Friday, November 30, 2007

夢想

由細到大,
我也沒有好好的想過 '夢想'.
最憎作文年年都要寫 '我的志願'.

我都唔鐘意唸啲不切實際的事情,
又唔鐘意唸將來.
今日都未顧得掂,
聽日有可能死掉,
都唔知唸咁多做乜?

近呢幾年,
我會寫低生日願望,
係可以係未來一年想做到, 又會做得到嘅事情.
這陣子我已經開始思考我下一年要達到的目標,
不過亳無頭緒....
冇乜方向.

我唔洗做千萬富豪,
又冇乜貴價嘢特別想買,
升職加薪又驚辛苦.
讀書又想遲少少先,
身體健康太行.
心想事成要留番新年用,

下年,
點算好?

肖馬B

生肖血緣:肖馬B 貪新鮮冇時停
正宗驛馬星,
坐唔定,
鍾意四圍發掘新鮮事物,
又喜歡跟朋友玩鬧,
可惜把口唔收,
守唔到秘密,
優點是沒有機心,
喜怒形於色,
做朋友夠坦誠。
至於對長輩,
雖也尊敬,
但遇爭拗,
會據理力爭。

今日蘋果副刊內容,
好準~

Thursday, November 29, 2007

冷血動物

終於都凍少少,
我就可以着大褸啦,
(我已經買咗好幾件褸...)
哇哈哈~~~~

我個人的本身係唔識自我發熱,
手腳長期冰冷,
好似雪條咁.

會開暖爐,
但係冇乜用,
個人係唔會暖番架.

一定要沖涼,
開勁熱的水,
然後成身紅晒!
成個浴室煙霧迷漫~
(啲煙會係門縫飄出廳...)

成個人舒服晒~
咁可以維持兩個鐘頭左右.
我最高紀錄係一日沖咗四次涼!

Tuesday, November 27, 2007

眼闊肚窄

食之前: 好肚餓! 好肚餓!
食完: 好飽! 好飽!

我就係咁~
餓又嘈!
飽又嘈!
冇得食就做餓鬼,
食少少又變咗隻飽鬼.

每次食飯我都鍾意叫到一枱都係.
鍾意有好多好多選擇,
但係其實我又食唔到咁多嘢...
食得飽得滯又會嘔~

同事們都鍾意同我 AA 飲茶或者打邊爐,
樣樣都唔食,
食得又少,
佢地話好抵!

電車

咁多種交通工具之中,
我最鍾意電車.

唔趕時間,
我會搭電車.
坐樓上,
居高臨下.
吹吹風,舒舒服服的.

唔開心我又會坐電車,
望吓街,
分散注意力.
睇吓四圍嘅變化.

鈴鈴鈴鈴~~
煩惱鈴走晒~

Family Day

星期天係永久的 Family Day.
雖然我出街出得很凶,
但係星期日我會留俾屋企人.

這樣難得全日的假期,
第一件事係飲茶,
個個禮拜都唔同酒樓,
有時想食盅飯,
有時想食糯米雞,
有時要大飽.

小時候會去遊車河,
行山,
郊野公園,
去啲冇雷公咁遠的地方.

依家會去超級市場,
行一少陣街.
之後返屋企瞓覺~
休息!

有時想探阿哥,
我地會揸車返大陸,
按個摩, 食個飯.

一日輕輕鬆鬆的過去了.

Monday, November 26, 2007

失戀

我記得失戀時候的痛,
是何等的蝕骨入心.

失去知覺, 味覺, 聽覺, 視覺, 嗅覺.
我, 只活在自己的世界裡.

明天怎麼了?
我唔想知,
亦唔想理.
只沈醉係悲痛的世界裡.

你唔需要可憐我,
我想暫時的死掉,
封閉自己.

我知愛我的人會因為我的痛而痛,
可惜我愛的人已經離開我.

我由衷的感激那些對我不離不棄的人.

那種痛,
那些支持,
我全部都記得.

第三者

我曾經做過第三者,
亦有過第三者.
三角關係,
非你所願.

大部份人都希望感情係一對一.
愛情要係一個唔合適的時間來到,
理智影響唔到你嘅選擇.

好友 r 說:
兩個人之間如果冇問題,
根本容不下第三者.

第三者的出現,
只係間接反映兩個人之間的隙縫.

好友 c 說:
三角關係嘅主旨在於鬥長命.

你能夠當第三者,
先要鬥實力,
再鬥忍耐力,
最後鬥長命.

愛情從來都係持久戰.
無論愛情的種子係由那個人開始,
邊個收成?
幾時收成?
能否收成?
只有天知.

Saturday, November 24, 2007

分手不要期望

今日聽到一個惡耗.
在我未來得及恭喜之前,
他們分開了.
兩個人的感情只有兩個人知道,
你唔需要向第三者解釋,
唔需要別人的明白與體諒.

分開了,
是環境的因素?
定係沒有足夠的愛呢?

竟然是這樣的兒戲.
過山車般的戀情,
大起大落.

我知道,
你要離開時,
我心底裡係會偷偷的等待你回心轉意,
但係你唔需要係分手嘅對白裡面包括:
'如果我失敗了, 我會回來跟你結婚.'
你唔好再俾希望我.
未來嘅事係冇人知,
但係依家唔該唔好開定期票.

沒有希望,
你唔回頭,
我唔會自怨自艾.
但到了你要回來的那一刻,
我會覺得更美好.

郭富城舞林正傳演唱會2007

同唔同嘅人睇 show 有唔同嘅見解.
今次同專業人士睇演唱會,
除咗郭富城,
會研究 dancers, 服飾, 燈光, 舞台, 音響, LED 設計.....
又學多樣嘢~

張叔平嘅衫好靚,
連 dancers 嘅衫都好靚!~
好有舞台感!
個舞台好好玩~
好有 '黃金戰士' feel~
好多 function,
360 度轉,
又可以做升降台,
好有型!

大部分都係快歌,
但我太耐冇聽郭富城,
冇溫書就聽演唱會~
實在有好多歌都冇聽過囉....

另外,
郭富城嘅對話實在太 '娘'~
去換衫之前會講: 一陣見!
講完爛 gag, 就會話: 以下呢首歌, xxx, 送俾你地~
可唔可以唸過啲稿?

但係歌舞連場,
都值得去睇嘅~

Friday, November 23, 2007

辦公室戀情

我一向抗拒辦公室戀情.
而事實上我做咗咁多年嘢都冇試過係公司結交男朋友.

題外話:
咁男朋友從何來?
可能我成日出街咁識到好多朋友嘅朋友.
真係要擴闊生活圈子先至容易係新朋友堆度搵到新男朋友.
成日留係屋企,
唔通無端端有條友黎按個門鈴咩!

公司是非鬼咁多,
一個唔覺意就變成發姣(!)私生活唔檢點(!)
無拿拿招人口舌,
我覺得幾戅居囉.

不過話分兩頭,
我個人又唔衰得,
愈多人阿芝阿咗,
我就愈發奮兼更努力,
係唔衰俾人地睇呀!!
(都唔明點解個人咁好勝?!)
(呢個唸法真係好無聊~ 攪到我鬼死咁忙...)

喂~~ 好耐冇 function 啦~~~

成個幾禮拜冇見過十兄弟啦!!!
連 msn 都少講咗,
工作又忙,
不如下個禮拜食飯啦~~~

其實要多謝陳媽媽~
那時我們剛開始全職工作,
常以為其他的兄弟事務繁忙,
因為酬備婚禮,
我們等無聊精又聚集啦~~
(一個婚禮, 竟然日日都得閒出黎做 preparation!!!)
(赫然發現, 我地原來大家都咁無聊.)

WildDayOut - 星光幫

節目: WildDayOut - 星光幫 Live
地點: Hard Rock Cafe

個幾鐘頭嘅表演,
四個星光幫 -
周定緯, 潘裕文, 許仁杰, 林宥嘉.

四個都唱得,
不過唔睇得.
氣氛一般.

唱嘅係第二隻碟嘅歌.
有個人, 有合唱.
周定緯有跳舞,
成日扮阿 rain, 好煩!
(雖然真係有兩分似阿 rain.)
林宥嘉比較靚仔,
但身形就... 又肥又矮咁囉~

不過全程企係度,
攰啲囉....

* 我得到一張有齊四個親筆簽名嘅 poster,
有興趣請通知我~ *

Thursday, November 22, 2007

冷靜

再係舊網頁找到這些.

{請給我一點時間憎恨你。}
當我憎恨你,不想見你的時候,我會想起你的優
點:你對我其實很不錯、沒有人比你更能容忍我、
你心地好、你不太會說謊、你很踏實……如果不是
有時間憎恨你,我就沒時間記起你的優點來。

吵架之後,我說不想再見到你。這個時候,你可否
給我一點時間?若你給我一點時間冷靜下來,我會
懷念你的一切。那麼,我會再見你。

我說要分手,請你不要求我留下來。你就給我一點
時間吧,一星期、兩星期,甚至一個月。見不到
你,也許我會好好反省一下自己。我自己也不是那
麼好,我憑甚麼對你那麼挑剔?我也許不會找到一
個比你更好的。

我罵你的時候,你不要理我好了。你最好給我一點
時間恨你。第一天、第二天,一直到第六天,我都
恨你,恨死你。但是好奇怪,到了第七天,我忽然
有點想念你。

我自憐的時候,你就由得我吧。請你由得我發霉、
發臭和風乾。我就是喜歡這樣。風乾之後,我或許
有力量重新愛你。原來,當你愛一個人,你不但要
愛他,還要偶爾恨恨他。在恨他的時候,你才會發
現他可愛的地方。請讓我有時間恨你。

------------------------------------------------
如果要一點時間才能記起你的好,
那你其實應該不太好.
------------------------------------------------

{你要冷靜多久?}
男人永遠搞不清楚女人的安全期,女人則永遠搞不
清楚男人的冷靜期。

男人說:「我想一個人冷靜一下。」這是不是代表
他想分手呢?他沒說分手,只說要冷靜。那麼,他
到底要冷靜多久?

「我會打電話給你。」男人通常會這樣說,而不會
直接告訴女人他要冷靜多久。

女人回家等男人的消息。對女人來說,這段冷靜期
漫長而痛苦。她知道,男人忽然希望一個人冷靜一
下,那就是說他不愛她了,他想分手,只是他還開
不了口,所以他需要一點時間。

所謂冷靜期,根本就是一方等候另一方宣布這段愛
情死亡。很少情侶能夠熬過冷靜期,冷靜期過後又
走在一起的,只是苟延殘喘,很快就會分手。

「冷靜」根本就是「分手」的同義詞。談過幾次戀
愛的人,不會笨得不明白冷靜的意思。雖然明白,
我們還是很難接受對方忽然說:「我們冷靜一下好
嗎?」無論聽過多少次類似的說話,我們還是希
望這一次是例外的,這一次的「冷靜」是有好結果
的。無論受過多少教訓,我們還是弄不清楚男人要
冷靜多久。我們還是會追問:「你為甚麼要冷靜,
你要冷靜到甚麼時候?」

-----------------------------------------
我也弄不清為何要冷靜?
是為着要想起我的好嗎?
既然忘記了,
應該要再記起嗎?
-----------------------------------------

Wednesday, November 21, 2007

謝謝你折磨我

從舊的網頁,
發現了幾篇我喜愛的文章,
邊個作者唔記得啦.
這是我最喜愛的.

{謝謝你折磨我}
在日常生活,在工作上,我們常常會碰到許多討厭
鬼,他們或許是你上司和同事。這些討厭鬼對你的
折磨,也許有激勵的作用。
是的,生活中,有很多折磨。貧窮、失意、失戀、
苦戀、單戀、被人奚落、被人藐視、被人欺侮、與
至愛的人別離、疾病、死亡,統統都是折磨。
受折磨的時候,你萬分痛苦。然而,有一天,你會
感謝所有折磨你的人和事。
折磨等於鍛煉。
沒有受過折磨,我們不會成長,不會變得成熟,也
不會擁有智慧。若有一個人折磨你,你該感激他。
若不是苦戀他,若不是他對你若即若離,害你受盡
折磨,你怎會開始了解愛情和人生?當你發現你可
以為一個人而忍受這種折磨,你的視野會忽然變得
廣闊。
不要被所有的折磨打倒,你要用這些折磨來自我提
升。長夜哭泣之後,你會感謝所有曾經折磨過你的
人。他們成就了你。

十兄弟遊樂場

大家仲記唔記得我係澳洲寫嘅無聊網頁?
那是 1999 年的回憶.
好得意,
好細路女,
勁白痴,
哇哈哈~~~

今日悶悶地,
又重溫一篇當年那些無聊的日記.
有啲好開心,
有啲好溫馨,
有啲好嬲,
有啲好笑.

相比之下,
我發現呢幾年我過得愈黎愈好~
呵呵~~

栗子

鐘意扮街坊,
鐘意着短褲拖鞋走落街~
十級鐘意食街邊嘢.
我完全唔介意企係街邊食嘢!

街邊嘢都有季節性~
到咗秋天,
當然要食栗子啦~~!!
真係生炒的栗子好好食架....

搖吓粒栗子,
離殼嘅又易剝又粉啲.
經過栗子車都會買半磅襯熱食!!

屋企樓下都有,
不過質素一般.
旺角近火車站橋底個叔叔嘅炒栗子好味好多~

魔戰王:貝奧武夫 Beowulf

又一套漫畫化史詩式英雄片,
好似戰狼 300,
又似 Troy.
雖然以上兩套我都有睇,
(三齣戲真係好似架~)
但係仍然覺得 Beowulf 都好好睇....

轉登去咗圓方的 Grand Cinema,
睇 3D 版本,
$100 張飛.

全套戲都係 3D,
俾副老土眼鏡你戴,
十個重.
而一路睇 3D,
好攰, 好傷神,
睇完想即刻返屋企瞓覺.

戲院環境好,
張橷好好坐~
音響又勁.

新地方新事物,
一定要試吓啦,
強勁推介~

官方簡介:
在英雄輩出的年代,大地上出現了最強的戰士:魔戰王:貝奧武夫(雷溫斯頓聲演)。貝奧武夫打敗橫行大地的惡魔格蘭杜,激起了惡魔之母(安祖蓮娜祖莉聲演)的怒火,她將不擇手段實行報復。隨之而來的世紀大戰將傳頌千古,令貝奧武夫的名字永誌人心。金像大導演羅拔湛米基斯在《魔戰王:貝奧武夫》把現存英語最古老的長篇故事映畫化,運用最頂尖的電腦技術,炮製出一部融合數碼科技的真人動畫電影。

Tuesday, November 20, 2007

平衡

可口可樂總裁迪森 (Brian Dyson)說過:
生活就好像一個擲球比賽,
你必須輪流拋接五個球,
分別是『工作』、『家庭』、『健康』、『朋友』及『精神生活』,
而你不可讓任何一個球落地。
很快地你會了解『工作』是一個橡皮球,
如果你不幸失手掉下,
它還是會彈回來。
而其他四個球是玻璃製的,
一旦落下,
它們可能會破損,
甚至變成一堆碎片,
再也不能和以前一樣了。
(from 都市日報 2007/11/14)

好不容易...平衡各方面,
時間總好像永遠都不夠~
討好了各方面,
某程度上...
辛苦了自己...
我嚴重的睡眠不足...
哈!

叫雞

有啲嘢我真係好想做~
例如叫雞...

如果有下世可以繼續做人,
我仍然係想做女人,
唯一令我要考慮做男人,
係可以去叫雞~ (好變態...)

人一世, 物一世.
如果我係男人....
我一定會去見識吓架!!!

當然我依家都可以入夜總會望吓或者睇吓艷舞,
甚至乎叫鴨.
但係都感受唔到做男人然後叫雞嗰種興奮~
真遺憾... (有冇咁嚴重呀....)

精神分裂

從素顏天使中看到以下文章,
我又正在被煩中!!!
身同感受.
呢個世界真係有好多人係精神分裂!!!!

女人選擇伴侶的條件可能有很多,又要有錢又要英俊又要高大威猛,要懂吃喝玩樂時又懂四書五經,但在我看來甚麼都不比這二字要緊,就是「謙厚」。

坦白說,so far 做了廿幾年人以來,我的追求者,不算多,但就專門招惹到那些發瘋的男人。為甚麼不,因為我很相信如果是互相對對方有好感,跟本就不用怎麼追求就能走在一起,所以我知道(覺得)是沒可能的,我都會一一很決絕的回絕。在我看來,那些男人用 N 年時間又冒雨又冒雪的去等待一個女孩子,十分的不可思議。

然被我拒絕了的男人,很多時候都有一個共通點,就是不夠謙厚。

有自信,固然是好,但過了頭,就是病。通常這些男人都是外表普普通通啦,收入不算差,比上不足,比下有餘,都雄心壯志,覺得自己已是擁有全世界。但就沒想到自己可能只是一家大企業裡的一個小薯頭,甚至只是薯頭上長著的那一小片青苔,比你更好更聰明的人還多的是。擺著大爺般的脾氣,好像世上的女人都是你寢宮內的小宮女。

唉我常常說,如果你真是叻真是聰明真是漂亮真是英俊真是很有成就,你就算瘋狂的讚自己,無人會覺得有問題。等如古天樂或者金城武跟你說覺得自己好靚仔,誰會覺得有問題先?

好啦,當我拒絕了你啦,我意正嚴詞地說我有男友,我要結婚了,你好討厭,好煩,你這一世都沒有機會的啦,你死心啦諸如此類。因為你受慣那些十七八歲小妹妹或是月賺六七千的女郎的簇擁,我拒絕了你,你忽爾覺得我特別起來。你以為,我拒絕你,是因為想要試探你的心意,要你受盡折磨才會與你一起。但其實我要的很簡單,我喜歡你,自不然會是想要跟你一起,但我一點都不喜歡你,甚至極之討厭你。

然後因為你太過有自信,你受不了打擊,你會說,死八婆你好有寶咩,你呢世都搵唔到個好似我咁有條件的男人呀,F 字頭的字眼,很多很難聽很難聽的說話都會說出口了。然後你又後悔了,你會隔天就送來一大紮花,瘋狂的發短訊 / MSN / E-mail 來轟炸我,求我原諒你,但話出了口就收不回,不是你說了要原諒就能原諒。

OK,然後又是一個 routine,你又覺得怎麼你低聲下氣了我還不肯原諒你呢,你呢個死八婆有病,好有寶咩,你心地好差,你呢世都搵唔到個好似我咁有條件的男人呀...... 再然後又後悔,說自己會改過 blah blah blah,我把你放進 ignore list,你還是隔一陣子就發電郵來說要跟我出去晚餐 make it up 很想見你。不停循環。

前一陣子那宗遊繩入屋殺女友的男生,很大機會就是這種人,受不了打擊,發飆,EQ 極低自信太高,危險人物。其實這篇文已經完全離了題,我只是想說,那種男人,煩到我想吐血囉!

reference:
http://plainfaceangel.blogspot.com/2007/11/blog-post_2964.html

Sabatini

因為近來大熱的白松露菌,
我們來到 Sabatini.

一如其他酒店餐廳,
一坐低有個經理走黎一輪咀的推介了各款美食.
其實佢有冇唸過一個正常人係一次過只係記到七樣嘢??
講完之後我實在係頭昏腦漲...

叫咗餐前酒, 頭盤, 主菜, 意粉, 甜品.

餐前酒佢話係意大利酒,
不過我已經唔記得叫乜嘢名啦.
好似香檳,
唔太甜,
非常易入口,
結果我全晚都面紅紅的.
(埋單至知原來 $140 一杯, 估佢唔到~)

送嘅餐飽有 4 款~
樣樣都好正!
加橄欖同醋,
正! 正! 正! 正! 正!

頭盤叫咗兩款,
白松露菌 + 蛋 + 多士 ($350) -
我第一次食白松露菌,
有樣學樣的先放咗一片入口.
不得了!!
一小片白松露菌令到成個口腔突然間充滿菌味!!
我覺得氣味濃烈得似蒜.
蛋加入芝士成炒蛋,
淨食蛋都好鬼好味囉!!
不過白松露菌加芝士蛋就好似冇乜味囉.

Parma ham + 哈蜜瓜 ($238) -
Parma ham 係原脾切出黎,
咁啱 Sabatini 的老闆 Mr. Sabatini 黎咗香港,
咁 Mr. Sabatini 就係面前招呼我地, 切 Parma ham 啦.
(即時覺得自己係貴賓~)
Parma ham 唔太鹹亦唔太肥, 哈蜜瓜又好甜, 好 juicy, 好好食....
Parma ham 同哈蜜瓜真係好夾~

主菜經理介紹食牛柳同龍蝦,
但係我唔食牛,
西餐食龍蝦又撈撈攪攪.
所以叫咗魚.
係原條煎撻沙魚加蘆筍 ($598).
撻沙魚煎得剛剛好, 脆皮但係唔乾,
蘆筍好嫰滑~

意粉係白松露菌寬條麵 ($690),
(有 3 gram 白松露菌),
係先煮熟個自製寬條麵加白汁然後係你面前磨白松露菌片.
(好扮嘢呀唔該....)
白松露菌真係好鬼死香!!!
但其實分開計個汁又好滑, 份量剛剛好,
意粉又好煙韌.
不過細碟啲囉.

仲加咗個 side dish 的菠菜 ($98),
蒜頭加菠菜囉,
賣相麻麻地.

甜品係會有架三層成個人咁高嘅甜品車推出黎,
(好似酒樓推車仔....)
咁見到個個蛋糕都好吸引....
當選擇咗個經理會係你面前切囉,
(再一次.. 我覺得好扮嘢呀....)
(但係亦解釋咗點解咁貴! 有 service 囉!)
叫咗三款甜品 (total $255)
我叫咗件餅叫聖安娜,
(經理話係西西里式喎...)
係酥皮底加 puff 加 whipped cream 同 chocolate mousse,
好味到不得了!!!!
另外叫咗雲尼拿布甸,
好滑好濃,
但係我件餅好食啲囉~~
仲有個 cream cone,
個 cone 好似脆麻花咁嘅味,
中間 whipped cream 加開心果碎,
樣靚但味道一般.

開咗支水 ($80),
最後加杯咖啡 ($50).

埋單成 $1500 一個人... 好貴....
係我食過最貴的西餐,
但係真係好好食...

多謝晒~!

Sabatini
地址 : 尖沙咀麼地道69號帝苑酒店三樓
電話 : 2733-2000
菜式 : 意大利菜

Sunday, November 18, 2007

購物狂之家

我生於購物狂之家.
我家各人都愛購物.

爹愛看電視.
我家有 20" 29" 32" 37" 46" 的電視機,
(仲一日到黑話要買個 52"!!)
我以前的房間已成為電視收容所.

娘愛厨房用品.
佢嘅煲, 鑊, 兜 (碗碗碟碟)...
已經玩完咗佢個厨房繼而入侵咗我個厨房~

哥就係 '必先利其器' 的表表者,
基本上佢一有新嗜好,
就會買最貴最靚的器材.

我買嗰少少衫,
濕濕碎啦~

Saturday, November 17, 2007

11-13

-------------------------------------------
如果我忘記了,
你會知道我不是有意的.
我知道,
你永遠不會忘記我的生日.

每年的生日,
是我唯一可以勇敢想你的日子.
-------------------------------------------

很喜歡劉若英,
很喜歡 '生日快樂' 這齣片子.

戲如人生.
每年我都會係你的生日給你一張生日咭.
到我的生日,
你會給我一個祝福的留言.

這樣的交談,
不經不覺的已維持了十多年啦.

回憶總是美好的.
我們互相關心,
不過沒在一起.
只有各自在兩條沒有交點的鋼絲上走着.

這一年生活愉快嗎?
祝你生日快樂!

Blog

朋友們成日都問我點解成日有咁多嘢寫,
因為我無聊兼時間多囉~ 哈~
我啲 Blog 咁冇深度,
半個鐘頭就寫完啦~

有時想到要講的 topic 的時候,
會係電話度記低,
靈感通常都係一閃即逝!~
(我又冇記性...)

然之後得閒先慢慢擴張句子變番篇文章囉.
咁多啲出街多啲講嘢都有幫助嘅.
當然....
都唔係個個人好似我咁無聊乜都寫得一餐~

寫出黎因為我自己都好鐘意睇番自己之前去過邊食過乜做過乜.
我強項係五時花六時變.
至少寫低咗有個記錄,
前因後果會明白好多.

清純~!

同事 w 成日話我扮純情.
我一買學生衫佢就嗌救命~

其實我偏愛 college look.
一身學生妹的打扮好似好有氣質~ (真膚淺!!)

黑.白.灰.
裇衫,
公主袖,
百摺裙,
V 領冷衫,
蘇格蘭格仔,
圓頭婆仔平底鞋.

簡潔中見高貴~
又長青,
季季都着得~

不過我覺得一把長直髮真係呃到唔少人嘅~
'清純' 係我大學時代係統計處返工嘅時候啲同事俾我嘅花朵!
你話笑死唔笑死!!!

來電

來電: xiao 者, 錢運你有 mou 天過千雲學 yuen?
我: 吓? (一頭霧水!! 一個字都聽唔到...)
小姐: 梗你有 mou 天過湘講鎮苦遲讀鑽燒支今?
我: 吓? (我估計佢想講 '香港政府持續進修基金')
我: (用純正的廣東話) 不如你同我講國語吖~
小姐: xiao 者, 你係咪唔塞天廣東話?
我: 我識聽廣東話, 不過係你啲廣東話差囉.
我相信廣東話對答我應該 ok 架, 我會考中文會話合格囉)
小姐: mou li yau 架, 便時啲仁都天得 dou.
我: 咁你搵啲聽到你講嘢嘅人啦, 唔該晒, 拜拜~

星匯佛蘭明高

星匯佛蘭明高 Gala Flamenca Dance.
呢個係地中海節嘅閉幕節目.
屬於西班牙的舞蹈.

Flamingo 拍子感好重,
好似踢躂舞.
主要係腳同手部的動作.
(唔好咁膚淺同我講跳舞唔係手就腳!!)
(跳舞仲有頭, 頸, 膊, 胸, 腹, hip 架!!)
地板同跳躍的動作亦都較少.
另外就係好多 sharp turn,
女舞者啲裙一轉就好靚!!
係輕快同熱情的舞蹈.

伴奏係 live band (結他&鼓) 加拍手,
好悠閒~
不過有時加插啲好似日本能劇加歌劇的歌聲, 好嚇人~

最離譜係隔離嗰兩公婆全場阿呆上身!!
冇交流, 冇笑容, 冇拍手.
好冇品!
拍手係基本禮貌,
係對表演者的支持同鼓勵,
點解咁吝惜你的掌聲??

另:
有冇人識西班牙文呢?
有冇人知 'alay'(音) 或者 'alure'(音) 點解呢??

節目簡介:
來自倫敦及紐約佛蘭明高藝術節的台前幕後演出精英,囊括國家級大師和最炙手可熱的舞壇新貴,最強陣容一時無兩。

以畢生獻予佛蘭明高藝術的西班牙一代舞伶瑪爾切.埃斯梅奈特,其一舉手一投足均是佛蘭明高的絕美姿態。這次演出匯聚了擅於在傳統中創造新意的貝蓮.瑪雅,還有曾於眾多大師舞團中都擔任獨舞員,剛贏取了2006年馬德里大獎最佳表演獎的奧爾嘉.佩利榭度,和同樣經歷了不同著名舞團首席舞位,千錘百鍊造就了驚人舞藝的曼努埃爾.里楠,以及在佛蘭明高舞界絕無僅有的自學天才,被舞評人讚譽為現時西班牙最具代表性的馬可.弗洛雷斯,加上十位結他手、敲擊樂手及歌者的現場精湛奏和,成就了一份無可比擬的佛蘭明高舞蹈巨星名錄。

一個延續傳統、當代、以至永恆的傳奇故事!一個匯聚西班牙絕頂舞蹈巨擘的完美絕配,只此一次的星匯佛蘭明高!

失憶

拾荒者一家四口,
支出比較大,
所以比較慳吝.

呢排和記又有某幾款手機作零機價推廣,
佢應該都係老人痴呆,
同樣的對話已經發生咗好幾次:

拾荒者: 近排某N記手機好似做緊零機價喎.
我: (敷衍的) 係呀.
拾荒者: 吖! 嗰隻 xxx 型號好唔好呀?
我: 冇研究.
拾荒者: 嗰隻 xxx 喎. 黑色嗰隻喎.
我: 唔識. (大部份嘅電話都係黑色架, 阿叔!!)
拾荒者: 咁你覺得零機價買 xxx 抵唔抵呀?
我: 都話咗冇研究咯....

救命!!
有冇人拯救我!!
我真係唔識呀...
唔好迫我呀.......

Friday, November 16, 2007

精神領袖

我們好像回到那個分隔兩地的日子.

沒有見面.
見面好像總是爭吵不斷.
維持着天各一方的日子,
我們相安無事.

一如以往,
各自為政,
互不相干,
獨立自主.

我們像精神領袖.
不需見面,仍然生活安好.

這是什麼樣的生活??

暗戀

從 facebook 裡看見一個久違了的名字,
突然記起....
我也曾經暗戀過某學長!!!
應該係小學三年班的時候~

他比我高兩屆,
皮膚黝黑, 瘦瘦的,
當時比我高成個頭.
讀書成績唔突出,
係運動型.
最剎食係嗰個黑人牙膏式的笑容~

不過呢件事情唔係維持咗好耐.
我太把人追啦~~
哈哈!!

拾香紀

開場前我仍然以為自己冇睇過呢本書,
但一開始簡介那些家人的時候,
連城, 宋雲,
大有, 相逢, 三多,
四海, 五美, 六合,
七喜, 八寶, 九傑,
拾香.
我記起了那個大家族.
(我想我應該有點老人痴呆!!)
(開場前我實在係零記憶!!!!)

生死只係一紗之隔,
同時代表兩個時段的回憶.
全場以黑.白.灰.代表拾香的回憶.
好簡潔.
不過太簡潔的舞台未能表達太多香港的回憶.
黑色嘅拾香好靚.
可惜連城同宋雲個老妝勁差.

最可惡係表演場地係西灣河文娛中心的劇院,
張橷比較差,
坐得好唔舒服.
全場三小時又不設中場休息,
攰死咗...
我地又坐第二行,
(第一行冇人架, 視野一流!!)
唔好意思拉筋阻住人.
雖然第二行的好處係見到演員的表情,
但唔好係要成個頭轉動先至可以睇晒成個台囉....

節目詳情:
原著小說榮獲香港中文文學雙年獎,透過主角連拾香的第一人敘述,道出連家上下十多人的遭遇和變遷;故事從五十年代到九十年代,當中加插了很多近代社會中的大事,但又與劇情及人物絲絲入扣,令人回味。
本劇曾於於二○○○年公演,好評如潮,獲劇評人及網上投票選為全年十佳演出之一。
今次演出為二○○七年全新改編版本。
小說原著:陳慧
改編 / 導演:馬志豪

Thursday, November 15, 2007

助養 / 助學

某天跟友人說起慈善活動.
跟很多人的答案一樣.
平時有買旗,
很想幫助別人,
但總是懶懶的,
或者唔知道點搵那些慈善機構.

以下提供各大機構助養或助學的連結,
請傳送給你的朋友,
有能力的你,
請幫助有需要的小朋友~

助養
保良局兒童院
http://www.poleungkuk.org.hk/plk/index.aspx?id=20060809160343&lang=t#5

「樂樂」「遙遙」助養計劃
http://www.skhsch.org.hk/c-lokyiu07.htm

中國助養兒童計劃-無國界義工
http://www.volunteer.org.hk/fpmc.htm

香港世界宣明會
http://www.worldvision.org.hk/child_frame.html

助學
苗圃行動
http://www.sowers.org.hk/program/channel.php?channelID=41&channelName=%AE%BD%B4%DA&&lang=hk

救世軍 - 中國兒童助學發展計劃
http://www.salvation.org.hk/Help/Child/Child(tc).htm

育苗計劃
http://life.mingpao.com/htm/yukmiu/content.cfm?Path=intro.htm

捐血

有時係中環無聊又有時間,
我會去捐血.

某同事會話我傻傻地,
又瘦又貧血仲去捐血.
咁其實體重同捐血又冇關係嘅.
輕啲咪捐少啲囉.

其實如果你唔係嚴重貧血,
唔怕血,
又唔怕痛(可以要求打麻醉針架),
兼唔怕打針.
你應該去幫助有需要的人.

捐血只係用你45分鐘的時間.
咁簡單~
幫到人就幫啦~

你想知多啲關於捐血的好與壞,
請到紅十字會網址:
http://www5.ha.org.hk/rcbts/c_donation.html

捐血站地址:-
銅鑼灣軒尼詩道 505 號電業城三樓
(銅鑼灣地鐵站B出口)
電話: 2834 2084
開放時間 :
星期一至星期六 中午十二時至晚上七時三十分
星期日及公眾假期 下午一時至八時

中環德輔道中40-42號通明大廈1樓
(中環地鐵站 C 出口)
電話: 2526 1420
開放時間:
星期一至星期六 上午十一時至下午七時
星期日及公眾假期 休息

油麻地京士柏道15號,近衛理道。
電話: 2710 1202
開放時間:
星期一、二、四、五 上午九時卅分至下午四時
星期三 上午九時卅分至下午一時
星期六 上午九時至下午五時
星期日及公眾假期 休息

沙田正街1號A,香港紅十字會白普理沙田中心一樓A
電話: 2603 0100
開放時間:
星期一至星期六 中午十二時至下午七時
星期日及公眾假期 下午一時至八時

荃灣大河道8號
(近荃灣地鐵站A出口。)
電話: 2414 2378
開放時間:
星期一至星期六 上午十一時至下午七時
星期日及公眾假期 下午一時至八時

暗瘡

黑人憎呀!!
轉季生暗瘡呀!!!

嬲死~~

經驗

作為 agent,
係唔同的職位上做的事情都一樣.
一樣的文件,
一樣的地方,
一樣的步驟.
分別在於經驗.

經驗影響 EQ, 心理的調節.
影響你做事的手法.

當你曾經到過高級組的世界,
你唔會再想係低級組徘徊.
(迫不得而除外.)
就好似叫一個大學生做番小學生的數學一樣:
覺得好淺,
覺得冇癮.

有邊個人鐘意原地踏步??

有時我都覺得高不成, 低不就.
但係差一點就係一點,
經驗都需要時間累積,
急唔黎.

Wednesday, November 14, 2007

Quality Time

你問我係咪需要成日黏住個男朋友?
查實我又唔係咁想囉,
我都想要多啲私人空間.

如果你係太忙,
我寧願自己搵街去.
我唔需要日見夜見,
我只係想見到你的時候,
你整個人都係屬於我.

只有你同我,
冇工作,
冇來電,
冇上網,
冇其他.

咁我謂之 quality time.
所有的話題,
目光, 空氣之中,
只得你同我.

情緒化

我唔知自己屬唔屬於情緒化??
不過當我唔開心的時候,
我通常都只係會搵一兩個可以幫我解決到問題的朋友傾訴.
盡量我都唔想麻煩人,
亦唔想傳染啲負面的思想俾人.

係朋友面前,
我又唔會黑面.
(其實我應該算少黑面啦??!)
盡可能成日都笑口噬噬~
咁人地同你出街都係想開開心心啫.
冇理由要睇你面色架.

但係我係一時一樣囉~
呵呵~~~
咁應該唔算情緒化嘍~~~
呵呵~~~

搭地鐵

一般坐車我都會暈車浪,
搭地鐵就比較穩定,
同埋通常我都有位坐,
我會睇吓報紙雜誌.

一朝早返工會攞份都市日報.
到放工我有時會打機,
有時會睇書.

係地鐵我好少睇八卦雜誌,因為好似好八婆,
睇無聊愛情小說好似好多幻想,
睇新出的書籍感覺會 update 啲.
哲學類會有啲氣質,
驚慄科幻類感覺特別啲.
中文書唔可以太薄,
最好係繁體字.
成寸厚的英文書好似好扮嘢,
薄薄的英文書就有文化好多啦.

每一次攞本書出街的時候都要唸得好清楚~

我們都害怕失去

除了寂寞,
失去是最最可怕的.

一旦擁有, 成為習慣,
就好似上了癮.
很艱難才能戒掉....

曾經一度屬於你的人與物,
在你手心慢慢流走,
你無能為力,
直到完全的消失.
這是最最最可怕的.

有人說:
沒有擁有過,
便不會失去.

我寧願選擇擁有過,
然後永遠記得曾經擁有的快樂.

Tuesday, November 13, 2007

珠寶首飾

尋日係中環等客,
企係間首飾舖前面,
無無聊聊對住個櫥窗嘅貴價首飾,
冇乜興趣.

我對珠寶首飾興趣不大,
暫時未有閒情逸緻去欣賞,
或者我從來都唔識欣賞,
我都唔覺得靚!

珠寶首飾通常大就叫做靚,
咁大我又覺得論盡~
(我膚淺呀!)
(應該有其他切割呀, 質地呀, 顏色的分別)
(不過我唔識囉!!)

紅寶石, 綠寶石, 玉, 黃金...
我又覺得'娘'~

最緊要係我都唔襯!
過多幾廿年先講啦~

不過講開又講,
我又戴唔到朱義醒,
我敏感....

極其量可以戴吓純銀或者白金,
鑽石都 ok.
(但係鑽石太碎就留番黎做切割啦~)

大興海鮮飯店

我阿嫲好古怪,
成日覺得大排檔的食物好抵食,
其實大排檔先至貴.
冇環境冇裝修仲嘈到死,
都唔知點收咁嘅價錢!

大興我由細食到大,
由坐街邊到依家走入熟食市場.
食物質素維持到,
海鮮仍然非常新鮮,
價錢就愈來愈貴!

阿嫲生日,
叫咗蒸魚,
椒鹽瀨尿蝦,
蒸奄仔,
豉油王焗鮮魷,
粟米斑塊,
生炒骨,
白粥加豉油王炒麵!! (必食!!)

大興海鮮飯店
地址 : 西灣河西灣河市政大樓地下熟食中心C1
電話 : 2567-9356
菜式 : 廣東菜

What Kind of Lover Are You?

You are "The Student"!
'What do you like?' 'Want me to go slower?' 'What position is your favorite?' Sound familiar? That's because when you have sex, you're there to learn. You do your best to do your best, and recognize that every partner is unique, and your style must conform to what they like. Which is beyond appreciated. As a bonus, you'll eventually become a master of all styles, which will be awesome so you can stop asking so many questions.

係 facebook 做咗個心理測驗, 我覺得幾準.
我真係每事問架!!!
所以其實我都幾煩~
哈哈~~~

Sunday, November 11, 2007

畢業典禮

畢業典禮中,
有很多奇人奇事.

排隊亂七八糟的!
你估你仲係小學生呀?
基本的整齊列隊唔洗教啩?

唔識鞠躬!
鞠躬係多謝老師的教導,
家人朋友對你的支持.

由左邊上台,
係中間握手,
梗係係右邊落台.
邊會無端端係中間落咗樓梯走咗去呢??

個畢業生代表英文差到死!
幾百個畢業生,
都唔明點解搵個 oral english 難聽,
再加上唔識做 presentation 嘅出黎致詞.

最激氣係見到啲服飾,
件袍皺到死!
個 hood 好似海潮跌膊!
牛仔褲!
converse!
nike 波鞋!
legging!!

上台攞張(假)証書,
係你以時間金錢(或者係你家人的金錢)辛苦得來的榮譽,
當然,
大學生一地都係.
要少,
尊重場合,
尊重別人,
尊重自己.

你要上台,
留意一下禮儀同 dress code 吖唔該.

希望 /失望

我從來都說:
沒有希望, 便沒有失望.

凡事以平常心去面對,
由冇到有,
你能到的時候會有雙倍的開心.

假設你對事情有着很大的期望,
當你失去,
由有到冇加上期待的心情,
你得到的是雙倍的唔開心.

希望同失望是相對的.

幸運兒

<幸運兒>是幾米的作品之中, 我最喜愛的.

有一個幸運兒,
什麼都有,
什麼都好,
人人羨慕.

有一天,
幸運兒的背脊更長了一對翅膀,
大家都覺得,
幸運兒真的太幸運了.
可是,
幸運兒不快樂.

他害怕飛,
但制止不了自己的翅膀.
寂寞,
因為家人朋友都不了解他的需要.
最後,
幸運兒終於消失人間.
離開前,
遺留下滿地血跡.

我覺得幸運兒好可憐,
看似擁有全世界,
實則一無所有.

內心的空虛並唔係物質所能補償.

有時,
我都會覺得我物質上一點不缺.
自小以來,
我也可掌控物質上的需要.
家人好得無話可說,
朋友可以赴湯蹈火,
我可滿足呢~

唔知係咪我太貪心呢??
定係因為太好而產生不安全感??
或者我覺得冇嘢係必然嘅.

愛錫我的人有好多.
我又時感不足~
成日都覺得總係差一點.
係臂蔭下太耐,我又怕飛.

我總覺得縱然我有努力,
但總忍不住將成功與幸運掛鉤.
是我不夠自信?
還是我都覺得別人幫了我一把?
定係我唔夠努力呢?

除咗學術上,
我會認為我的努力係凌駕於別人的幫助之外,
今日我大部份所得到的,
都好虛無.
點樣先至可以讓感覺再充實一點呢?

懶洋洋

這陣子出街出得很兇.
今日星期天,
懶洋洋的浪費了一個下午,
很爽~

Saturday, November 10, 2007

恐懼鬥室4 回頭是岸 SAW IV

我冇睇過齣戲頭嗰三集.
基本上入戲院之前我係唔知齣戲講乜嘅?!
(呢啲事情極少發生係我身上, 因為我都幾鐘意睇影評.)
我淨係知係驚慄片.
(點估乜嘢叫做「拼圖殺人狂」???)

我唔怕鬼,唔怕驚嚇,
最怕血腥核突.
唉....
呢套係三級血腥架.
唉....

不過情節都幾豐富,
血腥得黎都接受到唔洗嘔~
入戲院睇都幾好~

官方簡介:
今集由《恐懼鬥室》系列原班人馬繼續重手泡製血腥驚嚇,緊接著上一回的劇情,「拼圖殺人狂」及繼承人阿曼達宣佈死掉同時,警探皮利斯聯同史達咸(史葛彼得遜飾),一拼協助老差骨警官荷夫曼(哥斯達斯文迪拿飾)詳查「拼圖殺人狂」殺人遊戲背後的玄機。同一時間裡,唯一接觸過「拼圖殺人狂」的特種部隊人員列克(勞力賓特飾)突遭綁架,急需逃離連串死亡陷阱和佈局,否則只有死路一條!荷夫曼等人沿列克的線索追查下去,赫然發現一切皆牽連到「拼圖殺人狂」前妻翠爾(貝絲羅素飾),因而揭發「拼圖殺人狂」鮮為人知的震撼過去,惡魔源頭終極現身!

鐵三角

很想為每齣看過的戲寫一篇影評.
每一次總係懶懶的....
然後又不了了之....

'鐵三角'有我覺得靚仔但唔多識做戲的古天樂,
愈年紀長就愈型的任達華,
仲有身材極佳的林熙蕾.

賣點係三個導演, 三種風格,
真的, 三種風格!!
啲演員性格唔同晒囉!!!
你唔會估到個結尾,
成件事唔太連貫,
好多可以被爭議的地方.

林熙蕾唔喪唔癲,
古天樂突然間要雷唔要錢,
任達華由小男人變咗話事人.

總之成件事九唔搭八啦....

官方簡介:
一間酒吧,三個落魄人,無數怨氣話。寶山(任達華 飾)、彭輝(古天樂 飾)和莫中原(孫紅雷 飾)三位飽受社會、家庭及經濟壓力的好友,在酒酣耳熱中商議大計,要改變可惡的現狀,只有錢!神秘老人出現留下線索。為三人帶來一次尋寶奇遇!莫破解老人留下的密碼,寶藏就在立法局的地底。三人出發,找出寶藏。滿以為發財在望之際,便衣探員正文(林家棟 飾)追捕而至。一連串怪事接踵而來!神秘老人的死在新聞報導中發放,輝受大圈佬威脅參與銀行打劫行動。 莫與輝雖懷疑寶藏背後埋著不可告人秘密,但為了錢,三人決定冒生命危險,儘快出貨!因為三人得來的之物是一具身披純金外衣的史前古屍 -- 無價國寶!

好眼瞓

好眼瞓.
好眼瞓.
好眼瞓.

又到週未,
特別的眼瞓.

Friday, November 9, 2007

Beauty or Brain ??

依家唔係港姐廣告,
個天係公平嘅.
如果你美貌與智慧並重,
天會攞走你其他嘅東西作為交換.

假若美貌與智慧只能選一,
我寧願要智慧.
美貌並不持久.
智慧終生受用.

Thursday, November 8, 2007

天堂 / 地獄

我看見地獄,
打從心底的知道,
那是不可進入的世界.

經不起試煉,
到地獄探訪一回,
赫然發現,
地獄原是天堂.

我原以為身處天堂,
怎料一切皆是南柯一夢.

那一個是天堂?
那兒是地獄?

天堂地獄只在一念之間.

張小嫻

好一段日子沒有拜讀張小姐的作品.
一看,
不得了.
比起她初出道時的作品,
差遠了.
比起其他新興女作家,
也不吸引.

沒有思念的情懷,
沒有愛得入骨,
沒有恨得要死,
沒有心情高低趺盪.
只像平民版的岑凱倫.

完全沒有購買意慾.
借來的書,
一口氣看下去的衝動係零.
今日的張小嫻,
像明日黃花.

百利火鍋海鮮酒家

從 openrice 看這裡的食評,
一啲都唔吸引,
睇完個食評,
你一定唔會想黎食嘢.

說真的,
這裡的外表一啲都唔吸引,
店內裝修同格局好似返咗六十年代咁,
關二哥在堂正中,
鏡面牆壁,
鋼架啡皮櫈,
已發黃的貼防火板木枱,
所有的事情都未能引起你的食慾.

不過作為熟客,
其實這裡的食物真的非常新鮮,
雖然樓面哥哥成日都會介紹各式海鮮並不便宜,
但佢地所介紹的真係當時得令,
最靚的活海鮮.

當然,
這裡我火鍋是一流的,
牛腩鍋,
醉雞鍋,
蕃茄粟米豆腐鍋.

每次都叫的手切牛肉,
炸魚皮,
炸芋頭,
菜心,
因為要食泰式青檸酸汁而叫的竹節蝦,
成日未夠凍就攞出黎的象拔蚌.

近來愛上他們的小菜,
阿哥同契媽熱愛的砵酒焗魚托,
蒸方脷,
糯米飯~

當然仲有最後星哥攞俾我的綠豆沙~
好滿足!

百利火鍋海鮮酒家
地址 : 旺角基隆街3號地下及2樓
電話 : 23980566/23980227
菜式 : 港式 (火鍋)

小時候與兄長並不友愛,
為爭寵總是不斷的吵架,
(當然我係比較得寵啦!)

中學時段,
各有各的課外活動,
而作為成長的一部份,
我們總愛困在房間中傾電話或者不斷的跟友人外出,
除卻星期日的家庭日,
我們同一屋簷下,
卻不多碰面.

直到一起到澳洲留學的日子,
事情也沒有變得好一點.

爹常說: 兄弟姊妹是一輩子的.
但我們仍沒有多交流.

這幾年來,
都沒有住在一起,
反而更緊密了.
是因為成長了嗎?
或是從這個爾虞我詐的社會中發現親情的可貴?
大家好像更能傾吐心事.

昨天,
他百忙中老遠從內地趕回來參加我的畢業典禮.
(雖然佢唔知我讀邊科!)
說真的,
哥, 很感動的唷~

太安樓

小學位於西灣河,
太安樓是一個充滿回憶的地方.

雖然同阿哥係同一間學校只差兩屆,
不過一起上學的回憶不多,
只記得那些在校車內發生的鎖碎事.
太安樓是我倆的共同回憶.

小時的太安樓,
很恐怖.
長期燈光昏暗,
地面磚地長期油膩膩的,
走廊好像四通八達,
好像隨時有拐子佬出沒.

不過,
每次參加完課外活動,
娘總會帶我到太安樓午膳,
與其說午膳,
掃街似乎更合適.

這裡有各式街頭小吃:
我愛的煎釀三寶,
格仔餅,
雞蛋仔,
車仔麵,
即蒸腸粉,
糖水,
燒賣,
粉果,
牛雜....

不過,
在業主立案法團的大力整治後,
現今的太安樓整潔多了,
但也遜色了.

Wednesday, November 7, 2007

白裇衫

衣櫥裡,
有些衣飾是必需的.
我會選一件精緻的白裇衫.

唔係一般的的確涼返學用白裇衫.
唔要花巧,
唔要短袖,
唔要透視.

要一件踏實而精明,
薄料挺身不透光,
合身的白裇衫.

低調時可以配襯牛仔褲,
返工時不失莊重,
飲宴時亦顯得高貴.

白裇衫是很難找到合心水的.

Tuesday, November 6, 2007

錯誤

小時候讀書考試,
溫習時有錯誤的話,
母親會教導說:
沒打緊,
你要記下這個錯誤,
以免考試時再出錯.

到長大了,
我也會思考自己做人的錯誤,
我總為自己的失言或失態而苦惱不而.
同一個錯誤,
我也不想再犯.

除了愛情,
我總是一次又一次的一頭栽下去,
每次總是死去活來,
從來沒有學懂精明一點.

愛情從來是雙方的角力,
一隻手掌又拍唔嚮.
係平衡雙方關係的層面上,
我的理解同學習能力極低.

是日游醫師問我怎麼了.
很久沒有求醫,
病情好像差得要命.

游醫師要好想一想,
明天想要的是什麼?
今日得到的是什麼?
只要事實,
不要藉口,
好好的面對現實.

Monday, November 5, 2007

等待

你有冇試過有啲東西你好想要,
等咗好耐,
牽腸掛肚,
渴望擁有,
到最後尾,
你終於得到.

得到之後,
你會好好珍惜?
定係,
得到之後覺得不外如是?
或者,
想像嘅同得到嘅係兩回事?
可能,
你享受得到的過程而不在乎結果?

你的選擇會係點呢?

拾荒者

同事 w 說:
你坐在拾荒者的背後. (精警! 讚!)

我後面嗰阿叔真係好可怕!!
張枱上面勁多嘢,
要知道我地張枱係好細,
佢係枱面上有左青龍, 右白虎!
兩大疊 file 成呎高~

然後到枱底,
枱底的地方我覺淨係放對腳都略嫌空間比較小.
佢放咗佢用黎返工的背包,
係, 係返學嗰隻.
不過佢都唔知帶乜嘢返工架,
個袋仲肥大過我返學嗰個!
仲有,
唔知點解又有另一疊 file ??
我做咗四年都冇咁多 file !!
加上,
報紙啦,
唔用的分類架啦,
膠袋啦...
啦啦啦啦啦....

真係好似拾荒者...
遲啲唔知會唔會發出惡臭呢....

另:
本來我覺得男士西裝加背包好型,
不過如果你唔係木村拓哉兼又肥又矮,
唔該,
公事包比較適合你.

再者:
公司的座位比較狹窄,
正常時間我同佢背對背所剩的空間已經非常的小,
佢仲由於冇位放佢對腳而再佔據我後面更多的位置,
我完全要貼住張枱坐而謄出走廊的通道,
長期呼吸困難!!!

Sunday, November 4, 2007

畢架山

今日係健康運動第二回.
行畢架山到大潭水塘,
用咗大約兩個鐘.

今日天氣極佳~
陽光普照,
加個樹蔭,
好悠閒~

完成後,
去咗做久遠了的燒烤活動.

我鐘意燒烤架,
不過係懶嗰隻,
任食唔洗做嗰隻,
但我係淨係食啲零食類,
牛扒, 豬扒, 雞扒都唔食~

出咗一身汗,
沖咗個涼~
舒服晒!

Saturday, November 3, 2007

我喜愛花嗎?
沒有特別喜好.

喜愛收花嗎?
基本上有禮物收我都好高興.
最緊要唔好'娘'樣!
幾貴都假~

有特別鐘意的花嗎?
沒有研究.
我唸我唔夠浪漫, 呵呵~~

好憎有香味嗰啲, 特別係百合~
最驚嗰啲好似粵語殘片對住束花深呼吸嗰批!

Friday, November 2, 2007

'度叔'

公司聚餐,
冇原因,
冇事要慶祝.
地點係老闆新開的酒樓,
係黃埔.

wendy 傳了電郵給大家,
邀請出席.
沒人回覆.

前一天,
wendy 致電各人落實參與人數.
他們的反應係:
'洗唔洗夾錢架?'
'一人要夾幾多錢?'

其實食飯係同事間聯誼的活動,
錢銀真係咁重要咩?
一齊開開心心食餐飯,
洗得你幾多錢?
況且老闆係度,
真係會要你夾錢咩!
咁多年黎都未試過!

小學

這幾天,
因為不停跟小學同學談話的關係.
常用心的回想小學期間的人和事,

是我太老了要去想當年?
定係想留住那段無拘無束的日子?

其實我沒有很多的記憶,
我記得那些人,
沒有記得那些事.
只有一兩件大事件在我心中.

除了 winnie,
小學時期我最想再見的人係小一的靚女班主任李玲老師同佢嗰兩個女~

又一星期

這星期過得特別的快~

公事上我開始慢慢的努力地做多少少,
(wendy 剛讚賞我有進步! 叻女~)
(不過只係因為以前做我太少...)
(依家做少少少都好似多咗好多咁~ 哈!)

放工後我又忙於跟朋友見面,
這個星期我沒有一天在家吃飯!

下個禮拜我決定休息,
返屋企食吓飯先!
(不過好似已經有幾日約咗人啦.....)

一日一詞 - 金叵籮

「金菠蘿」,
即是備受溺愛的孩子,
和「掌上明珠」同義,
不過前者多用於形容男孩,
後者則指女孩,
亦有人將之解作為「溫室花朵」,
帶有點負面的意思.

其實,
「金菠蘿」根本是錯字,
正確寫法應是「金叵籮」.
「叵」字唸作por,
乃是 p 音而非「菠」的 b 音.
叵籮在古代指名貴的酒杯,
不少詩詞中也有出現,
如唐代詩人李白有《對酒》詩雲:「葡萄酒, 金叵羅.」
就是說用金杯盛載葡萄酒來喝.
《北史·祖珽傳》記載神武皇帝宴請群臣,
席上失去金叵羅,
於是下令飲酒的人脫帽索查,
結果在祖珽的髻上找回失物.
從這個故事中,
可知「金叵羅」是一件非常珍貴的飲酒器具,
不然不會引人貪念,
把它竊取.

reference:
http://www.cantonese.org.cn/anl/oncc/data/fun-cantonese/16/index.htm
http://hk.knowledge.yahoo.com/question/?qid=7006072302500http://hk.knowledge.yahoo.com/question/?qid=7006111201324

感謝 Facebook

這幾天,
我在 Facebook 找到失散多年的小學好友.

那一年的九月一號,
她跟她那當教師的母親一同人間蒸發了.
我傷心了好一陣子啊~

那個年代,
大家都用中文全名稱呼對方.
現在大家都用英文名字,
用中文全名好像老了一輩....
但我們真的需要以中文名字相認!!!

很開心,
當年的謎團解開了~
原本遠在天邊, 近在眼前~!
我們是一輩子的好友呵~~~
Blog Widget by LinkWithin