 致 的 各 種 臨 床 表 現 , 因 為 我 們 身 體 還 有 很 多 其 他 的 生 化 作 用 需 要 含 有 鐵 的 血 的 幫 助 , 始 能 有 效 的 完 成 。 缺 鐵 可 以 令 兒 童 精 神 發 育 和 行 為 改 變 , 對 外 界 的 反 應 差 , 易 激 惹 , 注 意 力 不 集 中 ; 亦 可 令 成 人 的 勞 動 耐 力 降 低 , 免 疫 能 力 下 降 , 抗 寒 能 力 降 低 , 引 致 黏 膜 組 織 變 化 , 出 現 口 炎 、 舌 炎 、 胃 炎 、 皮 膚 乾 燥 、 毛 髮 乾 枯 脫 落 、 指 甲 扁 平 、 脆 薄 易 裂 和 反 甲 、 吞 嚥 困 難 等 。

治 療 方 面

在 治 療 方 面 , 缺 鐵 性 貧 血 的 治 療 原 則 是 補 充 足 夠 的 鐵 直 到 恢 復 正 常 鐵 貯 存 量 , 以 及 去 除 引 起 缺 鐵 的 病 因 。 病 因 治 療 相 當 重 要 , 因 為 如 果 只 是 補 充 鐵 質 , 忽 略 了 基 礎 疾 病 的 治 療 , 例 如 延 誤 了 胃 腸 道 腫 瘤 的 診 斷 和 治 療 , 後 果 可 能 是 不 堪 設 想 的 。

在 補 充 鐵 質 方 面 , 口 服 鐵 劑 是 首 選 方 法 , 療 效 以 硫 酸 亞 鐵 , 富 與 酸 亞 鐵 為 最 佳 。 口 服 鐵 劑 反 應 主 要 係 胃 腸 道 症 狀 如 惡 心 , 上 腹 痛 、 便 秘 、 腹 瀉 等 。

不 能 耐 受 口 服 鐵 劑 , 或 有 消 化 道 疾 病 之 患 者 , 可 以 用 注 射 鐵 劑 , 常 用 的 有 右 旋 糖 酐 鐵 及 山 梨 醇 鐵 , 可 以 用 肌 肉 或 靜 脈 注 射 兩 種 方 法 給 予 。 但 最 重 要 的 一 點 就 是 預 防 。 我 們 應 加 強 婦 女 和 幼 兒 保 健 , 預 防 早 產 , 做 好 營 養 的 指 導 , 尤 其 是 對 兒 童 、 嬰 兒 和 孕 婦 的 營 養 , 一 定 要 及 時 加 添 含 鐵 量 及 鐵 吸 收 率 高 的 輔 食 品 , 婦 女 如 有 月 經 問 題 的 一 定 要 盡 快 解 決 。

成 年 人 如 無 任 何 明 顯 原 因 , 而 有 慢 性 出 血 引 致 缺 鐵 性 貧 血 者 , 一 定 要 極 小 心 處 理 , 因 為 可 能 有 腸 胃 道 之 病 灶 , 例 如 腫 瘤 之 類 , 引 致 慢 性 出 血 , 故 不 可 掉 以 輕 心 , 否 則 後 果 可 能 十 分 嚴 重 。

reference:
http://www.bch.cuhk.edu.hk/e-learn/bissue16_26.html
http://www.healthno1.com/health/feature/html/fe-blood-990924b.html

囍點住家菜

這是昨晚的新嘗試.
太古城附近的食肆差不多都食過晒,
友人從 openrice 搵到新嘢~

點題住家菜,
標榜冇味精.

兩個人食,
唔知點解樣樣都想食,
叫咗好多嘢!!

兩位老火湯 (HK$12/位)
日日唔同,
尋晚係合掌瓜煲唔記得乜煎魚湯,
幾好.
有碗半湯, 我見隔離兩個人 share 飲.

大山巴雞翼 (HK$22)
4 大隻,
脆咯咯,
個酸甜汁好好味.

蕃茄餃子 (HK$22)
6 隻,
蕃茄湯底餃子,
友人話偏鹹, 冇乜餃子味,
我又覺得 OK.

黑椒味菜泡蝦球
個人認為最差,
可能因為我唔鐘意食味菜.
成個組合怪怪的.

川味椒菜炒鮮魷
勁惹味.
清咗碟!

魚湯雜菌小白菜 (HK$35)
魚湯唔錯,
有啲誠意.

脆鮮奶 (HK$12)
有五大條!
唔太甜,
係脆粻略厚.

埋單的時候平到笑~
一般小餸 HK$48-55.
免收加一, HK$180.
都唔知係咪計錯數!

囍點住家菜
地址 : 側魚涌船塢里16號地下G舖
電話 : 2960-0996
菜式 : 港式 (中菜館)

Tuesday, March 4, 2008

白痴事件簿

前兩天做了一件很白痴的事情.

由於近來忘住清書,
NDS 都放咗係個冷宮度一陣子.
臨瞓前,
開著個 NDS 想打一陣機.

開咗個數學遊戲,
按鈕,
冇反應.
以為上次唔覺意跌壞咗.
restart,
再按鈕,
都係冇反應.
放棄.
瞓覺.

第二晚再開,
玩其他遊戲.
冇問題喎~
再開之前個數學遊戲,
又唔 work.
放棄.
瞓覺.

第三晚再開,
突然醒覺...
NDS 係 touch screen 架.....

太歲

自從農曆新年之後,
每單生意都煩到喊,
莫非因為我犯太歲??

食之無味,
棄之可惜.

已經叫咗阿媽拜神,
黑氣幾時至離我而去?
每日打開個 email 都提心吊膽,
你寧願佢死佢又死唔斷氣,
好慘~

Juno 少女孕記

好睇.
好睇因為真實.
由冇到有到生仔,
家人嘅開通同朋友的支持,
過程好感動.

最鐘意反而係個好想有細路而自己冇得生嘅女人得到個仔嗰刻,
好想得而得到,
好溫馨,
好有母愛.

好笑,
個女仔傻框框, 白白痴痴嘅,
美式笑話,
唔係個個識笑,
但係字幕又譯得幾傳神喎.

官方簡介
純屬好奇,但求就手,16歲少女Juno隨意找來騎呢男生初嘗性滋味,點知就咁搞大咗!對住面青青的父母、眼光光的經手人,Juno唯有自行「放盤」,透過分類廣告為腹中塊肉尋找一主好人家!就這樣,Juno把一眾身邊人拖晒落水,集體經歷懷胎10月,共同感受產前各種突如其來的失調、作動與陣痛……這段少女「孕」記離奇荒誕、哭笑難分,肯定一世難忘!

Monday, March 3, 2008

銀針粉

我娘從來唔懂得煮食的份量,
無論人多人少,
佢煮的食物都係一大鍋的.

不太愛食飯.
各類粉麵當中,
最愛銀針粉.

有時剩得我同娘食晚飯,
我都建議煮粉.
娘會煮出好似砂鍋雲吞雞咁大煲嘅砂鍋銀針粉!!
佢話銀針粉要買一斤,
兩個人點食一斤?
仲要加成棵黃芽白同大量丸丸再加肉片吊味.
見到個煲仲以為有一村人黎食飯添呀!

救命! 駛唔駛咁大煲呀~

Sunday, March 2, 2008

頭髮

我嘅頭髮同本人性格一樣.
懶而乖巧.
我可以一早起身唔梳頭,
頭髮都係貼貼服服的.
非常的懶.

苦悶的長直髮跟我多年.
唔係唔想變,
係根本'軟賴賴'冇彈性.
電完曲髮之後佢地仍然'直不甩'!
gel咗仍然都仲係'直不甩'!!
很氣憤!!!

可以變嘅係顏色.
主因係白頭髮特多!
(但係又唔覺得特別用腦過度?!)
紅橙黃金紫藍啡,
一般較易接受的顏色我都試過.
當然最後都係甩到變金色啦.
最好都係火紅色,
膚色映照得白一點.

很想剪齊'陰'.
很想剪短髮.
很想染淺金髮.
不過人大咗,
膽又細咗,
我唔會俾機會大家笑我~ 哇哈哈~~

扭蛋

某同學指自己購物過多,
msn 留言: 砍手指(我相信係'斬', 樹木就砍.), 一個禮拜!

但係去到某商場,
佢又希望睇扭蛋.
手指已經被 '砍' 啦,
點扭呀?
個人建議佢用腳指.

如果佢能夠用腳指扭蛋,
小弟資助一隻,
游博士又一隻.
林芍芍五隻,
iris 加多三隻.
善款指數增至十隻!

敬希某同學能勤加練習,
慈善表演腳指扭蛋.
願各同學 '腹有油雞'!

士多啤梨

最鐘意係日本食士多啤梨!
特別新鮮.
特別甜.
特別香.
特別紅.
特別好味.
特別平!!
好想去日本呀.......
--------------------------------------------------------
早前為無線劇集《和味濃情》,在九州福岡擔任製片工作,並答應了監製演出一個鏡頭,飾演士多啤梨園的店員,與陶大宇做對手戲,很搞笑!雖然只有數秒鐘,但片段出街後,收到很多朋友的來電問:「日本哪裡摘士多啤梨最好?」我一夜間變成「士多啤梨王子」。經理人公司的一位同事說︰「下星期來東京,帶我到士多啤梨園呀!」我出鏡的地方是九州福岡縣,但現在身在東京,怎麼辦?這位同事平時待我很好,為了達成她的願望,我特意找了一些關東地區的士多啤梨園資料!

果園極之隱蔽
我揀選了位於厚木市的「杉山士多啤梨園」,從東京出發約1小時車程,算是最近。由於那只在周末周日才營業,我預先致電園主,特別為我們開門。從新宿乘坐電車,到達「本厚木站」,約55分鐘,我們一行十人,再轉乘兩部的士,前往車程不過十分鐘的目的地。嘩!此士多啤梨園的確隱蔽,當地的的士大哥也弄得一頭霧水,走了不少冤枉路,幸好最後仍能安然抵達。

我們遲到了,園主看來有點生氣,後來知道與我同行的是外國人,很快就收起嚴肅的表情,熱情招待我們,因為他深深明白遊客迷路是很正常的。

沾上鮮奶絕妙
在溫室內一邊摘一邊吃士多啤梨,日本人叫作(ICHIGOGARI),意思是「採集、狩獵士多啤梨」,一般在每年一月至五月期間進行,又以一月至二月的士多啤梨最為甜美。原來長時間留在溫室 是很熱的,我吃到第二十一個士多啤梨,已是汗流浹背。我忠告大家走進溫室一件T-shirt就足夠了。

味道如何?士多啤梨本身的天然味道已是鮮甜無比,再蘸上少許花奶,簡直是完美的配搭,吃得眾人哇哇叫︰「好味呀!」

地址︰神奈川厚木市
電話︰090-4967-3966(只限日語,須預約。)
營業月份︰1月至5月初
收費︰1500YEN/30分鐘,任食

東京溫室尋訪士多啤梨 鮮!
太陽報 02/03/2008
文: 陳方藤
Blog Widget by LinkWithin