Saturday, September 29, 2007

德國篇 - 床

呢幾年, 阿哥工作太忙.
一般都係我跟爸媽三人行.

雖然三個人應該有一間半房,
但係我地通常都迫迫地拍埋兩張床一齊瞓.

媽係中間,
佢會話我嗰邊張床高, 老豆嗰邊張床矮~
佢係中間打斜半高半矮, 好奇怪~

咁就梗係屋企張床舒服十倍啦!

改變

小弟說我害怕改變.
真的, 我非常的怕.

我怕身邊的人突然唔見咗,
我怕離開我熟悉的環境.

現在的生活多好.
家庭, 朋友, 工作, 學業, 金錢.
樣樣都舒舒服服的.

不久,
便要再次面對改變,
從頭學起,
我真的有點怕.

Thursday, September 27, 2007

天廚菜館

中秋節翌日, 放假日.
終於, 我地去咗講咗十萬次的東涌食海鮮!

行程豐富:
先去飲茶,
(註: 由於遠足的關係~ 除咗游同學, 我地全部都遲到~)
再行東薈城 outlet,
(註: 唔知點解所有人都被勸喻唔好買, 結果大家都冇買嘢~)
然後去 terminal 2 食壽司,
好 hea....
最後就係重頭節目: 食海鮮!!

六個人,
食咗蒜蓉粉絲蒸扇貝,
豉椒炒花甲皇,
薑蔥炒蟹,
海皇羹,
海鮮什菜煲,
椒鹽鮮魷.
仲送綠豆沙添~

埋單都只係$454~
又有專車來回地鐵站.
抵到痺~!!

開開心心又一天~!

天廚菜館
地址 : 大嶼山東涌馬灣新村22-23號地下
電話 : 2988 8469
菜式 : 廣東菜 (中菜館, 酒樓, 海鮮)

Tuesday, September 25, 2007

人月兩團圓

各位,
今日係我的大日子.

人月兩團圓.
恭喜恭喜~!

中秋節快樂!!

德國篇 - 食物

德國人的食物真係好悶!
日日都食同一樣嘢, 冇啲新意~

各式腸仔,
咸豬手,
燒雞,
燒鴨,
多種煮法的薯仔,
酸蘿蔔絲.

日日都係肉,
我食滯咗啦...

以上的食物,
我呢個月都唔想再食啦~!!!!

I Now Pronounce You Chuck & Larry

I Now Pronounce You Chuck & Larry
港譯: 迫上斷背山

我自己選擇的話, 我好少去戲院睇西片喜劇.
睇完戲返到屋企係iris個blog度見到佢都係, 又係講同一齣戲~
仲有我都想講:
(照抄原文)
簡單的故事、計算過的笑位,兩個小時輕易把我滿足。
離場一起乘地鐵又各自回家,原來這樣約來看齣戲,聊幾句,也很簡單美好。

我實在太懶啦....
佢講晒我想講架啦~:
http://iristsoi.blogspot.com/2007/09/blog-post_4441.html

官方簡介:
故事講述消防員卓克 (阿當桑迪拿 飾)和同事拉利 (奇雲占士 飾)老友鬼鬼,拉利更是卓克的救命恩人,兩個死黨都願意為對方赴湯蹈火,義不容辭。但兩人的家庭觀念截然不同,拉利事事以家庭為先,卓克卻享受單身生活,女友成籮。愛妻死去,拉利傷心過度忘記更改保險受益人,致兩個孩子未能成為保險受益人,令拉利極為苦惱。當他以為只要神不知鬼不覺的在政府公民表格上,填上卓克的名字為家庭伴侶,問題便可迎刃而解, 誰不知這秘密竟成了報章頭條!事件被揭發後,兩名壯男被迫生活在同一屋簷下,,公開扮同志,鬧出連番笑話。然而,經過一輪“新婚”同居生活,卓克和拉利終於明白,“花多些時間相處,了解對方需要”是一個融洽家庭的重要元素。

Monday, September 24, 2007

德國篇 - Lufthansa

我唔鐘意漢莎航空!
我唔會再搭Lufthansa!

點會仲有長途機冇獨立電視!!!!
個座位又十個迫!!
機鎗全滿~
食物又難食!
十二個鐘頭沙甸魚咁!
十萬個辛苦~

空姐仲有派發久違了的機餐menu~

有一餐食雞或牛,
去到我半路已經冇晒雞~
大佬呀! 呢個世界好多人唔食牛架~
我同個空姐講: 我唔食牛.
佢問番我點解唔食牛!
你理得我點解!!
總之我唔食!
問佢有冇杯麵, 又冇!
佢話冇辦法, 俾多個沙律我好唔好!
你話呢?
梗係唔好啦!
十個沙律都唔夠飽啦~
最後佢係商務搵咗個三文魚俾我,
非常精美,
個個 uncle 都好羨慕~
點知....
個三文魚十級鹹........
結果..
我都係餓住瞓...

記得以前去澳洲讀書的時候,
我每一次飛,
我都會攞個機餐menu,
comment 我食咗的每一樣食物,
然後寄俾麥同學.
我從前就已經好無聊...

粘住晒

Auntie F 話: 你個女咁好嘅, 咁大個仲跟你地去旅行.
爹笑笑口話: 邊好呀, 成鬼日粘住晒!

講真, 中國人都係鐘意兒女成日都係身邊架啦.
老豆把口話我粘住晒, 查實鬼咁開心~
我不知幾孝順~!

上班偷懶問卷

在報紙見到呢個無聊問卷:-

準時上班嗎?
official 返 9 點, unofficial 返 9.30,
我係9.20 到 9.30 之間返到, 應該唔算遲到.
 
會否買早餐回公司吃?
大部份日子都食包, 有時落街食.
 
回到公司做的第一件事?
開電腦,斟水
 
回到公司後什麼時候才正式處理公事?
冇幾可處理公事.
 
座位附近有同事嗎?會一邊工作一邊和他/他們聊天嗎?
有同事, 佢地好嘈. 我多數 intercom 傾計.
 
和同事聊天的除了公事外,最多是傾談關於……?
樣樣都講, 大部份時間講是非~
 
吃午飯時會否用盡午飯的所有時間?有多餘的午飯時間你會怎處理?
通常會用凸, 我一般都食兩個鐘.
 
公事/私事,在公司裡的百分比大約是多少?
30%公事,70%私事
 
所謂私事……是指讀書?睡覺?打機?聊天?還是其他?
有讀書, 有打機, 和同事聊天, 有上網睇報紙雜誌……
 
老闆/上司臨時請假,你會繼續如常上班,還是乘機偷懶做私事?
繼續偷懶~
 
下班前多久你會執拾妥當準備好下班?
即走!
 
能否在公司上網?能否接上IM(例如MSN, ICQ, Y!M, AIM, QQ, GTalk……等等)?(如回答不能的,請跳過以下的題目,回答最後的問題)
有上網, msn 係每日必做的事.
 
上網的話你會做什麼?
所有你想像得到的事都有做,基本上Office電腦=家用電腦
 
如果公司禁止上網/IM,你會否有辭工的念頭?
冇, 不過我呢行一定可以上網~
 
最瘋狂曾經在上班時做過的私事是什麼呢?
四個同事一齊去雀會打牌!

參考資料:
http://www.daihung.com/blog/2007/09/05/3316

我回來了

我有好多好多嘢想講,
關於旅行,關於工作,關於家人....
聽日應該成日都好忙寫blog~

Thursday, September 13, 2007

珍惜眼前人

我們都不太會珍惜,
無論人, 事, 時間.

當皇后碼頭未話清拆之前,
你有坐下留心的欣賞嗎?

跟友人茶聚的時候,
你係咪不停的講電話?

你覺唔覺得成日都無所事事?
慢慢的虛渡光陰呢?

人的劣根性係,
當件事情係你面前,
你唔會珍惜.
當你失去的時候,
你先會覺得佢重要.

如果機會有幸再次來臨,
我一定會好努力!

------------------------------------------------


愛情萬歲 鄭秀文
填詞:林若寧 
作曲:劉祖德 
編曲/監製:蔡德才@人山人海

愛情存在輿論性
承受這批鬥與你笑著革命
市內全民皆兵 聽著流言之聲
我若能擁抱你已是險勝

受盡炮轟任由戀愛沒有世界共鳴
維持著愛護與尊敬
未怕沒有親友贈興

寧願犧牲也與你以愛捐軀
從歷史中見證這轟烈一對
愛到倒下去 浮沉是非中一對伴侶
謠言裏 人潮裏 尋求我幸福至少無罪

那怕走得再崎嶇
言論之中去見證愛情萬歲
未似對正常情侶
你我縱是殘餘弱旅 頑抗愛下去

愛情長路如絕嶺
無論傷口再中箭也未怨命
世上如何孤清 對望仍然溫馨
都不可封殺 戀之風景

彼此不必世界的嘉許
只想講生命至少也許
每人亦有最珍惜伴侶
旁觀的怎麼拼命插嘴 潑下冷水

寧願犧牲也與你以愛捐軀
流下這可歌可泣動人眼淚
滲進沙漠裏 懸崖上開花一對伴侶
曾難過 曾憔悴 尋求我幸福更加無懼

愛侶不需要心虛
承受子彈去愛你也是壯舉
若有了我們兒女
與你故事遺傳下去 能愛到萬歲

Wednesday, September 12, 2007

來電

朋友,
我呢種人無事不登三寶殿.
(除咗對啲無聊的人我會打啲無聊的電話之外.)
當然我會多謝你聽咗我的電話啦.

我唸我係你心目中應該非常的識做人.
我唔想麻煩人,
冇必要唔會搵人.
亦唔係唔適當的時候出現.

不過,
如果我係一啲奇怪的時候搵你,
我一定有事.

然後,
我知你一定會話:
你好叻架,
你自己可以攪得掂,
你好快冇事.

冇得依賴,
當然,
我好快冇事.

我已經冇事.

屬於自己的晚上

我很害怕孤獨,
我一個人的時間唔多,
一個人好寂寞.

今晚,
我想一個人.
想思考一下.

日間見人太多,
好混亂, 好趕.

我今晚想靜靜的,
一個人.

本來我想搵個好似屬於我的人傾吓計,
不過佢唔得閒.

我好迷糊,
我唔知自己想點,
唔知可以點,
唔知應該點.

生活中有啲唔如意,
當時我知道冇可能樣樣如你所願,
世界冇完美,
個天都好公平.

我唸我又自尋煩惱.

我想一個人 張栢芝
曲:謝杰 詞:陳少琪 編:劉志遠 監製:陳德健

我已領悟了 痛會洗去記憶 像落日沉掉
我已發現了 你已把愛殺死 體質漸弱小 失去心跳
如流血了 永久不止 這個凶兆

我感覺沒了 似某些腦細胞在慢慢融掉
沒痛苦 也沒笑 我每天也懷念可怨恨你 因戀愛困擾
總好過心情沒法動搖

*以後我只想一個人 如傷口深到任誰望我都不敢看人
神經都死了 任何甜蜜都不可攻陷
全靠你我遇著誰 談什麼 都已減七十分
忘掉了怎憎一個人 還灰得可怕 誰來扶助一把也不信任
如何想像到日後過什麼快樂生辰 你我熱吻(我會熱吻)

我戀上自困 世界不再戰爭 但尚在淪陷
願看天繼續陰 我眼中任誰或可替代你 都不再敏感
總好過天晴後再密雲

我昨日情難自制 只有利沒有弊
想快樂到底 終於跌落到底
從寂寞自閉 轉化活在下世
當告別某位 我心裡沒有位 拿不起放不低

曾磨練嘴巴閉著才忘懷被吻

畢業典禮

我昨天發現原來我有兩個畢業典禮,
一個係成間 polyu 的畢業生 - 1 dec,
一個係 faculty - 7 nov.

我 17 oct 可以攞袍,
請問大家幾時得閒一齊影相?

....
ummm....
我今次想要畢業公仔....
ummm....
多謝大家...
ummm....

Tuesday, September 11, 2007

曼谷篇 - 無帶個腦出街

那一年跟 S 去曼谷.

翟度翟的開始時間係九點.
我地預計七點鐘起身,
沖涼洗頭食早餐,
八點三出門口.

電話鬧鐘嚮起,
我先梳洗.
當我攪掂唸住叫佢起身的時候,
我發現...
時間係六點半!!!~
佢個電話冇較時差!!!

結果我地早咗一個鐘去翟度翟...
啲鋪頭都未開..
去旅行個腦留咗係屋企.

二奶

我覺得一個孤寒的人唔會包二奶.

作為一個二奶,
冇地位, (你唔係大婆.)
冇時間, (大時大節梗係俾咗阿大.)

甘心做二奶,
一係好愛, (可以有幾愛?)
一係為錢. (錢可以買起一個唔愛你的女人.)

孤寒的你點包二奶?

另, 甘心做二奶好愛佢的妳,
我祝福妳,
有一日會等到成為他唯一的一個.

Monday, September 10, 2007

偏食

我出名偏食,
由細到大都非常偏食.

我唔食骨,(除左雞翼.)
唔食皮,
唔食肥,
牛肉唔食,
羊肉唔食, (我食冇羊燥味的羊鞍.)
鴕鳥肉唔食,
內臟唔食, (但我食鵝肝.)
樣衰都唔食.

我食大部份的蔬果,
不過苦瓜西芹麻麻地,
唔食西柚同碌柚.

加拿大的回憶

那段在多倫多的日子,
沒事幹.
第一次去像遊客,
一個人在地鐵站站停,
觀光, 影相, 悠遊自在.

在 Waterloo 的日子,
像居民.
每天也是看電視,
下載劇集, 電影,
你每天回來的第一件事總是看看是否下載完成.
我愛看真人show - fear factor.
你愛 smallville.

那天的 top gear,
真的沒有印象~

Friday, September 7, 2007

底線

在我最痛苦的時候,
曾經有個朋友話我:
你對自己太嚴謹,
對朋友太寬鬆.

每個人心目中都有一條底線.
而我對每個人的底線都唔同.
回應番尋日所講的遲到,
對於一般人, 我的底線係五分鐘,
客人係十分鐘,
係之前嗰廿年都遲到嗰啲, 底線係三十分鐘.
呢啲係親疏有別.
對自己都係五分鐘.

我會估計我係你心目中,
係一個五分鐘定三十分鐘的朋友,
從而去定我可以去麻煩人的程度.
例如:
可以霸佔人地幾多時間去傾訴.
可以幾多點鐘打俾人而唔會俾人鬧.
可以問你借幾多錢.
我好少求人, 但每次搵人幫手之前我都會先衡量一下.

朋友說:
當你當佢地係三十分鐘的朋友的時候,
佢地都會當你係三十分鐘的朋友.

我不知道這是不是真的.
我驚如果我遲到三十分鐘會不停受到咀咒....
特別係對住好兇狠嗰啲...

Thursday, September 6, 2007

遲到

我最憎人遲到,
等五分鐘已經係極限,
依家手提電話咁方便,
明知自己遲到的話就早啲打電話話俾人知.
呢啲叫禮貌.
客遲到我會對佢印象好差.

遲到唔需要解釋,
因為大部份的解釋都係藉口去掩飾你遲出發.
遲即係遲,
遲咗要認, 唔關交通, 阿媽, 漏嘢 ...
xxxx事!!

雖然你打咗電話報定案,
但係你都係遲到.
講到尾其實都係你冇時間觀念,
你早啲起身, 早啲出門口, 早啲出發,
你就唔會遲到!

你嘅時間係時間,
我等緊你的時間都係時間,
你想瞓晏啲, 想整靚啲個頭, 想開多個會...
你要知道同時你浪費緊我的時間,
點解你要浪費我的時間?
你遲到實在係虛渡緊我的光陰.

咁大個人,
次次都係咁,
吓吓人地話你就無癮啦.
檢討吓啦.

Wednesday, September 5, 2007

童裝

我昨天在 Zara 買了一件童裝裇衫,
有公主袖,
宮廷娃娃式樣,
布料質地柔軟,
不易皺,
顏色係奶白色,
很高貴,
童裝價格亦比較相宜.

雖然 Zara 的童裝衫出到中童13-14歲,
但名義上我還能穿著童裝,
很高興~

Facebook

我昨天也開始了Facebook,
聽說,
很多人也沈迷了.

我是新手,
未領略個中樂趣.
玩多兩日再講.

Monday, September 3, 2007

波板糖

小時候體弱多病,
汽水零食糖果離我甚遠.

手板般大的波板糖,
非常偶爾才可得一支.
我會分好多好多次食.
舔兩吓又擺番入雪櫃.

我記得有次媽跟我說:
只要你三次默書一百分,
我便給你買一塊.

到我得到三個滿分以後,
媽已忘記承諾.
我最後也沒有得到波板糖.

我存有一支橙色的波板糖,
是有心人在廿年後知道故事,
老遠從英國寄給我的.
多謝!

不遠矣

不遠矣.
我知道那一天不遠矣.
我要加把勁!

Sunday, September 2, 2007

我又想讀書啦.

我以為我唔想讀書架啦.
我以為我厭倦咗功課同考試.
我以為之前用咗兩年做的一份功課會係我最後一份功課.

但我太無聊啦.
讀書用多啲時間.
同埋讀咗書真係屬於自己.
好過日日係屋企打機.

雖然讀的時候成日覺得冇用,
但係讀書的知識係日常生活中不知不覺的原來真係好需要.

不過我仲未唸定讀閒科,
定讀關於工作的,
定係讀phD.

仲有少少時間考慮吓.

Saturday, September 1, 2007

Fox's 果汁糖

今日係屈臣氏見到久違了的霍士果汁糖.

有一段日子,
沈迷於霍士果汁糖.
日日都食,
買完一罐又一罐.

一粒粒彩色晶瑩剔透,好靚,
果汁味又香.
係公司悶悶地食粒糖真係精神爽利~
價錢又平,
不停請人食又唔肉痛~

不過係硬糖,
會'界'損條脷~
Blog Widget by LinkWithin