Friday, February 29, 2008

勝香園

一吃就愛上了.
十個愛吃番茄,
二十個愛吃番茄湯~

蕃茄餐肉蛋通粉
濃番茄湯超讚~~
加埋個通粉三十個飽!!
忍唔住連湯都要清埋~

檸蜜脆脆
好脆,
檸蜜又香,
好好味呀!!~~ (扮味王先~)

埋單嘅時候最開心, 超抵!
但係要坐街邊同要等(頗耐)位啦....

勝香園
地址 : 中環美輪街2號排檔
電話 : 2544 8368
菜式 : 港式 (大排檔)

藥丸人

又一個老咗嘅例證!!
又或者真係覺得條命貴咗??

後生的時候身體好,
點會唸補身?
完全唔覺得身體基能的衰退.

近兩年,
要補鈣預防骨質疏鬆,
要維他命 c 美白防感冒,
要藍莓素補眼,
仲有阿媽成日去買嗰啲中藥補身丸.

一日到黑都食藥丸,
食到嘔呀~

Thursday, February 28, 2008

髮型

我想我老了.

出街見到嗰啲 '後生仔'.
頭髮留得好長,
前面的 '陰' 由左至右 (或由右至左),
九一分界,
四十五度角,
完全遮住隻眼,
懶係有層次, 懶有 wave~

睇唔睇到路架??
扮 '飛輪海'??
好靚咩???
真係型???
我唔明白.

我想我唔明白嘅原因就係我老啦.
唉...

星躍馬術奇藝坊

目不暇給.
對眼好忙.

馬係主角.
人次要.

由於馬匹有速度,
表演節奏明快.
現場演奏出色,
心情豁然開朗.

個幾鐘,
係短啲.
歡樂的時光過得特別快吖麻~

節目詳情:
橫掃全球各個大城市,迷倒萬千觀眾的星躍馬術奇藝坊,將於2008年專程由法國來港,在農曆新年及復活節的黃金檔飛躍,上演當今最頂尖,最精采,叫人情迷的馬術表演。

背倚維港閃爍夜景的紅磡碼頭空地,將變身為吉卜賽的浪漫天地 ― 以吉卜賽人浪蕩不羈的生活為主題,活靈活現的人物在36匹疾馳的馬上做出亡命花式表演,時而危機四伏,時而笑到碌地,加上火熱的吉卜賽音樂,不是馬戲的星躍馬術奇藝坊,適合大小共歡樂的節目!

Wednesday, February 27, 2008

衣物以外,
我買得最多係書.

有時,
一個人無無聊聊,
行書店就最好.
冇人會騷擾你,
自得其樂.

行書店點會空手而回?
每次買一兩本,
買又快過睇,
屋企有一幢新書.
我同自己講係未清舊貨之前唔可以再買啦.

新年後,
我將佢地放咗係當眼位置.
努力咗半個月,
一幢新書得番半幢~
就黎可以買過啲新啦!

Tuesday, February 26, 2008

記性差

我記性差. (呵呵.. 但係我記仇~)
成日話好耐冇買衫,
翻查帳單,
就會發現上一次買衫只係幾日先嘅事,

用咗 microsoft money 之後,
睇住個 budget,
成日警醒我.

原來我一個禮拜內,
又唔覺意嘅買咗八件衫啦...
club mon 三件.
zara 兩件.
去旺角買咗三件.

好可怕呀...
好彩 zara 有得 refund 啫!!

Sunday, February 24, 2008

一件小事

我食魚,
但很怕魚骨,
又唔鍾意食皮,
我只揀那些魚腩的部份.

那天跟友人吃中菜,
由於我唔多食肉,
通常我地會叫海鮮.
兩個人,
不能叫太多的款式.
一人叫一款加碟菜都飽死啦~

我愛吃蝦,
叫咗個四川松子蝦仁.
原本佢要粟米班塊,
但係個待應建議我地食大魚兩味.
炒球冇問題,
蒸頭腩就唔好預我.

席間他不停的為我添餸,
成日話我瘦,
每次食飯總要我食多一點.
(當然, 兩個人食飯, 我唔食, 佢咪要食囉~)

佢夾一件蒸骨俾我,
並說: 我揀過, 呢舊多肉!
我反白眼扁扁嘴: 咪又係有骨!

然後我繼續食飯睇電視,
逃避那碟蒸骨!

忽然間,
他給我送來一羮滿滿的魚肉.

原來,
係我不斷食食食的時候,
佢將舊蒸骨拆骨去皮,
只給我魚的肉.

當下感動得說不出話來,
位高權重經常指指點點嘅佢,
忽爾溫馨.

雖然短暫.
我實在享受那片刻被照料的光環.

飴軒

一致認為: 招呼十個差.
老板娘長期黑口黑面,
攞位落單收錢一腳踢!
不過我地已經習慣咗.
最緊要係當成條街都要排隊嘅時候,
呢度係唔多洗等架.
一個禮拜總有一兩次係度食晏.

服務係差,
但食物係唔錯嘅.
由細到大食湯麵我都好少飲湯架,
但呢度個酸辣湯底我都忍唔住要少喝幾口~
喇沙湯都唔錯.

另外麵食有好多選擇,
一般嘅麵線, 河粉唔在講,
有一款通心麵,
實在冇係其他地方食過.
白色有啲似粗意粉但係裡面係空心嘅,
超正!
我食得最多嘅係蛋角鮮墨魚通心麵酸辣湯,
個名咁長都係36蚊之麻~

飴軒粉麵甜品
地址 : 灣仔蘭杜街2號麗都大廈7號地舖
電話 : 2527 4230
菜式 : 廣東菜

Saturday, February 23, 2008

Microsoft Money

安裝了新軟件,
一個關於金錢的軟件,
可以原原本本記錄你用咗嘅一分一亳,
給你一份完整的記錄,
仲有圖表添.
簡單的計劃未來: easy job~
(好似賣廣告...)

不過我真係覺得好好用~
知道每個月用咗幾多錢,
分咗類知道啲錢點用.
有 budgeting,
一分一亳都計住唔可以亂洗錢.
要收支平衡仲要睇吓儲唔儲到錢.
簡單退休圖表,
警惕要多儲蓄.

如果以我今時今日的資產,
六十歲要退休而每月仲有二萬蚊零用錢,
依家每個月至少要儲一萬蚊,
仲未計如果我要結婚生仔喎.

我唔想老咗去酒樓洗碗,
又唔想攞綜援,
嫁個有錢人你估話咁易咩!
見到個表,
好愁~
真係要慳啲...

工作的優點-2

再重申一次,
我好憎辦公室戀情,
最憎招人話柄.

不過,
呢個部落格我係專登寫俾我單身的網友~
對於你,
我公司最大的好處係:
辦公室戀情處處有!

我呢啲不問世事嘅人知道多年來公開嘅已經有四對,
(仲未計嗰啲搭上咗同事的朋友!)
其中兩對已經修成正果.

既然你嗰邊都冇對象,
你換個環境,
識過啲人啦.

嗽口水

我覺得嗽口水係其中一樣最自虐的發明.
擺落個口入面又唔吞得,
乸到阿媽都唔認得.

我用緊嗰隻係某大牌子藍色貴價嗰隻防牙石配方.
嗽完口會牙肉麻痺.
呢啲唔係自虐係咩呢??

Friday, February 22, 2008

承諾

很喜歡為朋友揀選適合佢而佢又鍾意然後着出黎大家都會讚賞的那種感覺.

那天跟友人吃飯,
飯後一起到特賣場閒逛,
揀選了幾件襯衫,
亦幫佢揀咗幾件平靚正的悠閒服.

第二天,
收到他的來電,
他說新衣服大獲好評~
然後希望以後都得到我的幫忙, 並承諾:
'你幫我買一件衫, 之後可以另外買一件俾自己, 我俾錢!'

購物狂想聽到最美好的說話,
莫過於此.

工作的優點

某天想轉工的網友問我份工的優缺點,
跟他說了一大埋懶散的 '優點'.
我今日想評價一件最爽死的重點!

作為打工仔,
你總係有一朝一起身的時候,
突然間好唔想返工,
淨係想繼續留係個高床暖枕入面死掉~
呢個徵狀一個月都至少強烈發作一次~

我們可以無憂無累的 early appointment!
大模斯樣係屋企大覺瞓!!!
爽死了~

Thursday, February 21, 2008

皇后餅店

好明顯我係一個饞嘴的人,
我成日話個口得兩個用途: 講嘢同埋食嘢.

購買零食係我其中一個日常活動,
有某啲零食係長期入選我個零食櫃嘅.

皇后的西餐出名,
我就獨愛佢嘅鳥結糖.

由於本人係唔鍾意食果仁 (會填平啲牙...),
皇后的朱古力米通味鳥結糖就最合我心意喇~

朱古力味濃,
米通又唔會太軟,
硬度剛剛好,
次次一開封兩個鐘頭就食晒!

係貴啲囉...

皇后餅店
地址 : 銅鑼灣白沙道15D號地下
電話 : 2577-1866
菜式 : 西式 (餅店)

Wednesday, February 20, 2008

越南篇: Fear Factor 之空

Day 3 + Day 4: 頭頓, 耶穌山

頭頓好似十幾年前嘅海南島.
水清沙幼,
勁長海岸線,
好細的市鎮,
阿娘話好似柴灣咁大!

一到站就坐三輪車環市遊,
睇風景, 吹吹風,
幾好.
三輪車設計幾特別,
遊客坐前面,
車伕係後面踩單車,
不過一個鐘頭就已經遊晒.

第二日一早第一件事係行山!!!
好辛勞.
902 級樓梯,
係好扁嘅石梯,
上去睇耶穌!!!

行樓梯都 ok,
上到山頂有個耶穌像.
而你係可以行入個耶穌像個身入面,
然後上到個膊頭有個位俾你企出去吹風~

咁簡單.
有乜咁驚呢?

上耶穌像係冇電梯囉~
所有人無論上定落都係行同一條旋轉樓梯,
旋轉樓梯一面係牆,
一面係半腰的欄.
條樓梯係夠一個人行,
兩個人同時又上又落的話,
其中一個人就有半身飛咗出街!

上到耶穌個膊頭,
嗰位係全個地帶最高的位置,
冇遮冇掩,
圍壆高過腰少少囉.
好鬼大風!!
腳仔都軟埋.

都唔知係老咗?
定條命貴咗?
定個膽細咗?
邊有咁多嘢驚架!!!

何濟公

某人今日病咗,
佢家姐介紹佢食「何濟公」好番晒.

我地話「何濟公」係一個遊戲,
佢話冇玩過,
上網查,
得到好有趣的解釋!
----------------------------------------------------------------------
「何濟公」原來是一種止痛藥,1938年在廣州創立,內地還有得賣。話說創立人何福生有意效法濟公普渡眾生,起名「何濟公」。他很懂打廣告,1946年某天漢口《新湖北日報》在頭版登出一幅廣告:「廣東飛來何濟公」,人人摸不頭腦;第二天,頭版廣告是「止痛唔使五分鐘」;第三天才說明「何濟公」這止痛散由留美醫藥博士發明,行銷國外,現由廣東何濟公空運到來。當下轟動武漢三鎮。
-----------------------------------------------------------------------
香港地﹕何濟公

 兒時一種「低能」遊戲,名為何濟公。今日回想,都幾無聊。

 玩法——三五七人,一個做兵,追逐眾賊,Ve嘩鬼叫,差不多捉到你,你就把雙臂交叉胸前,大叫——「何濟公﹗」就可以免被捉,但必須立正不動,雪條一樣,雪藏﹗企硬﹗

 然後,其他賊仔,可以衝過來,冒住被捉之險,點一點你,解你穴度,何濟公又翻生,再投入追逐遊戲。

 這個遊戲,沒有兵捉賊遊戲那麼激烈,適合男女混在一起玩,也是我們追女孩子的第一種男女接觸。

 當年女同學,玩何濟公,三步唔埋,就姐手姐腳何濟公一次,雙手抱胸,等我等男孩子來救,而一救,就要拍一拍女仔,拍頭、拍手、拍腰、拍屁股,總之就會觸及女同學。

 如果救肥妹,可以大力拍,唔使錫佢。如果救校花,可以輕輕一拍,但係校花高傲,救她無乜好,她不會多謝你。如果是救意中人,心就忐忑,救得落力,輕輕一碰,心花怒放,又不敢表現得輕狂。最快樂是救她之後,一起「私奔」,跑到遠一點,她多謝你,你笑面迎人,顧左右而言他,當自己是情聖,實際上甚麼也沒有發生過,你自以為陶醉,其實只是自作多情﹗
-----------------------------------------------------------------
Reference:
http://hk.knowledge.yahoo.com/question/?qid=7006051600669
http://www.mingpaoweekly.com/htm/1997/bb01_9.htm

越南篇: Fear Factor 之陸

Day 3 - 古芝地道, 戰爭博物館

戰爭博物館見到嘅係滿清十大酷刑現代版,
講親都俾人鬧!
所以今日唔講啦.

古芝地道係戰時胡志明市重要關口.
我個人覺得係全個行程之最,
最值得去.

一開波帶你係個森林度行,
一路行一路介紹越軍的陷阱同容身之所,
眼界大開,
係實物唔係模型,
身處物質豐富幸福土地的香港,
真係冇見過.
啲機關真係好精彩!

另外最精彩係爬地道~
H70cm x W60 cm,
好窄的地洞,
要半蹲住黎行.
微弱的燈光,
大部份時間都係伸手大見五指,
見唔到前面嗰個行咗去邊,
又唔知後面嗰個距離幾遠.
雖然遊客專用行 30 米,
但係好似好長咁...
又細又迫又陌生,
又唔知仲要行幾耐,
又去到三岔口唔知轉左轉右,
又冇乜空氣又熱,
半蹲住行又攰,
個大脾攰到唔想行.
黑猛猛... 靜蠅蠅... 十個驚...

我行咗幾步已經想返轉頭啦,
但係後面又有人,
一條路,
冇得走..
好得人驚呀....

越南篇: Fear Factor 之海

這個海陸空 Fear Factor 的故事其實講咗幾次有啲悶,
但係我又想寫低做紀錄.

Day 2: 美拖市 - 搭船遊湄公河

由胡志明市搭成個鐘頭車去到美拖市,
我實在唔明點解個導遊可以咁悶,
全程都唔講嘢!! (除咗 sell 我哋買手信之外...)

條河好闊,
有啲似維港兩岸.
兩邊都有人住高腳屋,
幾特別.

先去一個叫椰子島的地方,
係一個有錢的傻佬用錢去創立的天道教教壇,
個傻佬每日淨係食椰子維生,
你估魯賓遜漂流記咩!!!

然後去過熱帶果園,
我行足全程都冇乜生果囉.
但之後有個涼亭俾你坐低聽歌食生果.
個小歌女又幾靚喎.

最後臨走前係坐獨木舟遊小河睇海底椰.
係有兩條友一前一後撐槃,
中間坐四個客,
一行一個人,
係平靜的小河度我覺得十分無聊,
好似遊緊迪迪尼的小小世界咁囉,
又慢又熱又悶!!

原來好戲在後頭!
架獨木舟係會直接出番去湄公河駁番架大船!!!!
突然間好大浪,
條河好闊,
我好渺小,
我冇救生衣架媽媽.....
好驚呀...
仲要橫跨條河上船,
架船反咗點算???

Monday, February 18, 2008

煙花之二

我看過最美麗的煙花,
在力寶中心天台.

平排的視線,
那些迎面而來的煙火,
五彩繽紛的火光,
噗!噗!噗!噗!的迴響,
超大風的室外空曠感.
你會覺得煙花應該係咁睇架.

另外我成日記住細個的時候,
東區走廊係會封閉俾市民行上去睇煙花,
睇完二十分鐘之後,
頸都痛埋,
仲要當年唔夠高,
唔知邊個阿叔俾我騎膊馬添!

依家,
我都冇乜睇煙花啦~

Sunday, February 17, 2008

有淚

我哭,
因為我在乎.

我哭,
因為我委屈.

我哭,
因為我感動.

我哭,
因為我仍有淚.

活得比你好

唔知點解.
近來經常哼起呢首歌:
--------------------------------------------
活得比你好

作詞:黃偉文 
作曲:葉健華 
編曲:葉健華/麥皓輪

在那一年 是你離開了我
令我低估自己 自信心往下沉

是那一年 自我沉溺放縱
為你摧毀肉身 為你遭遢靈魂

跌到了最暗處 人忽爾明了
賠掉我一生 未見得使你關心
明日我必須振作 這段情當作
從未發生 (從沒有傷我心)

然後每一天 活得好你一點
來讓你今天碰見 那日離棄我 原是你損失
事隔幾年 在眼前這個我
活得比你更好 (還多得你鼓舞)

------------------------------------------
我這陣子沒有失戀.
大部份的男友都係和平分手,
跟他們的關係也很好.

只可以肯定我真的好勝,
不喜歡敗於人前.

我想一天比一天好,
一日比一日開心.

又執嘢,
我發現我屋企除咗衫多,
最多嘅係紙!

我屋企有大量嘅 notes!
係多年黎讀書的結晶,
要全部清走,
好唔捨得.
但係再擺係櫃裡面又冇用.

今日.
清洗太平地!!

Saturday, February 16, 2008

越南篇: 夜遊西貢河

夜遊西貢河 = 海上夜總會???

係架船上面食個晚飯,
鬼咁大風,
乜都吹到凍晒啦!

好似大笪地有班友仔唱歌,
唱埋晒啲老歌!
最後有個阿姐着閃閃比堅尼玩低溫火.
悶死咗...

條河的風景係零!
除咗廣告牌就係貨櫃,
黑猛猛...
我唔見有迷人景色囉!!!

成件事好似 80 年代的香港避風塘....

越南篇: 貨幣

非常大面額的越南盾,
去厠所要俾一千,
買個椰青要一萬,
我哋廿人食宵夜食咗 654 萬!!

人人都係千萬富翁.
一萬幾千係濕柴~

兌換率係五蚊港幣等於一萬越南盾!~

關我乜事?

媽: 你阿哥話如果冇乜意外, 應該年尾會簽紙 (結婚) 喎.
我(冷漠的): 關我乜事?
媽: 咁你會見佢 (個女人) 多咗囉.
我(繼續冷漠的): 關我乜事?
媽: 咁大時大節會見到佢囉.
我(十分冷漠的): 依家都見係啦.
媽: 咁佢可能唔擺酒喎.
我(夠啦...): 關我乜事?

其實佢結婚真係唔關我事,
我男朋友話結婚就關我事!

Friday, February 15, 2008

越南篇: 胡志明市之景點一

聖母大教堂 + 郵政大樓 + Diamond Plaza

教堂前有個聖母像,
一個人咁高的白色石像,
冇特色.
仲要個教堂係唔入得架.

教堂隔離係郵政局,
個導遊話: 你地可以入去買張電話咭.
但係點解要買張電話咭呢?

行多兩步係 Diamond Plaza,
係一間細過吉之島的百貨公司.
為咗去個細過老麥的 food court 食碗牛肉粉.
好彩碗牛肉粉都唔錯,
係連鎖店的 Pho24 的出品.

很無聊!

越南篇: 天氣

在香港過咗成個禮拜的寒天,
去到越南, 超正!!

天朗氣清,
雖然個天好似唔夠藍~
好舒服的天氣,
熱但係唔濕.
係一早一晚凍少少.

天氣好,
心情都開朗啲~

越南篇: 購物

零 shopping!!!
手信同泰國十個相似.
雖然好平,
但唔吸引.

都冇嘢買.....
五日冇買過嘢!!!!
手痕死啦~~

越南篇: 越南五天團

十個搵笨實.
午機去, 早機返,
實則玩三日,
仲要大部份行程都幾無聊.

最精彩係參與 '海陸空 fear factor' 大行動!!

Thursday, February 14, 2008

Days in Vietnam

this is the 4th day in Vietnam.
bore x 10000000000000

once is more than enough,
i'll not going to Vietnam again in the coming 10 years!!!!

Sunday, February 10, 2008

月結單

信用卡,
管理費,
水費,
電費,
煤氣費,
保費,
...
..
.

所有的月結單我都會留起整理 filing,
見到一大疊亂七八糟的月結單,
頭都痛!

清倉

這幾天想了很多很多,
要全部整理寫出來,
還需一點時間.

還有很多很多....

我有一個阿哥,
正如大部份的阿哥一樣,
細個的時候,
佢唔多喜歡我,
更加唔多喜歡同我一齊玩.

佢玩黃金戰士, G.I.Joe,
我玩煮飯仔,
大個啲我可以勉強同佢一齊砌模型同打怪獸.

印象中一齊玩得最多係棋,
屋企好似乜棋都有:
鬥獸棋, 象棋, 圍棋, 波子棋, 飛行棋, 蛇棋, 康樂棋....

就算阿哥唔同我捉棋,
我都會一人分飾兩角,
自己同自己玩.

笑定喊?

有人說:
你成日都笑,
少少嘢你又笑,
都唔知你笑乜?

亦有人話:
你好易喊,
又好易笑,
都冇你乎!

又有人講:
你咁多表情,
因住成面都皺紋呀,
你年紀唔細啦.

唔同的人睇到唔同的我,
係我的唔識表達?
定係我變化太大呢?

開心咪笑.
唔開心咪喊囉.

般若波羅密多心經

觀自在菩薩 行深般若波羅密多時
照見五蘊皆空 度一切苦厄
舍利子 色不異空 空不異色
色即是空 空即是色 受想行識 亦復如是
舍利子 是諸法空相 不生不滅 不垢不淨 不增不減
是故空中無色 無受想行識 無眼耳鼻舌身意 無色聲香味觸法
無眼界 乃至無意識界
無無明 亦無無明盡 乃至無老死 亦無老死盡
無苦集滅道 無智亦無得 以無所得故
菩提薩埵 依般若波羅密多故 心無罣礙
無罣礙故 無有恐怖 遠離顛倒夢想 究竟涅槃
三世諸佛 依般若波羅密多故 得阿耨多羅三藐三菩提
故知般若波羅密多 是大神咒 是大明咒 是無上咒 是無等等咒
能除一切苦 真實不虛
故說般若波羅密多咒 即說咒曰
揭諦揭諦 波羅揭諦 波羅僧揭諦 菩提薩婆訶
------------------------------------------------------------
在那些迷失的時候,
在惡夢驚醒的時候.
在心亂的時候,
頌經,
心是有靜下來的.

常常想,
學習心經多一點.

笨豬跳

對於婚姻,
我是嚮往的, 是好奇的,
是躍躍欲試的, 是蠢蠢欲動的.
就好似好想玩一次的 '笨豬跳'.

很想做, 又怕死.

煙花

香港人年初二睇煙花係正常不過的節目,
但我記得小時候每一年都唔知去咗邊度,
但係年年都有得自己放煙花.

簡單如砂砲,
大型如 n 頭的炮竹,
還有那些奇怪名字的 '轟天雷', '沖天炮'....

'龍吐珠' 係比較普遍的花火.
但係有一次枝 '龍吐珠' 突然係中心爆破,
勁大聲 '0逢' 一聲!!!
想嚇死人咩!!!
嚇得我立刻就喊出黎.....
之後我就冇再玩過煙花啦.

瞓覺褲

我好怕凍.
冬天一出街我會牙關打震,
好似卡通片人物咁.

但係返到屋企我堅持要着短褲,
係舒適悠閒好似打籃球的及膝短褲.
着咗長褲會唔舒服同瞓唔着...

室內着拖鞋一樣,
好似唔識行路咁.
(仲有, 我係唔識着人字拖行路嘅.)

Saturday, February 9, 2008

魔法奇緣

不停講: 'true love's kiss - 真愛之吻',
係夢幻愛情片多過小朋友片.

我唸我過咗某個年紀,
一開場嗰啲劣質王子公主卡通片,
我實在想 fast fordward.

又一齣歌舞片,
呢期興咩?

官方簡介:
童話中的卓絲公主被巫婆推落深淵,幾經轉折,通過神秘出口,竟然來到現實世界的繁華紐約!公主人生路不熟,幸好得到失婚律師羅拔和他的小女兒悉心照顧,在冷漠都市總算找到溫暖。 童話中純過蒸餾水的的一套,在現實生活中行不通。公主的一舉一動,變得撞板搞笑。卓絲公主處處碰壁,期待愛德華王子由童話世界前來營救。王子遲遲未現身,公主和羅拔開始日久生情。那邊廂巫婆王后與奸險大臣前來追殺,終於都出動毒蘋果侍候,要公主一去冇回頭!危險關頭,愛德華王子為救回公主,冒險追到現實世界…究竟天真公主怎樣處理三角戀?巫婆毒蘋果奸計可否奏效?現實世界可否有大團圓結局?

青提子.杏脯

這是久違了的味道.
從超市買來青提子乾.

小時候體弱多病,
汽水零食都係禁品.

去到士多只可以揀玻璃瓶內的乾果,
五毫或一蚊嘅青提子乾或者杏脯肉,
用個啡色的小雞皮紙袋裝住.
甜甜地,
有咬頭, (即係0趙好耐...)
乾果又相對有益.
慢慢食, 可以食成日.

Thursday, February 7, 2008

恭喜恭喜

新年祝大家:

恭喜發財
萬事如意
萬事勝意
生意興隆
財源廣進
如意吉祥
春來福到
迎春接福
五福臨門
學業進步
學業猛進
一帆風順
笑口常開
心想事成
蜜運成功
大吉大利
花開富貴
身體健康
恭賀新禧
金銀滿屋
青春常駐
招財進寶
家肥屋潤
出入平安
老少平安
股票高升
快高長大
四季平安
年年有餘
歲歲平安
四方貴人
一本萬利
馬運亨通
龍馬精神
新春進步
年年順景
新年進步
吉慶有餘
金玉滿堂
發財好市
五代同堂
豬籠入水
一團和氣
和氣生財
家宅安寧
合家團聚
滿堂吉慶
添丁發財
丁財兩旺
多子多孫
旅途愉快
運轉乾坤
長年好運
週年旺相
旗開得勝
門庭若市
客似雲來
大展鴻圖
飛黃騰達
百業興旺
官運亨通
步步高陞
新春如意
恭賀春釐
恭賀新禧
迎春接福
新春大吉
新春納吉
三元啟泰
歡樂年年
年年有餘
五子登科
竹報平安
合境平安
合家平安
家宅平安
財源滾滾
盤滿砵滿
招財進寶
橫財就手
狗馬亨通
逢賭必勝
馬場得意
家肥屋潤
四方貴人
連生貴子

reference: http://hk.knowledge.yahoo.com/question/?qid=7007022202674

Wednesday, February 6, 2008

部落格

今日冇乜嘢做,
上網, 在 facebook 裡游走.

從你的設定裡見到你的部落格連結.
已經歷史悠久.
我唔係你親朋友好.
秘密存在係你我之間.

你代表着神秘,
從別人的眼中, 係我眼中,
一樣的神秘.
從不輕易的透露心事.
喜怒哀樂, 不形於色.

我唔明白.
我睇唔清.
我恐懼.

Sunday, February 3, 2008

陳 b

陳氏伉儷的兒子已經九個月啦,
我們自從出世後便沒有見過他啦.

依家陳 b 已經可以自己坐係度,
大頭加大眼,
很可愛.
仲成日對住我笑添~

好友對我有少量的嬰孩教育知識好奇怪.
因為我係優才教學的擁護者,
我都想我個仔醒醒目目架!
得閒學定啱架啦~

我跟爸媽說人地個仔好得意,
爹話: 人地個仔實得意架~ 佢喊你又唔駛理佢~!

對,
人地個仔係得意啲嘅!

桃花

今年阿媽唔知係咪太想我早啲嫁,
無端端話要去買桃花!

我: 我唔要買桃花呀, 我啲桃花仲唔夠多咩!
娘: 唔係淨係桃花呀, 你做呢行要人緣呀.
我: 我人緣好好喎~ 老豆, 你人緣唔好咩?
爹: 我人緣唔止好, 係非常好!
娘: 咁我要人緣得唔得吖?
我+爹: 我地覺得你人緣都好好噃~
娘: xyz$%^$%&

棵桃花擺你屋企定我屋企先??
佢阻住我打機呀!!

長江7號

朋友們看完都說失望了.

因為呢齣唔係笑片,
係話題之作.
係溫情片.

主角唔係周星星,
係小朋友.
想睇周星馳返屋企睇 vcd 啦.

死版外星狗零誠意,
生勾勾鬼口水版就一般啦.

齣戲又太短,
一陣間就完啦.

小朋友幾可愛,
其他大人行行企企.

總之,
俾 $78 睇呢齣戲,
唔值囉.

官方簡介:
蟄伏三年,周星馳再次推特別視覺效果的喜劇《長江7號》。故事講述一位以拾荒為生的父親鐵(周星馳飾)和兒子小狄(徐嬌飾)過著捉襟見肘的生活,小狄更經常被人欺負。某天,父親竟然拾得一隻外星生物!小狄把它命名為「長江7號」,並希望憑它的超能力擺平所有問題,在同學面前「吐氣揚眉」。可是,這外星人竟然另有主見,還製造了更多的麻煩... 最後,兩父子明白到「家」的意義,以及錢並非萬能。

Saturday, February 2, 2008

又一個月

仲有幾日就農曆新年,
又有假放, 真好!

寒冷的天氣快啲走啦,
我就黎凍死啦,
呢幾晚都要開暖氣瞓,
十個乾燥!!!

魔街理髮師

好睇~!
雖然我唔鍾意悲劇.

歌劇電影版,
歌曲好聽.
黑白灰, 好有型!

主力賣愛情同復仇.
血腥位做得好 funny,
一啲都唔恐怖.

官方簡介:
尊尼特普在電影中飾演班雅明貝加,他被流放他鄉坐了足足15年冤獄,今天逃回倫敦,誓要報仇雪恨,他在片中將與海倫娜寶咸卡達飾演的萊莉露花太太成為拍檔。班雅明貝加化身成史偉尼托特,回到他從前位於露花太太餅店樓上的理髮店,留意著杜班法官(艾倫利文 飾演)的一舉一動。當年,正是杜班法官與奸狡的副手比度潘福特(添莫菲史巴 飾演)設下陰謀把他流放異地,奪走他深愛的妻子露茜(羅拉米雪凱莉 飾演)和年紀尚輕的小女兒。 露花太太告訴托尼,他的愛妻被杜班法官污辱後已服毒自殺身亡。與此同時,敵對的理髮師派里尼(沙察拜朗高漢 飾演)則威脅要揭露托特的真正身分。托特把他殺死,正當他為怎樣處理屍體費煞思量,露花太太竟想出妙計,提議用人肉來製作肉批,並乘機改善她餅店的生意。 杜班法官成為史偉尼女兒祖安娜(珍偉絲娜 飾演)的監護人,並對這位亭亭玉立的女生虎視眈眈。從海中拯救史偉尼的年青水手安東尼(金寶保亞 飾演)也被祖安娜的美貌深深吸引,誓要拯救她脫離魔掌。不過,此一刻史偉尼托特一心只想實現他的復仇大計,無論對身邊人造成甚麼傷害也在所不惜。
Blog Widget by LinkWithin