Tuesday, July 31, 2007

心願未了...

這些日子,
我覺得時間不夠.

我買了很多新衣服,
很多還未剪牌.
可否一日有四季?
可否一日換四次衫?

我買了很多新書,
很多只看了一半.
漫畫:
小克 - 殺出香港2,
愛情小說:
深雪 - 選新娘,
哲學:
Mitch Albom - For One More Day
驚慄:
克里夫.巴克 - 血之書 1, 2
部落日誌:
Belle de Jour - The Intimate / Further Adventures of a London Call Girl
(如果你想睇, 我借俾你先.)
我本本都好想睇架...

我買了手工藝原材料,
想冬天來臨前完成兩條新頸巾.

我買了一櫃子的零食,
很多都放了一段時間,
好想食又冇配額, 又要減肥.

我買了很多 vcd,
甜心粉絲王,
柯南卡通,
借來的花樣少男少女.
但同時我又在追看無線的 '同事三分親', '強劍'.

我下載了很多新遊戲,
很想試玩一下...

還有,
我有很多地方想去.
匈牙利 - 九月,
日本東北之旅 - 十二月,
美國奧蘭多 - 下年一月...

我覺得
整日最浪費的時間便是待在公司十下十下做阿呆.....
光陰就這樣的流走了......
我還有很多未完成的心願啊....

緣份

沒有拍拖的日子,
開頭的時間, 真的很不習慣.
一個人, 做甚麼也沒有心機.
慢慢的, 一個人也沒有甚麼大不了.
而且, 我感到自由.
我為自己而活.

我知道,
身邊的朋友為我擔心,
因為我是一個很需要愛情的人.
紛紛的為我安排聚會,
(多謝大家, 但可唔可以安排早一點? 我比較早瞓. 哈!)
時間許可的話, 我都盡可能參與.
縱然, 我仍然很想得到愛情.
就算拍唔成拖, 我都會開心識多個朋友.

緣份的事宜冇得心急,
佢要黎你擋唔到,
佢唔黎你吹佢唔脹,
佢要玩你, 你咪等多陣囉.

她的男朋友

人與人之間的緣份是很奇妙的.
我很愛他,
她是我最要好的朋友,
但是我的他不喜歡她.
同樣地, 她也不向他示好.
夾在中間的我, 有些為難.

有時,
我們會評價朋友的男朋友.
覺得,
她可以找到更好的.
他倆不匹配.
他高攀了.
為何他還要追求別的女孩?
為什麼她要被管束?
為何她不能做自己喜歡的事情, 穿自己喜愛的衣服?
為什麼時間都要預留給他?

我們都為摯友不值.

但,
請不要忘記.
愛情只是兩個人的,
你也不需要為面子, 為閒言而退縮.
假設你會因此而離開,
請你冷靜一下, 想清楚, 你有足夠的愛和決心嗎?

只要你開心, 快樂,
作為朋友的我一定會支持你.

Monday, July 30, 2007

無無聊聊

平靜的.
淡淡的.
舒服的.
悠閒的.
懶懶的.

這是今天的我.

Friday, July 27, 2007

勤力

ling 稱讚我很勤力!
我很久沒有得到這樣的讚賞啦~ 呵呵~

點解佢會咁講?
因為我每個工作天也有更新我的部落格~
(但事實上我一向比她勤力~ 因為至少. 我. 有. 做. gym.!)

部落格的內容唔會寫係日記,
這些都是無聊時候用作聊天的題材.

因為工作時間無聊 (空閒時間太多),
因為冇人同我講嘢 (但係又好想講嘢),

寫部落格晒時間啦.
寫部落格打中文更晒時間啦.
寫部落格分享心情啦.
寫部落格話俾你知我悶到發慌啦.
寫部落格話俾你知我未死啦.

幾好.
I'M ALIVE~ (today).

圖書館

我公司的寫字樓好像一間圖書館.

靜靜的,
冷清清的,
座位被分格開,
兩個兩個面對面而坐,
同事們各自各的對著面前的電腦.
互不相干,
沒有交流.

假若某人突然大聲說笑,
他/她一定會備受白眼,
如果是關於工作,
大家都會比較平靜,
但如果是關於私人事務.....
佢就會不停的被咀咒!!被咀咒!!被咀咒!!被咀咒!!

你! 已經被咀咒了!
又係你!!

月尾

其他打工仔係月尾的時候會因為糧尾而頭痛.
我地會因為冇數而想死.
但係同樣的事情會發生:
一樣的唔想做嘢!

由於數期係每個月一號開始,
無論係數的限額, 影相的限額, bonus 的限額.
而除左數係天意之外,
其他的通常係月中前一定會完成.
到左月尾, 就唔會想再做多啲.
雖然多左的可以留落下個月,
但係我老死懶蟲會不停咁講:
休息吓啦..
抖吓啦...
唔好做啦....

well....
我同懶蟲咁老友,
試問我又點忍心拒絕佢呢?

Thursday, July 26, 2007

透明人

每間公司都會有啲透明人.

你可能知道佢個名, 但係你又唔係好肯定係唔係真.
係 john? johnny?? 定 jonathan???
當人地提起佢個名, 你又未必唸到佢個樣.
有帶眼鏡? 長頭髮?? 孖潤腸嘴???
唸到個樣的時候, 你又會唔會知佢坐係邊?
左邊? 右邊?? 老闆隔離???
當然, 你亦從未同佢講過嘢.

我公司有另一款.
你大大個坐係度, 係齋坐,
係冇貢獻的齋坐.
冇電話嚮.
冇人同你講嘢.
冇人發現你的存在.
冇人知你坐係度幹麼.
冇人知你係咪做緊工作有關的事情.
可能有人msn, 可能有人買賣股票, 但冇人干預.
更甚的, 究竟你係咪係公司? 定係出左街?
食煙? 去厠所?
打機? 打波? 打牌?
冇人知.
冇人理.

我都係透明人的中堅份子.

買! 買! 買!

眾所周知, 我最愛購物.
衫, 褲, 裙, 鞋, 襪, 袋, 零食, 書, vcd, 家庭用品, 我樣樣都啱.

又或者我其實最鐘意洗錢的過程,
由找尋, 選擇, 考慮, 到科款.
感覺好充實
(可能我有病....)

我亦都鐘意幫人買嘢,
俾個範圍, 款式, budget, 時間,
然後我去買.
人地滿意我都會好開心.

點解好似同我的工作都有啲相似?

老人家

家有一老, 如有一寶?
可能係, 又可能唔係.

老人家的思想同我地好唔同,
或者呢啲就係代溝.

有啲老人家好精靈, 可以自己照顧自己,
有啲好識為兒女著想,
有啲唔鐘意麻煩其他人,
有啲有極強依賴性,
有啲患病, 迫不得已,
有啲固執, 死硬派.

我對老人家冇多少經驗,
因為上上一代的至親都過世了,
只剩阿嫲, 見面時間都比較少.

不過聽說她近期愛裝病以引起注意.
老人家的心理其實跟小孩相似.
最怕孤苦伶丁.
但同時家人又要外出工作. 好難兼顧.

小孩可以買部遊戲機打發佢,
咁老人家可以點?

Wednesday, July 25, 2007

強記美食

通常與家人外出晚飯後, 嗜甜的我都會要求買碗糖水返屋企食.
係銅鑼灣區或以西的話, 我要食強記~

不過強記最好食的是糯米飯同腸粉!
老豆阿媽同阿哥都至愛糯米飯, 我最鐘意煎腸粉~
仲有豬皮, 魚旦, 我至愛的蘿蔔! 街邊小食~! 正!

糯米飯係呢度最出名的, 乾身又唔太黏, 裡面仲有冬菇, 腊腸, 幾入味的.
煎腸粉煎得很香脆, 加芝麻, 甜醬, 辣醬同麻醬, 一絕!
腐竹糖水的腐竹已經煮到變左豆漿, 我老豆鐘意食.

強記美食
地址: 灣仔駱克道382號莊士企業大廈地下
電話: 2572-5207
菜式 : 港式

Zoe

第一次係因為阿蘇推介,
叫外賣返屋企同阿媽一齊食,
講真, 法式西餅,
圓咕碌細細件, 好精緻.
冇話好好食, 但又唔係差.
(外賣餅食 Italian Tomato 仲好! 好食夾大件!)

第二次老友兼舊同事 C 想係銅鑼灣 high tea 食件 cake!
我想起 Zoe,
環境唔錯,
係開平道靜靜地,
法式情懷,
食環境多過食 cake~
幾優雅~!

Zoe
地址: 銅鑼灣開平道10號
電話: 2234 7188
營業時間: 1230 - 2230
菜式 : 西式

Zoe $25/件
Blood O $28/件
Key lime pie $25/件
Framboise $30/件

Jenny Bakery

友人C 送我一罐曲奇, 神神秘秘的. 沒有告訴我出自何處.
只說: 朋友介紹, 非常好味.

今日打開一試,
果然不得了!!
勁鬆化!!! 入口即溶!!
好味到不得了!!!!
牛油味足, 啱哂我啲牛油怪~
(不過肥死啦....)

個熊仔罐仲幾得意添~!
罐底有地址.

Jenny Bakery
地址: 赤柱新街11號1/F
電話: 2813 8568
營業時間: 1000 - 1800 (逢星期三休息)

地址:銅鑼灣糖街1-5號銅鑼廣場1樓1047室
電話: 2577-3789
菜式 : 西式

混合曲奇
(4款味) $50/細罐 $75/
大罐 (8款味) $75/細罐 $120/
大罐鳳梨酥 $65/罐

霸王山莊

金鐘一帶要搵一間好食又平又舒服的午飯, 幾難.
所以我會去其他區域.
今日去左灣仔新嗰黎的霸王山莊.

'霸王山莊' 個名好有氣勢!
食京川滬菜式的.

午餐有麵餐: 一款麵加點心或甜品都係四十! 都幾便宜~

今日我地三個人叫左個二人餐加兩款小食.
個餐有:
酸辣湯 or 宋嫂魚羹: 我地選擇酸辣湯, 偏酸, 不過我鐘意!
好多上海點心選擇當中叫兩款:
我地要左小籠包: 皮薄多汁, 不過唔係太熱.
另外鍋貼: 二人餐得兩隻, 我冇食.
小菜都係叫兩款:
黑醋小排骨: 唔肥膩喎, 個汁好得,
排骨細細舊, 一粒粒肉的, 唔會話 'zip' 牙縫囉~
我唔多食肉都整左幾粒~
咸肉浸津白: 幾鮮甜.
仲有白飯~
我地再加棒棒雞絲粉皮: 一般.
(棒棒雞絲粉皮同雞絲粉皮的分別是一個辣, 一個唔辣.)
同埋醉轉彎: 冇酒味~ not good.

埋單$169, ok 啦.

霸王山莊
地址: 灣仔軒尼詩道303號1樓
電話: 2877 6610
菜式 : 京川滬

Tuesday, July 24, 2007

背心底衫

你會唔會唔鐘意男仔著背心底衫?
我好鬼憎!
(肥人另計, 因為太熱)

嗰啲喺白裇衫透番裡面件背心底衫!!
好肉酸...
嗰個低圓領口唔知想點!
件白裇衫又薄到變透視... 好核突呀.....

可以唔著, 又可以著短袖...
咁囉.....

最噁心情侶選舉

據說: 男同事與女同事搭上了.

如果事件屬實, 他們將會是最噁心的情侶.

男的:
w comment: 樣衰兼冇家教.
我呢, 一向都不屑與他交談,
因為我覺得佢好無料, 聲大夾無準, 又冇禮貌 (我個人覺得禮貌係非常重要的).

女的:
姣滕滕的....
四處放電 (連啲阿叔都唔放過, well... 做得佢老豆啦....)
講嘢有尾音嗰的.

一句到尾:
姣婆遇著脂粉客, 一拍即合.
同樣的沙塵, 囂張, 無聊.

想凍死人咩!

炎炎夏日,
應該只會中暑而死,
我呢, 應該好快凍死.... (帛金多啲吖! 多謝各位~)

我雙手已經變咗瘀紫色...
班友都痴線架!
都唔知係點構造架!! 一日到黑係咁話熱~
有中央冷氣已經夠凍架啦, 仲要開風扇!!!
想凍死人咩!

你焗嘅咪吹你自己唔好影響到人啦!
我而家又頭痛, 又流鼻水, 又凍.
冷得我滕滕震呀.....
真係好鬼死凍..... (我已經著左外套同頸巾架啦.....)

Monday, July 23, 2007

扮豬

我覺得我最蠢的事是唔肯扮豬.
我好勝, 扮豬唔型又冇面.
所以身邊的人成日都以為我好強, 其實只不過是假象~

如果我肯扮豬, 太陽應該係西面升起~!

Saturday, July 21, 2007

矮腳虎

我有樣嘢好唔明白?

當你坐係公司自己倨坐位的時候,
雙腳應該只係放係枱底,
你右疊左, 定左疊右, 定平放,
雙腳都只係放係枱底, 對嗎?

點解啲阿叔係一隻腳放枱底,
另一隻腳要伸直放出走廊呢?

隻腳咁短! 枱底夠位喎! 放出走廊阻住晒!!!

一盒紙巾

一盒紙巾其實好便宜, 但係唔知點解, 係唔鐘意益佢!

佢面皮真係好厚~
自己從來唔買紙巾,
用隔離嗰啲, 仲係一次要攞幾張嗰隻.

有一日佢隔離盒紙巾用晒,
佢轉過頭用我嗰盒,
令到我盒紙巾係短時間度用完!

所以我買盒新的之後決定收埋係枱底~
佢個唔知醜仲大大聲話: 咦! 啲紙巾冇晒!

well~ 另一位同事同佢講: 紙巾係自己俾錢買架.
佢仲要話: 0下? 我唔知喎?

唔通紙巾自己變出黎咩!!! 用0下腦啦!!!

Friday, July 20, 2007

一班蝗蟲

我一向都擺好多零食係公司,
因為我個口冇時停,
我成日都話口只係得兩個用途: 就係食嘢同講嘢.

不過我唔鐘意某啲同事,
所以我成日都會收埋啲貴嘢, 哈哈, 好賤!
(其實佢地仲賤, 成日老馮咁, 又唔貢獻!!!)
但係啲零食開左咁過左一段日子仲食唔晒,
我就會攞出黎祭祀~
總有啲垃圾嘴會幫我食晒, (唔止垃圾嘴, 直頭係一班蝗蟲...)
非常環保,
我老闆今日仲多謝我添~
(我多謝佢幫我食左啲我已經唔想食嘅嘢就真啦~)

Thursday, July 19, 2007

我地同阿 ling 有仇?!

每一次跟 ling 聚會的時候,
我們總會跟她講出一大堆的道理,
關於遲到, 關於打機, 關於洗錢, 關於男朋友, 關於將來,
或者取笑她過去的失言.

外人看來我們像在欺負她,
其實我地係用輕鬆的手法去引導佢成材~

呵呵~~~
有我地呢班益友,
您真係三生有幸~
呵呵~~~

Wednesday, July 18, 2007

我左眼因乜事跳跳跳 - part 2

跟 iris 早幾個月前的徵狀一樣,
我左眼眼肚又係不停的跳跳跳!!!
我又係跳到好攰, 又影響視力, 震下震下咁....

我成日唔記得係:
左吉右兇? 定左兇右吉?
總之邊隻跳就邊隻吉!

同事 w 話之前佢係咁跳就有生意,
幾時我又簽番張單呢?

我左眼因乜事跳跳跳 -part 1:-
http://iristsoi.blogspot.com/2007/04/blog-post_23.html

Tuesday, July 17, 2007

人生是一場長途比賽

小時候, 因為年尾出世的關係,
我永遠是同班同學之中年紀最細的一群.
所以總係覺得時間比別人多, 因為我起步早.

後來去左澳洲讀書,
兜兜轉轉的回到香港直到大學畢業,
反而進入社會大學比別人遲了兩年.

我係理工的時候不斷的做 part-time,
因為我唔想浪費時間.
身邊的人都開始平步青雲, 我仍然原地踏步.
我覺得我起步遲了, 我要追回那兩年的空白.

幸運的我遇到你,
因為你,
我有動力完成碩士課程,
可以專心工作, 升職, 搵錢,
你教我規劃人生, 學識理財.
雖然到最後沒有結果,
但係呢幾年我亦得到很多.

我要說聲 :謝謝你.
我找回失去的, 而且已經爬過頭啦.

Monday, July 16, 2007

減肥

其實肥瘦都有 equilibrium,
我成日覺得肥一磅就好肥, 瘦一磅又瘦得滯!
所以一日到黑就嚷着增肥同減肥.

咁我都算係愛靚唔愛命嗰隻~
維持體重又係終生事業.
經過一輪增肥的日子,
我今日開始要減肥啦~

每當變幻時

這是<每當變幻時>的官方故事簡介:-
27歲的阿妙跟欠債纍纍、拈花惹草的賣魚父親,被逼來到富貴墟打工抵債。見盡街市中人際關係交錯糾纏的她,決心不嫁給街市的男人。她訂下三年計劃,目標是在30歲前幫父親還清欠債,離開街市,找一個值得嫁的人,打破宿命。同樣是賣魚出身的魚佬是一個將一生都投資在富貴墟的街市惡霸,面對機靈的阿妙,二人展開生意上的連番惡鬥。隨著超市的出現,街市陷於困境。魚佬為了拯救富貴墟,被逼與勢成水火的阿妙合作。最後,雖然救市失敗,但過程中,魚佬與阿妙都對對方產生了特別的感覺,可是,一直嫌棄街市的阿妙始終跨不過愛上街市男人的心理關口。不久,妙父因心臟病離世,為免與魚佬在富貴墟朝夕相對,阿妙乘著政府宣佈清拆富貴墟之際,決定離開街市...

於我看來,
這更似一個三十歲港女嫁唔出的故事.
廿幾歲的時候, 仲有條件 (都只不過是青春罷了),
千挑萬選, 嫌棄其他人的出身 (但係佢地同你是同級出身的),
要知道你揀人,人揀你,
大家都想越級挑戰, 大家都不甘平凡.
最後你的選擇都離你而去, 你仍然刁然一身.

戲中提出 '搵一個值得嫁的男人',
係 '值得嫁',
唔係求其搵一個人嫁,
呢樣最難,
你要好清楚自己要什麼,
然後你要撞到, 再要得到, 然後拍拖, 結婚生仔, 你估話咁易咩!?

全片唯一慶幸的是就算沒有男人,
阿妙自我增值, 有一份唔錯的事業,
可以養活自己同埋得到少少的享受, 一個人依然可以活得精彩.

各姊妹共勉之.

Saturday, July 14, 2007

shopping 精的轉變

在日本讀書期間,
我最要好的同學仔是 Carol 同來自馬來西亞的 Ang.
每日的主要活動除左讀書, 就係購物, 扮靚 (佢地兩個), 影相, 講是非, 講男仔, 好開心架!~
因為我地都係 shopping 精.


Ang 久唔久會黎香港 shopping,
佢早兩年結左婚, 舊年仲生左個可愛的仔仔~
shopping 內容唔同左.
同小魚同 wendy 一樣, 有仔萬事足.
以前為自己買衫扮靚,
依家為個仔買衫扮靚.

我生左仔之後仲會唔會買衫俾自己呢?

非洲的小朋友向你揮手

(我都唔記得第一之事發的經過, 邊個記得請提提我, 我淨係記得第二次係 BBQ 囉.)

你整跌左食物的時候,
你的朋友會同你講 : '非洲的小朋友向你揮手'

'非洲的小朋友向你揮手'
代表你白白浪費食物.
(但係你 order 的食物冇清碟的時候, 佢係唔會理你架?!)

我想問:
點解係非洲? 唔係埃塞俄比亞? 或者哥斯達黎加?
點解要揮手? 點解唔係嬲你? 或者咀咒你?
咁我係咪要回應佢? 定係我又要同佢揮手呢?

Friday, July 13, 2007

三談怪叔叔

人到中年, 耳朵都會受到影響.
講嘢都大聲 d.

公司地方淺窄, 怪叔叔們都坐係我附近,
前後左右, 又係梗有一個係左近.

中年人, 講電話都好鬼大聲!!
一個已經好嘈, (係, 真係好嘈)
假使雙劍合壁, 直情天下無敵....

基本上佢地一齊做嘢就代表我可以收工啦,
因為我的客人係電話中只係會聽到男人聲!
佢地仲嘈過地鐵的 beep beep beep!!!

游同學失蹤了

我每天也會於 msn 跟游同學打個招呼, 閒聊一下.

兩天前, 發現游同學不在線上,
轉頭問一下在線的 iris,
iris 提議打個電話俾游同學,
我打了, 但沒人接聽.
於是 iris conclude: 可能開緊會.
於是事件不了了之.

昨日, 仍然不見游同學.
再問 iris,
iris 問: 會唔會死左.
我 conclude: 應該係死左, 哈哈哈哈....
繼續的不了了之.

今早, 游同學出現了!!
原來她病了... 睡了兩天....

我們是多麼冷漠的朋友啊~
呵呵呵呵~

後記:
我曾經跟 Ling 說過,
依家一個人住,
又唔係日日返屋企食飯,
有一日死左真係冇人知~

如果我某天不見了,
我會係幾多日子後先至會俾人發現我失蹤呢?

Thursday, July 12, 2007

再談怪叔叔

我公司的同事基本上九成以上係飲過咸水返黎.
加拿大, 美國, 英國, 澳洲,
梗有一個係左近.
我地的客人都有一半是外國人.
怪叔叔們全部都曾經出國.
但有時聽到佢地同客講電話實在不敢想像.....

怪叔叔一號:-
'I will try my bad' --> 'I will try my best'
'egg kill me' --> 'excuse me'
'one 蚊only' --> 'one month only'
佢 grammar 好好架,
但係 d 發音非常有問題.

怪叔叔二號:-
連 hyphen 都唔識!!
我地公司 email 係 '名-姓',
佢可以同個客講 '名 underscore in the middle 姓'

我坐係佢地附近, 好痛苦.....
雖然我應該原諒佢地... 語言天分係天生的....

Wednesday, July 11, 2007

股票

我在學習買股票.
股票同基金投資計劃是他對我最大的貢獻!
與其說是買賣, 我更相信我是在賭博.
因為我實在對那些圖表沒有興趣.
而且我係數字白痴...

不過股票的收入真的不俗,
我買的都係大公司,
慢慢的有少少的進帳,
只要對錢銀不太執著,
不要太貪心,
依家個市升到痴左線,
最啱我呢d傻婆買少少,
搵少少買衫錢~

Tuesday, July 10, 2007

Mango

今日 lunch 後經過 pp,
mango 減價,
兜個圈又買左條連身裙~
竟然買xxs, 即係美國碼2號!!!
(條裙係有修腰的A字裙, 唔係水桶款架)
咁離奇的事一定要記低佢!

我呢d身形都買加加細,
麥同學應該買唔到嘢~

Monday, July 9, 2007

一期一會

昨日跟友人觀賞音樂劇 '一期一會'.
內容是關於一群大學生生活中的六個小故事.
六個小故事關於愛情, 友情, 親情.

很好, 年青人便是這樣的簡單直接.
嘻嘻哈哈的,
日過日的,
遇事時手足無措的,
經不起考驗的.

我想起我的大學生活.
基本上我沒有太多的大學回憶.
因為我太鐘意走堂, 太唔鐘意返學.
我連課室的位置也未有記得清楚.
同學的名字也忘記了.

不要為結婚而結婚

女孩子到了一定的年紀會很希望結婚, 生小孩.
有屬於自己的家庭.
特別是當你身邊的朋友一個一個的成家立室.

當你想結婚,
是因為你很愛一個人,
很想與她白頭偕老,
很想照顧她一輩子.
而唔係因為她年華老去,
唔係因為她跟你拍拖了一段時間而要給她一個名份.

如果她是愛你的,
關係是長久的.
佢唔會以分手作為藉口而迫你結婚.

一個人只會在有猶豫的時候才會相信鬼神.
你有足夠的愛同信心, 你唔需要別人的認同.
你會勇往直前, 別人的反對并未會影響你的決定.

相反,
你尋求家人的認同,
或者求神問卜.
我認為你愛得不夠,
或你未有足夠結婚的理由,
又或者你心理準備未建立完成.

假如她愛你, 就算不結婚, 她也不會離開你,
假如你愛她, 那你便好好想清楚何時才是結婚的好時機.

今日, 我覺得你未 ready.
兄妹是一輩子的.
婚姻也是一輩子的.
希望你作出一個正確的決定.

Friday, July 6, 2007

Shopping 精

我是一個 Shopping 精.
稍為認識我的人都知我最鐘意買嘢.
買一件似值 500 但實則只係俾 100 嘅就最開心.

以前係澳洲讀書,
冇衫買我都要去 supermarket 買個橙先返屋企.

基本上我日日行街, 日日買嘢.
成日都唔明白總係買極都有得買!!
個商場日日都行, 但日日都買到嘢.
邊有咁多地方擺?
邊有搵咁多$找數?

成日話斬手指, 但轉個頭又去買過!!
其實買嘢先至係我的正職~!

怪叔叔

我公司有很多怪叔叔,
每人也有不同的特徵,
包括我老闆...

我老闆係出名的工作狂,
晨咁早返工, 夜晚成九點至走,
仲要佢唔係行行企企嗰隻,
佢真係不停咁做架.
佢最特別係鐘意周圍搵嘢食,
有d零食放係枱面到朝早就會唔見咗...
好明顯係午夜出黎搵食!

坐我後面嗰個有一家四口,
老婆又做銀行, 有仔有女, 理應生活安穩,
但唔知點解好鬼孤寒.....,
又貪小便宜, 好鬼失禮.
上次去飲, 佢可以一個人飲三杯嘢!!
又橙汁, 又紅酒, 又汽水!!!
然後公司benefit有生果攞 (好似監獄.....),
佢又攞番屋企俾屋企人食!!.....

有一個好靚仔, 係熨直版馬英九,
四十幾歲仲皮光肉滑! 好過好多女人架!
但係就有潔癖, 而且非常貪靚,
得閒會搽 hand cream 同潤唇膏......

有個成日講咸濕故仔 (但係好錫個女).
有個日日 lunch 都食大家樂 (約佢食 lunch 又扭扭擰擰).
有個得閒無事成日 'un' 腳 ('un' 到隔離張枱都郁埋).
有個搵好多錢但成日扮窮 (留番 d錢搵伴遊).

well.....
日日對住 d怪人, 我覺得身心有 d唔平衡囉......

Wednesday, July 4, 2007

台北篇 - 手信

鳳梨酥一定要買!!
有兩個最出名的係港記同維格.
好方便, 係酒店已可以預訂兼送貨,
不過如果要試食就要去鋪頭啦.
試食非常大方, 任食!
我個人偏愛港記.

除左鳳梨酥,
最愛美式芝士條, 雖然幾貴....
較特別有總統餅 - 老婆餅面, 綠茶餡加蛋黃同年糕.
秦皇酥 - 綠茶餡的鳳梨酥
蜂蜜蛋糕 - 好蜂蜜味, 我覺得好過義美.

港記酥皇店
台北市漢中街6號之2
Tel: 886-2-23895587 / 23751967
www.twkongkee.com

台北篇 - 行程

3 day tour :-

Day 1
7.30 到機場 (因好友S 的妹妹已幫我們 online check-in 兼劃位, 所以只需一小時前到達機場)
8.35 CX460 飛往台北, 1 小時 20 分鐘機程, 出閘攞行李搭 45分鐘巴士
12.00 萬事達酒店check-in (間酒店位於西門町, 新淨, 整潔, 服務生有禮, 推介!)
14.00 阿宗麵線 (唔識欣賞, 但好友S勁鍾意)
15.00 鼎泰豐本店 (水準的保證)
16.00 忠孝復興行 Sogo (d 衫幾娘囉.... 不過有香港冇的 Lowrys Farm)
18.00 貓空 (未有纜車, 夜景又一般, 去一次都無所謂)
21.00 饒河夜市 (好似廟街, 但我好眼瞓啦.....)

Day 2
7.30 搭台北車站火車去瑞芳, 再轉車去十分睇十分瀑布 (行吊橋同路軌幾得意, 推介行程! 但十個曬. 反而瀑布一般)
11.30 好友S去九份, 我返台北去五分埔買衫 (地方幾大, 但得幾間啱睇, 不過都買左幾件衫)
16.00 謝謝魷魚羹 (正!)
16.30 酒店小休兼集合 (電視綜藝節目好好睇, 又多選擇~)
18.00 西門町鴨肉扁 (完全唔知點解出名, 都唔好食)
19.00 淡水 (不停小食再小食)

Day 3
無行程
西門町+誠品+冰館+鼎泰豐+金石堂
19.20 CX401 返香港
再去九龍城食清真牛肉館

萬事達酒店 Wonstar Hotel
108 台北市萬華區中華路1段82號
Tel: 886-2-2382-0889
http://www.wonstar.com.tw/

鼎泰豐本店
台北市信義路2段194號
Tel: 886-2-23218928

謝謝魷魚羹
108台北市萬華區漢中街4號

鴨肉扁
台北市武昌街二段2號

冰館
台北市永康街15號
Tel: 886-2-23948279

台北篇 - 的士奇遇

出黎玩唔爭在少少錢.
雖然捷運好方便, 但係我地豪華團黎架!
好多時唔想行去車站, 我大懶蟲都係選擇打的!

可能的士司機聽出我地廣東音普通話,
每次司機哥哥都會問我地係邊度黎?
知道香港人之後一定話你地香港人好靚女!
well.... 台灣人真的很友善... 呵呵呵呵.....

而且很風趣......

有個司機哥哥完成開場白之後竟然話變魔術俾我地睇!!
(變魔術呀大佬?? 可唔可以小心駕駛??)
說時遲那時快, 佢已經攞咗三隻啤牌出黎.
然後佢單手揸車.....
由原本三隻K, 上揭下揭咁變左 J,Q,K....
(well...... 三歲細路都知啤牌上下節唔同樣啦.......)

佢仲未完, 佢再攞一個紅色小膠盒同一粒骰子.
叫我地選定一個數字向出然後蓋上, 佢搖一搖就會估到答案.
仲話如果估唔中呢程車就唔洗錢兼送左佢自己俾我地, 為奴為婢, 24小時 on call, 想點都得....
(救命呀... 好驚呀... 你千祈唔好估唔中呀......)
好彩最後都估啱......

(點解咁耐都未到.....)
個哥哥完全停唔到...
佢仲問, 你地幾時走? (一陣間, 三個鐘頭後...)
真可惜, 下次你地再黎, 我變白鴿俾你地睇!
(變白鴿!?!?)
不過我隻白鴿依家太肥.... 我幫佢減緊肥...
以前一日俾佢食兩餐, 依家得番一餐....
太肥會穿崩...
家吓變左出黎收唔番入去.....!!

well....
多謝司機哥哥十分鐘的娛樂~

無帶個腦出街

自悠行最舒服的莫過於唔使無帶個腦出街~

冇 schedule, 冇目的地, 冇所謂.
遊吓魂咁, 十吓十吓又一日,
行錯路當睇多d,
試吓又食吓, 唔需要有儀態.
d人又唔識我, 又唔使注意儀容.

小休幾天, 人生又變得美好多了~
Blog Widget by LinkWithin